தரைமட்டமாக இடிந்து விழுந்த 7 மாடி கட்டிடம்

கம்போடியா நாட்டின் தென்மேற்கு பகுதியில் கட்டிடம் இடிந்து தரைமட்டமான விபத்தில் பலியானோர் எண்ணிக்கை 18 ஆக அதிகரித்துள்ளது. தென்கிழக்கு ஆசிய கண்டத்தில் அமைந்துள்ள நாடு கம்போடியா. இந்நாட்டின் சிஹானோக்வில்லி நகரில், சீனாவை சேர்ந்த ஒரு நிறுவனம் 7 மாடிகளைக் கொண்ட புதிய கட்டிடத்தை உருவாக்கி வருகிறது.

இந்த கட்டிடத்தின் 80 சதவித பணி நிறைவடைந்த நிலையில், தொழிலாளர்கள் நேற்று வழக்கம்போல் வேலையில் ஈடுபட்டிருந்தனர். அப்போது எதிர்பாராத விதமாக மொத்த கட்டிடமும் சில நொடிகளில் நொறுங்கி விழுந்து தரைமட்டமானது.

இந்த கோர விபத்தில் வேலையில் ஈடுபட்டிருந்த சுமார் 50 தொழிலாளர்கள் சிக்கினர். பின்னர் இதுகுறித்து தகவல் அறிந்து சம்பவ இடத்திற்கு விரைந்த தீயணைப்பு படையினர், இடிபாடுகளுக்குள் சிக்கியவர்களை மீட்டனர். அவர்களில் 20க்கும் அதிகமானவர்கள் படுகாயங்களுடன் மீட்கப்பட்டனர். மேலும் 7 பேரின் உடல்கள் மீட்கப்பட்டதாக, உள்ளூர் ஊடகங்கள் முதல் கட்டமாக செய்தி வெளியிட்டன.

இந்நிலையில், மருத்துவமனையில் சிகிச்சை பெற்று வந்த காயமடைந்தவர்களில், சிலர் சிகிச்சை பலனின்றி உயிரிழந்தனர். இதன்மூலம் பலியானவர்களின் எண்ணிக்கை 18 ஆக உயர்ந்துள்ளது. மேலும், 24 பேர் சிகிச்சை பெற்று வருகின்றனர்.

கவனக்குறைவு காரணமாகவே இந்த துயர சம்பவம் நடந்துள்ளதாகவும், பாதிக்கப்பட்டவர்களின் குடும்பத்திற்கு தலா 10 ஆயிரம் டொலர்கள் இழப்பீட்டை அரசு வழங்கும் என்றும், அந்நாட்டு பிரதமர் அறிவித்துள்ளார்.

கொலை செய்யப்பட்ட மனைவி

பிரித்தானியாவில் மனைவியை கொடூரமாக கொலை செய்த நபருக்கு 20 ஆண்டுகள் சிறை தண்டனை விதிக்கப்பட்டுள்ளது. தலைநகரான லண்டனின் Ilford பகுதியைச் சேர்ந்தவர் Muhammad Javed. 59 வயதாகும் இவருக்கு Saeeda Hussain என்ற 54 வயது மனைவி உள்ளார். இந்த தம்பதிக்கு ஐந்து பிள்ளைகள் உள்ளனர்.

இந்நிலையில் கடந்த ஆண்டு 13-ஆம் திகதி பிப்ரவரி மாதம் Muhammad Javed தன்னுடைய மனைவியை கொலை செய்துவிட்டேன் என்று கூறி காவல்நிலையத்தில் சரணடைந்தார். பாகிஸ்தான் விமானப்படையில் 20 ஆண்டுகள் பணியாற்றிய இவர் அதன் பின் பிரித்தானியாவிற்கு குடி பெயர்ந்துள்ளார்.

இதையடுத்து இவரை கைது செய்த பொலிசார், அவரிடம் தொடர்ந்து விசாரணை நடத்தினர். இதற்கிடையில் இது தொடர்பான வழக்கு விசாரணையும் நீதிமன்றத்தில் நடந்து வந்தது. Saeeda Hussain சின்ன டெய்லரிங் தொழில் செய்து வந்துள்ளார். அப்போது அவரிடம் வரும் வாடிக்கையாளர்களிடம் இவர் சகஜமாக பேசி பழகியுள்ளார். இதைக் கண்ட Muhammad Javed-வுக்கு மனைவி மீது சந்தேகம் ஏற்பட, தொடர்ந்து அவரை பாலியல் ரீதியாக மற்றும் உடல் ரீதியாக தொடர்ந்து துன்புறுத்தி வந்துள்ளார்.

திருமணம் ஆன 30 ஆண்டுகளில் பல ஆண்டுகள் அவர் இந்த கொடுமையை சந்தித்து வந்துள்ளார். இது குறித்து பொலிசாரிடம் புகார் அளித்தால், கணவர் நாடு கடத்தப்படலாம், இது அவமானமாக இருக்கும் என்று கருதி அவர் கூறாமல் இருந்து வந்துள்ளார்.

அப்படி ஒரு கட்டத்தில் இருவரும் ஒரே அறையில் தூங்கும் போது, தன் மனைவி Saeeda Hussain-னின் முதுகில் ஏதோ ஒன்று ஒரு வித அடையாளத்தை கண்டுள்ளார். இதனால் சந்தேகத்தின் உச்சிக்கு சென்ற அவர் மனைவியுடன் வாக்குவாதத்தில் ஈடுபட்டு சுத்தியலால் அவரை தாக்கி கத்தியால் குத்தி கொடூரமாக கொலை செய்துள்ளார்.

அதன் பின் சம்பவ தினத்தன்று மாலை 6 மணிக்கு காவல்நிலையத்தில் மனைவியை கொலை செய்துவிட்டேன் என்று கூறி சரணடைந்துள்ளார். இந்த சம்பவம் குறித்து வழக்கு விசாரணை நீதிமன்றத்தில் நடந்த போது, அவரது மகள் Sidra Hussain கூறுகையில், என்னுடைய அம்மா நல்லவர், என் அப்பா தான் அவரை கொலை செய்துவிட்டார். எங்களுடைய குடும்பத்திற்காகவே என் அம்மா வாழ்ந்து வந்தார் என்று கண்ணீருடன் கூறியுள்ளார். இதையடுத்து நீதிபதி Muhammad Javed-வுக்கு 20 ஆண்டுகள் சிறை தண்டனை வழங்கி தீர்ப்பளித்தார்.

அர்ஜெண்டினாவைச் சேர்ந்த பெண் ஒருவர் விவாகரத்து வாங்கிய நிலையில், அவர் தன்னுடைய முன்னாள் மனைவிக்கு 145,000 டொலர் செலுத்த வேண்டும் என்று உத்தரவிட்டுள்ளது.

அர்ஜெண்டினாவின் Comodoro Rivadavia பகுதியைச் சேர்ந்த தம்பதி கடந்த 1982-ஆம் ஆண்டு திருமணம் செய்துள்ளனர்.

சுமார் 30 ஆண்டு காலம் மகிழ்ச்சியாக சென்ற இவர்கள் வாழ்க்கையில், கடந்த 2011-ஆம் ஆண்டு விவகாரத்திற்கு முடிவு செய்துள்ளனர். ஆனால் என்ன காரணத்திற்காக விவகரத்து என்ற தகவல் இல்லை.

இத்தனை ஆண்டுகள் மனைவி எங்கும் வேலைக்கு செல்லாமல் தொடர்ந்து வீட்டு வேலை செய்து வந்ததால், அவர் தற்போது வயதான நிலையில்(60 வயது) உள்ளதால், இனி எங்கும் வேலைக்கு செல்ல முடியாது, பிள்ளைகளும் அவருடன் செல்ல விரும்பாததால் அவர்களுக்கு தேவையான செலவு மற்றும் திருமணம் ஆகியவற்றின் அடிப்படையில் கொண்டு நீதிமன்றத்தில் வழக்கு தொடர்ந்துள்ளார்.

வழக்கை விசாரித்த நீதிமன்றம் விவாகரத்து வாங்கிய போதும், மனைவியின் வயதை கருத்தில் கொண்டும், அவரின் எதிர்காலம் மற்றும் பொருளாதார தேவைகளின் அடிப்படையில் அவர் 145,000 டொலர் அவர் கொடுக்க வேண்டும் என்று தெரிவித்துள்ளது.

இளம்பெண் கொலை

கனடாவில் வாழ்ந்து வந்த இந்திய இளம்பெண் கொலை செய்யப்பட்ட வழக்கில், கொலையாளிக்கு உதவியதாக மேலும் இருவர் கைது செய்யப்பட்டுள்ளனர்.

கனடாவின் சர்ரே பகுதியில் வசித்து வந்த பஞ்சாபைச் சேர்ந்த பவ்கிரண் தேசி (19) கடந்த 2017ஆம் ஆண்டு ஆகஸ்டு மாதம் 1 ஆம் திகதி வெளியே சென்று வருவதாக தனது பெற்றோரிடம் கூறி விட்டு சென்றவர் அதற்குப்பின் வீடு திரும்பவில்லை.

பின்னர் எரிந்த நிலையில் இருந்த அவரது காருக்குள் உயிரற்ற நிலையில் தேசியின் உடல் கண்டு பிடிக்கப்பட்டது. அவரது உடலில் இருந்த காயங்களின் அடிப்படையில், பொலிசார், தேசி கொலை செய்யப்பட்டிருக்கலாம் என்ற முடிவுக்கு வந்தனர்.

இந்நிலையில் இந்த கொலை தொடர்பாக மே மாதம் 10ஆம் திகதி ஹர்ஜோத் சிங் டியோ (21) என்பவர் பொலிசாரிடம் சிக்கினார். ஹர்ஜோத் சிங் டியோவும் பவ்கிரண் தேசியும் காதலித்ததாக கூறப்படுகிறது. தொடர்ந்து பொலிசார் மேற்கொண்ட விசாரணையில், ஹர்ஜோத் சிங் டியோவின் தாயாகிய Manjit Kaur Deo (53), கிரண் தேசியின் கொலைக்கு உதவியதாக கைது செய்யப்பட்டார்.

பின்னர் ஹர்ஜோத் சிங் டியோவின் சகோதரியும் Manjit Kaur Deoவின் மகளுமான Inderdeep Kaur Deo, (23) என்பவரும் கைது செய்யப்பட்டார். அதன் பின்னரும் மேலும் சிலருக்கு இந்த சம்பவத்துடன் தொடர்பு இருப்பது தங்களுக்கு தெரியும் என்றும், அவர்கள் தாங்களாகவே வந்து சரணடையுமாறும் பொலிசார் கோரியிருந்தனர்.

இந்நிலையில் மேலும் இருவர் சம்பவம் தொடர்பாக கைது செய்யப்பட்டுள்ள நிலையில், கைது செய்யப்பட்டவர்களின் எண்ணிக்கை ஐந்தாகியுள்ளதாக பொலிசார் தெரிவித்துள்ளனர்.

கைது செய்யப்பட்டுள்ளவர்களின் பெயர்கள் Gurvinder Singh Deo (25) மற்றும் Talwinder Singh Khun Khun (22) என நீதிமன்ற ஆவணங்களிலிருந்து தெரியவந்துள்ளது. இந்த இருவர் மீதும், கொலைக்குப் பின் கொலையாளிக்கு உதவியது மற்றும் இறந்த உடல் ஒன்றை தகாத முறையில் நடத்தியது ஆகிய குற்றங்கள் சாட்டப்பட்டுள்ளன.

இதற்கிடையில், பல ஆண்டுகளாக டயாலிசிஸ் சிகிச்சை, மற்றும் பல அறுவை சிகிச்சைகளுக்கு உள்ளான தேசிக்கு, இறப்பதற்கு முன் சிறுநீரக மாற்று அறுவை சிகிச்சை நடந்துள்ளதாக தெரியவந்துள்ளது.

குழந்தை பெற்றெடுத்த மணப்பெண்

அமெரிக்காவின் நியூஜெர்ஸியை மாகாணத்தை சேர்ந்த தம்பதிக்கு திருமணம் முடிந்த 30 வினாடிகளிலேயே குழந்தை பிறந்துள்ளது. அமெரிக்காவில் “இது எங்கள் கதை என்று எங்களால் நம்ப முடியவில்லை” என்னும் தலைப்பின் கீழ் ஒவ்வொரு வாரமும் வெளியாகும் கதைகளில், இந்த வாரம், மைக்கேல் கல்லார்டோ மற்றும் மேரி மார்கரிடோண்டோ தம்பதியினர் தங்களுடைய வாழ்வில் நடந்த நிகழ்வினை பகிர்ந்துள்ளனர்.

நியூஜெர்ஸியை மாகாணத்தை சேர்ந்த மைக்கேல் கல்லார்டோ மற்றும் மேரி மார்கரிடோண்டோ என்கிற தம்பதியினர் தங்களுக்கு குழந்தை பிறப்பதற்கு முன்பே திருமணம் செய்துகொள்ளலாம் என முடிவு செய்துள்ளனர். ஆனால் மூன்று வாரத்திற்கும் முன்னதாகவே திடீரென மேரிக்கு நீர்க்குடம் உடைந்தது. உடனடியாக மேரி மருத்துவமனையில் அனுமதிக்கப்பட்டார்.

அங்கு குழந்தை பிறப்பதற்கு முன் திருமணம் செய்துகொள்ள வேண்டும் என தம்பதியினர் விரும்பியுள்ளனர். இதனை கேட்ட செவிலியர்கள் வேகமாக ஆளுக்கொரு திசையில் ஓடி, திருமணத்திற்கான வேலைகளில் ஈடுபட ஆரம்பித்தனர்.

பின்னர் திருமணம் முடிந்த உடனே மேரி அறுவை சிகிச்சை பிரிவிற்கு கொண்டு செல்லப்பட்டார். அடுத்த 30 வினாடிகளில் அவருக்கு மைக்கேல் என்கிற அழகிய குழந்தை பிறந்ததாக தெரிவித்துள்ளனர்.

130 ஆண்டுகளுக்கு பின்னர் ஏற்பட்ட துயரம்

சுவிட்சர்லாந்தின் போண்டோ கிராமத்தில் ஏற்பட்ட மிக மோசமான நிலச்சரிவானது அதிகாரிகளின் மெத்தனத்தால் ஏற்பட்டது என பாதிக்கப்பட்ட குடும்பத்தினர் சார்ப்பில் நீதிமன்றத்தில் முறையிடப்பட்டுள்ளது. குறித்த நிலச்சரிவில் சிக்கி ஜேர்மனி, ஆஸ்திரியா, சுவிஸ் நாட்டவர்கள் 8 பேர் கொல்லப்பட்டதுடன் ஏராளமான குடியிருப்புகள் இந்த பேரழிவில் சேதமடைந்துள்ளது.

கடந்த 2017 ஆம் ஆண்டு ஆகஸ்டு மாதம் நடந்த இந்த பேரழிவானது முன்னறிவிக்கப்படவில்லை எனவும், இதனால் மண்டல நிர்வாகத்தின் மெத்தனம் என எவரையும் குற்றஞ்சாட்ட முடியாது எனவும் Graubunden மண்டல நிர்வாகம் அறிவித்திருந்தது.

இந்த நிலையில் வெள்ளியன்று பாதிக்கப்பட்ட குடும்பத்தினரின் சார்பாக வழக்கறிஞர் ஒருவர், போண்டோ கிராமத்தில் ஏற்பட்ட பேரழிவானது முன்னெச்சரிக்கை விடுத்தும், மண்டல நிர்வாகத்தால் எந்த பாதுகாப்பு நடவடிக்கைகளும் முன்னெடுக்கப்படவில்லை என ஆதாரத்துடன் முறையிட்டுள்ளார்.

நிலச்சரிவு ஏற்படுவதற்கு 2 வாரங்கள் முன்னரே அதற்கான அறிகுறிகள் Piz Cengalo மலைப்பகுதியில் தென்பட்டதாகவும், அதனைத் தொடர்ந்து, ஒரு வாரத்தில் அல்லது 30 நாட்களில் மிகப்பெரிய நிலச்சரிவு ஏற்பட வாய்ப்பு உள்ளமையும் நிபுணர்களால் கணிக்கப்பட்டதையும் அவர் சுட்டிக்காட்டியுள்ளார்.

ஆனால் மண்டல நிர்வாகம் அதை கருத்தில் கொள்ளவில்லை எனவும், உரிய பாதுகாப்பு நடவடிக்கைகள் மேற்கொள்ள தவறியது எனவும் அவர் குற்றஞ்சாட்டியுள்ளார். கிழக்கு சுவிட்சர்லாந்தில் உள்ள போண்டோ கிராமத்தில் கடந்த 2017 ஆம் ஆண்டு ஆகஸ்டு மாதம் Piz Cengalo மலைப்பகுதியில் இருந்து சுமார் மூன்று மில்லியன் கன மீற்றர் அளவுக்கு பாறை கீழே விழுந்தது.

இது அப்பகுதியில் பெரும் நிலச்சரிவை ஏற்படுத்தியது. சுவிஸ் வரலாற்றில் கடந்த 130 ஆண்டுகளில் நடந்த மிக மோசமான நிலச்சரிவு இது எனவும் நிபுணர்களால் பதிவு செய்யப்பட்டது. வெளிநாட்டவர்கள் உள்ளிட்ட 8 பேர் கொல்லப்பட்டதுடன், சுமார் 500,000 கன மீற்றர் அளவுக்கு இடிபாடுகளும் மண்ணும் கீழே பாய்ந்தன.

அவுஸ்திரேலிய தாயார் ஒருவர், தமது கணவர் இரு பிள்ளைகளுடன் தம்மையும் தவிக்கவிட்டு சென்ற காரணத்தை வெளிப்படுத்தியது பலரையும் அதிர்ச்சியில் ஆழ்த்தியுள்ளது.

அவுஸ்திரேலியாவின் பெர்த் பகுதியை சேர்ந்தவர் காமிலே. மார்பக புற்றுநோயில் இருந்து மீண்ட இவர், தமது போராட்டத்தை தனியார் செய்தி ஊடகம் ஒன்றிற்கு பகிர்ந்துள்ளார்.

அதில், தமது இரண்டாவது குழந்தையை பெற்றெடுத்த சில நாட்களில், சந்தேகத்தின் பேரில் பரிசோதனை மேற்கொண்ட போது, தமக்கு மார்பக புற்றுநோய் இருப்பதை மருத்துவர்கள் உறுதி செய்ததாக தெரிவித்துள்ளார்.

2016 ஆம் ஆண்டு மார்ச் மாதம் தாம் மேற்கொண்ட சோதனைகளில் இது தெரியவந்தது என கூறும் காமிலே,

திருமணம் முடிந்து பல ஆண்டுகள் குழந்தை இல்லாத நிலையில், நீண்ட 3 ஆண்டுகள் செயற்கை கருவுறுதலுக்காக முயற்சித்து தோல்வி கண்டதாக தெரிவித்துள்ளார்.

ஆனால் அதன் பின்னர் இருமுறை இயற்கையாகவே கருவுற்று தற்போது இரு பிள்ளைகளையும் பெற்றெடுத்துள்ளதாக கூறும் காமிலே,

தமது மகளுக்கு பாலூட்டும் போதே, மார்பில் கட்டி இருப்பதாக உணர்ந்துள்ளார். ஆனால் அதை அவர் கருத்தில் கொள்ளவில்லை.

இந்த நிலையில் சுமார் 10 மாதங்களுக்கு பின்னர், தமது இரண்டாவது மகனை பிரசவிப்பதற்கு ஒரு வாரம் முன்னர், இன்னொரு கட்டி இருப்பதாக கண்டறிந்துள்ளார் காமிலே.

இதை தமது செவிலியரிடம் தெரிவித்து மருத்துவ சோதனைக்கும் தம்மை உட்படுத்தியுள்ளார்.

இது ஒருபுறமிருக்க, தமது கணவரிடம் இருந்து எவ்வித ஆதரவும் தமக்கு கிடைப்பதில்லை என்ற நிலை ஏற்பட்டது அவருக்கு.

மட்டுமின்றி, மருத்துவமனைக்கு அழைத்துச் செல்வதையே அவர் மறுத்துள்ளார். மேலும், இது வெறும் மார்பக புற்றுநோய் தானே என ஏளனமாக பதிலளித்துள்ளார்.

இதனையடுத்து காமிலே கணவர் தமது நிறுவனத்திலேயே அதிக நேரம் செலவிட துவங்கியுள்ளார். காமிலே, புற்றுநோய்க்கான சிகிச்சையுடன், இரு பிள்ளைகளையும் கவனிக்கும் பொறுக்கு தள்ளப்பட்டார்.

மட்டுமின்றி, கவலை, பதட்டம் காரணமாக சிறப்பு சிகிச்சையும் எடுத்துக் கொள்ளவேண்டிய நிலைக்கு தள்ளப்பட்டார்.

இந்த காலகட்டத்தில், கடவுள் துணைபோன்று, அவரது தோழிகளும் உறவினர்களும் வந்து உதவி செய்துள்ளனர்.

மார்பக புற்றுநோயில் இருந்து மீண்ட காமிலே தற்போது, தமது நிலை குறித்து மொத்தமும் தெரிந்த ஒரு நபரை திருமணம் செய்துகொள்ளும் முடிவில் இருக்கிறார்.