சென்னை சேப்பாக்கம் மைதானம் தொடர்பான வழக்கில் தமிழ்நாடு கிரிக்கெட் சங்கத்துக்கு எதிராக கிரிமினல் வழக்கு பதிவு செய்ய சென்னை பொலீஸூக்கு உயர்நீதிமன்றம் உத்தரவிட்டுள்ளது.

ஐபிஎல் போட்டிகளை நடத்துவதற்கான மைதானத்தில் புதிய பார்வையாளர் அரங்குகள் கட்டப்பட்டன. ஆனால் இந்த புதிய அரங்குகள் விவகாரத்தில் உண்மைக்குப் புறம்பான தகவல்களை அரசுக்குத் தெரிவித்து வெவ்வேறு துறைகளிடம் தமிழ்நாடு கிரிக்கெட் சங்கம் அனுமதி பெற்றிருக்கிறது.

இதன் மூலம் பல்லாயிரக்கணக்கான ரசிகர்களின் உயிருடன் விளையாடி இருக்கிறது என்று ஜபமணி ஜனதா கட்சியின் பொதுச் செயலர் மோகன்ராஜ் சென்னை உயர்நீதிமன்றத்தில் வழக்கு தொடர்ந்திருந்தார்.

மேலும் தமிழ்நாடு கிரிக்கெட் சங்கத்துக்கு எதிராக நடவடிக்கை எடுக்க வேண்டும் என்று சென்னை மாநகர பொலீஸிடம் 2011ம் ஆண்டு புகார் மனு தாம் அளித்ததாகவும் அதன் மீதும் எந்த ஒரு நடவடிக்கையும் மேற்கொள்ளப்படவில்லை என்றும் அவர் தமது மனுவில் கூறியிருந்தார்.

இந்த மனுவை விசாரித்த நீதிபதி வாசுகி தமிழ்நாடு கிரிக்கெட் சங்க நிர்வாகிகள் மீது கிரிமினல் வழக்குகள் பதிவு செய்ய உத்தரவிட்டார்.

ஐ.பி.எல் சூதாட்டத்துக்குப் பின், கிரிக்கெட் மீதான நம்பகத்தன்மையை மீட்பது குறித்து வெளியிட்ட கருத்துக்கள் ஊடகத்தினால் தவறாக புரிந்து கொள்ளப்பட்டதாக டிராவிட் வருத்தம் தெரிவித்தார்.

இந்திய அணியின் முன்னாள் அணித்தலைவரான ராகுல் டிராவிட் ஐ.பி.எல் தொடரில் ராஜஸ்தான் அணியின் அணித்தலைவராக உள்ளார். இத்தொடரில் நடந்த சூதாட்டம் தொடர்பாக, டிராவிட் அணியை சேர்ந்த ஸ்ரீசாந்த், சண்டிலா, அங்கித் சவான் ஆகியோர் சூதாட்டத்தில் ஈடுபட்டு பிடிபட்டனர்.

இது குறித்து டிராவிட் கூறுகையில் ஐ.பி.எல் தொடர் சூதாட்டத்தினால் ஏற்பட்டுள்ள சூழல் கிரிக்கெட் வளர்ச்சிக்கு உதவாது. இதனால் கிரிக்கெட் வீரர்களின் மீது வைத்துள்ள மரியாதை, அன்பு, மதிப்பு ஆகியவை குறைந்துவிடும்.

இப்போட்டியின் மீது ரசிகர்கள் இழந்த நம்பிக்கையை மீண்டும் கொண்டு வர வேண்டும். இதற்கு வாரியம் அல்லது அரசு என்று யாராக இருந்தாலும் சரி பாகுபாடு பாராமல் உதவ வேண்டும் என்றார்.

தவறான கருத்து:

இந்த பேட்டி குறித்து டிராவிட் தனது டுவிட்டர் இணையதளத்தில் வெளியிட்ட செய்தியில், நான் தெரிவித்த கருத்துக்களை சில ஊடகங்கள் தவறான பொருள்பட வெளியிட்டது ஏமாற்றம் தருகிறது.

நான் குறிப்பிட்ட நம்பகத்தன்மை குறித்து பல்வேறு குழப்பங்கள் ஏற்பட்டுள்ளது. எனது முழுமையான பேட்டி இன்று வெளியாகிறது. அதுவரை எல்லோரும் பொறுத்திருங்கள் என்று தெரிவித்துள்ளார்.

ஒருநாள் சர்வதேசப் போட்டிகளில் துடுப்பாட்ட வீரர்களுக்கான தரப்படுத்தலில் இலங்கை அணியின் குமார் சங்கக்கார மூன்றாவது இடத்தைப் பெற்றுக் கொண்டுள்ளார்.

தென்னாபிரிக்காவிற்கெதிரான ஒருநாள் சர்வதேசப் போட்டித் தொடரில் மிகச்சிறப்பான துடுப்பாட்டத்தை வெளிப்படுத்தியதையடுத்தே குமார் சங்கக்கார மூன்றாவது இடத்தைப் பெற்றுக் கொண்டுள்ளார்.

தென்னாபிரிக்காவிற்கெதிரான 5 போட்டிகளில் துடுப்பெடுத்தாடிய குமார் சங்கக்கார 93 என்ற சராசரியில், 107.51 என்ற அடித்தாடும் வேகத்தில் 372 ஓட்டங்களைக் குவித்து அத்தொடரில் நாயகனாகத் தெரிவாகியிருந்தார்.

இத்தொடர் ஆரம்பிக்கும் போது 776 புள்ளிகளுடன் 5ஆவது இடத்தில் காணப்பட்ட குமார் சங்கக்கார, தனது கிரிக்கெட் வாழ்வில் பெற்ற அதிக புள்ளிகளான 829 புள்ளிகளைப் பெற்று 3ஆவது இடத்திற்கு முன்னேறியுள்ளார்.

பந்துவீச்சாளர்களுக்கான தரப்படுத்தலில் முதலிடத்தில் காணப்பட்ட சுனில் நரைனோடு இணைந்து ரவீந்திர ஜடேஜாவும் முதலிடத்தைப் பெற்றுள்ளார். இலங்கையின் ரங்கன ஹேரத் 11ஆவது இடத்திலிருந்து 4ஆவது இடத்திற்கு முன்னேறியுள்ளார்.

சகலதுறை வீரர்களுக்கான தரப்படுத்தலில் இலங்கையின் திலகரட்ண டில்ஷான் 4ஆவது இடத்திலும், அஞ்சலோ மத்தியூஸ் 6ஆவது இடத்திலும் காணப்படுகின்றனர். முதலிடத்தில் ஷகிப் அல் ஹசன் காணப்படுகிறார்..