இந்தியாவில் பிரசவத்தின்போது மருத்துவர்களின் அலட்சியத்தால் குழந்தைகள் உயிரிழந்துபோவது தொடர்கதையாக நடந்து வருகிறது.

ராஜஸ்தான் மாநிலத்தில் போதையில் செவிலியர் ஒருவர் பிரசவம் பார்த்த காரணத்தால் தலை வேறு, உடல் வேறாக குந்தை வெளியே வந்த சம்பவம் நடந்தது. தற்போது, அதே போன்று ஒரு சம்பவம் தமிழகத்தின் காஞ்சிபுரம் மாவட்டத்தில் நடந்துள்ளது.

கூவத்தூர் ஆரம்ப சுகாதார நிலையத்தில் பொம்மி என்ற நிறைமாத கர்ப்பிணி அனுமதிக்கப்பட்டிருந்தார். பிரசவ வலி அதிகரித்த நிலையில், இரவுப் பணி மருத்துவர் இல்லாததால் செவிலியர் முத்துக்குமாரியே பிரசவம் பார்த்ததாகக் கூறப்படுகிறது.

போதிய பயிற்சி இல்லாத செவிலியர் என்பதால் குழந்தைப் பிறப்பின்போது குழந்தையின் தலையில் இடுக்கி வைத்து எடுத்துள்ளார். அதிக அழுத்தம் கொடுத்து தலையை எடுத்ததில் குழந்தையின் தலை மட்டும் தனியாக வெளியே வந்தது. பின்னர் ஆபத்தை உணர்ந்த செவிலியர் அவசர ஊர்தி மூலம் செங்கல்பட்டு அரசு மருத்துவமனைக்கு கர்ப்பிணி பொம்மியை அனுப்பி வைத்துள்ளார்.

அங்கு, அறுவை சிகிச்சை மூலம் குழந்தையின் உடல் வெளியே எடுக்கப்பட்டது. தற்போது ஆபத்தான நிலையில் செங்கல்பட்டு அரசு மருத்துவமனையில் பொம்மி சிகிச்சை பெற்று வருகிறார். செவிலியர் மீது நடவடிக்கை எடுக்க உறவினர்கள் வலியுறுத்தி வருகின்றனர். அவர்கள் போராட்டம் நடத்த வாய்ப்பிருப்பதால் கூவத்தூர் அரசு ஆரம்ப சுகாதார நிலையம் மற்றும் செங்கல்பட்டு அரசு மருத்துவமனையில் பொலிஸ் பாதுகாப்பு அதிகரிக்கப்பட்டுள்ளது.

பொது சுகாதாரத்துறை இயக்குநர் குழந்தைசாமி கூறியதாவது, தாயின் வயிற்றில் இறந்த நிலையில் சிசு 2 நாட்கள் இருந்துள்ளது. அதுவே தலை துண்டானதற்கு காரணமாகும். குழந்தையின் எடை 1.5 கிலோவாக மட்டுமே இருந்தது. குழந்தையின் தலை துண்டான விவகாரம் குறித்து விசாரணை நடத்த செங்கல்பட்டு அரசு மருத்துவமனை மருத்துவகல்லூரியின் மகப்பேறு தலைமை மருத்துவர் தலைமையில் 4 பேர் கொண்ட குழு அமைக்கப்பபட்டுள்ளது என்று கூறியுள்ளார்.

ஒன்றாக உயிரை விட்ட சோகம்

தமிழகத்தில் காதல் திருமணம் செய்த தம்பதி விஷம் குடித்து தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது. தருமபுரி மாவட்டத்தின் பாப்பிரெட்டிப்பட்டியை சேர்ந்தவர் சரவணன் (35). இவருடைய மனைவி அருணா (25). இருவரும் 3 ஆண்டுகளுக்கு முன்னர் காதல் திருமணம் செய்து கொண்ட நிலையில் தம்பதிக்கு கனிஷ்கா (1½) என்ற மகள் உள்ளார்.

சமீபத்தில் கனிஷ்காவுக்கு உடல்நிலை பாதிக்கப்பட்ட நிலையில் உள்ளூரில் உள்ள பல்வேறு மருத்துவமனையில் காட்டியும் சரியாகாததால் கோவையில் உள்ள ஒரு மருத்துவமனைக்கு கொண்டு சென்று சிகிச்சையளித்தனர்.

பின்னர் நேற்று முன் தினம் ஊருக்கு திரும்பினர். நேற்று சரவணனின் உறவினர் ஒருவர் இறந்து விட்டார். இதற்காக சரவணனின் உறவினர்கள் அங்கு சென்று விட்டு நேற்று மாலை அவர்கள் ஊருக்கு திரும்பினார்கள்.

அப்போது உறவினர் ஒருவர் சரவணன் வீட்டுக்கு வந்த போது சரவணன், அருணா, கனிஷ்கா ஆகிய 3 பேரும் விஷம் குடித்த நிலையில் வீட்டில் மயங்கி கிடந்தனர். உடனே அவர்களை மீட்டு அரசு மருத்துவமனையில் சேர்த்த நிலையில் அங்கு சரவணனும், அருணாவும் பரிதாபமாக இறந்தனர்.

குழந்தை கனிஷ்காவுக்கு தீவிர சிகிச்சையளிக்கப்பட்டு வருகிறது. இதுகுறித்து பொலிசார் வழக்குப்பதிவு செய்து விசாரணை நடத்தி வருகிறார்கள். கணவன், மனைவி இடையே அடிக்கடி குடும்ப தகராறு ஏற்பட்டு வந்ததாக கூறப்படுகிறது. இதன் காரணமாக இருவரும் தற்கொலை செய்தார்களா அல்லது வேறு காரணமா என விசாரணை நடத்தப்பட்டு வருகிறது.

4 பேர் சடலமாக மீட்பு

ஆந்திர பிரதேச மாநிலத்தில் ஒரே குடும்பத்தை சேர்ந்த 4 பேர் சடலமாக மீட்கப்பட்டுள்ள சம்பவம் பெரும் சோகத்தை ஏற்படுத்தியுள்ளது. ஆந்திராவின் குர்நூல் மாவட்டத்தை சேர்ந்தவர் வீரன் ஜானியுலு (28). இவர் தனது மனைவி வசந்தா (25), மகள் ராம லட்சுமி (7), மகன் ராஜேஷ் (5) ஆகியோருடன் வசித்து வருகிறார்.

நேற்று முழுவதும் இவர்களுடைய வீடு திறக்கப்படாமல் உள்தாழ்ப்பால் போடப்பட்டிருந்துள்ளது. இதனால் சந்தேகமடைந்த பக்கத்து வீட்டை சேர்ந்த ஒருவர் ஜன்னல் வழியே எட்டிப்பார்த்துள்ளார். அப்போது 4 பேரும் தூக்கில் தொங்கிய நிலையில் சடலமாக கிடந்துள்ளனர். இதனை பார்த்து அதிர்ச்சியடைந்த நபர், உடனடியாக பொலிஸாருக்கு தகவல் கொடுத்துள்ளார்.

அதன்பேரில் சம்பவ இடத்திற்கு வந்த பொலிஸார், 4 பேரின் உடல்களையும் கைப்பற்றி பிரேத பரிசோதனைக்காக மருத்துவமனைக்கு அனுப்பி வைத்தனர். பின்னர் இதுகுறித்து பொலிஸார் கூறுகையில், வீரன் ஜானியுலுவின் தினசரி வருமானத்தில் தான் குடும்பம் நடந்துள்ளது. மகிழ்ச்சியாக இருந்த குடும்பத்தில் கடந்த சில நாட்களாகவே கணவன், மனைவிக்கு இடையில் கருத்து வேறுபாடு ஏற்பட்டுள்ளது.

ஆனால் எந்த காரணத்திற்கான தற்கொலை செய்துகொண்டனர் என்பது தெரியவில்லை. முதலில் குழந்தைகளை தூக்கில் மாட்டிய பின்னர் தான் தம்பதியினர் தற்கொலை செய்திருக்க வேண்டும். கொலைக்கான காரணம் குறித்து தொடர்ந்து விசாரணை மேற்கொண்டு வருகிறோம் என தெரிவித்துள்ளார்.

நேர்ந்த விபரீதம்

தமிழகத்தில் உயிருக்கு உயிராக நேசித்த காதலனுக்கு வேறு பெண்ணுடன் திருமண நிச்சயதார்த்தம் நடந்ததால் மனமுடைந்த இளம்பெண் தற்கொலை செய்து கொண்டுள்ளார். வேலூர் மாவட்டத்தை சேர்ந்தவர் சுகுமார் (26). இவர் 2 ஆண்டுகளாக ரோந்து பொலிசில் தற்காலிக பணியில் இருந்தார். இந்நிலையில் வைஷ்ணவி (20) என்ற கல்லூரி மாணவியும், சுகுமாரும் காதலித்து வந்தனர்.

இந்த காதல் இரு குடும்பத்தாருக்கும் தெரியவந்த வந்த நிலையில் சுகுமாரின் பெற்றோர், வைஷ்ணவி பெற்றோரிடம் சென்று பெண் கேட்டனர். அதற்கு, வைஷ்ணவி கல்லூரியில் படித்து வருவதால் 2 ஆண்டுகள் கழித்து இது குறித்து பார்க்கலாம் என அவர் குடும்பத்தார் கூறியதாக தெரிகிறது.

இந்நிலையில் சுமாருக்கு மத்திய ரிசர்வ் பொலிசில் வேலை கிடைத்ததால் டெல்லிக்கு சென்றுவிட்டார். இதனையடுத்து சுகுமாருக்கு திருமணம் செய்ய அவரது பெற்றோர் முடிவு செய்து வேறு இடத்தில் பெண் பார்த்து கடந்த வாரம் நிச்சயதார்த்தம் செய்தனர்.

இதுபற்றி தகவல் அறிந்த வைஷ்ணவி சில நாட்களாக மனமுடைந்து காணப்பட்டார். நேற்று முன்தினம் காலை வெகு நேரமாகியும் அவர் எழுந்திருக்காததால் அதிர்ச்சி அடைந்த பெற்றோர், வைஷ்ணவியை அரசு மருத்துவமனைக்கு கொண்டு சென்றனர்.

அங்கு வைஷ்ணவியை பரிசோதித்த மருத்துவர்கள் அவர் ஏற்கனவே இறந்துவிட்டதாக தெரிவித்தனர்.
இதுதொடர்பாக பொலிசில் புகார் அளிக்கப்பட்ட நிலையில் பொலிசார் வழக்குப்பதிவு செய்து, உடலை பிரேத பரிசோதனைக்கு அனுப்பி வைத்தனர்.

பின்னர் வைஷ்ணவியின் உடல் நேற்று காலை வீட்டிற்கு வந்த நிலையில் அவரது உறவினர்கள் வைஷ்ணவியின் சாவுக்கு காரணமான சுகுமாரை கைது செய்ய வலியுறுத்தி முக்கிய சாலையில் மறியலில் ஈடுபட்டனர். இதன் பின்னர் பொலிசார் அங்கு குவிக்கப்பட்டனர். இதனால் அங்கு பரபரப்பு ஏற்பட்டது.

அறை எண் 102 இல் நடந்த சோகம்

பணத்திற்கு ஆசைப்பட்டு சிங்கப்பூரில் இருந்து நகை கொண்டு வந்த நபர், ஏற்பட்ட பிரச்சனை காரணமாக தனது அறையில் தூக்குபோட்டு தற்கொலை செய்துகொண்டார். கடலூர் மாவட்டம் பண்ருட்டியைச் சேர்ந்த சிவக்குமார் என்பவர் சிங்கப்பூரில் வெல்டராக வேலை பார்த்து வந்துள்ளார். எந்திரத்தில் இவரது கைவிரல் சிக்கிய காயமடைந்ததையடுத்து சிகிச்சைக்கு பின்னர் தாயகம் திரும்ப முடிவு செய்துள்ளார்.

சிங்கப்பூரியில் இருந்து மலேசியா வழியாக சென்னை வந்துள்ளார். இவர் மலேசியா விமான நிலையத்தில் நின்றுகொண்டிருக்கையில் சாதிக் என்பவர் சிவக்குமாரை அணுகி, 150 கிராம் தங்க நகையை கொடுத்து இதனை சென்னை விமான நிலையத்தில் பைசல் என்பவரிடம் கொடுத்தால் உனக்கு பணம் தருவேன் என கூறியுள்ளார்.

பணத்திற்காக சிவக்குமாரும் அந்த நகையை வாங்கிகொண்டார். ஆனால் கூறியபடி, பைசலிடம் நகையை சிவக்குமார் கொடுக்கவில்லை. கேட்டதற்கு மலேசியாவில் நடைபெற்ற சோதனையின்போது சுங்க அதிகாரிகள் அதனை வாங்கிகொண்டதாக தெரிவித்துள்ளார்.

சாதிக்கின் கூட்டாளிகள் அஜ்மல், தங்கராஜ் மற்றும் பைசல் ஆகிய மூவரும் சிவக்குமாரை திருவல்லிக்கேணியில் உள்ள தங்கும் விடுதிக்கு அழைத்து சென்று நகை எங்கு இருக்கிறது என மிரட்டியுள்ளனர்.

மினா எனும் விடுதியில் அறை எண் 102-ல் சிவக்குமாரை தங்க வைத்து, தொடர்ந்து விசாரித்துள்ளனர். இதனால் மனம் உடைந்த சிவக்குமார் அந்த அறையிலேயே தூக்குபோட்டு தற்கொலை செய்துகொண்டார்.

சிவக்குமாரின் சடலம் பிரேத பரிசோதனைக்கு அனுப்பப்பட்டுள்ள நிலையில், அவரை தற்கொலைக்கு தூண்டியதாக அஜ்மல் மற்றும் தங்கராஜ், அகமது பைசல் ஆகியோர் மீது வழக்குப்பதிவு செய்யப்பட்டுள்ளது.

மனைவியை கத்தியால் குத்திய கணவன்

தமிழகத்தில் நீதிபதி கண்முன்னே மனைவியை கணவன் கத்தியால் குத்தியுள்ள சம்பவம் அங்கு பலரையும் அதிர்ச்சிக்குள்ளாக்கியுள்ளது. சென்னை ஸ்ரீபெரும்புதூரைச் சேர்ந்தவர் சரவணன். மாநகர பேருந்து ஓட்டுனராக இருக்கும் இவருக்கு வரலட்சுமி என்ற மனைவி உள்ளார்.

இந்நிலையில் இவர்கள் இருவருக்கும் அடிக்கடி பிரச்சனை வந்ததால், சென்னை உயர்நீதிமன்ற வளாகத்தில் இருக்கும் குடும்ப நல நீதிமன்றத்தில் இது தொடர்பான வழக்கு கடந்த ஐந்து வருடங்களாக நடைபெற்று வருகிறது. இதையடுத்து இரண்டு பேரும் இன்று வழக்கு விசாரணைக்காக நீதிமன்றத்திற்கு வந்துள்ளனர்.

இருவரும் பார்த்து நீண்ட நாட்கள் ஆகிவிட்டதால், ஒன்றாக அமர்ந்து பேசியுள்ளனர். அப்போது இருவருக்குள் திடீரென்று வாக்குவாதம் ஏற்பட, கோபத்தின் உச்சிக்கு சென்ற சரவணன் திடீரென்று தான் மறைத்து வைத்திருந்த கத்தியால் கண்ணிமைக்கும் நேரத்தில் வரலட்சுமியின் நெஞ்சில் கத்தியால் குத்தினார்.

இது அங்கிருந்த நீதிபதி கண்முன்னே நடந்துள்ளது. அதன் பின் இதைக் கண்ட அங்கிருந்த பொலிசார் உடனடியாக அவரை மடபிடிக்க, வரலட்சுமி ஆம்புலன்ஸ் மூலம் மருத்துவமனைக்கு கொண்டு செல்லப்பட்டார். கைது செய்யப்பட்ட சரவணனிடம் விசாரணை நடத்தி வருவதாக பொலிசார் தெரிவித்துள்ளனர்.

அதிர்ச்சி சம்பவம்

தமிழகத்தில் வீடு வாடகைக்கு கேட்பதுபோல நடித்து மூதாட்டியை கழுத்தை அறுத்துக் கொலை செய்துள்ள சம்பவம் அதிர்ச்சியை ஏற்படுத்தியுள்ளது.

கோவையை அடுத்த செளரிபாளையம் பகுதியில் ஓய்வுபெற்ற செவிலியரான மேரி ஏஞ்சலின் என்பவர் வசித்து வந்தார். இரவு நேரத்தில் ஒரு தம்பதி அவரது வீட்டுக்கு வந்து கதவை தட்டிய நிலையில் மேரி திறந்தார், பின்னர் வீடு வாடகைக்கு உள்ளதா என அவர்கள் கேட்டனர்.

அத்துடன் வீட்டை திறந்து காட்டுமாறு கூறினர். இதையடுத்து மேரி வீட்டை திறந்து தம்பதிக்கு காட்டி கொண்டிருந்தார். அப்போது திடீரென அந்த தம்பதி மேரியை தாக்கிவிட்டு அவர் அணிந்திருந்த 6 பவுன் நகையை பறித்தனர். பின்னர் மேரியின் கழுத்தை அறுத்து கொலை செய்துவிட்டு தப்பியோடினர்.

இதன்பின்னர் அந்த பகுதியை சேர்ந்தவர்கள், மேரி வீட்டுக்கு சென்று பார்த்த போது அவர் ரத்த வெள்ளத்தில் சடலமாக கிடந்தார். இது குறித்து தகவலறிந்த பொலிசார் மேரியின் சடலத்தை கைப்பற்றிவிட்டு கொலையாளிகளை தேடி வருகிறார்கள்.