ஏற்பட்ட பெரும் பதற்றம்

மட்டக்களப்பு கல்லடி பாலத்தில் குதித்து யுவதி ஒருவர் தற்கொலை முயற்சி செய்துள்ள நிலையில், அந்த பகுதியில் பதற்றமான சூழ்நிலை நிலவி வருகின்றது. இச் சம்பவம் நேற்று இரவு இடம்பெற்றுள்ளதாக அறியமுடிகின்றது. எனினும், குறித்த யுவதியை அந்த பகுதியில் இருந்த இளைஞர்கள் ஒன்றிணைந்து காப்பாற்றியுள்ளதாகவும் தெரியவந்துள்ளது.

அண்மைக் காலமாக மட்டக்களப்பு கல்லடி பாலத்தில் குதித்து தற்கொலை செய்துகொள்ளும் சம்பவங்கள் அதிகரித்துள்ள நிலையில், இந்த விடயம் குறித்து மட்டக்களப்பு மாநகரசபையில் கலந்துரையாடப்பட்டிருந்தது.

கல்லடி பாலத்தில் குதித்து தற்கொலை செய்துகொள்வதை தடுப்பது குறித்து பேசப்பட்டிருந்தது. இந்நிலையிலேயே, இன்றும் தற்கொலை முயற்சி ஒன்று மேற்கொள்ளப்பட்டுள்ளது.

இதேவேளை, மட்டக்களப்பில் கடந்த ஆண்டு மாத்திரம் 90க்கும் மேற்பட்டவர்கள் தற்கொலை செய்து கொண்டுள்ளதாகவும் தகவல்கள் வெளியாகியுள்ளமை குறிப்பிடத்தக்கது.

இருவர் பலி

தோம்பே – ஹங்வெல்ல – நித்தபத்தர பிரதேசத்தில் இராணுவ வாகனம் ஒன்று உந்துருளி ஒன்றுடன் மோதுண்டதில் ஒரே குடும்பத்தினை சேர்ந்த இருவர் உயிரிழந்துள்ளனர். நேற்று இரவு இடம்பெற்ற குறித்த விபத்தில் மாமியார் மற்றும் மருமகளும் உயிரிழந்துள்ளதாக காவற்துறை தெரிவித்துள்ளது.

சம்பவம் தொடர்பில் இராணுவ வாகனத்தின் சாரதி கைது செய்யப்பட்டுள்ளதாக காவற்துறை மேலும் தெரிவித்தது.

இராணுவ வாகனம், மற்றும் ஓர் வாகனத்தினை முன்னோக்கி செல்ல முற்பட்ட போது, எதிர்திசையில் பயணித்த உந்துருளியுடன் மோதுண்டு குறித்த விபத்து நேர்ந்துள்ளது.

வீதி விபத்தில் ஒருவர் பலி

யாழ்ப்பாணம் சங்குபிட்டி பகுதியில் இடம்பெற்ற வீதி விபத்தில் ஒருவர் உயிரிழந்துள்ளதுடன் மேலும் ஒருவர் காயமடைந்துள்ளார். இந்த சம்பவம் நேற்று மாலை இடம்பெற்றதாக காவல் துறை ஊடகப்பேச்சாளர் அலுவலகம் தெரிவித்துள்ளது.

குறித்த பகுதியில் அதிக வேகத்துடன் சென்ற உந்துருளி ஒன்று வேகத்தை கட்டுபடுத்த முடியாமல் கல் ஒன்றுடன் மோதுண்டமையினால் இந்த விபத்து ஏற்பட்டுள்ளது.

சம்பவத்தில் மானிப்பாய் பகுதியை சேர்ந்த 22 வயதுடைய இளைஞர் ஒருவர் உயிரிழந்துள்ளதுடன் 24 வயதுடைய இளைஞர் யாழ் போதனா வைத்தியசாலையில் சிகிச்சைக்காக சேர்க்கப்பட்டுள்ளார்.

பொன்னாலை வீதி மானிப்பாயைச் சேர்ந்த 22 வயதான சிவப்பிரகாசம் தனுசன் என்ற இளைஞனே இவ்வாறு உயிரிழந்துள்ளார். மோட்டார் சைக்களிில் பயணித்த மானிப்பாயைச் சேர்ந்த 24 வயதான வசந்தகுமார் நிரோசன் படுகாயம் அடைந்துள்ளார். இந்த சம்பவம் தொடர்பான மேலதிக விசாரணைகளை காவல் துறையினர் மேற்கொண்டு வருகின்றனர்.

பலரையும் ஏமாற்றிய இளைஞர்

கையடக்க தொலைபேசியை கொள்வனவு செய்வது போன்று பண மோசடியில் ஈடுபட்டு தொலைபேசியுடன் தப்பிச் சென்ற சந்தேக நபரொருவர் காவல்துறையால் கைது செய்யப்பட்டுள்ளார். காலி பகுதியை சேர்ந்த 21 வயதான ஜனித் கஷான் என்ற 21 வயதான இளைஞனே கைது செய்யப்பட்டுள்ளார்.

சந்தேக நபர் இணையத்தளம் ஊடாக குறித்த கையடக்க தொலைபேசி உரிமையாளரின் வங்கி கணக்குக்கு பணம் வைப்பு செய்வதாக கூறி போலி ஆவணங்களை காட்டி பின்னர் தொலைபேசியுடன் தப்பிச் சென்றுள்ளார். குறித்த இளைஞன் இவ்வாறு பல மோசடிகளை மேற்கொண்டு வந்துள்ளார்.

கையடக்க தொலைபேசிகளை விற்பனை செய்யும் நபர்கள், தமது வங்கி கணக்குகளை பரிசோதிக்கும் போது அவ்வாறு பணம் ஏதும் வைப்பிலடாமை தெரியவந்துள்ளது. குறித்த சந்தேக நபர் பாணந்துறை, கல்கிஸ்ஸை, மிரிஹான மற்றும் கட்டுநாயக்க ஆகிய பகுதிகளில் இவ்வாறு மோசடிகளை செய்து தப்பிச் சென்றுள்ளார் என காவல் நிலையங்களில் பல முறைப்பாடுகள் மேற்கொள்ளப்பட்டுள்ளன.சந்தேக நபர் முதலில் ஹிக்கடுவை பகுதியிலும், பின்னர் நுகேகொடை பகுதியிலும் வசித்து வந்ததுடன், அவர் இரண்டு திருமணங்களை முடித்தவர் என்றும் தெரியவந்துள்ளது.

இவ்வாறு பல மோசடிகளை மேற்கொண்ட அவரை கைது செய்வதற்காக கட்டுநாயக்க காவல்துறையால் கையடக்க தொலைபேசியொன்று விற்பனை செய்யப்படவுள்ளதாக இணையளத்தளத்தில் விளப்பரப்படுத்தி திட்டம் தீட்டப்பட்டது.

இந்நிலையில் அதனை கொள்வனவு செய் வந்த சந்தேக நபரை கட்டுநாயக்க பகுதியில் வைத்து காவல்துறையினர் கைது செய்தனர். பின்னர் சந்தேக நபர், நீர்கொழும்பு நீதவான் நீதிமன்றில் முன்னிலைப்படுத்தப்பட்டு அடுத்த மாதம் முதலாம் திகதி வரை விளக்கமறியலில் வைக்கப்பட்டுள்ளார்.

இளைஞனின் சடலம் மீட்பு

திருகோணமலையில் தூக்கில் தொங்கிய நிலையில் இளைஞன் ஒருவனின் சடலம் மீட்கப்பட்டுள்ளதாக எமது செய்தியாளர் தெரிவித்தார். திருகோணமலை, பள்ளத்தோட்டம் பகுதியில் உள்ள வீடொன்றில் இன்று பகல் இச்சம்பவம் இடம்பெற்றுள்ளது.

தந்தை திட்டியமையினால் குறித்த இளைஞன் தற்கொலை செய்துள்ளதாக தெரிவிக்கப்படுகின்றது. இவ்வாறு உயிரிழந்த இளைஞன் 20 வயதுடையவர் என தெரிவிக்கப்படுகின்றது.

குறித்த இளைஞனின் சடலம் தற்போது பிரேத பரிசோதனைக்காக வைத்தியசாலைக்கு கொண்டு செல்லப்பட்டுள்ளது. இது தொடர்பாக பொலிஸார் மேலதிக விசாரணைகளை மேற்கொண்டு வருவதாக தெரிவிக்கப்படுகின்றது.

யாழில் நடந்த பெரும் சோகம்

யாழ்ப்பாணத்தில் தூக்கில் தொங்கிய நிலையில் இளம் யுவதி ஒருவரின் சடலம் மீட்கப்பட்டுள்ளதாக பொலிஸார் தெரிவித்துள்ளனர். கைதடி மத்தி கைதடியைச் சேர்ந்த 21 வயதுடைய யுவதியே இவ்வாறு சடலமாக மீட்கப்பட்டுள்ளார்.

இரண்டு மாதங்களுக்கு முன்னர் அவரின் தாயார் இறந்துள்ளார். இதனால் ஏற்பட்ட மன உளைச்சல் காரணமாக யுவதி உயிரை மாய்த்துக் கொண்டதாக தெரிவிக்கப்படுகிறது.

இச் சம்பவம் அப் பகுதியை சோகத்தில் ஆழ்த்தியுள்ளது. மேலதிக விசாரணைகளை சாவகச்சேரி பொலிஸார் மேற்கொண்டு வருகின்றனர்.