மரணத்தின் காரணம் வெளியானது

வவுனியா நெளுக்குளம் கிராம சேவையாளர் பிரிவுக்குட்பட்ட சுற்றுவட்ட வீதியில் நேற்று (20.03.2019) அதிகாலை வெட்டுக் காயங்களுடன் கிணற்றிலிருந்து இரண்டு பிள்ளைகளின் தாய் சடலமாக மீட்கப்பட்டிருந்தார்.

கடந்த சனிக்கிழமை கணவர் வெளிநாட்டுக்கு சென்றிருந்த நிலையில், வீட்டில் குறித்த பெண்ணும் அவரது இரு பிள்ளைகளும் தனிமையில் இருந்துள்ளனர். இவர்களுக்கு பாதுகாப்பாக அயல்வீட்டுப் பெண்ணொருவரும் இவர்களுடன் இருந்துள்ளார்.

காலையில் அயலவர்கள் வீட்டுக்குச்சென்றபோது, இரு பிள்ளைகளும் அவர்களுக்கு பாதுகாப்பாக இருந்த பெண்ணும் உறங்கிக் கொண்டிருந்தனர். குறித்த பெண்ணை காணவில்லை. அவரை தேடி அறைக்குள் சென்றபோது, அங்கு இரத்தம் காணப்பட்டுள்ளது.

இதனையடுத்து பெண்ணை வீடு முழுவதும் தேடியுள்ளனர். பின்னர் வீட்டின் ஒதுக்குப்புறத்தில் காணப்படும் பாவனையற்ற கிணற்றினை எட்டிப் பார்வையிட்ட சமயத்தில் கிணற்றில் சடலமாக மிதந்துள்ளார்.

இதனையடுத்து நெளுக்குளம் பொலிஸாருக்கு தகவல் வழங்கப்பட்டது. சம்பவ இடத்திற்கு விரைந்த வவுனியா மற்றும் நெளுக்குளம் பொலிஸார் மேலதிக விசாரணைகளை மேற்கொண்டு வருகின்றனர்.

பொலிஸாரினால் குற்றத்தடவியல் பொலிஸாருக்கு தகவல் வழங்கப்பட்டது. சம்பவ இடத்திற்கு விரைந்த குற்றத்தடவியல் பொலிஸாரினால் கிணற்றிற்க்கு செல்லும் பாதையில் கத்தியொன்றை மீட்டெடுத்துள்ளனர்.

சடலமாக மீட்கப்பட்டவர் 11 மற்றும்5 வயதுடைய இரு பிள்ளைகளின் தாயார் கௌரி (வயது 32) என பொலிஸார் தெரிவித்தனர்.

இதேவேளை வவுனியா நீதிவான் திருமதி தஸ்னீம் பௌசான் மற்றும் வவுனியா சட்ட வைத்திய அதிகாரி தம்மி லொவிஸ்லோவா ஆகியோர் சம்பவம் இடம்பெற்ற இடத்திற்கு நேரடியாக சென்று சடலத்தினை பார்வையிட்டதுடன் பிரேத பரிசோதனைக்கும் உத்தரவிட்டனர். இதனையடுத்து சடலம் வவுனியா வைத்தியசாலைக்கு கொண்டு செல்லப்பட்டுள்ளது.

கழுத்தில் கத்திக்குத்து காயம் இருந்தது. எனினும், இறப்பு காயத்தால் நிகழவில்லை. நீரில் மூழ்கி மூச்சுத் திணறியே பெண் இறந்ததாக பிரேத பரிசோதனை அறிக்கையில் குறிப்பிடப்பட்டுள்ளது.

சிகரெட் பாவனைக்கு தடை

வவுனியாதெற்கு தமிழ் பிரதேசசபையின் மாதாந்த அமர்வு தவிசாளர் து.நடராஜசிங்கம் தலைமையில் நேற்றுமுன்தினம் நடைபெற்றது. இதன்போதே குறித்த தீர்மானம் நிறைவேற்றப்பட்டுள்ளது.

வவுனியா தெற்கு பிரதேசசபைக்குட்பட்ட பகுதிகளில் உள்ள வர்த்தக நிலையங்களில் சிகரெட் பாவனையை முற்றாக தடைசெய்ய வேண்டும் என பிரதேசசபை உறுப்பினர் கா.பார்தீபனால் கடந்த மாதம் நடைபெற்றருந்த சபை அமர்வில் பிரேரணை ஒன்று முன்வைக்கப்பட்டது.

இவ்விடயம் தொடர்பாக பிரதேசசபைக்கு அதிகாரங்கள் இருக்கிறதா என்பதை ஆராய்ந்து அடுத்து வருகின்ற அமர்வில் அதனை தீர்மானமாக எடுக்கலாம் என்றும் சபை உறுப்பினர்களால் கடந்த அமர்வில் தெரிவிக்கப்பட்டிருந்தது.

இந்நிலையில் நேற்றைய தினம் நடைபெற்ற சபை அமர்வில் இவ்விடயம் ஆரயபட்டதுடன் தெற்கு பிரதேசசபைக்குட்பட்ட அனைத்து வர்தக நிலையங்களிலும் சிகரெட் பாவனையை தடைசெய்வது என ஏகமனதாக தீர்மானம் மேற்கொள்ளப்பட்டுள்ளது.

வவு­னியா, மூனா­மடு நாகபூசணி அம்­மன் ஆல­யக் காணியை அப­க­ரித்து பௌத்த மதத்­த­லம் அமைக்க முயற்­சிக்­கப்­ப­டு­கின்­றது என்று குற்றஞ்சாட்­டப்­ப­டு­கின்­றது.

முனா­மடு மற்­றும் பேயா­டிக்­கூ­ழாங்­கு­ளம் ஆகிய இடங்­க­ளில் தமிழ் மக்­கள் தொன்­று­தொட்டு விவசாயம் மேற்­கொண்டு வரு­கின்­ற­னர். அவர்­கள் தமது வயல் நிலங்­க­ளுக்கு அருகே ஆல­யங்­களை அமைத்து வழி­பட்டு வந்­த­து­டன், இளைப்­பா­று­மி­டம் என்­ப­வற்­றை­யும் அமைத்­தி­ருந்­த­னர்.

மூனா­ம­டு­வில் அமைந்­தி­ருந்த நாகபூசணி அம்­மன் ஆல­யம் நீண்டகாலமாக தமிழ் மக்­க­ளால் பேணப்­பட்டு வந்தது.

1995ஆம் ஆண்­டின் பிற்­ப­கு­தி­யில் அந்­தப் பகு­தியை இலங்கை இரா­ணு­வம் கைய­கப்­ப­டுத்­தி­யது. அவர்களால் அமைக்­கப்­பட்ட முகா­மில் வழிபாட்டுக்காக புத்­தர் சிலை ஒன்­றை­யும் அவர்கள் நிறு­வி­யி­ருந்­த­னர்.

பின்­னர் அந்­தக் காணி­கள் மக்­கள் பயன்பாட்டுக்காக விடு­விக்­கப்­பட்­ட­போ­தும், அங்கு நிறு­வப்­பட்ட புத்­தர் சிலை அகற்­றப்­ப­ட­வில்லை. தற்போது வவு­னி­யா­வில் உள்ள பிக்கு ஒரு­வர் அந்­தப் பகு­தி­யைத் தன்­னி­டம் ஒப்­ப­டைக்க வேண்­டும் என்று கோரு­கின்­றார் என்று குற்­றஞ்­சாட்­டப்­ப­டு­கின்­றது.

இது தொடர்­பில் வவு­னியா மாவட்ட அந்­த­ணர் ஒன்றியம், அந்­தக் காணி இந்து ஆல­யம் அமைந்துள்ள பகுதி. அந்­தக் காணி நாகபூசணி அம்மன் ஆல­யக் காணி என்று பிர­தேச செய­ல­க­மும் கூறி­யுள்­ளது. அதற்­கான ஆதா­ரங்­க­ளும் உள்­ளன. அதை வேறு எவ­ரும் உரிமை கோரவோ, கைய­கப்­படுத்­தவோ அனு­ம­திக்க முடி­யாது என்று கூறியுள்ளது.

வடக்­கில் புத்­தர் சிலை­கள் நிறு­வப்­பட்­டுள்ள காணி­க­ளில் பெரும்­பா­லா­னவை தனி­யார் காணி­களே. புத்­தர் சிலையை அனைத்து இடங்­க­ளி­லும் நிறுவி அந்த இடங்­க­ளைச் சொந்­தம் கொண்­டாட நினைப்­பது நல்­லி­ணக்­கத்­தைச் சீர்­கு­லைக்­கும். புத்த பெரு­மா­னின் போத­னை­களை ஏற்று நடக்­கும் எவ­ரும் இவ்­வா­றான காரி­யங்­க­ளைச் செய்ய மாட்­டார்­கள்.

அந்த இடத்­தில் நிறு­வப்­பட்ட புத்­தர் சிலையை அகற்றி, தமிழ் மக்­கள் பூர்­வீ­க­மாக மேற்­கொண்­டு­வ­ரும் வழி­பாட்டு நட­வ­டிக்­கை­க­ளுக்கு இட­ம­ளிக்க வேண்­டும் என்­றும் வவு­னியா மாவட்ட அந்­த­ணர் ஒன்­றி­யம் வலி­யு­றுத்­தி­யுள்­ளது.

அதே­வேளை, இந்த விட­யம் தொடர்­பான கலந்­து­ரை­யா­டல் ஒன்று எதிர்­வ­ரும் 21ஆம் திகதி வவு­னியா மாவட்­டச் செய­ல­கத்­தில் நடை­பெ­ற­வுள்­ளது என்று தெரி­விக்­கப்­ப­டு­கின்­றது.

-உதயன்-

சாராயம் விற்பனை

வவுனியா நெளுக்குளத்தில் பௌர்ணமி தினமான நேற்று (20.03.2019) சாராய விற்பனையில் ஈடுபட்ட நபர் ஒருவரை கைது செய்துள்ளதாக வன்னி பிராந்திய பிரதி பொலிஸ் மா அதிபரின் கீழ் செயற்படும் விசேட போதை ஒழிப்பு பொலிசார் தெரிவித்தனர்.

குறித்த நபர் வீட்டில் வைத்து சாராய விற்பனையில் ஈடுபடுவதாக பொலிசாருக்கு கிடைத்த தகவலிற்கு அமைய சாராயத்தை கொள்வனவு செய்பவர்கள் போல சென்ற பொலிசார் அவரை கையும் மெய்யுமாக பிடித்துள்ளனர்.

சம்பவத்தில் நெளுக்குளம் பகுதியை சேர்ந்த 45 வயதான நபர் ஒருவர் கைது செய்யப்பட்டதுடன் அவரிடமிருந்து இரண்டரை போத்தல் சாரயம் பறிமுதல் செய்யப்பட்டதாகவும் மேலதிக விசாரணைகளின் பின்னர் வவுனியா மாவட்ட நீதிவான் நீதிமன்றத்தில் ஆஜர்படுத்தவுள்ளதாக பொலிசார் மேலும் தெரிவித்தனர்.

கையெழுத்துப் போராட்டம்

வடமாகாணத்தில் தனியார் நுண்கடன் நிதி நிறுவனங்களிடம் அடிமைப்பட்டு சித்திரைவதைப்படும் பெண்களின் கடனை தள்ளுபடி செய்ய வலியுறுத்தி நேற்று (20.03) கையெழுத்துப் போராட்டம் சிதம்பரபுரம் கற்குளம் படிவம் ஒன்று பழனி முருகன் ஆலயத்தில் ஆரம்பிக்கப்பட்டுள்ளது.

சமூக விழிப்புணர்வுக்கான மக்கள் ஒன்றியம், உழைக்கும் பெண்கள் விடுதலை முன்னணியின் ஏற்பாட்டில் வடபகுதியில் தொடர்ந்து இடம்பெறும் கையெழுத்துப் போராட்டத்தில் பெற்றுக்கொள்ளப்படும் கையெழுத்துக்கள் ஜனாதிபதி மைத்திரிபால சிறிசேனாவிற்கு அனுப்பிவைக்கப்படவுள்ளன.

வடபகுதியில் இடம்பெறும் கையெழுத்துப் போராட்டம் தென்பகுதியிலும் அங்குள்ள அமைப்பினருடன் இணைந்து மேற்கொள்ள நடவடிக்கை எடுக்கப்பட்டுள்ளதாகவும் தெரிவிக்கப்பட்டுள்ளது.

நேற்று ஆரம்பிக்கப்பட்ட கடனை தள்ளுபடி செய்ய வலியுறுத்திய கையெழுத்துப் போராட்டத்தில் அப்பகுதியிலுள்ள பெருமளவான பெண்கள் கலந்து கொண்டனர்.

செட்டிகுளத்தில் காணிப்பிணக்குகள் தொடர்பான 88 முறைப்பாடுகள் கிடைக்கப்பெற்றுள்ளதாக வவுனியா விசேட காணி மத்தியஸ்தர் சபை தவிசாளர் இ.நவரட்ணம் தெரிவித்துள்ளார்.
இது தொடர்பில் அவர் மேலும் தெரிவிக்கையில்,

வவுனியா, செட்டிகுளம் பிரதேசத்தில் உள்ள காணி உரிமம் மற்றும் உரிமை, காணி ஆவணம், காணி எல்லை என்பன தொடர்பான 88 பிணக்குகள் வவுனியா விசேட காணி மத்தியஸ்தர் சபையிடம் ஆற்றுப்படுத்தப்பட்டுள்ளது.

இதில் முதல் கட்டமாக 40 பிணக்குகள் தொடர்பான கலந்துரையாடல் மற்றும் விசாரணைகள் எதிர்வரும் 23 ஆம் திகதி சனிக்கிழமை காலை 9 மணியில் இருந்து 1 மணிவரை செட்டிகுளம் பிரதேச செயலகத்தில் இடம்பெறும்.

சம்மந்தப்பட்டவர்களுக்கான அழைப்புக் கடிதங்கள் தபாலில் அனுப்பி வைக்கப்பட்டுள்ளன. அவர்கள் வருகை தந்து தமது காணிப் பிணக்குகள் தொடர்பில் தீர்வினைப் பெறுவதற்குரிய ஒழுங்குகள் மேற்கொள்ளப்பட்டுள்ளது.

அத்துடன் காணிப் பிணக்கு உடையோர் வருகை தந்து புதிய முறைப்பாடுகளையும் அன்றைய தினம் செய்ய முடியும் எனவும் அவர் மேலும் தெரிவித்தார்.

திரிபீடக வந்தனா வாரம்

தூய பௌத்த போதனைகள் உள்ளடங்கிய தேரவாத திரிபீடகத்தை உலக மரபுரிமையாக பிரகடனப்படுத்துவதற்கான திரிபீடக வந்தனா வாரம் வவுனியாவில் அனுஸ்டிக்கப்பட்டு வருகின்றது. இதனை முன்னிட்டு வவுனியாவின் பல்வேறு பகுதிகளிலும் பௌத்த கொடிகள் பறக்கவிடப்பட்டுள்ளன.

ஜனாதிபதி மைத்திரிபால சிறிசேனவின் ஆலோசனைக்கு அமைவாக கடந்த 16 ஆம் திகதி முதல் 23 ஆம் திகதி வரை திரிபீடக வந்தனா (புனித திரிபீடக) வாரமாக நாடு முழுவதும் பிரகடனப்படுத்தப்பட்டுள்ளது.

ஜனாதிபதி செயலகம், புத்ததாசன அமைச்சு, வீடமைப்பு நிர்மாணத்துறை மற்றும் கலாசார அலுவல்கள் அமைச்சு என்பன ஏனைய அமைச்சுகள்களுடன் இணைந்து இந்த திரிபீடக வந்தனா வாரத்தில் பல்வேறு நிகழ்வுகளை நடத்தி வருகின்றது.

இவ்வாரம் முழுவதும் அரச நிறுவனங்கள், தனியார் நிறுவனங்கள், இல்லங்கள், வாகனங்கள், வீதிகள் எங்கும் பௌத்த கொடியினை காட்சிப்படுத்துமாறு வேண்டுகோள் விடுக்கப்பட்டுள்ளது.

வவுனியா நகரம் மற்றும் வவுனியாவின் பல பகுதிகளிலும் வீதிகளில் பௌத்த கொடி காட்சிப்படுத்தப்பட்டுள்ளதுடன், அரச திணைக்களங்கள், இராணுவ முகாம்கள், பொலிஸ் நிலையம் என்பவற்றிலும் பௌத்த கொடிகள் காட்சிப்படுத்தப்பட்டுள்ளன.

தேரவாத திரிபீடகத்தினை உலக மரபுரிமையாக பிரகடனப்படுத்துமாறு யுனெஸ்கோ தாபனத்திற்கு உலக அனைத்து பௌத்த நாடுகளினதும் ஒத்துழைப்புடன் இலங்கை முன்மொழிவினை சமர்ப்பிக்கும் தேசிய மகோற்சவம் மூன்று நிக்காயக்களின் மகாநாயக்கர்கள் உள்ளிட்ட மகாசங்கத்தினரின் முன்னிலையில், ஜனாதிபதி மைத்திரிபால சிறிசேன அவர்களின் பங்குபற்றுதலில் எதிர்வரும் 23 ஆம் திகதி கண்டி தலதா மாளிகையில் இடம்பெறவுள்ளமை குறிப்பிடத்தக்கது.