248 பாடசாலைகள் மூடப்படக்கூடிய அபாயம்

வட மாகாணத்தில் சுமார் 248 பாடசாலைகள் மூடப்படக் கூடிய அபாயத்தை எதிர்நோக்கியுள்ளதாக தெரிவிக்கப்படுகிறது. கடந்த பத்து ஆண்டுகளாக ஐம்பது மாணவர்களுக்கும் குறைந்த அளவில் கல்வி கற்று வரும் அரசாங்க பாடசாலைகளை மூடுவதற்கு தீர்மானிக்கப்பட்டுள்ளது.

இந்த பாடசாலைகளில் மாணவர்களின் எண்ணிக்கையை அதிகரிக்க நடவடிக்கை எடுக்கப்படாவிட்டால் இந்த ஆண்டின் இறுதியில் குறித்த பாடசாலைகள் மூடப்படும் என வட மாகாண கல்வி திணைக்களம் தெரிவித்துள்ளது.

இவ்வாறு மூடப்படும் பாடசாலைகளின் மாணவர்கள் அருகாமையில் அமைந்துள்ள பாடசாலைகளுக்கு மாற்றப்படுவர்கள் என தெரிவிக்கப்படுகிறது.

50 மாணவர்களை விடவும் குறைந்த பாடசாலைகளை பராமரிப்பதற்கு பாரியளவு செலவிடப்பட்ட போதிலும் அதற்கான கற்பித்தல் பிரதிபலன்கள் கிடைக்கப் பெறுவதில்லை என சுட்டிக்காட்டப்பட்டுள்ளது.

அண்மையில் கல்வி அமைச்சில் நடைபெற்ற கூட்டமொன்றில் இவ்வாறு 50 இற்கும் குறைந்த மாணவர்களை கொண்ட பாடசாலைகள் பற்றி கலந்துரையாடப்பட்டதாகவும், ஏனைய மாகாணங்களிலும் இவ்வாறான பாடசாலைகள் காணப்படுவதாகவும் அவற்றையும் மூடுவது குறித்து இணங்கப்பட்டுள்ளதாகவும் வட மாகாண கல்வித் திணைக்கள தகவல்கள் தெரிவிக்கின்றன.

திடுக்கிடும் உண்மைச்சம்பவம்

அம்பாறை உஹன திஸ்ஸபுர பகுதியில் 1968 ஆம் ஆண்டு பிறந்த 51 வயதுடைய நபரே வசந்தன். இவர் தனது கல்வியை முழுமையாக நிறைவேற்றாத நபர். தன்னுடைய சீவனோபாயத்திற்கு விவசாயமே செய்து வந்துள்ளார்.

சிறிது காலம் சென்ற பின்னர் இராணுவத்தில் இணைந்துக்கொள்கின்றார். இராணுவத்தில் கடமையாற்றிக்கொண்டிருக்கையில் திருமணமும் செய்துக்கொள்கின்றார். சிறிது காலம் சென்றதும் வசந்தன் 3 பிள்ளைகளுக்கு தந்தையாகின்றார்.

தனது பிள்ளைகளின் நலனுக்காக இராணுவத்திலிருந்து விலகி சாதாரண வாழ்க்கைக்கு ஆசைப்பட்டு வீடு திரும்புகிறார். வசந்தன் இராணுவத்தில் கடமையாற்றிய காலத்தில் அரசாங்கத்தினால் வழங்கப்பட்ட வீடு ஒன்று காணப்படுகின்றது.

குறித்த வீட்டில் வசந்தன் அவரது மூன்று பிள்ளைகள் மற்றும் மனைவி ஆகியோர் மகிழ்ச்சியாக வாழ்ந்து வருகின்றனர். சிறிது காலம் சென்றதும் அந்த வீட்டினை விற்கின்றார் வசந்தன். பின்னர் வெயாங்கொடை பகுதிக்கு சென்று அங்கு வீடொன்றினை விலைக்கு வாங்கி வசிக்கின்றனர்.

குடும்ப செலவீனங்களுக்காக வெயாங்கொடையிலும் விவசாயமே செய்கின்றார் வசந்தன். அவரின் விவசாய உற்பத்திகளுக்கு உதவியாக வசந்தனுக்கு உதவியாக வில்சன் என்ற நபர் ஒருவர் உதவி புரிந்து வருகின்றார்.

வசந்தன் மற்றும் வில்சன் இருவரும் ஒருவருக்கொருவர் சிறந்த நட்பினை பேணி வந்தனர். இருவரும் ஒருவரை ஒருவர் விட்டுக்கொடுப்பதில்லை… வில்சன் குடும்பத்தினருக்கு வசந்தன் விருந்தளிப்பதும் வசந்தன் குடும்பத்தினருக்கு வில்சன் விருந்தளிப்பதுமாக தங்களது நட்பினை தொடர்ந்தனர்.

இந்நிலையில் வில்சனின் மனைவி மீது வசந்தன் காதல் கொள்கிறார். வசந்தனின் பிள்ளைகளும் சமூகத்திற்கு அடையாளம் காண்பிக்கும் வகையில் நன்கு வளர்ந்தவர்கள். இந்நிலையில், வசந்தன் மற்றும் வில்சனின் மனைவி ஆகிய இருவருக்கும் இடையில் காதல் அதிகமாகியது.

வழமையை போன்று ஒரு பௌணர்மி தினம் வசந்தன் வெள்ளை நிற ஆடை அணிந்து வெளியில் செல்வதற்கு தயாராகிக்கொண்டிருந்தார். அப்பொழுது அவருக்கு தொலைபேசி அழைப்பொன்று வருகின்றது…. கையடக்க தொலைபேசி ஒலிக்கின்றது.

அந்த சந்தர்ப்பத்தில் வசந்தனின் மனைவியும் அருகில் நிற்கின்றார்… திடீரென ‘ உங்களுடைய போனை ஆன்சர் பண்ணுங்க… அவள்தான் கோல் எடுக்கிறாள்… கோயிலுக்கு போகத்தானே போய் வாருகங்கள்… நான் இருந்தால் என்ன…? எடுத்து பேசுங்கள்’ என்று வசந்தனின் மனைவி உயிர்நீத்த குரலில் உலறியபடி அவ்விடம் விட்டு நகர்கின்றாள்.

சுத்தமான ஆடை அணிந்து கோயிலுக்கு செல்ல புறப்பட்ட வசந்தன் தன்னுடைய உந்துருளியை எடுத்துகொண்டு வில்சனின் வீட்டுக்கு சென்று அவரின் மனைவியை அழைத்தவாறு உந்துருளியிலிருந்து இறங்க முயற்சிக்கின்றார்.

அப்பொழுது எதிர்பாராத வகையில் முகத்தை மூடிக்கொண்டு நபர் ஒருவர் வசந்தனை நோக்கி ஓடி வருகின்றார். வசந்தன் உந்துருளியிலிருந்து இறங்குவதற்கு முன்னர் உடலில் பல பாகங்களிலும் சரமாரியாக குத்துகின்றார்.

பலத்த கத்தி குத்திற்கு இலக்கான வசந்தன் கீழே சரிகின்றார்… வில்சனின் மனைவி வெளியே வருகை தந்து பார்த்த பின்னர் வீதியில் செல்லும் பல வாகனங்களை நிறுத்துமாறு கோரிக்கை விடுக்கின்றார்.

பயனளிக்கவில்லை… சிறிது நேரம் சென்றதும் முச்சக்கர வண்டி ஒன்று நிறுத்தப்படுகின்றது. அதில் வசந்தனை ஏற்றிக்கொண்டு வைத்தியசாலை செல்கிறாள் வில்சனின் மனைவி.
எனினும் செல்லும் வழியிலேயே உயிர்துறக்கின்றார் வசந்தன்…

வில்சனின் மனைவியுடன் வசந்தன் தகாத உறவினை பேணி வருகின்றார் என வில்சன் கேள்வியுற்றதை தொடர்ந்து வில்சன் இதற்கு முன்னர் வசந்தனின் முச்சக்கர வண்டியையும் தீக்கிரையாக்கியுள்ளார். இந்நிலையில் வசந்தனை குத்திய நபரும் வில்சனாகவே இருக்க வேண்டும் என காவல் துறையினர் சந்தேகம் வெளியிட்டுள்ளனர்.

துஸ்பிரயோகம் செய்த அதிபர்

17 வயதான பாடசாலை மாணவி ஒருவரை பாலியல் துஷ்பிரயோகத்திற்கு உட்படுத்தியதாக கூறப்படும் சம்பவம் தொடர்பில் குளியாபிட்டி பிரதேச பிரபல பாடசாரலை ஒன்றின் அதிபர் கைது செய்யப்பட்டுள்ளார்.

பாதிக்கப்பட்ட மாணவி காவற்துறையில் மேற்கொண்ட முறைப்பாட்டை அடுத்து அவர் கைது செய்யப்பட்டுள்ளார். பாடசாலை அதிபரினால் பாடசாலையினுள் வைத்து இந்த துஷ்பிரயோகம் மேற்கொள்ளப்பட்டுள்ளதாக அந்த முறைப்பாட்டில் தெரிவிக்கப்பட்டுள்ளது.

கைது செய்யப்பட்ட பாடசாலை அதிபர் இன்றைய தினம் நீதிமன்றில் முன்னிலைப்படுத்தப்படவுள்ளார்.

தெற்காசியாவின் அதிசயம்

தெற்காசியாவின் உயர்ந்த கட்டடம் என அழைக்கப்படும் கொழும்பு தாமரைக் கோபுரத்தின் பிரமிக்க வைக்கும் உள்ளக புகைப்படங்கள் வெளியாகி உள்ளன. 1153 அடிகள் உயரம் கொண்ட தாமரை கோபுரத்தின் உட்புற பகுதிகள் நட்சத்திர ஹோட்டல் போன்று வடிவமைக்கப்பட்டுள்ளது. அதற்கான புகைப்படங்களை அரச சார்பு சமூக வலைத்தளம் ஒன்று வெளியிட்டுள்ளது.

கடந்த வருடம் டிசம்பர் மாதம் 25ஆம் திகதி தாமரை கோபுரம் திறப்படவிருந்த போதிலும் ஜனாதிபதியின் வெளிநாட்டு விஜயம் காரணமாக அந்த நடவடிக்கை தடைப்பட்டது. இந்நிலையில் தாமரைக் கோபுரத்தின் செயல்பாடுகள் அனைத்தும் தற்போது முழுமையாக நிறைவடைந்துள்ளதாக திட்ட இயக்குனர் தெரிவித்துள்ளார்.

அதற்கமைய அடுத்த மாதம் இறுதியில் தாமரை கோபுரத்தின் திறப்பு விழா நடைபெறும் என எதிர்பார்க்கப்படுகின்றது. தெற்காசியாவில் அதிசயமிக்க கட்டடமாக தாமரை கோபுரம் அமைந்துள்ளது. இதனை நிர்மாணிக்க சீன வங்கியொன்று 100 மில்லியன் அமெரிக்க டொலர்கள் நிதியுதவியாக வழங்கியுள்ளது.

பிரமாண்டமிக்க தாமரை கோபுரத்தில் தொலைத்தொடர்பாடல் நிலையங்கள், அருங்காட்சியகம், உணவகங்கள், அங்காடிகள், மாநாட்டு மண்டபங்கள், 400 பேர் அமரும் கேட்போர் கூடம், 1,000 இருக்கைகள் கொண்ட அரங்கம், ஆடம்பர விடுதிகள், வாகன தரிப்பிடம் உட்பட பல்வேறு சிறப்பம்சங்கள் அடங்கியுள்ளமை குறிப்பிடத்தக்கது.

புதிய விதிமுறை

இலங்கையில் பொது போக்குவரத்து சேவைகளில் ஈடுபடும் பேருந்துகள் தொடர்பான புதிய விதிமுறை விரைவில் அமுலாகவுள்ளதாக தகவல்கள் வெளியாகியுள்ளன.

அந்த வகையில் குறித்த பேருந்துகளில் ஒலிக்கும் பாடல்கள் மற்றும் ஒலியின் அளவு தொடர்பிலேயே புதிய நடைமுறை கொண்டு வரப்படவுள்ளதாக தேசிய போக்குவரத்து ஆணைக்குழுவின் தலைவர் குறிப்பிட்டுள்ளார்.

மேலும் பொது போக்குவரத்து சேவைகளில் ஈடுபடும் பேருந்துகளில் ஒலிக்கவிடப்படக்கூடிய பாடல்களை தெரிவு செய்வதற்கான கலைஞர்கள் குழுவொன்றையும் நியமிக்க நடவடிக்கை எடுக்கப்படவுள்ளது. இந்த புதிய விதிமுறைகளை நடைமுறைப்படுத்த தவறும் பேருந்து நடத்துனர்கள் மற்றும் சாரதிகளுக்கு எதிராக சட்ட நடவடிக்கைள் எடுக்கப்படும் என அறிவிக்கப்பட்டுள்ளது

கோர விபத்து

கொழும்பிலிருந்து யாழ்ப்பாணம் நோக்கி சென்ற சொகுசு பேருந்தொன்று ஏ9 வீதியின் மாங்குளம் பகுதியில் வைத்து இன்று அதிகாலை விபத்திற்கு இலக்காகியுள்ளது. இந்த சம்பவத்தில் சாரதியின் உதவியாளர் விபத்து இடம்பெற்ற இடத்திலேயே உயிரிழந்துள்ளதாக தகவல்கள் தெரிவிக்கின்றன.

விபத்தில் காயமடைந்த மூன்று பேர் கிளிநொச்சி வைத்தியசாலையில் சிகிச்சைகளுக்காக அனுமதிக்கப்பட்டுள்ளதுடன், சிலர் சிறு காயங்களுக்கு இலக்காகியுள்ளனர்.

தரித்து நின்ற டிப்பர் வாகனமொன்றுடன் மோதியே பேருந்து விபத்திற்கு இலக்காகியுள்ளது. இதேவேளை அதிக வேகமே விபத்திற்கு காரணம் என ஆரம்ப கட்ட விசாரணைகளில் இருந்து தெரியவருகிறது.

சம்பவம் தொடர்பான மேலதிக விசாரணைகளை மாங்குளம் பொலிஸார் மேற்கொண்டு வருவதுடன், விபத்தில் சிக்கியோரை மீட்கும் பணியும் மேற்கொள்ளப்பட்டு வருவதாக எமது செய்தியாளர் குறிப்பிட்டார்.

விபத்தில் சிக்கிய பயணிகள் சம்பவம் தொடர்பில் கூறுகையில், சாரதி வவுனியா பகுதியில் வைத்து பேருந்தை மோசமாக திருப்பியதை அவதானித்தோம். அதன் பின்னர் அவர்கள் சத்தமாக சிரித்து கதைத்தனர். அதிக வேகமாக வாகனத்தை செலுத்தினர்.

பேருந்து வீதியில் தரித்து நின்ற டிப்பர் வாகனத்துடன் மோதி விபத்திற்கு உள்ளாகியுள்ளது. டிப்பர் வாகனமானது வீதியின் மறு பக்கத்திலுள்ள சிறு பற்றைக்குள் சென்றுள்ளது என குறிப்பிட்டுள்ளனர்.

வானிலையில் மாற்றம்

அடுத்த இரண்டு நாட்களுக்கு நாட்டின் தென்மேற்கு பகுதியில் (குறிப்பாக தென் மற்றும் சப்ரகமுவ மாகாணங்களில்) மழையுடன் கூடிய வானிலை அதிகரிக்கக் கூடிய சாத்தியம் காணப்படுகின்றது. இன்றைய வானிலை தொடர்பில் வளிமண்டலவியல் திணைக்களம் வெளியிட்டுள்ள அறிக்கையில் இந்த விடயம் கூறப்பட்டுள்ளது. அதில் தொடர்ந்தும் தெரிவிக்கப்பட்டுள்ளதாவது,

“மேல், சப்ரகமுவ, மத்திய, தென், மற்றும் ஊவா மாகாணங்களில் பி.ப. 2.00 மணிக்குப் பின்னர் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது. இரத்தினபுரி, களுத்துறை, காலி மற்றும் மாத்தறை மாவட்டங்களில் சில இடங்களில் 150 மி.மீற்றருக்கும் அதிகமான பலத்த மழைவீழ்ச்சி எதிர்பார்க்கப்படுகின்றது.

ஊவா மற்றும் மத்திய மாகாணங்களிலும் கேகாலை, கொழும்பு மற்றும் கம்பஹா மாவட்டங்களிலும் சில இடங்களில் 100 மி.மீ அளவான பலத்த மழைவீழ்ச்சி எதிர்பார்க்கப்படுகின்றது.

மட்டக்களப்பு மற்றும் அம்பாறை மாவட்டங்களில் பல தடவைகள் சிறிதளவான மழைவீழ்ச்சி எதிர்பார்க்கப்படுகின்றது. தென் மாகாணத்திலும் இரத்தினபுரி, களுத்துறை, மொனராகலை மற்றும் நுவரெலியா மாவட்டங்களிலும் பலத்த மின்னல் தாக்கத்திற்கான சாத்தியம் காணப்படுகின்றது.

இடியுடன் கூடிய மழை பெய்யும் வேளைகளில் அப்பிரதேசங்களில் தற்காலிகமாக பலத்த காற்றும் வீசக்கூடும்.

மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக் கொள்ளுமாறு பொதுமக்கள் அறிவுறுத்தப்படுகின்றார்கள்.”

அபூர்வ சத்திர சிகிச்சை

பதுளை வைத்தியசாலையில் அபூர்வ சத்திர சிகிச்சை ஒன்று முதல் முறையாக நோயாளி ஒருவருக்கு மேற்கொள்ளப்பட்டுள்ளது.

நோயாளிக்கு இரண்டு சீறுநீரகத்திலும் காணப்பட்ட 6 கற்கள் வயிற்றை வெட்டாமல் நீக்கப்பட்டுள்ளது. 4 மில்லிமீற்றர் நவீன இயந்திரம் ஒன்றின் மூலம் சிறுநீரகத்திற்கு சேதம் ஏற்படாத வகையில் இந்த கற்கள் நீக்கப்பட்டுள்ளன.

குறித்த கற்கள் தூளாக்கப்பட்டு (PCNL முறை) 3 சத்திர சிகிச்சைகள் ஒரே முறையில் மேற்கொள்ளப்பட்ட அரிய சந்தர்ப்பம் பதுளை வைத்தியசாலையில் நேற்று இடம்பெற்றுள்ளது. 48 வயதான பெண் ஒருவரே இந்த விசேட சத்திர சிகிச்சைக்கு முகம் கொடுத்துள்ளார். சத்திர சிகிச்சையின் பின்னர் நோயாளி ஆராக்கியமாக இருப்பதாக விசேட வைத்தியர் தெரிவித்துள்ளார்.