பெண் கடத்தல்

இலங்கையின் ஊடாக குவைத்துக்கு ஆந்திர பிரதேச தெலுங்கானா மாநிலப் பெண்களை கடத்தும் நடவடிக்கை ஒன்று கண்டுப்பிடிக்கப்பட்டுள்ளது. இந்திய நாளிதழ் ஒன்று இந்த செய்தியை வெளியிட்டுள்ளது. இது தொடர்பில் அந்த செய்தியில் மேலும், இந்த சம்பவம் தொடர்பில் 10 பேர் கொண்ட குழுவொன்றை தாம் கைது செய்துள்ளதாக தெலுக்கானா பொலிஸ் தெரிவித்துள்ளது.

ஆந்திர பிரதேசத்தின் கிழக்கு கோதாவரி, கிருஸ்ணா, கடப்பா போன்ற மாவட்டங்களில் இருந்தே அதிகமான பெண்கள் குவைத்துக்கு கடத்தப்பட்டுள்ளனர். குவைத்தில் பணிகளுக்கு என்றுக்கூறி போலியான சுற்றுலா விசா தயாரித்து பின்னர் இலங்கையின் ஊடாக குவைத்தில் சென்று இறங்கியதும் அவர்களுக்கு தொழில் விசாக்கள் வழங்கப்படுகின்றன.

இதற்காக பெண்களிடம் பணமும் முன்கூட்டியே அறவிடப்படுகிறது. இந்த நிலையில் பொலிஸ் சான்றிதழ் பெறுவதற்காக பெண்கள் வந்து செல்வதை அவதானித்த தெலுக்கானா பொலிஸார் விசாரணை மேற்கொண்ட போதே இந்த தொடர் சம்பவம் அம்பலமாகியுள்ளது என தெரிவிக்கப்பட்டுள்ளது.

பெண்ணின் வயிற்றில் சிக்கிய மர்மம்

வெளிநாட்டிலிருந்து பெருந்தொகை கொக்கொய்ன் போதைப்பொருளை இலங்கைக்கு கொண்டு வந்த பெண்ணுக்கு ஆயுள் தண்டனை விதிக்கப்பட்டுள்ளது. ஒரு கோடி ரூபா பெறுமதியான போதைப்பொருளை விழுங்கிய நிலையில் வந்த வெளிநாட்டு பெண்ணுக்கு ஆயுள் தண்டனை விதிக்கப்பட்டுள்ளது.

வர்த்தகம் செய்யும் நோக்கில் வெனிசியூலாவில் இருந்து பெருந்தொகை கொக்கொய்னை விழுங்கி நிலையில், இலங்கைக்கு வந்த பெண் குற்றச்சாட்டை ஏற்றுக் கொண்டுள்ளார்.

68 வயதான குறித்த பெண்ணுக்கு கடுமையான வேலையுடன் கூடிய வாழ் நாள் முழுவதும் சிறைத்தண்டனை விதிக்கப்பட்டுள்ளது. நீர்கொழும்பு நீதிமன்ற நீதிபதியினால் நேற்றைய தினம் தண்டனை விதிக்கப்பட்டது. கடந்த 2016 ஆம் ஆண்டு பெப்ரவரி மாதம் மூன்றாம் தினதி கட்டுநாயக்க விமான நிலையத்தில் சுங்க அதிகாரிகளால் அவர் கைது செய்யப்பட்டார்.

வைத்தியசாலையில் அனுமதிகப்பட்ட அந்தப் பெண்ணின் வயிற்றிலிருந்த கொக்கொய்ன் போதைப்பொருள் வெளியே எடுக்கப்பட்டது. அதன் பெறுமதி ஒரு கோடி ரூபாவுக்கும் அதிகம் என பொலிஸார் தெரிவித்துள்ளனர்.

குள்ள மனிதர்களின் நடமாட்டம்

நாட்டிற்குள் எந்தவொரு குள்ள மனிதரின் நடமாட்டங்கள் தொடர்பிலும் தமக்கு உறுதிப்படுத்தும் வகையிலான ஆதாரங்கள் கிடைக்கவில்லை என தெரிவிக்கப்பட்டுள்ளது. கொழும்பு பல்கலைக்கழகத்தின் விண்வெளி ஆய்வு பிரிவின் பேராசிரியர் சந்தன ஜயரத்ன பிபிச் செய்தி சேவைக்கு இதனை தெரிவித்துள்ளார்.

நாட்டின் பல பகுதிகளில் குள்ள மனிதர்களின் நடமாட்டம் அதிகரித்துள்ளதாக பொலிஸ் நிலையங்களில் முறைபாடுகள் பதிவு செய்யப்பட்டு வருகின்றன.

இந்நிலையில், குறித்த விடயம் தொடர்பில் பிபிச் செய்தி சேவைக்கு கருத்து வெளியிட்டுள்ள அவர் இவ்வாறு கூறியுள்ளார். “இலங்கையில் குள்ள மனிதர்களின் நடமாட்டம் குறித்து வெளியான செய்திகள் தொடர்பில் தாம் விடயங்களை ஆராய்ந்திருந்தேன்.

எனினும், நாட்டிற்குள் எந்தவொரு குள்ள மனிதரின் நடமாட்டங்கள் தொடர்பிலும் தமக்கு உறுதிப்படுத்தும் வகையிலான ஆதாரங்கள் கிடைக்கவில்லை. வேற்று கிரகவாசிகள் இலங்கைக்குள் வருகைத் தந்துள்ளதாக கூறப்படுகின்ற கருத்தையும் பேராசிரியர் சந்தன ஜயரத்ன நிராகரித்தார்.

எவ்வாறாயினும், ஊடக பிரபல்யத்தை பெற்றுக் கொள்ளும் நோக்குடன் சில தரப்பினர் இவ்வாறான கருத்துக்களை வெளியிட்டு வருவதாகவும் அவர் சுட்டிக்காட்டினார். இந்த நிலையில், குள்ள மனிதர்களின் நடமாட்டம் குறித்து தொடர்ச்சியாக வெளியிடப்பட்டு வருகின்ற கருத்தில் எந்தவித உண்மை தன்மையும் கிடையாது” என அவர் மேலும் தெரிவித்துள்ளார்.

மக்களுக்கு எச்சரிக்கை

நாட்டின் பல பகுதிகளில் மீண்டும் அதிக வெப்பமான காலநிலை நிலவும் என வளிமண்டலவியல் திணைக்களம் தெரிவித்துள்ளது. அதற்கமைய வடமேல் மாகாணத்திலும் மன்னார் மற்றும் கம்பஹா உட்பட பல மாவட்டங்களிலும் நாளை வெப்பமான காலநிலை நிலவும் என திணைக்களம் எதிர்வு கூறியுள்ளது.

அவ்வாறு அதிக வெப்பமான காலநிலை நிலவும் போது அவதானத்துடன் செயற்படுமாறு வளிமண்டலவியல் திணைக்களம் பொதுமக்களிடம் கேட்டுக்கொண்டுள்ளது. இந்தக் காலப்பகுதியில் அதிகளவான நீர் பருகுவதுடன் நிழலான இடங்களில் தங்கியிருக்குமாறும் பொது மக்களுக்கு அறிவிக்கப்பட்டுள்ளது.

நாட்டில் பல்வேறு இடங்களில் 40 பாகை செல்சியஸில் கடுமையான வெப்பநிலை காணப்படுகிறது. அது 54 பாகை செல்சியஸாக அதிகரிக்கும் பட்சத்தில் பாரிய ஆபத்துக்கள் ஏற்படும் என திணைக்களம் எச்சரித்துள்ளது.

மாணவன் சடலமாக மீட்பு

நாவலப்பிட்டியில் கடந்த 5 நாட்களாக காணாமல் போயிருந்த பாடசாலை மாணவனின் சடலம் கண்டுபிடிக்கப்பட்டுள்ளது. வீட்டிற்குள் அருகிலுள்ள கற்குகையில் இருந்து இந்த சடலம் கண்டுபிடிக்கப்பட்டதாக பொலிஸார் தெரிவித்துள்ளனர்.

நாவலப்பிட்டி மாபகந்த பிரதேசத்தை சேர்ந்த காவிந்த மதுசங்க என்ற 17 வயதான மாணவனின் சடலமே இவ்வாறு கிடைத்துள்ளது. சாதாரண தர பரீட்சை பெறுபேறுகளுக்கு காத்திருந்த பாடசாலை மாணவன் கடந்த 5 நாட்களாக காணாமல் போயுள்ளதாக பெற்றோர் நாவலப்பிட்டிய பொலிஸாரிடம் முறைப்பாடு செய்துள்ளனர்.

பொலிஸார் மற்றும் பிரதேச மக்கள் இணைந்து நடத்திய தேடுதலுக்கமைய இந்த சடலம் மீட்டுகப்பட்டுள்ளது. இந்த மாணவனின் பிரேத பரிசோதனை நாவலப்பிட்டி வைத்தியசாலையில் இடம்பெறவுள்ளதாக தெரிவிக்கப்படுகின்றது.

பெண்ணுக்கு பாலியல் சைகை

கடந்த 15ஆம் திகதியன்று கார் ஒன்றில் பயணம் செய்து கொண்டிருந்த பெண் ஒருவரிடம் பாலியல் ரீதியில் சைகைகளை காட்டியதாக கூறப்படும் முச்சக்கர வண்டி சாரதியை ஏப்ரல் முதலாம் திகதி வரை விளக்கமறியலில் வைக்குமாறு நீதிமன்றம் இன்று உத்தரவிட்டது.

பாலியல் ரீதியில் மற்றும் ஒருவருக்கு சொல்லாலோ அல்லது நடவடிக்கையாலோ தொந்தரவு செய்வது தண்டனைக்குரிய குற்றம் என்ற அடிப்படையிலேயே இந்த முச்சக்கர வண்டி சாரதி கைதுசெய்யப்பட்டார்.

குறித்த முச்சக்கர வண்டியின் சாரதி தம்மை தொந்தரவுக்கு உட்படுத்திய காணொளி காட்சியை குறித்த பெண் சமூக வலைத்தளங்களில் பதிவிட்டிருந்தார்.

இதனையடுத்து கலகா பகுதியை சேர்ந்த இந்த சந்தேகநபர் பம்பலப்பிட்டிய காவல் நிலையத்தில் சரணடைந்தார். இந்தநிலையிலேயே புதுக்கடை நீதிமன்றம் அவரை விளக்கமறியலில் வைக்க உத்தரவிட்டுள்ளது.

குழந்தையை பொல்லால் தாக்கிய தந்தை

அநுராதபுரம் – நொச்சியாகமை பகுதியில் மதுபோதையில் ஏற்பட்ட குடும்ப தகராறில், கணவன் பொல்லால் மனைவியை தாக்க முயற்சித்த போது, அது மூன்று மாத குழந்தையின் மீது பட்டத்தில் குழந்தை படுகாயமடைந்துள்ளது.

இநத தகராறு முற்றிதால், ஆத்திரமடைந்த கிராமவாசிகள் அந்த நபரை தாக்கி மரத்தில் கட்டி வைத்து நொச்சியாகமை பொலிஸாரிடம் ஒப்படைத்துள்ளனர். இந்த சம்பவம் நொச்சியாகமை, கட்டலுபத்வெவ, கபரகொய்யா வெவ பிரதேசத்தில் நேற்று மாலை நடந்துள்ளது.

தகராறின் போது மதுபோதையில் இருந்த கணவன், பொல்லால் மனைவியை தாக்கிய போது, மனைவி கையில் வைத்திருந்த குழந்தை மீது அந்த அடிப்பட்டுள்ளது. சம்பவத்தில் படுகாயமடைந்த குழந்தை அநுராதபுரம் போதனா வைத்தியசாலையில் அனுமதிக்கப்பட்டு, சத்திர சிகிச்சைக்கு உட்படுத்தப்பட்டுள்ளது.

பிரதேசத்தில் மேற்கொள்ளப்படும் சட்டவிரோத மது விற்பனையை கட்டுப்படுத்த அதிகாரிகள் நடவடிக்கை எடுக்காத காரணத்தினால், இவ்வாறான நிலைமை ஏற்பட்டுள்ளதாக கிராமவாசிகள் குற்றம் சுமத்தியுள்ளனர்.

ஆணொருவரின் சடலம் மீட்பு

வாழைச்சேனை பொலிஸ் பிரிவிலுள்ள ஆலங்குளம் கிராமத்திலுள்ள வீடொன்றின் பின்னாலுள்ள மரத்தில் தொங்கவிடப்பட்ட நிலையில் ஆணொருவரின் சடலம் கண்டு பிடிக்கப்பட்டதாக பொலிஸார் தெரிவித்துள்ளனர்.

ஆலங்குளம் கிராமத்தில் வசித்து வந்த 3 பிள்ளைகளின் தந்தையான 46 வயதுடைய சின்னையா சுப்பிரமணியம் என்பவரின் சடலமே இன்றைய தினம் மீட்கப்பட்டுள்ளது. இது தொடர்பில் உயிரிழந்த நபரின் மனைவி தெரிவிக்கையில், கடந்த ஞாயிற்றுக்கிழமை இவர் சில நபர்களால் தாக்கப்பட்ட நிலையில் வாழைச்சேனை வைத்தியசாலையில் அனுமதிக்கப்பட்டு சிகிச்சை பெற்றார்.

இந்த நிலையில் அவர் நேற்றைய தினம் நண்பகலளவில் வீடு திரும்பிய நிலையில் அவர் சில நபர்களால் தாக்கப்பட்டது குறித்து வாழைச்சேனைப் பொலிஸ் நிலையத்தில் முறைப்பாடு செய்திருந்தேன்.

இதேவேளை சிகிச்சை பெற்று வீடு திரும்பிய எனது கணவர் வீட்டின் பின் வளவிலுள்ள ஆத்தி மரத்தில் தொங்கவிடப்பட்ட நிலையில் காயங்களுடன் சடலமாக காணப்பட்டார் என குறிப்பிட்டுள்ளார். சம்பவம் தொடர்பில் தகவல் கிடைக்கப்பட்ட நிலையில் அங்கு விரைந்த பொலிஸார் தீவிர விசாரணைகளை மேற்கொண்டு வருகின்றனர்.