திருநங்கையை காதலித்த இளைஞர்

இந்தியாவில் இரண்டு இளைஞர்கள் இரண்டு திருநங்கைகளை திருமணம் செய்து கொண்ட சம்பவம் அரங்கேறியுள்ளது. குஜராத் மாநிலத்தை சேர்ந்தவர் கேயார் சவுகான் (20). இவர் ஆட்டோ ஓட்டுனராக உள்ளார்.

சவுகான் ஆட்டோவில் சில மாதங்களுக்கு முன்னர் பயலி என்ற திருநங்கை பயணம் செய்தார். அப்போது இருவரும் நண்பர்கள் ஆனார்கள், பின்னர் இருவருக்கும் காதல் ஏற்பட்டது. இதையடுத்து தனது வீட்டில் இது குறித்து சவுகான் கூறினார். ஆனால் திருநங்கையை சவுகான் திருமணம் செய்வதை அவர் குடும்பத்தார் விரும்பாத நிலையில் அதற்கு எதிர்ப்பு தெரிவித்தனர்.

திருநங்கையாக இருந்தாலும் அவர் எனக்கு அழகு தான் என கூறிய சவுகான், பயலியை திருமணம் செய்ய முடிவெடுத்தார். அதன்படி கடந்த மாதம் 31ஆம் திகதி சவுகான் பயலியை ரகசிய திருமணம் செய்து கொண்டார்.

பின்னர் இது குறித்து தனது குடும்பத்தாரிடம் சொன்னார். முதலில் இதை ஏற்காத குடும்பத்தார் தற்போது இருவரையும் ஏற்று கொண்டார்கள். இது குறித்து திருநங்கை பயலி கூறுகையில், நான் தற்போது மகிழ்ச்சியாக இருக்கிறேன்.

எனக்கு திருமணம் நடக்கும் என எதிர்பார்க்கவே இல்லை. என் கணவரின் தாய் தற்போது என்னுடன் சகஜமாக பேசுகிறார் என கூறியுள்ளார். இதே போல ரத்வா (30) என்ற நபர் டீக்கடை நடத்தி வருகிறார். இவர் சர்க்கஸ் சாகச நிகழ்ச்சியை காண சில மாதங்களுக்கு முன்னர் சென்றார்.

அப்போது அங்கு பணிபுரிந்த ரீனா என்ற திருநங்கையை பார்த்த உடனேயே ரத்வாவுக்கு பிடித்து விட்டது. இதையடுத்து அவரை பார்ப்பதற்காகவே அடிக்கடி சர்க்கஸுக்கு ரத்வா சென்றார். பின்னர் இருவருக்கும் பொதுவான நண்பர் ஒருவர் ரீனா மற்றும் ரத்வாவை பேச வைத்தார்.

இதையடுத்து இருவரும் காதலிக்க தொடங்கினர், பின்னர் இது குறித்து ரத்வா தனது குடும்பத்தாரிடம் சொன்ன போது முதலில் ஏற்கவில்லை. பின்னர் சமாதானம் அடைந்த குடும்பத்தார் ரத்வா திருமணத்துக்கு சம்மதம் தெரிவிக்க ரத்வா – ரீனா திருமணம் சமீபத்தில் நடந்துள்ளது.

வாய்ப்பிளந்த மக்கள்

இந்தியாவில் மணக்கோலத்தில் மாப்பிள்ளை ஒருவர் பணமாலையுடன் வாக்களிக்க வந்ததை பார்த்த மக்கள் ஆச்சரியத்தில் வாய்ப்பிளந்தனர்.

இந்தியாவில் உள்ள 7 மாநிலங்கள் மற்றும் ஒரு யூனியன் பிரதேசங்களில் நேற்று மக்களவை தேர்தல் நடைபெற்றது. இந்த நிலையில் ஹிமாச்சல் பிரதேசத்தில் உள்ள மணாலி தொகுதியில் 8ஆவது வாக்குச் சாவடி மையத்துக்கு மணக்கோலத்தில் வந்தார் மணமகன். அவருடன் அவரது குடும்பத்தினரும் வந்தனர்.

மணமகன் உள்பட அனைவரும் பணமாலை அணிந்து கொண்டு வாக்களித்தனர். இதை அங்கிருந்த வாக்காளர்கள் ஆச்சரியத்துடன் பார்த்தனர் இன்னும் சிலரோ பணம் இருக்கிறது என்பதற்காக இப்படியா அலப்பறை செய்வது என மனதிற்குள் கேட்டுக் கொண்டனர். இது தொடர்பான புகைப்படங்கள் டுவிட்டரில் வெளியிடப்பட வைரலாகியுள்ளது.

அதிர்ச்சி வாக்குமூலம்

விழுப்புரம் மாவட்டத்தில் சொந்த குடும்பத்தையே தீ வைத்து எரித்த இளைஞர், கொலைக்கான காரணம் குறித்து பொலிஸாரிடம் வாக்குமூலம் கொடுத்துள்ளான். திண்டிவனத்தில் கடந்த 14-ம் தேதி அன்று ஏசி வெடித்து ஏற்பட்ட தீ விபத்தில் அறையில் உறங்கிக்கொண்டிருந்த, ராஜு, அவருடைய மனைவி கலைச்செல்வி மற்றும் இளைய மகன் கவுதமன் ஆகியோர் பரிதாபமாக உயிரிழந்தனர்.

ஆரம்பத்தில் விபத்து எனக்கருதியே பொலிஸார் விசாரணையை ஆரம்பித்தனர். ஆனால் சம்பவம் நடந்த அன்று ராஜுவின் மூத்த மகனின் சட்டையில் இருந்த ரத்தக்கறை மற்றும் அறையில் இருந்து வந்த பெட்ரோல் வாசம் போன்றவை பொலிஸாருக்கு பலத்த சந்தேகத்தை ஏற்படுத்தியது.

இதற்கிடையில் தன்னுடைய சகோதரி விபத்தில் இறக்கவில்லை, கொலை செய்யப்பட்டுள்ளார் என கலைச்செல்வியின் சகோதரர் ஜெய்சங்கர் கொடுத்த புகாரின் பேரில் பொலிஸார் விசாரணையை ஆரம்பித்தனர். ராஜுவிற்கு அதிக சொத்துக்கள் இருந்ததால், சொத்துக்களை அபகரிக்க கொலை செய்யப்பட்டாரா என்கிற, சந்தேகத்தின் பேரில் நேற்று ராஜுவின் மூத்த மகன் கோவர்த்தனன் மற்றும் அவருடைய மனைவி கைது செய்யப்பட்டனர்.

இந்த நிலையில் கொலை சம்பவம் குறித்து அவர்களிடம் விசாரணை மேற்கொண்ட போது, சிறுவயதில் இருந்தே என்னை விட என்னுடைய தம்பிக்கு தான் அதிக பாசம் கொடுத்தனர். 7 மாதங்களுக்கு முன் என்னுடைய திருமணத்தை எளிமையாக நடத்தினர்.

ஆனால் ஜூன் மாதம் நடக்கவிருந்த என்னுடைய தம்பியின் திருமணத்தை மிகவும் ஆடம்பரமாக நடத்த திட்டமிட்டனர். மேலும் என்னுடைய தம்பிக்கு அதிக சொத்துக்களை எழுதிக்கொடுக்க உள்ளதாகவும் என்னிடம் கூறினர். இதனால் ஆத்திரத்தில் அவர்களை தீர்த்து கட்ட முடிவெடுத்தேன்.

பீர் பாட்டிலில் பெட்ரோலை நிரப்பி அவர்கள் உறங்கிக்கொண்டிருந்த அறையில் தூக்கியெறிந்தேன்.தீ பற்றி எரிந்துகொண்டிருந்த போது என்னுடைய தந்தை மட்டும் ஜன்னலை உடைத்துக்கொண்டு உதவி கேட்டார். உடனே பாட்டிலை வைத்து அவருடைய கழுத்தை அறுத்துக்கொலை செய்தேன் என வாக்குமூலம் கொடுத்துள்ளார்.

மாணவிக்கு நடந்த விபரீதம்

சென்னையில் வீட்டில் தனியாக விளையாடி கொண்டிருந்த சிறுமி, தொட்டில் சேலை கழுத்தை இறுக்கியதில் உயிரிழந்தது சோகத்தை ஏற்படுத்தியுள்ளது.

கிருஷ்ணகிரியை சேர்ந்த வடிவேல் – ஹேமா தம்பதியின் மகள் அஸ்வதி (11). பள்ளிக்கூடத்தில் படித்து வந்தார். தற்போது பள்ளி விடுமுறை என்பதால் அஸ்வதி, தனது பாட்டி ரமாவுடன் சென்னை ஐ.சி.எப். ரெயில்வே குடியிருப்பில் வசிக்கும் தனது மாமா வினோத்குமார் வீட்டுக்கு வந்து இருந்தாள்.

வினோத்குமாரின் மகன் யஷ்வந்துக்கு உடல் நிலை சரி இல்லாததால் மருத்துவமனையில் அனுமதிக்கப்பட்டு உள்ளான். மகனுக்கு துணையாக வினோத்குமாரின் மனைவி அங்கேயே உள்ளார். யஷ்வந்தை பார்க்க ரமா மருத்துவமனைக்கும், வினோத்குமார் வேலைக்கும் சென்று விட்டனர்.

வீட்டில் தனியாக இருந்த அஸ்வதி, கதவை உள்புறமாக பூட்டிக்கொண்டு வீட்டில் யஷ்வந்துக்கு கட்டி இருந்த தொட்டில் சேலையில் விளையாடிக்கொண்டிருந்தாள். அப்போது எதிர்பாராதவிதமாக தொட்டில் சேலை, மாணவியின் கழுத்தை இறுக்கியதில் அஸ்வதி பரிதாபமாக இறந்தாள்.

தற்செயலாக வீட்டுக்கு வந்த அஸ்வதியின் சித்தப்பா ஈஸ்வரன், ஜன்னல் வழியாக இதை பார்த்து அதிர்ச்சி அடைந்தார். சம்பவம் குறித்து தகவல் அறிந்த பொலிசார் அஸ்வதி உடலை கைப்பற்றி பிரேத பரிசோதனைக்கு அனுப்பி வைத்துவிட்டு இது தொடர்பாக விசாரித்து வருகிறார்கள்.