சென்னையில் 8 பேர் மீது குடிபோதையில் இருந்த நபர் ஆசிட் வீசிய சம்பவம் அதிர்ச்சியை ஏற்படுத்தியுள்ளது. சென்னை நெற்குன்றத்தில் உள்ள ஒரு வீட்டின் மூன்றாவது மாடியில் கன்னியப்பன் என்பவர் குடும்பத்தோடு குடியிருந்து வருகிறார்.

இவர், வெள்ளிப்பட்டறையில் வேலை பார்க்கிறார். இவரின் மனைவி ரஞ்சனி. ரஞ்சனியின் அண்ணன் பாஸ்கர். இவர், பெயின்டராக வேலை பார்க்கிறார். இந்த வீட்டின் இரண்டாம் மாடியில் அழகுமுத்து, கருப்பசாமி, வாஞ்சிநாதன், பி.வேல்முருகன், வீரமணி, எஸ். வேல்முருகன், அசோக், ப.வேல்முருகன் ஆகியோர் குடியிருந்து வருகின்றனர்.

இந்நிலையில் நேற்றிரவு 8 பேரும் வீட்டு மொட்டை மாடியில் மது அருந்து கொண்டிருந்த போது அங்கு குடிபோதையில் கன்னியப்பனும், பாஸ்கரும் வந்தார்கள். இருவரும் அந்த எட்டு பேருடன் வாக்குவாதம் செய்த நிலையில் பின்னர் சண்டையாக மாறியது.

இதை பார்த்த ரஞ்சினி கன்னியப்பனையும் பாஸ்கரையும் வீட்டுக்குள் வைத்து பூட்டியுள்ளார். வீட்டின் வெளியில் 8 பேரும் உருட்டுகட்டையுடன் வந்து தகராறு செய்தனர்.

பின்னர் வீட்டை திறந்து கொண்டு வெளியில் வந்த கன்னியப்பன், வெள்ளிப் பாத்திரங்களைச் சுத்தம் செய்யப் பயன்படுத்தும் ஆசிட்டை எடுத்து 8 பேர் மீதும் வீசிய நிலையில் அவர்கள் வலியால் அலறித்துடித்தனர். பின்னர் அவர்கள் மருத்துவமனையில் சேர்க்கப்பட்ட நிலையில் அவர்களுக்கு சிகிச்சையளிக்கப்பட்டு வருகிறது. இது தொடர்பாக கன்னியப்பனிடம் பொலிசார் விசாரணை நடத்தி வருகிறார்கள்.

இந்தியாவில் சி.ஆர்.பி.எஃப்பில் பணிபுரியும் நபர் ஒருவர், ஒரே நேரத்தில் இரண்டு பெண்களை திருமணம் செய்து கொண்ட சம்பவம் பரபரப்பை ஏற்படுத்தியுள்ளது.

சத்தீஷ்கரில் உள்ள பக்தோல் கிராமத்தை சேர்ந்தவர் அனில் பைகரா. இவர் சி.ஆர்.பி.எஃப்பில் பணிபுரிந்து வருகிறார். இவருக்கு நான்கு ஆண்டுகளுக்கு முன்னர் இளம்பெண்ணுடன் திருமணம் ஆன நிலையில் குழந்தையில்லை.

இந்நிலையில் அதே ஊரில் அங்கன்வாடியில் பணிபுரியும் ஒரு பெண்ணை அனில் காதலித்து வந்தார். பல்வேறு ஊர்களில் பணிபுரிந்த அனில் ஊருக்கு வரும்போதெல்லாம் மனைவியுடன் நேரத்தை செலவிடுவதை விட அதிக நேரத்தை தனது காதலிடமே செலவிட்டு வந்தார்.

இந்நிலையில் நேற்று அனில் செய்த விசித்திர காரியத்தை பார்த்து ஊர் மக்கள் அதிர்ச்சியடைந்தார்கள். அதாவது தனது காதலியை திருமணம் செய்து கொண்ட அனில் அதன் உடன் தனது மனைவியையும் மீண்டும் திருமணம் செய்து கொண்டார்.

அரசு பணியில் இருப்பவர் முதல் மனைவி உயிருடன் இருக்கும் போது இன்னொரு பெண்ணை மணப்பது குற்றம் என்ற நிலையில் அனில் மீது நடவடிக்கை எடுக்கப்படலாம் என தெரிகிறது. அனில் கூறுகையில், எனக்கு முதல் திருமணம் மூலம் குழந்தையில்லை, அதனால் தான் இரண்டாம் திருமணம் செய்து கொண்டேன் என கூறியுள்ளார்.

தமிழகத்தில் காதலர்கள் திருமணம் செய்யவிருந்த நிலையில் தற்கொலை மிரட்டல் விடுத்து காதலனின் தாய் திருமணத்தை நிறுத்தியதால் தற்போது காதலன் சிறையில் கம்பி எண்ணிக்கொண்டிருக்கிறார்.

திருவள்ளூரை சேர்ந்தவர் கனகா. இவர் நேற்று மகளிர் காவல் நிலையத்துக்கு தனது காதலன் குமார் உடன் வந்தார்.இருவர் கையிலும் பூமாலை இருந்த நிலையில் கனகா உறவினர்களும் உடன் வந்தனர்.

இருவருக்கும் அங்கு திருமணம் நடக்கும் என எதிர்பார்க்கப்பட்ட நிலையில் குமாரின் அம்மா அங்கு வந்து, இந்தக் திருமணம் நடந்தால் இங்கேயே தீக்குளிப்பேன் என்று கூறியதால் அங்கு பரபரப்பு ஏற்பட்டது.

இதனால் திருமணம் நடக்காமல் போனது. இதனால் அதிர்ச்சியடைந்த கனகா, உன்னை எவ்வளவு தூரம் நம்பினேன். என்னை நம்ப வைத்து ஏமாற்றிவிட்டாயே, என்னை திருமணம் செய்யாத நீ, சிறைக்குச் செல் என குமாரை நோக்கி கூறினார்.

இதையடுத்து, குமார் மீது நடவடிக்கை எடுக்கும்படி கனகா கொடுத்த புகாரின்பேரில் அவரை பொலிசார் கைது செய்துள்ளனர். இது குறித்து பொலிசார் கூறுகையில், இந்த திருமணம் நடக்காததற்கு பணம் தான் காரணம். குமாரும், கனகாவும் 8 வருடங்களாக காதலித்தார்கள்.

இந்த சமயத்தில் குமாருக்கு வெளிநாட்டில் நல்ல சம்பளத்துடன் வேலை கிடைத்தது. அவர் வெளிநாட்டுக்குச் செல்வதற்கு முன் தன் கழுத்தில் தாலி கட்டவேண்டும் என கூறிய கனகா குமாரை காவல் நிலையத்துக்கு வரவழைத்தார்.

ஆனால் நல்ல வேலை கிடைத்ததால் பணக்கார குடும்பத்தை சேர்ந்த பெண்ணை குமாருக்கு திருமணம் செய்துவைக்க அவர் தாய் விரும்பி இந்த திருமணத்தை நிறுத்தினார். இதற்கு குமாரும் திடீரென சம்மதம் தெரிவித்தார். அதனால் தான் அவரை கைது செய்தோம் என கூறியுள்ளனர்.

இந்தியாவின் கேரள மாநிலத்தில் சொந்த மகன் காதலித்து கைவிட்ட இளம்பெண்ணின் திருமணத்தை அவரது தந்தையே ஆடம்பரமாக நடத்தி வைத்த சம்பவம் பொதுமக்களை நெகிழ்ச்சியில் ஆழ்த்தியுள்ளது.

திரைப்படத்தை மிஞ்சும் இச்சம்பவம் கேரளாவின் கோட்டயம் மாவட்டத்தில் நடந்துள்ளது. கடந்த ஆறு ஆண்டுகளுக்கு முன்னர் கோட்டயம் மாவட்டம் திருனக்கர பகுதியில் குடியிருக்கும் ஷாஜி என்பவரின் மகன் ஒரு பெண்ணை காதலித்து, பின்னர் இருவரும் திருமணம் செய்யும் நோக்கில் தலைமறைவாகினர்.

இந்த நிலையில் இளம்பெண்ணின் குடும்பத்தார் அளித்த புகாரின் அடிப்படையில், தலைமறைவான இருவரும் நீதிமன்றத்தில் சரணடைந்தனர்.

விசாரணையில் இருவருமே திருமண வயதை எட்டவில்லை என்பதால், நீதிமன்றம் இருவரையும் பெற்றோருடன் செல்ல உத்தரவிட்டது. மட்டுமின்றி எதிர்காலத்தில் காதலர்கள் இருவருக்கும் திருமணம் செய்து வைக்கவும் இரு வீட்டாரும் முழு மனதுடன் ஒப்புக்கொண்டுள்ளனர்.

இதனிடையே குறித்த இளம்பெண் தங்களது குடியிருப்பில் இருந்தபடியே கல்லூரி படிப்பை முடித்தார். அந்த இளைஞர் கல்லூரி விடுதியில் தங்கியபடியே படிப்பை முடித்தார்.

இந்த நிலையில் அந்த இளைஞர் இன்னொரு பெண்ணை காதலித்துள்ளார். மேலும், தந்தையுடன் ஐக்கிய அமீரகத்தில் வேலைக்கும் சென்றுள்ளார். ஆனால் கடந்த ஆண்டு முதல் காதலியை மறந்த இளைஞர், தமது இரண்டாவது காதலியை திருமணம் செய்து கொண்டார்.

இந்த தகவலை அறிந்த ஷாஜி தமது மகனை எதிர்த்ததுடன், மகனுக்காக இதுவரை சேகரித்த சொத்துக்களை, மகனால் கைவிட்ட இளம்பெண்ணின் பெயருக்கு எழுதி வைத்துள்ளார். மேலும் ஒரு மணமகனையும் தேடிப்பிடித்த அவர் அந்த இளம்பெண்ணின் திருமணத்தையும் ஆடம்பரமாக நடத்தி வைத்து தமது சொல்லை காப்பாற்றியுள்ளார். இச்சம்பவம் கோட்டயம் மாவட்ட மக்களிடையே நெகிழ்ச்சியை ஏற்படுத்தியுள்ளது.

கணவரை திருநங்கை ஒருவர் திருமணம் செய்து கொண்ட நிலையில் அவரை திருநங்கையிடம் இருந்து மீட்டு தருமாறு மனைவி கண்ணீர் மல்க புகார் அளித்துள்ளார்.

திருநெல்வேலி மாவட்டத்தை சேர்ந்தவர் விஜயசண்முகநாதன். காவல் நிலையத்தில் உதவி ஆய்வாளராக உள்ளார். இவருக்கு மனைவி மற்றும் இரு குழந்தைகள் உள்ளனர். அதே பகுதியில் வசிக்கும் திருநங்கையான பபிதா ரோஸ், சமீபத்தில் தன் வீட்டின் மீது மர்ம நபர்கள் சிலர் கல்வீசியதாக காவல்நிலையத்தில் புகார் கொடுத்திருக்கிறார்.

அப்போது விஜயசண்முகநாதனுடன் ஏற்பட்ட பழக்கம் காரணமாக, இரு மாதங்களாக காதலித்து இருவரும் திருமணம் செய்துக்கொண்டனர். விஜயசண்முகநாதன், பபிதா ரோஸை திருமணம் செய்தது பற்றி, அவரது மனைவி சக்தியிடம் தெரிவிக்காமலேயே இருந்துள்ளார்.

இது தொடர்பான உண்மை சமீபத்தில் சக்திக்கு தெரிந்துள்ளது. இதையடுத்து ஏற்கனவே திருமணமான தனது கணவரை, மனைவியான நான் உயிருடன் இருக்கும்போதே மறுமணம் செய்துக்கொண்ட பபிதா ரோஸை கைது செய்து,

தன் கணவரை தன்னிடம் மீட்டுக் கொடுக்கும் படி சக்தி, மாவட்ட காவல் கண்காணிப்பாளரிடம் புகார் அளித்துள்ளார். சக்தி அளித்த புகார் ஏற்றுகொள்ளப்பட்டாலும் அதன் மீதான விசாரணை இன்னும் தொடங்கவில்லை என கூறப்படுகிறது.

தமிழகத்தில் இளம்பெண்ணுக்கு அவர் பெற்றோர் திருமண ஏற்பாடுகளை செய்து வந்த நிலையில் அவர் தூக்கிட்டு தற்கொலை செய்து கொண்டுள்ளார்.

கும்மிடிபூண்டியை அடுத்த சின்னஓபுளாபுரம் கிராமத்தை சேர்ந்த குமரேசனின் மகள் ஆர்த்தி (21). பொறியியல் பட்டதாரியான ஆர்த்திக்கு அவர் பெற்றோர் திருமண ஏற்பாடுகளை செய்து வந்தனர்.

இந்நிலையில் நேற்று முன்தினம் வீட்டில் தனியாக இருந்த ஆர்த்தி மின்விசிறியில் தூக்கிட்டு கொண்டதாக கூறப்படுகிறது. இதை அறிந்த ஆர்த்தியின் உறவினர்கள் அவரை மீட்டு சிகிச்சைக்காக மருத்துவமனையில் சேர்த்த நிலையில் அவர் சிகிச்சை பலனின்றி உயிரிழந்தார்.

இது குறித்து பொலிசார் வழக்குப்பதிவு செய்துள்ள நிலையில் தற்கொலைக்கான காரணம் குறித்து விசாரணை நடத்தி வருகின்றனர்.