நள்ளிரவில் நடந்த பயங்கரம்

தஞ்சாவூர் மாவட்டத்தில் சிறுமியை திருமணம் செய்த இளைஞர், 9 பேர் கொண்ட பெண் வீட்டாரால் கொடூரமாக அடித்துக்கொலை செய்யப்பட்டுள்ள சம்பவம் பெரும் பரபரப்பை ஏற்படுத்தியுள்ளது. தஞ்சாவூர் மாவட்டம் வெண்ணாற்று கரையில் இன்று அதிகாலை இளைஞர் ஒருவரின் சடலம் கிடப்பதாக பொலிஸாருக்கு தகவல் கிடைத்தது.

அதன்பேரில் சம்பவ இடத்திற்கு சென்ற பொலிஸார், இளைஞரின் உடலை கைப்பற்றி விசாரணை மேற்கொள்ள ஆரம்பித்தனர். அப்போது மணலூர் கிராமத்தை சேர்ந்த பிரசாத் என்கிற இளைஞர் இரண்டு நாட்களாக மாயமாகியிருப்பது தெரியவந்தது.

அதனை வைத்து விசாரணை மேற்கொள்கையில், இறந்துகிடப்பது பிரசாந்த் என்பது உறுதி செய்யப்பட்டது. கொலைக்கான காரணம் குறித்து விசாரிக்கையில் அதிர்ச்சி தரும் தகவல் வெளியாகியுள்ளது. சமையல் வேலை செய்துவந்த பிரசாந்த், பக்கத்து ஊரை சேர்ந்த பிளஸ் 2 முடித்த சிறுமியை காதலித்து வந்துள்ளார்.

கடந்த சில நாட்களுக்கு முன் அந்த சிறுமி வீட்டிலிருந்து வெளியேறி பிரசாந்தின் வீட்டிற்கு வந்துள்ளார். அவரை அழைத்து கொண்டு அங்கிருந்து கிளம்பிய பிரசாந்த், ஜெயங்கொண்டம் அருகே ஒரு கோவிலில் திருமணம் செய்துகொண்டுள்ளார். பின்னர் சமயபுரத்தில் உள்ள உறவினர்கள் வீட்டில் தங்கி வந்துள்ளனர். இதற்கிடையில் அந்த சிறுமி, திருமணம் செய்துகொண்டது குறித்து தன்னுடைய தாயிடம் கூறியுள்ளார்.

திருமணத்தை ஏற்றுக்கொண்டதாக அவருடைய தாய் கூறியதால், தங்களுடைய இருப்பிடத்தை பற்றி அந்த சிறுமி கூறியுள்ளார். உடனே அங்கு விரைந்த 9 பேர் கொண்ட கும்பல், காதல் ஜோடியை காரில் ஏற்றிக்கொண்டு, அங்கிருந்து புறப்பட்டுள்ளனர். வழியில் உறவினர் வீட்டில் அந்த பெண்ணை இறக்கி விட்ட கும்பல், பிரசாந்தை மட்டும் காரில் ஏற்றிக்கொண்டு வெண்ணாற்று பகுதிக்கு சென்றுள்ளார்.

அங்கு சத்தம் வெளியில் கேட்ககூடாது என்பதற்காக இளைஞரின் வாயில் துணியை திணித்து, சரமாரியாக வெட்டியும், உருட்டுக்கட்டையால் அடித்தும் படுகொலை செய்து வீசிச்சென்றுள்ளனர். இந்த சம்பவமானது தற்போது பெரும் பரபரப்பை ஏற்படுத்தியிருக்கும் நிலையில், பொலிஸார் வழக்கு பதிவு செய்து ஆற்காட்டை சேர்ந்த 2 பேரை கைது செய்து விசாரணை மேற்கொண்டு வருகின்றனர்.

திருமணமான பெண் கண்ணீர்

தமிழகத்தில் திருமணமான பெண்ணை வேலை தருவதாக கூறி, வரவழைத்து பாலியல் பலாத்காரம் செய்துள்ள சம்பவம் அதிர்ச்சியை ஏற்படுத்தியுள்ளது. தேனி மாவட்டம் சங்கராபுரத்தைச் சேர்ந்த பெண் ஒருவர், அதே பகுதியைச் சேர்ந்த மெக்கானிக்கல் ஒருவரை காதலித்து திருமணம் செய்து கொண்டார். இந்த தம்பதிக்கு இரண்டு குழந்தைகள் உள்ளனர். இந்நிலையில் அந்த பெண் கடந்த 10-ஆம் திகதி தன் கணவருடன் தேனி மாவட்ட காவல் கண்காணிப்பாளரிடம் ஒரு புகார் கொடுத்தார்.

அந்த புகாரை படித்துப் பார்த்த காவல் கண்காணிப்பாளர் அதிர்ச்சியடைந்தார். அதில், கடந்த 2018ஆம் ஆண்டு ஜுலை மாதம் என் கணவர் வேலை காரணமாக கேரளா மாநிலம் கொல்லம் பகுதிக்கு சென்று விட்டார். அப்போது தான் சம்பாதிக்கும் பணத்தை போட்டுவிடுவதாக கூறினார். இதனால் அதற்காக வங்கிக் கணக்கை துவங்குவதற்காக சங்கராபுரத்தில் உள்ள தனியார் வங்கியில் கணக்கு தொடங்கச் சொன்னார்.

அதன்படி நான் வங்கிக்குச் சென்று கணக்கு தொடங்கினேன். அப்போது, அங்கிருந்த வங்கி ஊழியர் முத்துசிவகார்த்திக், ஏ.டி.எம் கார்டு வந்ததும் அழைக்கிறேன். உங்கள் நம்பரைக் கொடுங்கள் என்றார், நானும் நம்பி கொடுத்துச் சென்றேன். அதன் பின் ஒரு நாள் என்னை போனில் தொடர்பு கொண்ட அவர்,

பி.காம் படித்திருக்கும் உனக்கு எங்களது வங்கியில் தற்காலிக வேலை இருக்கிறது அதனை வாங்கிக் கொடுக்கிறேன், அதற்காக வங்கி ஊழியர்களை நீ சந்திக்க வேண்டும் என்று கூறி, கம்பத்தில் உள்ள தனியார் லாட்ஜ் ஒன்றுக்கு வரச்சொன்னார். என் குடும்பச் சூழல் காரணமாக எப்படியாவது இந்த வேலை கிடைத்தால் போதும் எனக் கருதி அங்கு சென்றேன்.

அப்போது அறைக்குள் சென்றதும் என்னை வலுக்கட்டாயமாக பாலியல் வன்புணர்வு செய்தார். அதைத் தனது செல்போனில் காணொளியாகப் பதிவுசெய்துகொண்டார். தொடர்ந்து தனது ஆசைக்கு இணங்காவிட்டால் அந்த வீடியோவை எனது கணவருக்கு அனுப்பிவிடுவதாகக் கூறி என்னை மிரட்டி, தொடர்ந்து பாலியல் வன்புணர்வுசெய்தார்.

ஒரு கட்டத்தில், அவருடன் வங்கியில் பணிபுரியும் அன்பு, பாண்டி, சதீஸ் மற்றும் பெயர் தெரியாத மூவருக்கு அனுப்பி, அந்த ஆறு பேரை அழைத்துக்கொண்டு எனது வீட்டுக்கு வந்து, என்னைப் பலமுறை பாலியல் வன்புணர்வு செய்தார்கள். என்னை விட்டுவிடுங்கள் எனப் பல முறை கெஞ்சியும் பார்த்தேன்.

ஆனால், நான் சொல்வதை கேட்காமல், முத்துசிவகார்த்தியின் நண்பன் ராஜபார்த்திபன் மற்றும் வங்கி ஊழியர்கள் இருவர் உட்பட, மூவர் என்னை தேக்கடி உட்பட பல இடங்களுக்கு அழைத்துச்சென்று பாலியல் வன்புணர்வு செய்தனர். அப்போதெல்லாம் வீடியோ மற்றும் போட்டோ எடுத்துக்கொண்டனர். இதனை என் கணவரிடமோ, பெற்றோரிடமோ சொன்னால் வீடியோவை வெளியிட்டுவிடுவேன் என மிரட்டினார்கள்.

இவர்களிடம் இருந்து தப்பிக்க போடி சிலமலையைச் சேர்ந்த எனது உறவினரான போஸ் என்பவரது மகன் ஈஸ்வரனிடம் நடந்த விடயம் அனைத்தையும் கூறினேன். எனக்கு உதவி செய்வதைப் போல நடித்து, அவனும் என்னை பாலியல் வன்புணர்வு செய்தான். அதோடு, பெயர் தெரியாத அவனது நண்பனை அழைத்துவந்து என்னை பாலியல் வன்புணர்வு செய்து அதை செல்போனில் வீடியோவாகப் பதிவுசெய்துகொண்டான்.

கடந்த 2018 ஜூலை முதல் டிசம்பர் மாதம் வரை 12 பேரும் என்னை பாலியல் வன்புணர்வு செய்து கொடுமைப்படுத்தினர். ஒரு கட்டத்தில் என் உடல் நிலை மோசமாகச் சென்றதால், அதனை அறிந்த என் கணவர், எனது மொபைல் போனுக்கு வந்த அழைப்புகளைப் பார்த்து என்னுடன் சண்டைபோட்டார். அதன்பின்னர் நடந்ததைக் கூறினேன். என்னை பாலியல் வன்புணர்வு செய்த 12 பேர் மீதும் சட்டப்படி கடும் நடவடிக்கை எடுக்க வேண்டும்.

இது தொடர்பாக, 2018 டிசம்பர் மாதம் போடி தாலுகா காவல் நிலையத்தில் புகார் கொடுத்தேன். நடவடிக்கை இல்லை. அதன் பின்னர், பல்வேறு போராட்டங்களுக்குப் பின்னர் இப்போது எஸ்.பி அலுவலகத்தில் புகார் கொடுத்திருக்கிறேன். 12 பேருக்கும் கடும் தண்டனை கொடுக்க வேண்டும் என்று குறிப்பிட்டிருந்தார்.

இதையடுத்து சம்பந்தப்பட்ட தனியார் வங்கியைச் சேர்ந்த துணை மேலாளரான போடியைச் சேர்ந்த முத்துசிவகார்த்திக் (30), சிலமலையைச் சேர்ந்த ஈஸ்வரன் (30) ஆகியோர் கைதுசெய்யப்பட்டனர். மேலும் சதீஷ், பாண்டி, ராஜபார்த்திபன் உட்பட 10 பேர்மீது வழக்குப்பதிவு செய்து பொலிசார் அவர்களை தேடி வருகின்றனர்.

தம்பதி செய்த செயல்

தமிழகத்தில் திருமணம் முடிந்த கையோடு புதுமண தம்பதி செய்த செயலுக்கு பல தரப்பில் இருந்தும் பாராட்டுகள் குவிந்து வருகிறது. சேலம் மாவட்டத்தை சேர்ந்தவர் கீர்த்தி ராஜ். இவருக்கு தனசிரியா என்ற இளம்பெண்ணுக்கும் நேற்று திருமணம் நடைபெற்றது.

திருமணம் முடிந்த கையோடு மாலையும் கழுத்துமாக திருமண மண்டபத்தை விட்டு கிளம்பிய தம்பதி சீலநாயக்கன்பட்டி பகுதியில் உள்ள வீடுகளை நோக்கி சென்று தலைக்கவசம் அணிந்தபடி சென்று விழிப்புணர்வு ஏற்படுத்தினார்கள்.

அதாவது இருசக்கர வாகனத்தில் செல்வோர் கண்டிப்பாக தலைக்கவசம் அணிந்து செல்லும்படி அறிவுறுத்தினார்கள். தமிழகம் முழுவதும் இருசக்கர வாகன ஓட்டிகள் தலைக்கவசம் அணிந்து செல்லும்படி காவல் துறையினர் வலியுறுத்தி வருவது குறிப்பிடத்தக்கது.

இளம்பெண்களின் வாக்குமூலம்

வட இந்தியாவை சேர்ந்த 4 பெண்கள் உட்பட 6 பேர் சென்னைக்கு வந்து விலையுயர்ந்த புடவைகளை திருடிவந்த நிலையில் தற்போது வசமாக சிக்கியுள்ளனர். சென்னை தி.நகரில் உள்ள பிரபலமான ஜவுளிக் கடைக்குள் 4 வடமாநில பெண்கள், 2 ஆண்கள் கடந்த இரு தினங்களுக்கு முன்னர் இரவு சென்றனர். பட்டுப்புடவை பிரிவில் வெகுநேரமாக புடவைகளை அவர்கள் பார்த்த நிலையில் எதையும் வாங்காமல் வெளியில் சென்றனர்.

இதனால் அவர்கள் மீது கடை ஊழியர்களுக்கு சந்தேகம் ஏற்பட்ட நிலையில் அவர்களை சோதனை செய்தனர். அப்போது பெண்களின் சுடிதாருக்குள் விலை உயர்ந்த பட்டுப்புடவைகள் மறைத்து வைக்கப்பட்டிருந்தன. இது குறித்து பொலிசாருக்கு தகவல் தரப்பட்ட நிலையில் சம்பவ இடத்துக்கு வந்த பொலிசார் அவர்களிடம் விசாரித்தனர். இது குறித்து பொலிசார் கூறுகையில், ஜவுளிக்கடையில் பட்டுப்புடவைகளைத் திருடியவர்கள் டெல்லியைச் சேர்ந்த ராம்குமார் (40), ரிங்குசிங் (35), பீனா (53), ஜோதி (48), சுனிதா (26), தீபாஞ்சலி (21) எனத் தெரியவந்தது.

இவர்கள் டெல்லியிலிருந்து கார் மூலம் சென்னை வந்து இந்தச் சம்பவத்தில் ஈடுபட்டுள்ளனர். இந்த கடையில் திருடுவதற்கு முன், அதேபகுதியில் உள்ள இன்னொரு பட்டு ஷோரூமில் கைவரிசை காட்டியுள்ளனர். அங்கு 2,22,369 ரூபாய் மதிப்புள்ள 3 பட்டுச் புடவைகளை திருடியுள்ளனர்.

அந்த புடவைகளை காரில் வைத்துவிட்டு இந்த கடைக்கு வந்துள்ளனர். இங்கு 1,41,010 ரூபாய் மதிப்புள்ள 3 பட்டுச் புடவைகளை திருடியுள்ளனர். இது தொடர்பாக கடையில் இருந்த சிசிடிவி கமெராவில் பதிவான காட்சிகளை ஆய்வு செய்தோம்.

அப்போது, 4 பெண்களும் கடைக்குள் பேசிக்கொண்டு பட்டுச் சேலைகளை தேர்வு செய்கின்றனர். விலையுயர்ந்த ஒரு பட்டுச்சேலையை ஒரு பெண் எடுத்து இன்னொருவரிடம் கொடுக்கிறார். அவரும் அதை ஆர்வமாக பார்ப்பதுபோல சுடிதாருக்குள் வயிற்றுப்பகுதியில் மறைத்து வைத்துக் கொள்வது தெரிந்தது.

இது குறித்து பொலிசில் சிக்கிய பெண்கள் அளித்த வாக்குமூலத்தில், சில்க் புடவைகளை திருடினால் பணம் கிடைக்கும். டெல்லியிலிருந்து குழுவாக வருவோம். ஒரு தடவை வந்தால் 50 சில்க் புடவைகளை திருடுவோம். இது, எங்களுக்கு ஒரு சம்மர் ட்ரிப் என்று கூறியுள்ளனர்.

பெரிய கடைகளில் சிசிடிவி கமெரா இருக்குமே என்று 4 பெண்களிடம் பொலிசார் கேட்டதற்கு, சிசிடிவி கமெராவா டோன்ட்வொரி ஜி என்று பதட்டம் இன்றி இந்தியில் கூறியுள்ளனர். இதை தொடர்ந்து ஆறு பேரையும் பொலிசார் கைது செய்துள்ளனர்

நெஞ்சை உலுக்கும் சம்பவம்

தமிழகத்தின் நாகப்பட்டினத்தில் கல்வி கட்டணத்தை செலுத்த முடியாததால் மகனை கொன்று பெற்றோர் தற்கொலை செய்து கொண்ட சம்பவம் அதிர்வலைகளை ஏற்படுத்தியுள்ளது.

நாகப்பட்டினத்தில் உள்ள வெளிபாளையம் பகுதியை சேர்ந்தவர்கள் செந்தில்குமார், லட்சுமி தம்பதி. இவர்களுடைய 11 வயது மகன் ஜெகதீஸ்வரனை கொலை செய்துவிட்டு இவர்களும் தற்கொலை செய்து கொண்டிருக்கின்றனர். தனியார் பாடசாலையில் 6ம் வகுப்பு படித்துவந்த ஜெகதீஸ்வரனுக்கு கல்வி கட்டணத்தை செலுத்த முடியாமல் செந்தில்குமார் தம்பதி அவதிப்பட்டு வந்துள்ளனர்.

மட்டுமின்றி இவர்களை நம்பி எவரும் கடன் தர முன்வரவில்லை என்றும் கூறப்படுகிறது. இதையடுத்து தங்களின் ஒரே மகனுக்கு பாடசாலை திறந்து 10 நாட்கள் ஆகியும் கல்வி கட்டணத்தை செலுத்த முடியவில்லையே என்ற வருத்தத்தில் இருவரும் தவித்து வந்துள்ளனர்.

இந்த நிலையில் இருவரும் சிறுவன் ஜெகதீஸ்வரனை சாப்பாட்டில் விஷம் வைத்து கொன்றுள்ளனர். மேலும் பொலிஸ் ஆக வேண்டும் என்று சிறுவன் கனவு கண்டதால் அவனுக்கு பொலிஸ் உடையை அணிவித்து அதன் பின்னர் விஷத்தை கொடுத்துள்ளனர். பின்னர் அவர்கள் இருவரும் அதே உணவை சாப்பிட்டு தற்கொலை செய்து கொண்டனர். இச்சம்பவம் அப்பகுதி மக்களிடையே சோகத்தை ஏற்படுத்தி உள்ளது.