இருவர் காயம்

வெல்லவாய – தனமல்வில வீதியில் இடம்பெற்ற வாகன விபத்தொன்றில் இருவர் காயமடைந்துள்ளனர். முச்சக்கரவண்டியொன்று பேருந்தில் மோதியதில் இந்த விபத்து இடம்பெற்றுள்ளதாக தெரிவிக்கப்படுகிறது.

நேற்று மாலை இடம்பெற்ற இந்த விபத்தில் காயமடைந்தவர்கள் மருத்துவமனையில் அனுமதிக்கப்பட்டுள்ளதாக காவற்துறை தெரிவித்தது. முச்சக்கரவண்டி நிறுத்தி வைக்கப்பட்டிருந்த பேருந்தொன்றை முந்திச் செல்ல முற்பட்ட போது இந்த விபத்து இடம்பெற்றுள்ளது.

இந்த விபத்தில் புத்தல பெல்வத்த பிரதேசத்தை சேர்ந்த ஆண் மற்றும் பெண்ணொருவர் காயமடைந்துள்ளனர். சம்பவம் தொடர்பில் வெல்லவாய காவற்துறையினர் மேலதிக விசாரணைகளை மேற்கொண்டு வருகின்றனர்.

மாணவர்களுக்கு..

இலங்கையில் அசாதாரண சூழ்நிலை காணப்பட்டாலும், திட்டமிட்டபடி அனைத்து பரீட்சைகளும் நடைபெறும் என பரீட்சைகள் ஆணையாளர் நாயகம் பி. சனத் பூஜித தெரிவித்துள்ளார்.

2019ம் ஆண்டுக்கான கபொத உயர்தர பரீட்சை ஆகஸ்ட் மாதம் 5ம் திகதி முதல் 31ம் திகதி வரை நடைபெறும் என ஆணையாளர் நாயகம் பி.சனத் பூஜித தெரிவித்துள்ளார்.

ஐந்தாமாண்டுக்கான புலமைபரிசில் பரீட்சை எதிர்வரும் ஆகஸ்ட் மாதம் 4ம் திகதி இடம்பெறும். இதேவேளை, டிசம்பர் மாதம் நடைபெறவுள்ள கபொத சாதாரண தரப் பரீட்சைக்கான விண்ணப்பங்கள் எதிர்வரும் 24 ஆம் வரை ஏற்றுக் கொள்ளப்படுமென பரீட்சைத் திணைக்களம் அறிவித்துள்ளது.

இறந்த தாயிடம் பால் குடித்த எட்டு மாத குழந்தை

தமிழின அழிப்பின் பத்தாவது ஆண்டு நினைவேந்தலை நாம் இன்று கண்ணீருடன் அனுஷ்டித்து கொண்டிருக்கின்ற போதும் யுத்தம் நம் இதயங்களில் தந்து சென்ற வடு எத்தனை வருடங்கள் கடந்தாலும் மாறாதது.

நூற்றுக்கணக்கான பொலிஸார் பலத்த பாதுகாப்பை வழங்க இன்றைய தினம் முள்ளிவாய்க்கால் மண் எமது உறவுகளின் கண்ணீரில் நனைந்துள்ளது. இவ்வாறான சந்தர்ப்பத்தில் துயர் சுமந்து நிற்கும் எம் உறவுகளுக்கு மத்தியில் முள்ளிவாய்க்கால் துயரின் சாட்சியாக வாழ்ந்து கொண்டிருக்கும் சிறுமி ராகினி இன்று பொது ஈகைச்சுடரை முதன்முதலாக ஏற்றிவைத்திருந்தார்.

முள்ளிவாய்க்கால் யுத்தம் நடந்தபோது இலங்கை அரச படைகள் நடத்திய கோரத் தாக்குதலில் சிறுமி ராகினி தனது கையொன்றை பறிகொடுத்திருந்தார். அதைவிட பேரவலம் என்னவெனில் இறந்த தனது தாயிடம், அப்போது பிறந்து எட்டு மாதங்களே ஆகியிருந்த ராகினி பால் குடித்த காட்சி தான்.

தாயின் உயிர் பிரிந்தது அறியாமல், தந்தை படுகாயங்களுக்கு இலக்காகி உயிருக்கு போராடி கொண்டிருந்தது தெரியாமல் அந்த எட்டு மாத பச்சிளம் குழந்தை தாயிடம் பால் குடித்த காட்சி அனைவரது நெஞ்சையும் கனக்கச் செய்து விட்டது.

தற்போது ராகினி அப்பம்மாதான் பாதுகாப்பில் வளர்ந்து வரும் நிலையில் பதினொரு வயது சிறுமியான அவரே இன்று ஈகைச்சுடரை ஏற்றி நினைவேந்தலை ஆரம்பித்து வைத்துள்ளமையாது முள்ளிவாய்க்கால் பேரவலத்தை கண்முன்னே கொண்டு வந்துள்ளது.

ராகினி போன்ற எத்தனையோ குழந்தைகள் இறுதி யுத்தத்தின் போது தாயை இழந்து வாழ்ந்து கொண்டுதான் இருக்கின்றனர். இன்னும் எத்தனையோ துயரங்கள் நினைக்கும் போது பதறுகிறது நெஞ்சம்.

முள்ளிவாய்க்கால் நினைவேந்தல்

முள்ளிவாய்க்கால் 10வது ஆண்டு நினைவேந்தல் தற்போது தமிழர் தாயக்கத்தில் அனுஸ்டிக்கப்படுகின்ற நிலையில் சற்று முன்னர் முள்ளிவாய்க்கால் நினைவேந்தல் நிகழ்வின் பிரதான ஈகைச்சுடர் ஏற்றப்பட்டது.

இறுதி யுத்த நேரத்தில் தனது தாயாரை இழந்து நிர்க்கதியாக இருக்கும் சிறுமி ஒருவர் பிரதான ஈகைச் சுடரினை ஏற்றி வைத்தார்.

முல்லைத்தீவு, முள்ளிவாய்க்கால் நினைவேந்தல் முற்றத்தில் ஒன்று திரண்டுள்ள ஆயிரக்கணக்கான மக்களின் கண்ணீருடன் இந்த முள்ளிவாய்க்கால் நினைவு தினம் அனுஷ்டிக்கப்பட்டு வருகின்றது.

மதத் தலைவர்கள் பலரின் பங்களிப்புடன் முள்ளிவாய்க்கால் நினைவேந்தல் நிகழ்வு அனுஷ்டிக்கப்பட்டு வருகின்றது. தொடர்ந்து அங்குள்ள மதகுருமார்கள் உயரிழந்தவர்களை நினைவுகூர்ந்து மலரஞ்சலி செலுத்தியுள்ளனர்.

பிரதான ஈகைச் சுடர் ஏற்றிவைக்கப்ட்டதன் பின்னர் அங்கு அணித்திரண்டுள்ள பொதுமக்களால் சுடர்கள் ஏற்றப்படுகின்றன. தொடர்ந்து திருகோணமலை ஆதீனத்தின் தலைவரால் மே 18 ஆம் நாள் பிரகடணம் வாசிக்கப்பட்டது.

இலங்கையில் இஸ்லாமியர்களின் கடைகள், வீடுகள் மீது சில தினங்களுக்கு முன்னர் தாக்குதல் நடத்தப்பட்ட நிலையில் அவர்களுக்கு நிதியுதவி வழங்க தொழிலதிபர் ஒருவர் முன் வந்துள்ளதோடு, மற்றவர்களும் உதவ வேண்டும் என கோரிக்கை வைத்துள்ளார்.

இலங்கையில் இஸ்லாமியர்கள் வாழும் பகுதிகளில் சில தினங்களுக்கு முன்னர் தாக்குதல் நடத்தப்பட்டது. இஸ்லாமியர்களுக்கு சொந்தமான கடைகள், வீடுகள் மீது தாக்குதல் நடத்தப்பட்டதோடு மசூதிகள் மீதும் தாக்குதல் நடத்தப்பட்டது.
இதில் பலரின் உடைமைகள், பொருட்கள் சேதமடைந்தது.

இந்நிலையில் தனுஷ்க டி சில்வா என்ற நபர் டுவிட்டரில் ஒரு பதிவை வெளியிட்டுள்ளார். அதில், டுவிட்டரில் உள்ள சிங்கள மக்களுக்கு ஒரு வேண்டுகோள். அழிக்கப்பட்ட இஸ்லாமியர்களின் சொத்துகள், உடைமைகளை திரும்ப பெற நிதி திரட்ட முடியுமா? நாம் தான் இதற்கு உதவ வேண்டும்.

நான் என் சொந்த பணத்தில் இருந்து ரூ 50,000 கொடுத்து இதை தொடங்கி வைக்கிறேன். நீங்களும் உங்களால் முடிந்ததை கொடுங்கள், ஒருவர் ரூ.1000 கொடுத்தால் கூட போதுமானது. என் பதிவு அதிக நபர்களிடம் சென்றடைய இதை பகிருங்கள் என பதிவிட்டுள்ளார்.

இதையடுத்து தனுஷ்காவின் மனித நேய செயலுக்கு டுவிட்டரில் பாராட்டுகள் குவிந்து வருகிறது.

பொலிஸார் விடுத்துள்ள கடும் எச்சரிக்கை

நாட்டின் அமைதியை சீர்குலைக்கும் வகையிலும் வன்முறையை தூண்டும் வகையிலுமான பதிவுகளை சமூக வலைத்தளங்களில் பதிவேற்றம் செய்பவர்களுக்கு எதிராக கடுமையான சட்ட நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.

பொலிஸ் ஊடகப்பேச்சாளர் பொலிஸ் அத்தியட்சகர் ருவான் குணசேகர இதனை தெரிவித்துள்ளார். கடந்த சில நாட்களாக நாட்டில் ஏற்பட்ட அசாதாரண நிலையை தொடர்ந்து சமூக வலைதளங்கள் அனைத்தும் முடிக்கப்பட்டிருந்தன.

இந்நிலையில், நேற்று மாலை முதல் அந்த தடை நீக்கப்பட்டுள்ள நிலையில், பொலிஸ் ஊடகப்பேச்சாளர் பொலிஸ் அத்தியட்சகர் ருவான் குணசேகர இவ்வாறு எச்சரிக்கை விடுத்துள்ளார். இது குறித்து தொடர்ந்தும் கருத்து வெளியிட்டுள்ள அவர், “தற்போது நாட்டின் அனைத்து பிரதேசங்களிலும் அமைதி நிலைநாட்டப்பட்டுள்ளது. இவ்வாறாக அமைதியை பேணுவதற்கு உதவிய பலர் உள்ளனர்.

அவர்களுக்கு நன்றிகளை தெரிவித்துக்கொள்கின்றேன். இதேவேளை அமைதியை சீர்குலைக்கும் வகையிலான செயற்பாடுகளிலும் சட்டவிரோத நடவடிக்கைகளிலும் ஈடுபடுபவர்கள் தொடர்பில் விசாரணைகள் மேற்கொள்ளப்பட்டு வருகின்றன. இத்தகைய நடவடிக்கைகளில் ஈடுபடுபவர்களுக்கு எதிராக கடுமையாக சட்ட நடவடிக்கை எடுக்கப்படும்.

அத்துடன், வன்முறையை தூண்டும் வகையிலான பதிவுகளை சமூக வலைத்தளங்களில் பதிவேற்றம் செய்பவர்கள் தொடர்பில் விசாரணைகளை மேற்கொள்ளப்படுவதற்காக பொலிஸ் தலைமையகத்தினால் விசேட பொலிஸ் குழுவொன்று நியமிக்கப்பட்டுள்ளது.

அவர்கள் தொடர் பரிசோதனை நடவடிக்கைகளில் ஈடுபடுத்தப்பட்டுள்ளனர். ஆகவே, இத்தகைய வன்முறையை தூண்டும் வகையிலாக சமூகவலைத்தளங்களில் பதிவேற்றம் செய்பவர்கள் தொடர்பில் முதலில் கண்டறியப்பட்டவுள்ளது.

பரிசோதனை நடவடிக்கைகளுக்கு பின்னதாக அவ்வாறன பதிவுகளை சமூக வலைத்தளங்களில் பதிவேற்றம் செய்வோர் குற்றப்புலனாய்வு பிரிவினரால் மேலதிக விசாரணைகளுக்கு உட்படுத்தப்படுவர் எனவும் தெரிவித்தார்.

பௌத்த, கிறிஸ்தவ மத குருக்கள்

மினுவாங்கொடை மஸ்ஜிதுல் ஹுஜ்ஜாஜ் பள்ளிவாசலில் நேற்று இடம்பெற்ற ஜும்மா தொழுகையின் போது பௌத்த மற்றும் கிறிஸ்தவ மதத்தை சேந்த மதகுருக்கள் பாதுகாப்பு வழங்கியுள்ளனர்.

கடந்த மாதம் 21ம் திகதி இடம்பெற்ற தற்கொலை தாக்குதலை தொடர்ந்து, அண்மை காலமாக நாட்டின் பல இடங்களிலும், வனமுறை தலைத்தூக்கியிருந்தது. இதன்போது இஸ்லாமியர்களின் கடைகள், நிறுவனங்கள் மற்றும் மசூதிகள் மீது தாக்குதல் நடத்தப்பட்டன.

குறிப்பாக மினுவாங்கொடை பிரதேசத்தில் முஸ்லிம்களுக்கெதிராக இடம்பெற்ற இனவாத வன்முறை சம்பவத்தில் மினுவாங்கொடை மஸ்ஜிதுல் ஹுஜ்ஜாஜ் பள்ளிவாயில் கடுமையாக தாக்கப்பட்டு சேதங்களுக்குள்ளாக்கப்பட்டிருந்தது.

இந்நிலையிலேயே, குறித்த பள்ளிவாசலில் நேற்று இடம்பெற்ற ஜும்மா தொழுகையின் போது பௌத்த மற்றும் கிறிஸ்தவ மதத்தை சேந்த மதகுருக்கள் பாதுகாப்பு வழங்கியுள்ளனர்.

குறித்த பிரதேசத்தை சேர்ந்த பெளத்த விகாரை ஒன்றின் மதகுரு ஒருவரும் கிறிஸ்தவ குருக்கள் இருவரும் தொழுகை வேளையில் பள்ளிவாயலில் அமர்ந்து கண்காணிப்பில் ஈடுபட்டுள்ளனர்.

இலங்கை தமிழ் சகோதரர்கள்

அகதிகள் அந்தஸ்தை பெற தகுதி இல்லை எனக் கூறி இலங்கை தமிழ் இளைஞர்கள் இருவரை நாடுகடத்தும் முடிவுக்கு சுவிஸ் நீதிமன்றம் ஒப்புதல் அளித்துள்ளது. சுவிட்சர்லாந்தில் கடந்த 5 ஆண்டுகளாக குடியிருந்து வருகின்றனர் இலங்கை தமிழ் சகோதரர்களான ஜெலக்சன் (18) மற்றும் ஜெசிபன் (17).

கடும் உழைப்பாளிகளும் திறமைசாலிகளுமான இருவருக்கும் தற்போது அகதிகள் அந்தஸ்தை வழங்க முடியாது என சுவிட்சர்லாந்தின் இடம்பெயர்வுக்கான மாநில செயலகம் உறுதிபட தெரிவித்துள்ளது. மட்டுமின்றி கடந்த பிப்ரவரி மாதம் சுவிட்சர்லாந்தின் மத்திய நிர்வாக நீதிமன்றம் இந்த விவகாரத்தை உறுதியும் செய்துள்ளது.

சுவிட்சர்லாந்தில் தாங்கள் பாதுகாப்பையும் முன்னேற்றத்தையும் உணவர்வதாக ஜெலக்சன் தெரிவித்துள்ளார். சுவிட்சர்லாந்தில் பட்டப்படிப்பை முடித்த ஜெலக்சன் தற்போது பாடசாலை ஒன்றில் துணை ஆசிரியராக பணியாற்றி வருகிறார். அவரது சகோதரர் ஜெசிபன் கால்பந்தாட்டத்தில் அதிக ஈடுபாடு கொண்டுள்ளதால் கால்பந்து அணி ஒன்றில் இணைந்து செயல்பட்டு வருகிறார்.

தற்போது சகோதரர்கள் இருவரும் நாடுகடத்தப்படும் ஆபத்தில் இருப்பதால் இருவரும் மனமுடைந்து காணப்படுவதாக தெரியவந்துள்ளது.

சுவிஸில் தங்களுக்கு கிடைக்கப்பெற்ற தரமான கல்வி என்பது இலங்கையில் வாய்ப்பே இல்லை என கூறும் ஜெலக்சன், இலங்கை சென்று என்ன செய்யப் போகிறோம் என்பது தொடர்பில் குழப்பமாகவே உள்ளது என்கிறார்.

மட்டுமின்றி கடந்த ஏப்ரல் மாதம் தற்கொலை வெடிகுண்டு தாக்குதல் நடத்தப்பட்டுள்ளது. பாதுகாப்புக்கு அச்சுறுத்தல் இருப்பது மட்டுமின்றி, தீவிரவாதம் என்றாலே பயமாக இருக்கிறது என தெரிவித்துள்ளார் ஜெலக்சன்.

கடந்த 2014 ஆம் ஆண்டு தாயாரின் கடுமையான முயற்சியால் சகோதரர்கள் இருவரும் சுவிட்சர்லாந்துக்கு குடிபெயர்ந்ததாக கூறும் ஜெலக்சனின் உறவினர் ஷார்மி ரவி,

ஜெலக்சனின் தந்தை தமிழீழ விடுதலைப் புலிகள் ஆதரவாளர் என்பதால் ராணுவம் தொடர்ந்து அச்சுறுத்தலை அளித்து வந்தது என்றார்.

தற்போதைய சூழலில் ஜெலக்சனும் சகோதரரும் இலங்கை சென்றால், கண்டிப்பாக ராணுவத்தின் கையில் சிக்க வாய்ப்புள்ளது எனவும் ஷார்மி ரவி அச்சம் தெரிவித்துள்ளார்.

மேலும், இந்த இளம் வயதில் இலங்கை சென்று புதிதாக ஒரு வாழ்க்கை முன்னெடுப்பது என்பது கடினமான விடயம் எனவும் ஷார்மி ரவி தெரிவித்துள்ளார்.

சகோதரர்கள் இருவரையும் நாடுகடத்தும் முடிவுக்கு சுவிட்சர்லாந்தின் மத்திய நிர்வாக நீதிமன்றம் ஒப்புதல் அளித்துள்ளதை கடுமையாக விமர்சித்த Urs Hofer என்ற ஆசிரியர்,

இருவரும் திறமைசாலிகள் எனவும் தொழில் ரீதியாக சுவிட்சர்லாந்தில் அவர்களுக்கு நல்ல வாய்ப்புகள் உள்ளன எனவும் தெரிவித்துள்ளார்.

இதனிடையே, இலங்கையில் தற்போதுள்ள சூழலை குறிப்பிட்டு மீண்டும் புகலிடம் கோரி விண்ணப்பம் வழங்க சட்ட நிபுணர்கள் ஆலோசித்து வருவதாக கூறப்படுகிறது.

இலங்கை குண்டுவெடிப்பு தாக்குதலில் தனது மூன்று குழந்தைகளை இழந்த கோடீஸ்வரர் உருக்கமான அறிக்கை ஒன்றை வெளியிட்டுள்ளார்.

இலங்கையில் ஈஸ்டர் தினத்தில் நடத்தப்பட்ட குண்டுவெடிப்பு தாக்குதலில் 253 பேர் கொல்லப்பட்டனர். இதில் ஸ்கொட்லாந்தை சேர்ந்த பெரிய கோடீஸ்வர தொழிலதிபர் ஆண்டர்ஸ் ஹோல்ச் மற்றும் அன்னி தம்பதிகளின் மூன்று பிள்ளைகளான அல்மா (15), அக்னீஸ் (12) மற்றும் அல்பிரட் (5) ஆகியோரும் அடக்கமாகும்.

இந்நிலையில் பிள்ளைகளை இழந்து தவித்து கொண்டிருக்கும் தங்களுக்கு ஆறுதலான வார்த்தைகளை கூறி மனதை தேற்றியவர்களுக்கு ஆண்டர்ஸ் – அன்னி தம்பதி நன்றி கூறி உருக்கமான அறிக்கையை வெளியிட்டுள்ளனர்.

அதில், எங்கள் மூன்று பிள்ளைகளை இழந்த பின்னர் எங்களுக்கு கிடைத்த இரங்கல்கள், அனுதாபங்கள் மற்றும் மனதை தேற்றும் வார்த்தைகளுக்கு நெஞ்சார்ந்த நன்றியை தெரிவித்து கொள்கிறோம். எங்களுக்கு ஆறுதல் அளிக்க கூறப்பட்ட பலவார்த்தைகள் எங்கள் இதயத்தை தொட்டது.

இலங்கை தாக்குதலில் உயிரிழந்தவர்களின் குடும்பத்தாருக்கும் எங்களின் இரங்கல்களை தெரிவித்து கொள்கிறோம். எங்கள் மூன்று குழந்தைகளின் நினைவுகள் மற்றும் எண்ணங்கள் எப்போதும் எங்கள் இதயத்தில் இருக்கும் என தெரிவித்துள்ளனர்.

ஆண்டர்ஸ் – அன்னி தம்பதிக்கு மொத்தம் நான்கு பிள்ளைகள் என்ற நிலையில் தற்போது மகள் ஆஸ்டிரிட் உடன் வசித்து வருகிறார்கள் என்பது குறிப்பிடத்தக்கது.