தற்கொலை செய்த பெண்..

கர்நாடக மாநிலத்தை சேர்ந்த பெண் ஒருவர் வீடியோ வெளியிட்டு தற்கொலை செய்துகொண்டுள்ள சம்பவம் பரபரப்பை ஏற்படுத்தியுள்ளது. பெங்களூருவை சேர்ந்த சுப்பிரமணி – மஞ்சுளா (36) தம்பதியினர் தேவானந்தா பகுதியில் வாடகைக்கு வீடு எடுத்து தங்கி வருகின்றனர்.

கடத்த சில தினங்களுக்கு முன் அந்த வீட்டின் உரிமையாளரான சோமண்ணா, வீட்டை வேறு ஒருவருக்கு குத்தைகைக்கு விட திட்டமிட்டுள்ளதால், காலி செய்யுமாறு கூறியுள்ளார். அந்த பேச்சு வார்த்தை தோல்வியடைந்ததை அடுத்து, மஞ்சுளா குடும்பத்தாருக்கும் சோமண்ணா குடும்பத்தாருக்கும் அடிதடி சண்டை ஏற்பட்டுள்ளது. உடனே மஞ்சுளா பொலிஸ் நிலையம் சென்று புகார் கொடுத்துள்ளார்.

அங்கு இரு குடும்பத்தாரையும் அழைத்து வைத்து பொலிஸார் சமாதானம் செய்து அனுப்பியுள்ளனர். வீட்டிற்கு வந்த சில மணி நேரங்களில் மீண்டும் சண்டை துவங்கியுள்ளது. இதில் காயமடைந்த தன்னுடைய கணவரை மருத்துவமனையில் அனுமதித்த மஞ்சுளா, வீடு திரும்பியதும் தூக்குபோட்டு தற்கொலை செய்துகொண்டுள்ளார்.

இந்த சம்பவம் அறிந்து வந்த பொலிஸார், மஞ்சுளாவின் உடலை கைப்பற்றி பிரேத பரிசோதனைக்கு அனுப்பி வைத்தனர். பின்னர் மேற்கொள்ளப்பட்ட சோதனையில், தற்கொலைக்கு முன் அவர் பேசியிருக்கும் வீடியோ கைப்பற்றப்பட்டது.

அந்த வீடியோவில், என் மரணத்திற்கு பிந்து, கீதா மற்றும் சோமன்னா ஆகிய மூன்று பேர் காரணம். அவர்கள் என் வாழ்க்கையை நரகமாக்கியிருந்தார்கள். எனது தாலியை கூட பறித்து துன்புறுத்தினார்கள். நாங்கள் காவல் நிலையத்திற்குச் சென்றபோது, ​​பொலிஸாரின் முன் வைத்தே எங்களை தாக்கினார்கள்.

ஆனால் அவர்கள் ஒரு வார்த்தை கூட என்னவென்று கேட்கவில்லை. என் கணவரை மருத்துவமனையில் அனுமதித்துள்ளேன். இப்பொழுது நானும் தூக்கில் தொங்க போகிறேன். தயவு செய்து அவர்கள் மூன்றுபேரையும் விட்டுவிடாதீர்கள் என பதிவிட்டுள்ளார். இந்த சம்பவம் தொடர்பாக வழக்கு பதிவு செய்துள்ள பொலிஸார் தீவிர விசாரணை மேற்கொண்டு வருகின்றனர்.

ஆண் காவலர் மரணம்

இந்தியாவின் கேரள மாநிலத்தில் பெண் காவலரை எரித்துக் கொலை செய்துவிட்டு தற்கொலைக்கு முயன்ற ஆண் காவலர் மருத்துவமனையில் சிகிச்சை பலனின்றி மரணமடைந்துள்ளார்.

கேரள மாநிலம், மாவேலிக்கரா அருகே உள்ள வள்ளிக்குந்நு காவல் நிலையத்தில் சிவில் காவல் அதிகாரியாகப் பணிபுரிந்தவர் சௌமியா. ஆலுவா போக்குவரத்துக் காவலராக பணியாற்றி வந்தவர் அஜாஸ். இவர்கள் இருவரும் திருச்சூர் காவலர் பயிற்சியின்போதே நட்பாக பழகியுள்ளனர்.

மூன்று குழந்தைகளுக்குத் தாயான செளமியாவை திருமணம் செய்யும் ஆசையில் வேறு திருமணமே செய்யாமல் இருந்துள்ளார் அஜாஸ். மட்டுமின்றி செளமியாவின் பணத் தேவைகளுக்கு அஜாஸ் உதவியும் வந்துள்ளார். இந்த நிலையில் சுமார் ஒன்றேகால் லட்சம் ரூபாய் அஜாஸிடம் இருந்து செளமியா கடனாக பெற்றுள்ளார்.

அந்தப் பணத்தை செளமியா திருப்பிக் கொடுத்தபோது வாங்காமல் தன்னைத் திருமணம் செய்யும்படி வற்புறுத்தியுள்ளார் அஜாஸ். இந்த நிலையில், கடந்த 15 ஆம் திகதி தேர்வு ஒன்று எழுதிவிட்டு தனது பைக்கில் சென்ற செளமியாவை காரால் இடித்த அஜாஸ், பின்னர் அரிவாளால் வெட்டியதுடன், பெட்ரோல் ஊற்றி எரித்துக் கொலை செய்தார்.

உயிர் பயத்தில் அலறிய செளமியா பற்றிய நெருப்புடன் அஜாஸை கட்டி அணைத்துள்ளார். இதில் 50 சதவிகிதம் தீக்காயங்களுடன் ஆலப்புழா மருத்துவக்கல்லூரி மருத்துவமனையில் சிகிச்சைபெற்று வந்தார் அஜாஸ்.

அவரிடம் ஆலப்புழா மாஜிஸ்திரேட்டு வாக்குமூலம் பெற்றார். அப்போது தன்னை திருமணம் செய்துகொள்ளாததால் செளமியாவைக் கொலை செய்ததாக அஜாஸ் கூறியுள்ளார்.
இந்த நிலையில் சிறுநீரகம் இரண்டும் செயலிழந்த நிலையில் சிகிச்சை பலனின்றி இன்று மாலை அஜாஸ் மரணமடைந்துள்ளார்.

மனைவிக்கு நடந்த கொடூரம்

உத்திரபிரதேச மாநிலத்தில் கணவனை மரத்தில் கட்டி வைத்து அவரின் கண்முன்னே மனைவி துஸ்பிரயோகம் செய்யப்பட்ட வழக்கில் அதிரடி திருப்பமாக, சம்மந்தப்பட்ட பெண் பொய் புகார் கொடுத்திருப்பது தெரியவந்துள்ளது.

உத்திரபிரதேச மாநிலம் ராம்பூர் மாவட்டத்தை சேர்ந்த ஒரு தம்பதியினர் சாலையில் நடந்து சென்றிருந்த போது 4 பேர் கொண்ட கும்பலால் வழிமறித்து தாக்குதலுக்குளாகியுள்ளனர். மேலும் அந்த பெண்ணின் கணவரை மரத்தில் கட்டி வைத்து அடித்ததோடு, அவருடைய கண்முன்னே மனைவியை பலாத்காரம் செய்ததாக குற்றசாட்டு எழுந்தது.

ஜனவரி 11ம் திகதி இந்த சம்பவம் நடந்திருந்ததாலும், தம்பதியினர் பொலிஸ் நிலையத்தில் புகார் எதுவும் கொடுக்காமல் இருந்துள்ளனர். இதற்கிடையில் வீடியோ ஒன்று இணையத்தில் வைரலாக பரவியுள்ளது.

உடனே அந்த பெண் , நான்கு பேர் சேர்ந்து தன்னை பாலியல் பலாத்காரம் செய்துவிட்டதாக பொலிஸ் நிலையத்தில் புகார் கொடுத்தார். அதன்பேரில் வழக்கு பதிவு செய்த பொலிஸார் நான்கு இளைஞரை கைது செய்து விசாரணை மேற்கொண்டு வந்தனர்.

இந்த நிலையில் செய்தியாளர்களிடம் பேசிய உயரதிகாரி, இணையத்தில் பரவிய வீடியோவினை அந்த பெண் தான் வெளியிட்டு வைரலாக்கியுள்ளார் எனவும், அவர் துஸ்பிரயோகம் செய்யப்படவில்லை எனவும் தெரிவித்துள்ளார். மேலும் இந்த சம்பவம் குறித்து தொடர்ந்து விசாரணை மேற்கொள்ளப்பட்டு வருவதாகவும் கூறியுள்ளார்.

அதிர்ந்துபோன பொலிசார்

ஆந்திராவில் மனைவி மீது சந்தேகம் ஏற்பட்டு அவரின் தலையை துண்டித்து கையில் எடுத்துக்கொண்டு காவல் நிலையத்திற்கு வந்த நபரை பொலிசார் தொடர்ந்து விசாரித்து வருகின்றனர்.

ஆந்திர மாநிலம் சித்தூர் மாவட்டம் கலக்கடாவை சேர்ந்தவர் உசேன். இவரது மனைவி அம்மாஜியின் நடத்தை குறித்து உசேனுக்கு சந்தேகம் எழுந்ததால் இருவருக்கும் இடையே அடிக்கடி பிரச்சனை ஏற்பட்டுள்ளது.

இந்நிலையில் ஆத்திரத்தில் மனைவியின் கழுத்தை உசேன் அறுத்துள்ளார். துண்டிக்கப்பட்ட தலையை கையில் எடுத்துக்கொண்டு நேரடியாக காவல் நிலையத்திற்கு சென்று அங்கு நடந்த விவரங்களை கூறி சரணடைந்துள்ளார் உசேன்.

இதையடுத்து பொலிசார் சம்பவ இடத்திற்கு சென்று சடலத்தை கைப்பற்றி உடலை அரசு மருத்துவமனைக்கு பிரேத பரிசோதனைக்கு அனுப்பி வைத்தனர்.இச்சம்பவம் தொடர்பாக வழக்கு பதிவு செய்த பொலீசார் தீவிர விசாரணை மேற்கொண்டு வருகின்றனர்.

காதலர்கள்

தெலுங்கானா மாநிலத்தில் இளம்காதல் ஜோடி ரயில்தண்டவாளத்தில் தலையை கொடுத்து தற்கொலை செய்துகொண்டுள்ள சம்பவம் சோகத்தை ஏற்படுத்தியுள்ளது.

தெலுங்கானா மாநிலம் ஜோகுலம்பா காத்வால் மாவட்டத்தில் உள்ள ரயில் நிலையத்தின் தண்டவாளத்தில், இளம் காதல் ஜோடி தற்கொலை செய்துகொண்டதாக பொலிஸாருக்கு தகவல் கிடைத்தது.

அதன்பேரில் சம்பவ இடத்திற்கு வந்த பொலிஸார், இருவரின் உடல்களையும் மீட்டு பிரேத பரிசோதனைக்கு அனுப்பி வைத்தனர். இந்த சம்பவம் குறித்து விசாரணை மேற்கொண்ட பொலிஸார் செய்தியாளர்களிடம் பேசுகையில், உண்டவள்ளி மண்டல் கிராமத்தை சேர்ந்த லோகேஷ் மற்றும் கஸ்தூரி ஒருவரை ஒருவர் காதலித்து வந்துள்ளனர்.

இருவரும் வெவ்வேறு சமூகத்தை சேர்ந்தவர்கள் என்பதால் வீட்டில் பலத்த எதிர்ப்பு கிளம்பியுள்ளது. இதன்காரணமாகவே இருவரும் தற்கொலை செய்துகொண்டிருக்கலாம் என சந்தேகம் தெரிவித்துள்ளனர்.