ஜுலை முதலாம் திகதி முதல்..

நாடாளுமன்றத்தில் வைத்து அரசாங்க ஊழியர்களுக்கு மகிழ்ச்சியளிக்கும் வகையிலான தகவலொன்று வெளியிடப்பட்டுள்ளது. அந்த வகையில் அரசாங்க ஊழியர்களுக்கு வழங்கப்படுகின்ற வாழ்க்கை செலவு கொடுப்பனவு 2500 ரூபாவால் அதிகரிக்கப்படவுள்ளதாக தெரிவிக்கப்பட்டுள்ளது.

இந்த விடயத்தை நிதி அமைச்சர் மங்கள சமரவீர நேற்றைய தினம் நாடாளுமன்றத்தில் வைத்து தெரிவித்துள்ளார். இது தொடர்பில் அவர் மேலும் தெரிவிக்கையில், அரசாங்க ஊழியர்களின் சம்பளம் கடந்த ஐந்து வருட காலப் பகுதியில் இரண்டு மடங்காக அதிகரித்துள்ளது.

இந்த நிலையில் எதிர்வரும் ஜுலை முதலாம் திகதி முதல் அரசாங்க ஊழியர்களுக்கு வழங்கப்படுகின்ற வாழ்க்கை செலவு கொடுப்பனவு 2500 ரூபாவால் அதிகரிக்கப்படவுள்ளது என தெரிவித்துள்ளார். தற்போது இலங்கையில் அரசாங்க ஊழியர்களுக்கு 7800 ரூபா வாழ்க்கை செலவு கொடுப்பனவாக வழங்கப்பட்டு வருவதாகவும் அவர் மேலும் குறிப்பிட்டுள்ளார்.

தரிந்து தயாரத்ன

அண்மையில் விண்வெளிக்கு அனுப்பப்பட்ட ராவணா-1 என்ற செய்மதியை தயாரித்த பொறியியலாளர்கள் இருவர் தொடர்பில் நாடாளுமன்றத்தில் தகவல் வெளியிடப்பட்டுள்ளது. அதற்கமைய நாடாளுமன்றத்தில் கருத்து வெளியிட்ட நாடாளுமன்ற உறுப்பினர் விஜித ஹேரத்,

இந்த செய்மதியை அமைத்த தரிந்து தயாரத்ன என்ற இளைஞன் மிகவும் வறுமையில் பாதிக்கப்பட்டுள்ளார். அவர் வாழ்வதற்கு தகுதியான வீடு கூட இல்லை. தரிந்துவின் தந்தை சிறுநீரக நோயினால் பாதிக்கப்பட்டு உயிரிழந்துள்ளார்.

அமைச்சர் கிரிஎல்லவின் வீட்டை நிர்மாணிக்க 199 லட்சம் ரூபாய் செலவிட்டதாக நாடாளுமன்றத்தில் கூறப்பட்டது. எனினும் நாட்டிற்கு பெருமை தேடித்தந்த இளைஞனுக்கு எந்தவொரு உதவிகளும் செலவிடப்படவில்லை என அவர் மேலும் தெரிவித்துள்ளார்.

இலங்கையை சேர்ந்த இரு பொறியியலாளர்களால் ராவணா-1 தயாரிக்கப்பட்டது. இந்நிலையில் கடந்த திங்கட்கிழமை சர்வதேச விண்வெளி மையத்திலிருந்து விண்வெளி சுற்றுவட்டத்தில் ராவணா-1 செய்மதி சேர்க்கப்பட்டடிருந்தது. இலங்கையின் வரலாற்றில் முதன்முறையாக விண்வெளிக்கு செய்மதி அனுப்பப்பட்டுள்ளமை குறிப்பிடத்தக்கது.

இராணுவத்தினர் தேடுதல் நடவடிக்கை

கல்முனை தமிழ் மக்கள் வாழும் பகுதிகளில் நள்ளிரவில் ரயர் எரித்தவர்களை தேடி இராணுவத்தினர் தேடுதல் நடவடிக்கை ஒன்றை முன்னெடுத்துள்ளனர். இன்று (19) காலை நற்பிட்டிமுனை சந்தி கிட்டங்கி வீதி உள்ளடங்களாக பொதுக்கட்டடங்கள் தனியார் கல்வி நிலையங்கள் கடைகளில் குறித்த சோதனை நடவடிக்கை மேற்கொள்ளப்பட்டுள்ளது.

நள்ளிரவு வேளை நற்பிட்டிமுனை கிட்டங்கி வீதிகளில் திடிரென வந்த குழு ஒன்று ரயர்கள் மரக்கட்டைகளை வீதியின் குறுக்காக இட்டு தீயிட்டு தப்பி சென்றனர். இதனால் பொது போக்குவரத்து பாதிக்கப்பட்டிருந்ததுடன் அவசர அழைப்பின் பிரகாரம் அவ்விடத்திற்கு வந்த கல்முனை பொலிஸார் தீயை கட்டுப்பாட்டிற்கு கொண்டு வந்துள்ளனர்.

இச்செயற்பாட்டை மேற்கொண்டவர்கள் பொதுப்போக்குவரத்தை குழப்பும் நோக்குடன் செயற்பட்டுள்ளதுடன் பொலிசாரின் வருகையை அடுத்து அவ்விடத்தில் இருந்து தப்பி சென்றனர். இந்நிலையில் தப்பியவர்களை தேடி இராணுவம் பொலிஸார் சிசிடிவி காட்சிகளை வைத்து விசாரணை மேற்கொண்டு தேடி வருகின்றனர்.

மேலும் சம்பவம் நடைபெற்ற இடம் சாகும் வரையிலான உண்ணாவிரதப் போராட்டத்தை ஆரம்பித்துள்ள இடத்திலிருந்து 1 கிலோமீற்றர் தூரத்தில் நடைபெற்றுள்ளமை குறிப்பிடத்தக்கது. அத்துடன் குறித்த உண்ணாவிரதப்போராட்டத்திற்கு ஆதரவாக கிழக்கில் ஹர்த்தாலுக்கு அழைப்பு விடுக்கப்பட்டள்ளது.

கல்முனை வடக்கு பிரதேச செயலகத்தை தரமுயர்த்தக்கோரி கல்முனையில் மூன்றாவது நாளாகவும் முன்னெடுக்கப்பட்டுவரும் உண்ணாவிரதப்போராட்டத்திற்கு ஆதரவு தெரிவிக்கும் வகையில் நாளை 20 ஆம் திகதி கிழக்கு மாகாணத்தில் கடையடைப்பு செய்து ஹர்த்தால் அனுஷ்டிக்குமாறு கிழக்கு மாகாண மாணவர் பேரவை எனும் அமைப்பால் அழைப்பு விடுக்கப்பட்டுள்ளது.

குழந்தையை கொன்ற தாய்

தமிழகத்தில் முறைதவறிய உறவுக்கு இடையூறாக இருந்த குழந்தையை, தாயே கள்ளக்காதலனுடன் சேர்ந்து தண்ணீரில் மூழ்கடித்து கொலை செய்துள்ள சம்பவம் பரபரப்பை ஏற்படுத்தியுள்ளது. வேலூர் மாவட்டம், சிப்காட் வ.உ.சி நகரை சேர்ந்த ராமச்சந்திரன் (30) என்பவருக்கும் வாலாஜா அடுத்த வன்னிவேடை சேர்ந்த காவ்யா(25) என்பவருக்கும் 5 ஆண்டுகளுக்கு முன் திருமணம் நடந்தது.

குடும்பத்தகராறு காரணமாக 2 ஆண்டுகளுக்கு முன்பு காவ்யா, கணவரை பிரிந்து 4 வயது குழந்தையுடன் வெளியேறி வாலாஜா, பெல்லியப்பா நகரில் வாடகை வீட்டில் வசித்துள்ளார். அதே பகுதியில் உள்ள தனியார் பள்ளியில் தருண் யுகேஜி படித்து வந்தான்.

அப்போது, காவ்யாவிற்கும், ராணிப்பேட்டை பகுதியை சேர்ந்த தியாகராஜன்(30) என்பவருக்கும் பழக்கம் ஏற்பட்டது. இதுபற்றி தெரியவரவே ராமச்சந்திரன் காவ்யாவிடம் சென்று மகனை தன்னிடம் ஒப்படைக்கும்படி கேட்டு வந்தார். ஆனால், காவ்யா, மறுத்துள்ளார்.

இந்நிலையில், கடந்த 13 ஆம் திகதி காவ்யாவிற்கும், தியாகராஜனுக்கும் இடையே, ராமச்சந்திரன் அடிக்கடி வந்து தகராறு செய்வது குறித்தும், குழந்தை தருண் குறித்தும் வாக்குவாதம் ஏற்பட்டதாக கூறப்படுகிறது.

ஒருகட்டத்தில் இருவரும் சேர்ந்து குழந்தை தருணை, சரமாரியாக தாக்கி கழுத்தை நெரித்துள்ளனர். பின்னர், பிளாஸ்டிக் தண்ணீர் டேங்கில் மூழ்கடித்து கொடூரமாக கொலை செய்தனர். தொடர்ந்து அன்றிரவு 2 மணியளவில் குழந்தையின் சடலத்தை ஆற்காடு டெல்லிகேட் அருகே உள்ள பாலாற்றில் புதைத்தனர்.

மறுநாள் காலை காவ்யாவின் வீட்டிற்கு வந்த அவரது அக்கா அஜந்தா, குழந்தை தருண் குறித்து கேட்டுள்ளார். அதற்கு, காவ்யா முன்னுக்குபின் முரணாக பதிலளித்துள்ளார். தீவிரமாக விசாரிக்கவே, குழந்தையை கொன்று புதைத்து விட்டதாக கூறியுள்ளார். இதுகுறித்த தகவலின்பேரில், வாலாஜா பொலிசார் நேற்று முன்தினம் காவ்யாவிடம் விசாரணை நடத்தினர்.

அப்போது, தமது காதலுக்கு இடையூறாக இருந்ததால் தியாகராஜனுடன் சேர்ந்து குழந்தை தருணை கொலை செய்ததாக கூறி, புதைத்த இடத்தை பொலிசாரிடம் காவ்யா அடையாளம் காட்டினார். இதையடுத்து தருணின் சடலத்தை வெளியே எடுத்து பிரேத பரிசோதனை செய்தனர். காவ்யாவை பொலிசார் கைது செய்தனர். தியாகராஜனிடம் தொடர்ந்து விசாரணை மேற்கொள்ளப்பட்டு வருகிறது.

அதிர்ச்சி தரும் தகவல்

வர்த்தக வங்கிகளினால் கடன் அட்டைகளுக்காக அறவிடப்படும் வட்டி வீதம் நூற்றுக்கு 32 வீதமாக அதிகரிக்கப்பட்டுள்ளது. 2019ஆம் ஆண்டு ஜுன் மாதம் முதல் இவ்வாறு கடன் அட்டைக்காக அறவிடப்படும் வட்டி வீதம் அதிகரித்துள்ளது.

இதேவேளை, இலங்கை மத்திய வங்கியின் புதிய அறிக்கைகளுக்கமைய 2019ஆம் ஆண்டு ஏப்ரல் மாதம் வரையில் இலங்கை வங்கிகள் மற்றும் நிதி நிறுவனங்களினால் வெளியிடப்பட்டுள்ள முழுமையான கடன் அட்டைகளுக்காக 110.27 பில்லியன் ரூபாய் நிலுவை உள்ளதாக கணக்கிடப்பட்டுள்ளது.

அத்துடன் அதிக வட்டி வீதம் காரணமாக கொடுக்கல் வாங்கல்கார்கள் கடன்அட்டை போன்றைவற்றை பயன்படுத்துவதற்கு அச்சப்படுவதாக மத்திய வங்கி அதிகாரி ஒருவர் தெரிவித்துள்ளார்.

கோர விபத்து

குடா ஓய பிரதேசத்தில் சிற்றூந்து ஒன்று கவிழ்ந்து விபத்துக்குள்ளானதில் 5 பேர் காயமடைந்து மருத்துவமனையில் அனுமதிக்கப்பட்டுள்ளனர். விபத்தில் காயமடைந்தவர்களில் தேரர் ஒருவரும் அடங்குவதாக எமது செய்தியாளர் தெரிவித்தார்.

தனமல்வில பிரதேசத்தில் இடம்பெற்ற நிகழ்வு ஒன்றுக்கு சென்று திரும்பிக் கொண்டிருந்த போது இந்த விபத்து நேர்ந்துள்ளதாக தெரிவிக்கப்பட்டுள்ளது.

நேற்று முன்தினம் மாலை குறித்த விபத்து இடம்பெற்றுள்ள நிலையில் விபத்தில் காயமடைந்தவர்கள் தனமல்வில மருத்துவமனையில் அனுமதிக்கப்பட்ட பின்னர் 4 பேர் மேலதிக சிகிச்சைக்காக ஹம்பாந்தொட மருத்துவமனைக்கு மாற்றப்பட்டுள்ளதாக தெரிவிக்கப்பட்டுள்ளது.

கடலில் மூழ்கிய நபரின் சடலம்

காலி கடற்பரப்பில் மூழ்கி காணாமல் போன நபர் ஒருவரின் சடலம் இரண்டு தினங்களுக்கு பின்னர் நேற்று மீட்கப்பட்டுள்ளதாக காவல் துறையினர் தெரிவித்தனர்.

கடந்த 16 ஆம் திகதி குறித்த நபர் கடற்கரைக்கு அருகில் காணப்படும் குன்று ஒன்றின் மீது நின்று செல்பி எடுத்துக்கொண்டிருந்த நிலையில் தவறி கடலில் வீழ்ந்து இருவர் வேகமாக வந்த அலையில், இழுத்துச் செல்லப்பட்டு காணாமல் போயிருந்தனர் என்பது குறிப்பிடத்தக்கது.

இந்நிலையில் மேற்கொள்ளப்பட்ட தேடுதல் நடவடிக்கையின் போது காணாமல் போன இருவரில் யுவதி அன்றைய தினம் மீட்கப்பட்டார். குறித்த இளைஞரின் சடலம் நேற்று மீட்கப்பட்டுள்ளதோடு பிரேத பரிசோதனைகளுக்காக காலி வைத்தியசாலையில் வைக்கப்பட்டுள்ளமை குறிப்பிடத்தக்கது.