எரித்துக் கொல்லப்பட்ட பெண்

இந்தியாவின் கேரள மாநிலத்தில் பட்டப்பகலில் பெண் பொலிஸ் அதிகாரியை உயிருடன் எரித்து கொலை செய்த விவகாரத்தில் அவரது 12 வயது மகன் அளித்த வாக்குமூலம் முக்கிய திருப்பத்தை ஏற்படுத்தியுள்ளது.

கேரள மாநிலத்தில் மாவேலிக்கர பகுதியை சேர்ந்த செளமியா என்ற பெண் பொலிஸ் அதிகாரியே பட்டப்பகலில் நடு சாலையில் வைத்து எரித்து கொல்லப்பட்டுள்ளார். இவருக்கும் முக்கிய குற்றவாளி அஜாஸ் என்பவருக்கும் காதல் இருந்து வந்துள்ளது. ஆனால் அஜாஸின் குணம் அறிந்த செளமியா திருமணத்திற்கு ஒப்புக்கொள்ளவில்லை என கூறப்படுகிறது.

மட்டுமின்றி, செளமியா வேறு திருமணம் செய்து கொண்டு அவருக்கு தற்போது 3 பிள்ளைகளும் உள்ளனர். ஆனால் அஜாஸ் இதுவரை திருமணம் செய்துகொள்ளாமல் இருந்து வந்துள்ளார். மேலும் செளமியாவுடன் போன் மூலம் தொடர்பில் இருந்தும் வந்துள்ளதாகவும் கூறப்படுகிறது.

மட்டுமின்றி செளமியாவை அடிக்கடி மிரட்டியும் வந்துள்ளார். ஒருகட்டத்தில் தமது உயிருக்கு ஆபத்து நேரிடலாம் எனவும், அசம்பாவிதம் ஏதும் நேர்ந்தால் அதற்கு காரணம் அஜாஸ் என்பவரே என பொலிசாரிடம் தெரிவிக்க வேண்டும் என தமது 12 வயது மகன் ரிஷிகேஷிடம் செளமியா கூறியிருந்துள்ளார்.

தற்போது செளமியா கொல்லப்பட்ட நிலையில், சிறுவன் ரிஷிகேஷ் பொலிசாரிடம் தமது தாயார் தெரிவித்த அனைத்து சம்பவங்கலையும் விலாவாரியாக ஒப்புவித்துள்ளான். செளமியா காவல்துறையில் இணைந்த காலம் தொட்டே அஜாஸ் நோட்டமிட்டு வந்துள்ளார் என கூறப்படுகிறது.

இருவரும் சில காலம் நட்பாக பழகி வந்துள்ளனர். அப்போது அஜாஸிடம் இருந்து செளமியா வாங்கிய ஒன்றரை லட்சம் ரூபாயை கடந்த இரு வாரங்களுக்கு முன்னர், தனது தாயாருடன் இணைந்து சென்று திருப்பி அளித்துள்ளார்.

ஆனால் அஜாஸ் அந்த பணத்தை கைப்பற்ற மறுத்துள்ளதுடன், அவர் குடியிருக்கும் கொச்சி நகரில் இருந்து செளமியாவை மாவேலிக்கரையில் கொண்டுசென்று விட்டதாகவும் பொலிஸ் விசாரணையில் தெரியவந்துள்ளது. அஜாஸ் சொந்த வேலை நிமித்தம் இரண்டு வாரங்கள் விடுப்பில் இருந்து வந்துள்ளார். ஆனால் செளமியாவை கொலை செய்யும் நோக்கிலே அவர் விடுமுறையில் இருந்திருக்கலாம் என சந்தேகம் எழுந்துள்ளது.

கொல்லப்பட்ட பொலிஸ் அதிகாரி செளமியாவின் உடற்கூறு ஆய்வு இன்று மாவேலிக்கரை அரசு மருத்துவமனையில் நடைபெறுகிறது. இந்த விவகாரத்தில் கைது செய்யப்பட்ட முக்கிய குற்றவாளி அஜாஸ் தீக்காயங்களுடன் மருத்துவமனையில் சிகிச்சைபெற்று வருகிறார்.

மாயமான மணமகன்

நாகர்கோவிலில் திருமண நாளன்று மணமகன் மாயமாகியுள்ள சம்பவம் பெரும் பரபரப்பை ஏற்படுத்தியுள்ளது. சென்னையில் பொறியாளராக வேலை செய்து வரும் ஆரல்வாய்மொழியை சேர்ந்த இளைஞருக்கும், நாகர்கோவில் பகுதியை சேர்ந்த இளம்பெண்ணுக்கு திருமணம் நிச்சயம் செய்யப்பட்டிருந்தது.

இதனையடுத்து இருவீட்டாரும் சேர்ந்து பத்திரிக்கை அடித்து உறவினர்கள் அனைவருக்கும் கொடுக்க ஆரம்பித்தனர். திருமணத்தை ஒட்டி இருவீட்டிலும் ஏராளமான உறவினர்கள் குவிந்திருந்தனர். மணமகனும் இரண்டு நாட்களுக்கு முன்னே ஊருக்கு திரும்பியுள்ளார்.

நேற்றிரவு உறவினர்கள் மற்றும் நண்பர்களுடன் மணமகன் சிரித்து பேசிக்கொண்டிருந்துள்ளார். 9 மணியளவில் நண்பரின் மோட்டார் சைக்கிளை எடுத்துக்கொண்டு கிளம்பிய மணமகன், குளிர்பானம் வாங்கிவிட்டு சிறிது நேரத்தில் திரும்பிவிடுவேன் என கூறி சென்றுள்ளார். ஆனால் நீண்ட நேரமாகியும் வீடு திரும்பிவில்லை. இதனால் அங்கு குழுமியிருந்த உறவினர்கள் அனைவருமே பெரும் அதிர்ச்சியடைந்துள்ளனர்.

பல இடங்களில் தேடிப்பார்த்தும் மாப்பிள்ளை கிடைக்காததால் பொலிஸ் நிலையத்தில் புகார் செய்தனர். அங்கு செல்போன் சிக்னலை வைத்து பொலிஸார் விசாரணை மேற்கொள்ளும் போது, குமரி மேற்கு மாவட்டத்தில் உள்ள ஒருமலை கிராமத்தை காட்டியது. இதனால் மணமகன் கடத்தப்பட்டுள்ளாரா என்கிற கோணத்தில் பொலிஸார் தீவிர விசாரணை மேற்கொண்டு வருகின்றனர்.

இளைஞன் மீது அசிட் வீசிய பெண்

காதலித்துவிட்டு திருமணம் செய்ய மறுத்த காதலன் மீது இளம்பெண் ஆசிட் வீசிய சம்பவம் டெல்லியில் பரபரப்பை ஏற்படுத்தி உள்ளது. டெல்லியில், விகாஸ்பூரி என்ற இடத்தில் மருத்துவமனை ஒன்றில் இளம்பெண் ஒருவரும், இளைஞரும் காயங்களுடன் சிகிச்சைக்காக வந்துள்ளனர்.

பெரிய அளவில் காயத்துடன் வந்ததால், இதுபற்றி தகவல் பொலிசாருக்கு தெரிவிக்கப்பட்டது. இந்நிலையில், அந்தப் பெண்ணிடம் நடத்தப்பட்ட விசாரணையில் இருவரும் காதலர்கள் என்பது தெரியவந்தது.

எதனால், காதலனுக்க இவ்வளவு காயம் ஏற்பட்டது என்பது குறித்து விசாரிக்கையில், அந்த பெண்ணை காதலித்து விட்டு திருமணம் செய்ய மறுத்ததால் ஆத்திரமடைந்த பெண் காதலன் மீது ஆசிட் வீசியதை ஒப்பு கொண்டார். ஆசிட் வீச்சில் அந்த இளைஞனுக்கு முகம், கழுத்து மற்றும் மார்புப் பகுதியில் பலத்த காயம் ஏற்பட்டது. மேலும் அந்தப் பெண்ணுக்கும் கைகளில் காயம் இருந்தது. இதையடுத்து அந்தப் பெண்ணைக் கைது செய்த போலீசார் தொடர்ந்து விசாரணை நடத்தி வருகின்றனர்.

பீகாரில் மூளைக்காய்ச்சலால் உயிரிழந்த குழந்தைகளின் எண்ணிக்கை 96-ஆக அதிகரித்துள்ள நிலையில், வெயில் காரணமாக 61 பேர் உயிரிழந்ததும் பெரும் அதிர்ச்சியை ஏற்படுத்தி உள்ளது.

இந்தியாவில் பல்வேறு மாநிலங்களில் தொடர்ந்து வெப்பம் அதிகரித்து வருகிறது. இந்நிலையில், பல மாநிலங்களில் தண்ணீருக்காக மக்கள் தெருக்களில் அலைந்து திரியும் காட்சிகள் காண்போரை கண்கலங்க செய்யும் அளவிற்கு இருக்கிறது.

பீகார் மாநிலம் முசாபர்பூர் மாவட்டத்தில் உள்ள குழந்தைகளுக்கு மூளைக்காய்ச்சல் பாதிப்பு இருப்பதாக அண்மையில் கண்டறியப்பட்டது. கடந்த ஜூன் 1-ஆம் திகதி பிறகு நோய் அறிகுறியுடன் முசாபர்பூரில் உள்ள ஸ்ரீகிருஷ்ணா அரசு மருத்துவக்கல்லூரி மருத்துவமனையில் 197 குழந்தைகளும், கெஜ்ரிவால் மருத்துவமனையில் 91 குழந்தைகளும் அனுமதிக்கப்பட்டனர்.

இந்நிலையில், மருத்துவமனைகளில் அனுமதிக்கப்பட்டிருந்த குழந்தைகளில் 96 குழந்தைகள் உயிரிழந்தனர். இதனிடையே, பீகாரில் கடும் வெயிலின் தாக்கத்தால் ஏற்பட்டுள்ள வெப்ப அலையால் இதுவரை 61 பேர் உயிரிழந்துள்ளது மேலும் சோகத்தை ஏற்படுத்தியுள்ளது.

அவுரங்காபாத், கயா, நவாடா ஆகிய பகுதிகளில் இயல்பைவிட 9 டிகிரி செல்சியஸ் வெப்பம் அதிகரித்துள்ளது. அதிகபட்சமாக கயாவில் 45 டிகிரி செல்சியஸ் வெப்பம் பதிவாகியுள்ளது.2 நாட்களில் மட்டும் அவுரங்காபாத்தில் 25 பேர் உயிரிழந்தது பெரும், அதிர்ச்சியை ஏற்படுத்தியுள்ளது.

பாட்னாவில் கடந்த 10 ஆண்டுகளில் இல்லாத அளவிற்கு 45 டிகிரி செல்சியஸ் வெப்பம் பதிவானதால் வரும் 19-ஆம் தேதி வரை பள்ளிகளுக்கு விடுமுறை அறிவிக்கப்பட்டுள்ளது.

முன்னதாக குழந்தைகள் லிச்சி பழம் சாப்பிட்டு உயிரிழந்துள்ளதாக தகவல்கள் வெளியாகின. ஆனால் தற்போது, அதிகரித்து வரும் வெப்பம் காரணமாக மூளைகாய்ச்சல் ஏற்பட்டு உயிரிழந்துள்ளனர் என்று தகவல்கள் தெரிவிக்கின்றன.

பெற்றோருக்கு காத்திருந்த அதிர்ச்சி

புதுச்சேரி மாநிலத்தில் மணப்பெண்ணின் வீட்டில் இருந்த நகைகளை கொள்ளையர்கள் திருடி சென்றுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது. புதுச்சேரி அரசு கல்வித்துறையில் கண்காணிப்பாளராக பணியாற்றி வருபவர் பிரேமா. இவருக்கு இரண்டு மகள்கள் உள்ளனர். இதில் மூத்த மகளுக்கு ஏற்கனவே திருமணம் முடிந்துவிட்டது.

இந்த நிலையில் இரண்டாவது மகளுக்கு திருமணம் நிச்சயிக்கப்பட்டு, அதற்கான வரவேற்பு நிகழ்வு அருகாமையில் உள்ள திருமண மண்டபத்தில் நடைபெற்றது. அதில் பங்கேற்பதற்காக பிரேமா குடும்பத்தினர் மற்றும் உறவினர்கள் அனைவரும் அங்கு சென்றுவிட்டு வீடு திரும்பியுள்ளனர்.

அப்போது பூட்டிய வீடு திறந்து கிடப்பதை பார்த்து பெரும் அதிர்ச்சியடைந்துள்ளனர். உள்ளே சென்று பார்த்த போது பீரோல் உடைக்கப்பட்டு உள்ளிருந்த 3.50 பவுன் தங்க நகை, மற்றும் 4 லட்சம் ரூபாய் ரொக்க பணம் கொள்ளையடிக்கப்பட்டிருந்தது. இந்த சம்பவம் அறிந்து உடனடியாக விரைந்து வந்த பொலிஸார், தீவிர விசாரணை மேற்கொண்டு சந்தேகத்தின் பேரில் 3 பேரை கைது செய்துள்ளனர்.