விபத்து

யாழில் தனியார் பேருந்தொன்று மின்கம்பத்துடன் மோதி ஏற்பட்ட விபத்தில் பயணி ஒருவர் படுகாயமடைந்துள்ளார். குறித்த விபத்து இன்று அதிகாலை யாழ். மானிப்பாய் பொலிஸ் பிரிவுக்குட்பட்ட சண்டிலிப்பாய் சீரணிச் சந்தியில் வைத்து இடம்பெற்றுள்ளதாக பொலிஸார் தெரிவித்துள்ளனர்.

இதன்போது பேருந்தில் பயணித்த பயணி ஒருவர் பேருந்துக்குள்ளே அகப்பட்டு, நீண்ட நேர போராட்டத்தின் மத்தியில் மீட்கப்பட்டு உடனடியாக வைத்தியசாலையில் அனுமதிக்கப்பட்டுள்ளார்.

இருவேறு பேருந்துகள் ஒன்றை ஒன்று முந்தி செல்வதற்கு முயற்சித்துள்ள வேளையிலேயே இந்த விபத்து இடம்பெற்றுள்ளதாக ஆரம்ப கட்ட விசாரணைகளில் இருந்து தெரியவருகிறது. இந்த நிலையில் சம்பவம் தொடர்பான மேலதிக விசாரணைகளை பொலிஸார் முன்னெடுத்துள்ளனர்.

பாரிய மோசடி

வெளிநாடுகளில் வேலை வாய்ப்பு பெற்றுத்தருவதாக கூறி பல இளைஞர்களை ஏமாற்றிய பெண்ணொருவர் கைது செய்யப்பட்டுள்ளார். உள்நாடு மற்றும் வெளிநாடுகளில் வேலை பெற்றுத் தருவதாக கூறி, சுமார் 50 இலட்சம் ரூபா வரையில் மோசடியாக பெற்றுள்ளார்.

கஹதுடுவ பிரதேசத்தில் உள்ள வீடு ஒன்றில் வைத்து குறித்த பெண் கைது செய்யப்பட்டுள்ளார்.அவர் பொலிஸ் புலனாய்வு பிரிவு அதிகாரி போன்று நடித்து பணம் மோசடி செய்துள்ளதாக தெரியவந்துள்ளது.

குறித்த பெண் சுமார் 3 வருடங்கள் இவ்வாறு நடித்து ஏமாற்றி வந்துள்ள நிலையில் வாடகை வீடு ஒன்றிலேயே வசித்து வந்துள்ளார். மிகவும் துணிச்சலான முறையில் இந்த மோசடி மேற்கொண்டு வந்துள்ளதாக பொலிஸார் தெரிவித்துள்ளனர். ஜப்பான் தொழிற்சாலை ஒன்றில் தொழில் பெற்றுத் தருவதாக இரண்டு இளைஞர்களிடம் 2 லட்சம் ரூபாயில் இருந்து பெருந்தொகை பணம் மோசடி செய்துள்ளதாக பொலிஸார் தெரிவித்துள்ளனர்.

உடுவில் மகளிர் கல்லூரி

யாழ். உடுவில் மகளிர் கல்லூரி மாணவி பாடசாலை விடுதியில் இருந்து வெளியேறியமை தொடர்பாக உண்மைக்கு புறம்பான செய்தியை சில ஊடகங்கள் பிரசுரித்தமையையிட்டு மனம் வருந்துவதாக கல்லூரி அதிபர் பி.எஸ்.ஜெபரட்ணம் தெரிவித்துள்ளார். மகளிர் கல்லூரி தொடர்பாக அவர் நேற்று வெளியிட்டுள்ள அறிக்கை ஒன்றிலேயே இவ்வாறு குறிப்பிட்டுள்ளார். அந்த அறிக்கையில் மேலும்,

அதாவது எனது பாடசாலை விடுதியில் இருந்து வெளியேறிய மாணவி நேற்று பரீட்சை நடைபெறவுள்ளதால் அதனை தவிர்த்து கொள்ளும் முகமாக இவ்வாறான நடவடிக்கையில் ஈடுபட்டுள்ளார்.

குறித்த மாணவி மருத்துவக் காரணத்திற்காக விடுமுறையில் வீட்டில் நின்று மீண்டும் புதன்கிழமை அவரின் பெற்றோரால் விடுதிக்கு அழைத்து வரப்பட்டார். பாடசாலை நுழைவாயிலில் வரும் போதே மாணவி வீடு செல்ல எத்தனித்துள்ளார்.

ஆயினும் பெற்றோரின் வேண்டுகோளுக்கு இணங்க அவர் மீண்டும் விடுதியில் அனுமதிக்கப்பட்டார். அதற்கு பின்னரே அவர் விடுதியை விட்டுத் தவறான முறையில் வெளியேறியிருந்தார்.

இருப்பினும் நாம் முறைப்படி அவரைப் பொறுப்பேற்று ஒழுங்கான விதிமுறைகளின்படி அவரின் தாயாரிடம் ஒரு கடிதத்தைப் பெற்று மீண்டும் தாயாரிடமே மாணவியை ஒப்படைத்தோம்.

உண்மை நிலவரம் இவ்வாறிருக்க ஆதாரமற்ற உண்மைக்குப் புறம்பான செய்திகள் அம் மாணவியின் எதிர்காலத்திற்கும் படிப்பிற்கும் பாரிய பின்னடைவாக அமையும் என்பதுடன் எமது பாடசாலையின் வளர்ச்சிக்கும் நன்மதிப்பிற்கும் பங்கம் விளைவிற்கும் என்பதை மிகவும் வருத்தத்துடன் அறியத் தருகின்றோம்.

மேற்படி விடயத்தைக் கருத்திற்கொண்டு உண்மை நிலவரத்தை வெளிப்படுத்துமாறு கேட்டுக் கொள்கின்றேன் என அவர் குறிப்பிட்டுள்ளார்.

ஜனாதிபதி வேட்பாளர்கள்

கோத்தபாயவே அடுத்த ஜனாதிபதி வேட்பாளராகவுள்ளதாக அமைச்சர் நவீன் திஸாநாயக்க நிகழ்வு ஒன்றில் வைத்து கூறிய பின், அந்த நிகழ்வில் பங்கேற்ற கோத்தபாய, நவீன் திஸாநாயக்கவின் மாமனாரான கரு ஜயசூரியவும் ஜனாதிபதி வேட்பாளராக போகிறார் என்று குறிப்பிட்டுள்ளார்.

நாரஹன்பிட்டிய ஸ்ரீகௌதம விஹாரையில் அண்மையில் இடம்பெற்ற நிகழ்வு ஒன்றின்போது இருவரும் பங்கேற்றிருந்தனர். இதன்போது உரையாற்றிய நவீன் திஸாநாயக்க, தனித்து சிங்கள பௌத்த வாக்குகளால் அரசாங்கத்தை அமைக்க முடியும். அல்லது அரசாங்கத்தை கவிழ்க்க முடியும் என்ற அடிப்படையில் ஜனாதிபதி வேட்பாளராக கோத்தபாய போட்டியிடுவார் என குறிப்பிட்டுள்ளார்.

இதனையடுத்து உரையாற்றிய கோத்தபாய, “உங்களுடைய தந்தையாரான காமினி திஸாநாயக்க எதனை செய்ய முடியவில்லையோ அதனை நீங்கள் செய்வீர்கள் என்று நம்புகிறேன். எனினும் உங்கள் மாமனார் கரு ஜயசூரிய ஜனாதிபதி வேட்பாளராக வருவார் என்பதும் எனக்கு தெரியும்” என்று குறிப்பிட்டுள்ளார்.

சவுதி அரேபியாவில் இறந்துபோன தங்களது மகனது உடலுக்கு பதிலாக சவப்பெட்டியில் இலங்கை நாட்டு பெண்ணின் உடல் வந்ததை பார்த்து குடும்ப உறுப்பினர்கள் அதிர்ச்சியடைந்துள்ளனர்.

கேரளாவின் கொன்னி பகுதியை சேர்ந்த 29 வயதான ரபிக் என்பவர் சவுதி அரேபியா நாட்டில் பல ஆண்டுகளாக பணிபுரிந்து வந்துள்ளார்.

இந்நிலையில், கடந்த பிப்ரவரி 27 ஆம் திகதி ரபிக்குக்கு மாரடைப்பு ஏற்பட்டு உயிரிழந்துள்ளார். இவரது உடலை கேரளாவுக்கு கொண்டு வருவதற்காக குடும்பத்தார் மற்றும் உறவினர்கள் மேற்கொண்ட முயற்சி வெற்றியடைந்தததையடுத்து எம்பார்மிங் செய்யப்பட்ட ரபிக்கின் உடல் அவரது சொந்த ஊருக்கு விமானத்தின் மூலம் அனுப்பி வைக்கப்பட்டது.

தேவாலயத்தில் வைத்து பிரார்த்தனை செய்து முடிந்துவிட்டு, அடக்கம் செய்யப்போகையில் சவப்பெட்டியை திறந்து பார்த்த பெற்றோர் அதிர்ச்சியடைந்துள்ளனர்.

ஏனெனில், சவப்பெட்டிக்குள் இருந்தது ஒரு பெண்ணின் உடல். இதனைத்தொடர்ந்து உடனடியாக கொன்னி பொலிசாருக்கு தகவல் தெரிவித்ததையடுத்து, பொலிஸ் அதிகாரிகள் கொச்சி விமான நிலையம் மற்றும் சவுதி விமான நிலையத்தில் விசாரணை மேற்கொண்டதில் , அது இலங்கை பெண்ணின் உடல் என்றும், ரபிக்கின் உடல் இலங்கைக்கு தவறுதலாக அனுப்பப்பட்டுள்ளது என தெரியவந்துள்ளது.

சவுதி விமான நிலையத்தில் வைத்து இறந்துபோன உடல்கள் வைக்கப்பட்டிருந்த சவப்பெட்டிகள் மாறியுள்ளன. இதனைத்தொடர்ந்து இலங்கை பெண்ணின் உடல் கோட்டயம் மருத்துவ கல்லூரிக்கு எடுத்து செல்லப்பட்டு அங்கு வைக்கப்பட்டுள்ளது.

இதனால் மனவேதனையடைந்த ரபிக்கின் பெற்றோர், இலங்கையில் இருக்கும் எங்களது மகனது உடலை எப்படியாவது மீட்டு தாருங்கள் என கோரிக்கை வைத்துள்ளனர்.

ரபிக்கிற்கு திருமணமாகி ஏற்கனவே ஒரு குழந்தை உள்ள நிலையில், தற்போது அவரது மனைவி இரண்டாவது முறையாக கர்ப்பமாக உள்ளார். எங்களது மகனின் இறப்பு எங்கள் குடும்பத்தை சோகத்தில் ஆழ்த்தியுள்ளது என தாயார் கூறியுள்ளார்.

நண்பர்களுடன் விளையாடிக் கொண்டிருந்த மாணவன் ஒருவன் திடீரென கீழே வீழ்ந்து மரணித்துள்ளார்.

மொரட்டுவ வேல்ஸ் குமார பாடசாலையைச் சேர்ந்த மாணவன் ஒருவனே இவ்வாறு உயிரிழந்துள்ளதாக மொரட்டுவ காவல்துறையினர் தெரிவிக்கின்றனர்.

பாணந்துறை கெசல்வத்த என்னும் பகுதியைச் சேர்ந்த சமித் துல்சர டி அல்விஸ் என்ற 18 வயதான சிறுவனே இவ்வாறு இன்றைய தினம் உயிரிழந்துள்ளான்.

மாணவன் ஏனைய மாணவர்களுடன் இணைந்து கால்பந்தாட்டம் விளையாடிக் கொண்டிருந்த போது மாணவன் கீழே வீழ்ந்து உயிரிழந்துள்ளார்.

மாணவன் வைத்தியசாலைக்கு அழைத்துச் செல்லப்பட்ட போது தலையில் காயம் ஏற்பட்டிருந்ததாகவும், மரணம் தொடர்பில் விசாரணைகள் நடத்தப்பட்டு வருவதாகவும் மொரட்டுவ காவல்துறையினர் தெரிவிக்கின்றனர்.