இலங்கைச் சிறுமி

சிறுமிகளில் மிக திறமையான சிறுமி என்ற விருதை பிரித்தானியாவில் வசித்து வரும் இலங்கை சிறுமி ஒருவர் பெற்றுள்ளார். இந்த விருது கடந்த வார இறுதியில் 12 வயதான நிஷி உக்கல்ல என்ற சிறுமிக்கு வழங்கப்பட்டுள்ளது.

செனல் 4 தொலைக்காட்சி தயாரித்து வழங்கும் “Child Genius” என்ற நிகழ்ச்சி இந்த விருது வழங்கப்பட்டுள்ளது. பிரித்தானியாவில் வசித்து வரும் பல இனங்களை சேர்ந்த சிறுமிகளை இலகுவாக தோற்கடித்து இந்த வெற்றியினை பெற்றுள்ளார்.

இந்த சிறுமியிடம் பிரித்தானியாவில் உள்ள பல ஊடகங்கள் நேர் காணலை நடத்தியுள்ளதுடன், பிரித்தானியாவில் பிரபலமாகியுள்ளார். அடிக்கடி ஊடகங்கள் நேர்காணலை நடத்துவதன் காரணமாக சிறுமியின் தந்தைக்கு தொழில் விடுமுறை பெற நேரிட்டுள்ளது.

இலங்கையில் பிறந்து பிரித்தானியாவில் குடியேறிய நிலங்க உக்கல்ல மற்றும் சிரோமி ஜயசிங்க ஆகியோர் இந்த சிறுமியின் பெற்றோர்களாவர். பிரித்தானியாவில் பிறந்த நிஷிக்கு பிரித்தானிய குடியுரிமையும், இலங்கை குடியுரிமையும் உள்ளது.

முன்பள்ளி ஆசிரியர்கள் ஏனைய பிள்ளைகளை விட நிஷியிடம் வித்தியாசம் தெரிவதாக கூறிய பின்னரே தனது மகளின் திறமையை தான் முதலில் அறிந்துக்கொண்டதாக சிரோமி ஜயசிங்க தெரிவித்துள்ளார்.

மகளின் இருக்கும் திறமை காரணமாக அவருக்கு கற்பிக்க முன்பள்ளிக்கு புதிய ஆசிரியரை நியமிக்க நேர்ந்ததாக சிறுமியின் தந்தை கூறியுள்ளார்.

அத்துடன் பாடசாலையில் 4 ஆம் வகுப்பு படிக்க வேண்டிய வயதில் 6 ஆம் வகுப்பில் படித்ததாகவும் ரிப்பல் பிரமோஷன் பெற்று 6 ஆம் வகுப்புக்கு தேர்ச்சி பெற்றதாகவும் அவர் குறிப்பிட்டுள்ளார்.

பிரித்தானியாவில் திறமையான சிறுமி என்ற விருதை பெற்று கொண்ட பின்னர், நிஷி உக்கல்லவுக்கு பல நாடுகளில் இருந்து பாராட்டுகள் கிடைத்து வருகின்றன.

10 வயதிலும் நிஷி உக்கல்ல முக்கிய வெற்றியை பெற்றதையும் சிலர் நினைவூட்டியுள்ளனர். 10 வயதில் அவர் அதி கூடிய புள்ளியான 162 புள்ளிகளை பெற்றுக்கொண்டதாக அஜிதா கதிர்காமர் என்ற பெண் கூறியுள்ளார்.

நீதிமன்றம் விதித்த உத்தரவு

திருகோணமலை, குச்சவெளி பகுதியில் 14 வயதுடைய சிறுமியை ஒரு வருடமாக காதலித்து பெற்றோர்களுக்கு தெரியாமல் வீட்டிற்கு அழைத்துச் சென்ற காதலனை விளக்கமறியலில் வைக்குமாறு திருகோணமலை நீதிமன்ற நீதிவான் உத்தரவிட்டுள்ளார்.

திருகோணமலை நீதிமன்ற நீதிவான் முன்னிலையில் சந்தேக நபரை இன்று ஆஜர்படுத்திய போதே இம்மாதம் 13ஆம் திகதி வரை விளக்கமறியலில் வைக்குமாறு உத்தரவிடப்பட்டுள்ளது. திருகோணமலை, கும்புறுப்பிட்டி பகுதியைச் சேர்ந்த 28 வயதுடையவரே இவ்வாறு விளக்கமறியலில் வைக்கப்பட்டுள்ளார்.

சந்தேக நபர் 14 வயதுடைய சிறுமியை ஒரு வருடமாக காதலித்து பெற்றோர்களுக்கு தெரியாமல் சிறுமியை நண்பர் ஒருவரின் வீட்டுக்கு அழைத்துச் சென்றுள்ளார். இந்நிலையிலே சிறுமியின் பெற்றோர் சந்தேக நபர் தொடர்பாக பொலிஸ் நிலையத்தில் முறைப்பாடு மேற்கொண்டுள்ளனர். இதற்கமைய பொலிஸார் சந்தேக நபரை கைது செய்துள்ளனர்.

மகிழ்ச்சி கொடுத்த ரணில்

நாடு பூராகவும் 1178 இலவச வை-பை இணைய நிலையங்கள் அமைக்கப்பட்டுள்ளதாக பிரதமர் செயலகம் தெரிவித்துள்ளது. இலங்கை மக்கள் அனைவருக்கும் இலவச இணையம் என்ற வாக்குறுதிக்கு அமைய இந்த செயற்பாடு முன்னெடுக்கப்பட்டதாக, பிரதமர் செயலகம் விடுத்துள்ள அறிக்கையில் குறிப்பிடப்பட்டுள்ளது.

இந்த செயற்பாடு தகவல் மற்றும் தொடர்பாடல் தொழில்நுட்ப நிறுவனத்தினால் மேற்கொள்ளப்படுவதுடன் கண்கானிக்கப்பட்டு வருவதாகவும் குறிப்பிடப்படுகின்றது. நாடு முழுவதிலுமுள்ள பிரதான இடங்கள், ரயில் நிலையங்கள், பேருந்து நிலையங்கள், நூலகங்கள் உள்ளிட்ட பகுதிகளில் இவசல வை-வை நிலையங்கள் அமைக்கப்பட்டுள்ளன. இதன்மூலம் இலவசமாக நாட்டு மக்கள் இணைய சேவையை பெற்றுக்கொள்ள முடியும்.

இந்த வசதியை பெறும் எந்தவொரு நபரும் மாதாந்தம் 100 MBஅளவு இலவச வைபையை பெற்றுகொள்ள முடியும். எந்த நேரத்திலும் எந்தவொரு சந்தர்ப்பத்திலும் இலவச வைபை வசதியினை பெற்றுக் கொள்ள முடியும்.

2019ஆம் ஆண்டு பெப்ரவரி மாதம் வரையில் 1176 பகுதிகளில் 455741 பேர் இலவச இணைய வசதியினை பெற்றுக்கொள்ள கூடிய வகையில் இந்த வை-பை நிலையங்கள் அமைக்கப்பட்டுள்ளதாக, தகவல் மற்றும் தொடர்பாடல் தொழில்நுட்ப நிறுவனம் தெரிவித்துள்ளது.

அதற்கமைய 2016ஆம் ஆண்டு ஒக்டோபர் மாதம் 28ஆம் திகதி முதல் 455741 GB இலவச வை-பை பயன்படுத்தப்பட்டுள்ளதாக தெரிவிக்கப்பட்டுள்ளது. சமகாலத்தில் அதிகளவான இளைஞர், யுவதிகள் ஸ்மார்ட் கைபேசியை பயன்படுத்தி வருகின்றனர். இலவச இணைய வசதி மூலம் பலர் நன்மை அடைந்துள்ளதாக சுட்டிக்காட்டப்பட்டுள்ளது .

விபத்தில் ஒருவர் படுகாயம்

கிளிநொச்சி – கண்டாவளை பகுதியில் ஏற்பட்ட விபத்தில் ஒருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார். குறித்த விபத்து இன்று அதிகாலை இடம்பெற்றுள்ளதாகவும், வாகனத்தின் சாரதியே இவ்வாறு அனுமதிக்கப்பட்டுள்ளதாகவும் தெரிவிக்கப்படுகின்றது.

வாகனம் தனது வேகக் கட்டுப்பாட்டை இழந்தமையே குறித்த விபத்திற்கான காரணமென பொலிஸாரின் ஆரம்பகட்ட விசாரணைகளின் போது தெரியவந்துள்ளது.

இந்த விபத்து தொடர்பில் மேலதிக விசாரணைகளை கிளிநொச்சி பொலிஸார் மேற்கொண்டு வருகின்றமை குறிப்பிடத்தக்கது.

இலங்கையில் ஏற்படவுள்ள மாற்றம்

இலங்கையில் பெண்களுக்கு மாத்திரம் ரயிலில் பெட்டியை ஒதுக்கும் நடைமுறை அமுலுக்கு வரவுள்ளது. இந்த நடைமுறை மகளிர் தினத்தை முன்னிட்டு நாளை முதல் அமுலுக்கு வரவுள்ளதாக ரயில்வே திணைக்களம் தெரிவித்துள்ளது.

நாளை காலை 6.59 மணிக்கு வேயங்கொட ரயில் நிலையத்தில் இருந்து முதலாவது ரயில் பயணம் ஆரம்பிக்கப்படவுள்ளதாக ரயில்வே அதிகாரி டிலந்த பெர்னாண்டோ தெரிவித்துள்ளார். போக்குவரத்து மற்றும் சிவில் விமான சேவை அமைச்சர் அர்ஜூன ரணதுங்கவின் தலைமையில் இந்த சேவை ஆரம்பித்து வைக்கப்படும் என அவர் குறிப்பிட்டுள்ளார்.

இலங்கையில் பல வருடங்களுக்கு முன்னர் பெண்களுக்காக தனியான ரயில் பெட்டி முறை அறிமுகப்படுத்தப்பட்ட போதிலும் உரிய முறையில் அது முன்னெடுக்கப்படவில்லை.ரயில்களில் பெண்கள் முகம் கொடுக்கும் சிரமம் மற்றும் பாலியல் துன்புறுத்தல்களை தவிர்ப்பதற்காக இந்த நடவடிக்கை எடுக்கப்பட்டுள்ளதாக அவர் கூறியுள்ளார்.

அதற்கமைய, அலுவலக ரயில்களான பங்கதெரிய, சாகரிக்கா, சமுத்ராதேவி, ரம்புக்கன்ன, மஹவ ஆகிய ரயில்களில் மூன்றாவது பிரிவின் ஒரு பெட்டி இவ்வாறு ஒதுக்கப்பட்டுள்ளதாக அவர் தெரிவித்துள்ளார். பெண்களுக்காக ஒதுக்கப்பட்ட ரயில் பெட்டியில் ஆண்கள் ஏறுவதனை தவிர்ப்பதற்காகவும் இந்த சேவையை தொடர்ந்து உரிய முறையில் பாதுகாப்பதற்காகவும் பாதுகாப்பு பிரிவு அதிகாரிகள் கடமைக்கு ஈடுபடுத்தப்பட்டுள்ளதாக அவர் மேலும் தெரிவித்துள்ளார்.

யாழில் இளைஞர்களின் அட்டகாசம்

யாழ்.மட்டுவில் பகுதியில் வீடொன்றின் மீது மேற்கொள்ளப்பட்ட தாக்குதல் சம்பவத்துடன் தொடர்புடையவர்கள் எனும் சந்தேகத்தில் மூவரை சாவகச்சேரி பொலிஸார் கைது செய்துள்ளனர்.மட்டுவில் வின்சன் வீதியில் உள்ள வீடொன்றினுள் நேற்று செவ்வாய்க்கிழமை இரவு புகுந்த கும்பல் ஒன்று வீட்டின் கதவினை கை கோடாலியினால் கொத்தி சேதப்படுத்தி அட்டகாசம் புரிந்துள்ளனர்.

இலக்க தகடுகள் அற்ற மோட்டார் சைக்கிளில் சென்ற 20க்கும் மேற்பட்ட கும்பலே தாக்குதலை மேற்கொண்டு உள்ளது. குறித்த கும்பல் வீட்டின் மீது தாக்குதலை மேற்கொண்ட பின்னர் மட்டுவில் சந்தியில் கூடி நின்று அட்டகாசம் புரிந்துள்ளனர்.

குறித்த சம்பவம் தொடர்பில் வீட்டின் உரிமையாளர் சாவகச்சேரி பொலிஸாருக்கு அறிவித்ததை அடுத்து சம்பவம் தொடர்பில் விசாரணைகளை முன்னெடுத்த பொலிஸார் மூன்று இளைஞர்களை கைது செய்துள்ளனர்.

அத்துடன் அவர்களிடமிருந்து மோட்டார் சைக்கிள் ஒன்றையும் கைப்பற்றியுள்ளனர். கைது செய்யப்பட்ட இளைஞர்களிடம் மேலதிக விசாரணைகளை முன்னெடுத்துள்ளதுடன், ஏனையவர்களையும் கைது செய்யும் நடவடிக்கைகளை மேற்கொண்டுள்ளதாக பொலிஸார் தெரிவித்துள்ளனர்.