பரிதாபமாகப் பலி

தம்பலகாமம் – கிண்ணியா பிரதான வீதி கோவிலடி பகுதியில் ஏற்பட்ட விபத்தில் ஒருவர் உயிரிழந்துள்ளதாக தம்பலகாமம் பொலிஸார் தெரிவித்துள்ளனர். குறித்த விபத்து இன்று இடம்பெற்றுள்ளதாகவும், லொறியொன்றில் ஏற்பட்ட கோளாறு காரணமாகவே குறித்த விபத்து இடம்பெற்றுள்ளதாகவும் தெரிவிக்கப்பட்டுள்ளது.

இதன்போது ஆணைச்சேனை பகுதியைச் சேர்ந்த எஸ். தேவசாயம் சத்தியசீலன் எனப்படும் 55 வயதுடைய லொறியின் சாரதியே இவ்வாறு உயிரிழந்துள்ளார். கந்தளாய் பகுதியிலிருந்து கிண்ணியா ஊடாக மூதூருக்கு பொருட்களை ஏற்றிச்சென்ற போதே குறித்த விபத்து ஏற்பட்டுள்ளது.

உயிரிழந்தவரின் சடலம் தம்பலகாமம் பிரதேச வைத்தியசாலையில் வைக்கப்பட்டுள்ளதுடன், விபத்து தொடர்பிலான மேலதிக விசாரணைகளை தம்பலகாமம் பொலிஸார் மேற்கொண்டு வருகின்றனர்.

விபத்துக்குள்ளான பாரவூர்தி

கண்டி – மாத்தளை பிரதான வீதி அகுறனை நகரில் பயணித்து கொண்டிருந்த பாரவூர்தி ஒன்று வீதியை விட்டு விலகி விபத்துக்குள்ளாகி விபத்துக்குள்ளானது.

இன்று காலை 07 மணியளவில் குறித்த விபத்து பதிவாகியுள்ளது. குறித்த விபத்து வர்த்தக நிலையம் பொருத்தப்பட்டிருந்த C.C.T.V காணொளி ஒன்றில் பதிவாகியுள்ளது.

அகுறனை நகரில் பயணித்து கொண்டிருந்த பாரவூர்தி ஒன்று வீதியை விட்டு விலகி விபத்துக்குள்ளாகி விபத்துக்குள்ளானது.

கோர விபத்து

கொழும்பு – குருநாகல் பிரதான வீதியின் பொல்கஹாவெல பகுதியில் இடம்பெற்ற வாகன விபத்தில் மூவர் உயிரிழந்துள்ளதுடன் மூவர் காயமடைந்துள்ளனர். இந்த சம்பவம் இன்று அதிகாலையில் இடம்பெற்றதாக காவல் துறை ஊடகப்பேச்சாளர் அலுவலகம் வௌியிட்டுள்ள அறிக்கையில் தெரிவிக்கப்பட்டுள்ளது.

சிற்றூர்ந்து (வேன்) ஒன்றும் முச்சக்கர வண்டி ஒன்றும் நேருக்கு நேர் மோதுண்டமையினாலேயே இந்த விபத்து நேர்ந்துள்ளது. சம்பவத்தில் முச்சக்கர வண்டியில் பயணித்த ஒரே குடும்பத்தை சேர்ந்த தாய் தந்தை மற்றும் வயோதிப பெண் ஒருவர் ஆகியோரே உயிரிழந்துள்ளனர்.

அவர்களின் பிள்ளைகள் மூவரும் காயமடைந்த பொல்கஹாவெல வைத்தியசாலையில் சேர்க்கப்பட்டு பின்னர் மேலதிக சிகிச்சைகளுக்காக குருநாகல் பொது வைத்தியசாலைக்கு மாற்றப்பட்டுள்ளனர். இந்த சம்பவம் தொடர்பான மேலதிக விசாரணைகளை காவல் துறையினர் மேற்கொண்டு வருகின்றனர்.

22 வயது யுவதி கைது

ஐஸ் மற்றும் கொக்கேய்ன் போதைப்பொருளுடன் பெண்ணொருவர் உள்ளிட்ட 3 பேர் பாணந்துறை – வாழைத்தோட்டம் பிரதேசத்தில் அமைந்துள்ள வீடொன்றில் வைத்து கைது செய்யப்பட்டுள்ளனர். இவர்களிடம் இருந்து 94 கிராம் ஐஸ் மற்றும் கொக்கேய்ன் போதைப்பொருள் மீட்கப்பட்டுள்ளதாக தெரிவிக்கப்படுகிறது.

களனி பிரதேசத்தை சேர்ந்த இவர்கள் வாடகைக்கு வீடொன்றை பெற்று அதை போதைப்பொருள் வியாபாரத்திற்காக பயன்படுத்தியுள்ளதாக தெரியவந்துள்ளது.

குறித்த வீட்டில் இருந்து போதைப்பொருள் வர்த்தகத்திற்காக பயன்படுத்த 16 கைப்பேசிகள் மற்றும் 19 சிம் அட்டைகள் உள்ளிட்ட உபகரணங்கள் சில காவற்துறையால் கண்டுபிடிக்கப்பட்டுள்ளனர். 22 வயதுடைய பெண்ணொருவரும் 28 மற்றும் 30 வயதுடைய சகோதரர்களுமே இவ்வாறு கைது செய்யப்பட்டுள்ளனர்.

நபரொருவர் உயிரிழப்பு

மர்மமான முறையில் உயிரிழந்த நபரொருவரின் சடலமொன்று இன்று மதியம் முந்தளம் காவற்துறையால் கண்டுபிடிக்கப்பட்டுள்ளது.

தோட்டமொன்றில் காவலாளராக பணியாற்றி வந்த நபரொருவரின் சடலமொன்றே இவ்வாறு கண்டுபிடிக்கப்பட்டுள்ளதாக முந்தளம் காவற்துறை தெரிவித்துள்ளது.

உயிரிழந்தவர்கள் 70 வயதுடைய முதியவர் என தெரிவிக்கப்படுகிறது. தான் தோட்டத்திற்கு வந்து பார்த்த போது காவலர் இல்லாததால் அவரை தேடிய போது காவலரண் கட்டிலில் உயிரிழந்த நிலையில் அவர் இருந்ததாக தோட்ட உரிமையாளர் காவற்துறையில் தெரிவித்துள்ளார்.

இந்த மரணம் தொடர்பில் நீதவான் விசாரணைகள் இடம்பெறவுள்ள நிலையில் , முந்தளம் காவற்துறையினர் சம்பவம் தொடர்பில் விசாரணைகள் ஆரம்பித்துள்ளனர்.

ஆண் ஒருவர் சடலமாக மீட்பு

திருகோணமலை நகராட்சி மன்றத்துக்கு அருகிலுள்ள பேருந்து தரிப்பிட நிலையத்தில் தலை மற்றும் கால்களில் காயங்களுடன் ஆண் ஒருவர் சடலமாக மீட்கப்பட்டுள்ளார் என துறைமுக பொலிஸார் தெரிவித்துள்ளனர்.

குறித்த சம்பவம் இன்று காலை இடம்பெற்றுள்ளது. இவ்வாறு சடலமாக மீட்கப்பட்டவர் யாழ். நான்காம் வட்டாரத்தை சேர்ந்த 74 வயதுடைய அந்தனிபாஸ் என்பவர் என தெரியவந்துள்ளது.

குறித்த நபர் யாழிலிருந்து திருகோணமலைக்கு பேருந்தில் வந்துள்ளதாக விசாரணைகளை முன்னெடுத்த பொலிஸார் குறிப்பிட்டுள்ளனர்.

உயிரிழந்தவரின் சடலம் திருகோணமலை பொது வைத்தியசாலை பிரேத பரிசோதனை அறையில் வைக்கப்பட்டுள்ளது. சம்பவம் தொடர்பான மேலதிக விசாரணைகளை துறைமுக பொலிஸார் முன்னெடுத்து வருகின்றனர்.

நந்திக்கடல் ஏரி

முல்லைத்தீவில் அண்மை நாட்களாக தொடரும் அதிக வெப்பநிலை காரணமாக நந்திக்கடல் ஏரியின் நீர்மட்டம் மிக வேகமாக குறைவடைந்து செல்வதாக அங்கிருக்கும் எமது செய்தியாளர் தெரிவித்துள்ளார்.

கடந்த வருடம் டிசம்பர் மாதம் பெய்த கடும் மழை காரணமாக நந்நிதிக்கடலின் நீர்மட்டம் அதிகரித்து நந்திதிக்கடல் இயற்கையாகவே பெருங்கடலுடன் சங்கமித்திருந்தது.

இந்நிலையில், தற்பொழுது நிலவும் அதிக வெப்பநிலை காரணமாக பெருங்கடலுடனான நந்நிதிக்கடல் நீர் இணைப்பும் துண்டிக்கப்பட்டுள்ளதாக எமது செய்தியாளர் தெரிவித்துள்ளார்.

இதனால் பெருங்கடலில் இருந்து நந்திக்கடல் ஏரிக்குள் வரும் கடல்வாழ் உயிரினங்களின் வருகை தடைப்பட்டுள்ளதுடன் நத்திக்கடலில் வாழும் கடல்வாழ் உயிரினங்கள் அழிவடையும் நிலைக்கு தள்ளப்பட்டுள்ளதாகவும் குறிப்பிடப்படுகின்றது.

பெண்களின் மோசமான செயல்

தங்க கடத்தலில் ஈடுபட்ட இரண்டு இலங்கை பெண்கள் இந்தியாவில் வைத்து கைது செய்யப்பட்டுள்ளனர். சிங்கப்பூரில் இருந்து தங்கத்தை கடத்திச் சென்ற இந்த பெண்கள் பூனே விமான நிலையத்தில் வைத்து கைது செய்யப்பட்டதாக இந்திய ஊடகங்கள் தெரிவித்துள்ளன.

இந்த பெண்களிடம் இருந்து 900 கிராமுக்கும் மேற்பட்ட தங்கக்கட்டிகள், சங்கிலிகள், வளையல்கள் என்பவற்றை இந்திய சுங்க அதிகாரிகள் கைப்பற்றியுள்ளனர்.

இந்த தங்கத்தின் மதிப்பு 30 இலட்சம் இந்திய ரூபாய்களுக்கு மேல் என தெரிவிக்கப்பட்டுள்ளது.
கைது செய்யப்பட்ட இலங்கை பெண்கள் சம்பந்தமாக இந்திய சுங்க அதிகாரிகள் மேலதிக விசாரணைகளை நடத்தி வருகின்றனர்.

வெளியான அதிர்ச்சித் தகவல்

வடக்கில் பாலியல் வன்கொடுமை காணொளிகள் உருவாக்கப்பட்டு பெருந்தொகை பணத்திற்கு விற்பனை செய்யப்பட்டு வருவதாக ஜே.வி.பி அதிர்ச்சி தகவல் ஒன்றை முன்வைத்துள்ளது. ஜே.வி.பியின் சிரேஸ்ட நாடாளுமன்ற உறுப்பினர்களில் ஒருவரான பிமல் ரத்நாயக்க இந்த குற்றச்சாட்டை முன்வைத்துள்ளார்.

புலம்பெயர் தமிழர்களின் நிதியீட்டத்தைக் கொண்டு பாலியல் வன்கொடுமைக் காணொளிகள் பதிவு செய்யப்படும் மோசமான தொழிற்துறையொன்று வடக்கில் முன்னெடுக்கப்பட்டு வருவதாக அவர் குற்றம் சுமத்தியுள்ளார்.

2019ஆம் ஆண்டுக்கான வரவு செலவுத் திட்ட மூன்றாம் வாசிப்பு மீதான குழு நிலை விவாதத்தில் நேற்று பங்கேற்று உரையாற்றிய போது அவர் இதனைக் குறிப்பிட்டுள்ளார். அவர் தொடர்ந்தும் கூறுகையில், புங்குடுதீவில் பாடசாலை மாணவி வித்தியா பாலியல் ரீதியாக வன்கொடுமைக்கு உட்படுத்தப்பட்டு படுகொலை செய்யப்பட்ட சம்பவத்தை நாம் அனைவரும் மறந்திருக்க முடியாது.

இந்த சம்பவத்தை வெறும் பாலியல் வன்கொடுமையாக மட்டும் பார்த்துவிட முடியாது. இந்த பாலியல் வன்கொடுமை சம்பவம் காணொளியாக பதிவு செய்யப்பட்டதுடன், அதற்காக பெருந்தொகை பணம் பெற்றுக் கொள்ளப்பட்டுள்ளது.

இவ்வாறான சம்பவங்கள் தொடர்ந்தும் வடக்கில் இடம்பெற்று வருகின்றமை பரகசியமானதொன்றேயாகும். இதில் மிகவும் துரதிஸ்டவசமானது என்னவென்றால் அதே சமூகத்தைச் சேர்ந்த புலம்பெயர் மக்களே இந்த கொடூர செயலுக்கு பணம் வழங்கி வருகின்றனர் என்பதுதான்.

சிறுமியர் மற்றும் பெண்களை பாலியல் வன்கொடுமைக்கு உட்படுத்தி அந்தக் காட்சிகளை காணொளியாக பதிவு செய்து பெருந்தொகை பணத்திற்கு விற்பனை செய்யப்பட்டு வருகின்றது. வடக்கில் பாலியல் வன்கொடுமைகள், போதைப்பொருள் பயன்பாடு, மதுபான பயன்பாடு மற்றும் வறுமை நிலைமை போன்றன மிகவும் அதிகரித்துள்ளதாக பிமல் ரட்நாயக்க தெரிவித்துள்ளார்.

குறைந்த விலையில் நவீன கார்

இலங்கையில் புதிய வகை கார் ஒன்று குறைந்த விலையில் அறிமுகம் செய்யப்பட்டுள்ளது. இலங்கையர்களின் கார் கனவை நனவாக்கும் வகையில் இந்த வாகனம் அறிமுகம் செய்யப்பட்டுள்ளதாக இந்திய நிறுவனம் தெரிவித்துள்ளது.

சுமார் 11 இலட்சம் ரூபாவுக்கு இந்த வாகனத்தை கொள்வனவு செய்ய முடியும். குடும்பம் ஒன்று பயணிப்பதற்கு ஏற்ற வகையில் இது வடிவமைக்கப்பட்டுள்ளது.

Bajaj Qute என்ற இந்த வாகனத்தில் DTSi தொழில்நுட்பத்திலான இயந்திரம் ஒன்றும் 216.6 CM3 திறன் கொண்ட இயந்திரமும் பொருத்தப்பட்டுள்ளது. போதுமான இட வசதிடன் வடிவமைக்கப்பட்டுள்ள இந்த வாகனத்தில் சாரதி மற்றும் பயணிகள் அனைவரும் வசதியாக பயணிக்க முடியும்.

இந்த வாகனம் காபன் பிரச்சனையில் இருந்து தப்பித்துக் கொள்ளும் வகையில் இந்தியாவில் தயாரிக்கப்பட்டுள்ளது. போக்குவரத்து நெரிசலை ஏற்படுத்தாத வகையில் இந்த வாகனம் தயாரிக்கப்பட்டுள்ளதாக குறித்த நிறுவனத்தின் இலங்கை அதிகாரி தெரிவித்துள்ளார். இந்த வாகனத்திற்கு ஐரோப்பாவின் WVTA சான்றிதழும் கிடைத்துள்ளதாக குறிப்பிடப்படுகின்றது.

தற்போது ஐரோப்பிய நாடுகளான துருக்கி, போலந்து, போர்த்துக்கல், ரஷ்யா, வட அமெரிக்கா, மெக்சிகோ, கொலம்பியா, தென் ஆபிரிக்கா, பங்களாதேஷ், இந்தோனேஷியா உட்பட 32 நாடுகள் இந்த Bajaj Qute என்ற வாகனத்தை கொள்வனவு செய்துள்ளன. நாடு முழுவதும் டேவிட் பீரிஸ் மோட்டார் வாகன விற்பனை நிலையங்களில் இந்த வாகனத்தை பெற்றுக் கொள்ள முடியும்.