கண்ணீரால் நனைந்த கிளிநொச்சி

காணாமல் ஆக்கப்பட்டவர்களின் உறவினர்களால் கிளிநொச்சியில் இன்று காலை கவனயீர்ப்பு போராட்டமொன்று முன்னெடுக்கப்பட்டுள்ளது. மேலும் வலிந்து காணாமல் ஆக்கப்பட்ட தங்களின் உறவுகளுக்கு நீதியை பெற்றுத்தா எனக் கதறிய உறவுகளால் கிளிநொச்சி கண்ணீரால் நனைந்துள்ளது. சர்வதேசத்திடமும், அரசிடமும் நீதி கோரி அவர்கள் எழுப்பிய கோசங்களால் விண்ணதிர்ந்தது.

ஐ.நா. மனித உரிமைகள் பேரவையின் 40ஆவது கூட்டத்தொடர் இன்று ஆரம்பமாகவுள்ள நிலையில் அதன் கவனத்தை ஈர்க்கும் நோக்கில், காணாமலாக்கப்பட்டோரின் உறவினர்களால் இந்தப் போராட்டம் முன்னெடுக்கப்பட்டுள்ளது.

ஐ.நா. மனித உரிமைகள் பேரவையில் அளித்திருந்த வாக்குறுதிகளை இலங்கை நிறைவேற்றத் தவறியுள்ளதை வெளிப்படுத்தியும், தமக்கு இன்னமும் நீதி வழங்கப்படாததைக் கண்டித்தும், இலங்கைக்கு இனிமேலும் கால அவகாசம் வழங்க வேண்டாமென தெரிவித்தும் இந்த போராட்டம் முன்னெடுக்கப்பட்டுள்ளது.

இன்றைய தினம் கிளிநொச்சி கந்தசுவாமி ஆலய முன்றலில் காலை ஒன்பது மணிக்கு வடக்கு கிழக்கு வலிந்து காணாமல் ஆக்கப்பட்டவர்களின் உறவுகளால் மேற்கொள்ளப்பட்ட போராட்டம் அங்கிருந்து ஏ9 வீதி 155 ஆம் கட்டையில் அமைந்துள்ள ஐக்கிய நாடுகள் சபை அலுவலகம் வரை சென்றடைந்து அங்கு மகஜரும் கையளிக்கப்பட்டுள்ளது.

கிளிநொச்சியில் அனைத்து வர்த்தக நிலையங்களும் பூட்டப்பட்டு, அரச மற்றும் தனியார் போக்குவரத்து சேவைகளும் நிறுத்தப்பட்டமையால் நகர் வெறிசோடியிருந்தது. பாடசாலைகளுக்கு உள்ளூர் ஆசிரியர்கள் வருகை தந்திருந்த போதும் மாணவர்கள் எவரும் சமூகமளித்திருக்கவில்லை.

அரச திணைக்களங்களில் வெளிமாவட்ட உத்தியோகத்தர்கள் பேருந்து போக்குவரத்து இன்மையால் பெருமளவு சமூகமளித்திருக்கவில்லை. திணைக்களங்கள் திறக்கப்பட்டிருந்த போதும் சேவைகள் இடம்பெறவில்லை. இவ்வாறு மாவட்டத்தின் அனைத்து செயற்பாடுகளும் நிறுத்தப்பட்டு வலிந்து காணாமல் ஆக்கப்பட்டவர்களின் உறவினர்களின் போராட்டத்திக்கு ஆதரவு வழங்கியிருந்தார்கள்.

கடந்த 2017-02-20ஆம் திகதி கிளிநொச்சி கந்தசுவாமி ஆலய முன்றலில் ஆரம்பிக்கப்பட்ட வலிந்து காணாமல் ஆக்கப்பட்டவர்களின் உறவினர்களின் போராட்டம் இரண்டு வருடங்களை கடந்தும் எவ்வித தீர்வும் எட்டப்படாது தொடர்ந்து வரும் நிலையில் இன்றைய மாபெரும் கண்டன போராட்டம் இடம்பெற்றுள்ளது.

போராட்டத்தில் கலந்துகொண்டவர்கள் வேண்டாம் வேண்டாம் காணாமல் ஆக்கப்பட்டவர்களின் அலுவலகம் வேண்டாம், வேண்டும் வேண்டும் சர்வதேச விசாரணை வேண்டும், இதன்போது போதும் இந்தச் சோதனை, நமக்கு ஏனிந்த வேதனை கண்ணீருடன்தான் நாங்கள் வாழ வேண்டுமா?, எங்கள் கண்ணீருக்கு முடிவேது, எங்கள் துயருக்கு பதிலேது, எங்கள் துயரம் உங்களுக்கு வியாபார பொருளா?,

எங்கள் கண்ணீர் உங்களுக்கு அரசியல் விளையாட்டா?, எங்கே எங்கே எங்கள் உறவுகள் எத்தனை காலம்தான் நாம் தேடுவது, அவரை இன்னும் எத்தனை காலம்தான் காத்திருப்பது நாம், இன்னும் எத்தனை தடவை எமாற்றுவீர் எம்மை, போதும் போதும் ஏமாற்று நாடகங்கள் இனியும் நாங்கள் ஏமாளிகள் அல்ல போன்ற கோசங்களை எழுப்பியவாறும் பதாதைகளையும் ஏந்தியிருந்தனர்.

இப் போராட்டத்தில் வடக்கு, கிழக்கில் வலிந்து காணாமல் ஆக்கப்பட்டவர்களின் உறவினர்கள், அருட்தந்தையர்கள், ஏனைய மதங்களின் குருமார்கள், நாடாளுமன்ற உறுப்பினர்களான சிவசக்தி ஆனந்தன், செல்வம் அடைக்கலநாதன், சிறீதரன், முன்னாள் நாடாளுமன்ற உறுப்பினர்களான சந்திரகுமார், சுரேஸ் பிரறேமச்சந்திரன், வடக்கு மாகாண முன்னாள் உறுப்பினர்கள், பொது அமைப்புகள், யாழ். பல்கலைகழக சமூகம், தொழிற்சங்கள், மனித உரிமைகள் செயற்பாட்டாளர்கள் சட்டத்தரணிகள் என ஆயிரக்கணக்கானவர்கள் கலந்து கொண்டிருந்தனர்.

முழுமையாக முடங்கியது வட மாகாணம்

வட மாகாணம் முழுவதும் பூரண ஹர்த்தால் முன்னெடுக்கப்பட்டு வருவதால் அனைத்து விதமான சேவைகளும் முடங்கியுள்ளன. மாகாணத்தின் அனைத்து மாவட்டங்களில் காலை முதல் ஹர்த்தால் முன்னெடுக்கப்பட்டு வருகிறது.

அரச சேவைகள், போக்குவரத்து, பாடசாலை என பல்வேறு பகுதிகளும் முடக்கப்பட்டுள்ளது. அனைத்து வரத்தக நிலையங்களும் பூட்டப்பட்டுள்ளதுடன், சேவை சந்தையில் கறுப்பு கொடி கட்டப்பட்டு கர்த்தால் கடைப்பிடிக்கப்பட்டுள்ளது.

பாடசாலைகளிற்கு மாணவர்கள் வருகை தராமையால் பாடசாலை வெறிச்சோடி காணப்படுவதுடன், எவ்வித கற்றல் செயற்பாடுகளும் இடம்பெறவில்லை. அரச, தனியார் போக்குவரத்து சேவைகளும் முழுமையாக பாதிப்படைந்துள்ளன. வட மாகாணத்தின் பிரதான வீதிகள் வெறிச்சோடிக் கிடக்கின்றன.

காணாமல் ஆக்கப்பட்டடோர் விடயம், போர்க் குற்றங்களுக்கு பொறுப்பு கூறவேண்டும் போன்ற பல நிபந்தனைகள் விதிக்கப்பட்டு இலங்கை அரசுக்கு இரண்டு வருட கால அவகாசம் வழங்கப்பட்டது. எதிர்வரும் மாதத்துடன் இரண்டு வருடங்கள் முடிவடைய இருக்கின்றது. ஆனால் எவையும் நிறைவேற்றப்படவில்லை.

இந்நிலையில் ஐ.நா மனித உரிமைகள் பேரவையின் 40 ஆவது கூட்டத்தொடர் இன்று ஆரம்பமாகவுள்ளது. பேரவையின் கவனத்தை ஈர்க்கும் வகையில் இந்தப் போராட்டத்துக்கு முன்னெடுக்கப்பட்டு வருகின்றது.

குள்ள மனிதர்களின் அட்டகாசம்

இலங்கையின் பல பகுதிகளில் அச்சுறுத்தலாக மாறியுள்ள குள்ள மனிதர்கள் தொடர்பில் விசாரணை நடவடிக்கைகள் ஆரம்பிக்கப்பட்டுள்ளபொலிஸார் தெரிவித்துள்ளனர்.

அம்பாறை, அனுராதபுரம், குளியாப்பிட்டியை தொடர்ந்து மஹவிலச்சிய பொலிஸ் பிரிவின் பல இடங்களில் இரண்டு மர்ம மனிதர்களின் நடமாட்டம் காணப்பட்டதாக பெண்கள் சிலர் பொலிஸ் நிலையத்தில் முறைப்பாடு செய்துள்ளனர்.

இந்த நிலையில் நேற்று தமது வீட்டிற்கு அருகில் இந்த இரண்டடி குள்ள மனிதனை அவதானித்ததாக சியம்பலாகஸ்வெவ பெண்களினால் தத்திரிமலை பொலிஸாரிடம் அழைப்பேற்படுத்தி தெரியப்படுத்தியுள்ளனர். உடனடியாக அந்த பகுதிக்கு பொலிஸார் சென்ற போதிலும் அவ்வாறான குள்ள மனிதர்களை அவதானிக்க முடியவில்லை என பொலிஸார் குறிப்பிட்டுள்ளனர்.

இதேவேளை, அண்மையில் இந்த குள்ள மனிதர்களின் தாக்குதலினால் இரண்டு பெண்கள் காயமடைந்துள்ளதாக தெரிவிக்கப்படுகின்றது. இந்த நிலையில் இதனை கண்டுபிடிக்கும் தீவிர முயற்சியில் பொலிஸார் ஈடுபட்டுள்ளதாக தெரிவிக்கப்படுகின்றது.