தம்பதியினர் செய்த நெகிழ்ச்சி செயல்

புல்வாமா தாக்குதலில் உயிரிழந்த ராணுவ வீரர்களுக்கு திண்டுக்கல்லை சேர்ந்த புதுமணத்தம்பதியினர் அஞ்சலி செலுத்தியதோடு, ரத்ததானம் செய்துள்ள சம்பவம் அனைவரும் நெகிழ்ச்சியை ஏற்படுத்தியுள்ளது.

காஷ்மீர் மாநிலத்தில் கடந்த சில நாட்களுக்கு முன்பு நடைபெற்ற தற்கொலைபடை தாக்குதலில் 40 ராணுவ வீரர்கள் வீர மரணம் அடைந்தனர். அவர்களுக்கு அஞ்சலித்து செலுத்தும் விதமாக காஷ்மீர் முதல் கன்னியாகுமரி வரை பொதுமக்கள் பலரும் ஆங்காங்கே பதாகைகளை வைத்துள்ளனர்.

இந்த நிலையில் திண்டுக்கல்லை சேர்ந்த ஹரிஹரன்(25) என்பவருக்கும், அனுமோனிஷா (23) என்பவருக்கும் ஆட்சியர் அலுவலகம் அருகே உள்ள திருமண மணடபத்தில் திருமணம் நடைபெற்றது.

திருமணத்திற்கு முன்பாக மரணமடைந்த ராணுவ வீரர்களுக்கு மௌன அஞ்சலி செலுத்திய தம்பதியினர், அதன் பிறகு மேடைக்கு அருகில் அமர்ந்தவாறே ரத்ததானம் செய்தனர்.

இதனை பார்த்து நெகிழ்ந்து போன உறவினர்கள் பலரும் ரத்ததானம் செய்ய முன்வந்தனர். இந்த விழாவின் போது 35 பேர் வரை ரத்ததானம் செய்ததாக திருமண தம்பதியினர் மகிழ்ச்சி தெரிவித்துள்ளனர்.

தாய் எடுத்த சோக முடிவு

கடலூர் மாவட்டத்தில் குடும்ப பிரச்சனை காரணமாக 2 மகன்களை கொலை செய்துவிட்டு தாய் தற்கொலை செய்துகொண்டது சோகத்தை ஏற்படுத்தியுள்ளது. மதிவாணன் – சிவசங்கரி ஆகிய இருவரும் காதலித்து திருமணம் செய்துகொண்டனர். இவர்களுக்கு 2 மகன்கள் உள்ளனர்.

கடந்த ஒரு வருடமாக கணவன் மனைவிக்கு இடையே பிரச்சனை இருந்துவ்ந்துள்ளது. இதனால் சிவசங்கரி மனவேதனையில் இருந்துள்ளார். இந்நிலையில் நேற்று இரவு தனது இருமகன்களுக்கு விஷ மருந்து கொடுத்து கொலை செய்துள்ளார்.

பின்னர் இறந்துபோன மகன்களுக்கு மலர்தூவி அழுதுள்ளார். இதனைத்தொடர்ந்து தானும் தூக்குபோட்டு தற்கொலை செய்துகொண்டார்.வீடு திரும்பிய மதிவாணன் தனது மனைவி தூக்கில் தொங்குவதை பார்த்து அதிர்ச்சியடைந்து அழுதுள்ளார்.

 சிவசங்கரி தற்கொலை கொள்வதற்கு முன்னதாகக் காவல்துறை மற்றும் உறவினர்கள் அம்மா, தங்கை, மாமா எனத் தனித்தனியாக 4 கடிதங்கள் எழுதி வைத்துள்ளார். அந்தக் கடிதத்தில் என் கணவர் மிகவும் பொறுமையானவர், அவருக்கு நான் அதிகளவு தொந்தரவு கொடுத்துவிட்டேன். எனவே நான் சாகப்போகிறேன்.

என் சாவுக்கும் என் மகன்கள் சாவுக்கும் யாரும் காரணம் இல்லை. எங்கள் உடலை உடல் கூறாய்வு செய்ய வேண்டாம் என எழுதிவைத்துள்ளார்.

தாய், மகளின் சொகுசு வாழ்க்கை

ஒரே வீட்டை 5 பேரிடம் விற்று மோசடியாக கோடிக்கணக்கில் சம்பாதித்து இலங்கை, பிரித்தானியா உள்ளிட்ட நாடுகளில் சொகுசு வாழ்க்கை வாழ்ந்த தாய் மற்றும் மகள் கைது செய்யப்பட்டுள்ளனர். இந்தியாவின் புதுடெல்லியின் கிரேட்டர் கைலாஷ் பகுதியைச் சேர்ந்தவர் மோலி கபூர் (65), இவர் தனது மகளான அனுராதா கபூருடன் (43) தங்களுக்கு சொந்தமான வீட்டில் வசித்து வந்தனர்.

இவர்கள் தங்களது வீட்டினை 2.8 கோடி ரூபாய்க்கு விற்பனை செய்வதாகக் கூறி 2014-15 காலகட்டத்தில் 5 பேரிடம் புரிந்துணர்வு ஒப்பந்தம் செய்துகொண்டு ஆளுக்கு 60 லட்ச ரூபாய், ஒரு கோடி ரூபாய் என மொத்தமாக 2.5 கோடி ரூபாயை முன்பணமாக பெற்றுக்கொண்டு, செல்ஃபோன்களை ஸ்விட்ச் ஆஃப் செய்துவிட்டு தப்பிச்சென்றனர்.

இவர்கள் மீதான புகார்கள் இருவேறு காவல் நிலையங்களில் பதிவு செய்யப்பட்டிருந்த நிலையில், ஹொட்டல் ஒன்றில் இவர்கள் தங்கியிருந்ததை அறிந்து அங்கு சென்ற பொலிசார் இருவரையும் கைது செய்தனர்.

அவர்களிடம் நடத்தப்பட்ட விசாரணையில் ஏமாற்றிய பணத்தை கொண்டு பிரித்தானியா, இலங்கை, அமெரிக்கா, அவுஸ்திரேலியா, சிங்கப்பூர் ஆகிய நாடுகளுக்கு சென்று சொகுசான வாழ்க்கை வாழ்ந்ததாக கூறி அதிர வைத்தனர்.

மேலும் அனுராதா லண்டன் பல்கலைக்கழகத்தில் MBA பட்டம் பெற்றவர் என்பதும், படித்துவிட்டு நாடு திரும்பியவர் எனவும் தெரிந்தது.

இங்கு, பங்கு ஆலோசகராக பணியாற்றி வந்த நிலையில் உடனடியாக அதிக பணம் சம்பாதிக்கும் பொருட்டு தனது தாயிடம் இந்த மோசடி யோசனை குறித்து எடுத்துக்கூறி அவரை தனக்கு சாதகமாக மாற்றி மோசடிக்கு துணை புரியவைத்துள்ளார் என்பதும் தெரியவந்துள்ளது.

இந்திய இராணுவம் ருத்ர தாண்டவம்

இந்தியாவில் கடந்த 14ஆம் திகதி ஜம்மு காஷ்மீரில் இருந்து ஸ்ரீநகருக்கு சென்ற துணை இராணுவப்படையினர் மீது, பாகிஷ்தான் ஜெய்ஷ் இ முகமது என்ற தீவிரவாத அமைப்பினைச் சேர்ந்த ஒரு இளைஞர் தற்கொலைப்படைத் தாக்குதலை நடத்தியிருந்தார்.

குறித்த தாக்குதலின் போது 40இற்கும் மேற்பட்ட வீரர்கள் மரணமடைந்தமை அனைவரையும் அதிர்ச்சிக்குள்ளாக்கியிருந்தது. இந்நிலையில், அதனைத் தொடர்ந்து ஜம்மு காஷ்மீரில் இந்திய பாதுகாப்பு படையினர் 12 மணித்தியாலமாக நடத்திய வேட்டையில், புல்வாமா தாக்குதலின் மூளையாக செயல்பட்ட தீவிரவாதி கம்ரான் சுட்டுக் கொல்லப்பட்டுள்ளார்.

சி.ஆர்.பி.எப் வீரர்கள் மீது தாக்குதல் நடத்தியதற்கு பொறுப்பேற்ற, ஜெய்ஷ் இ முகமது தீவிரவாத அமைப்பின் தலைவர் மசூத் ஆசாருக்கு நெருக்கமானவர், கம்ரான் என்பதால், பாதுகாப்பு படையினரின் நடவடிக்கையில் இது முக்கியமான திருப்புமுனையாக பார்க்கப்படுகிறது.

காஷ்மீரிலுள்ள இளைஞர்களுக்கு மூளைச் சலவை செய்து தங்கள் தீவிரவாத இயக்கத்தில் சேர்ப்பது மற்றும் அவர்களுக்கு ஆயுதப் பயிற்சி அளிப்பது போன்ற செயல்களில் ஈடுபட்டு வந்தவர் கம்ரான். பாதுகாப்பு படையினர் கடந்த 12 மணி நேரமாக எல்லையில் நடத்திய தேடுதல் வேட்டை மற்றும் துப்பாக்கிச் சூடு தாக்குதல்களில் கம்ரான் கொல்லப்பட்டதோடு அவரது நண்பனான மற்றொரு தீவிரவாதி காஜி ரஷீத் என்பவரும் கொல்லப்பட்டுள்ளார்.

இந்த துப்பாக்கிச் சண்டையில் இந்திய இராணுவத்தின் 4 வீரர்களும் வீர மரணம் அடைந்தனர். பொது மக்களில் ஒருவரும் பலியாகியுள்ளார். துப்பாக்கிச் சண்டை நடைபெற்ற பகுதி என்பது, கடந்த 14ஆம் திகதி சி.ஆர்.பி.எப் படை வீரர்கள் மீது தீவிரவாதி தற்கொலைத்தாக்குதல் நடத்திய இடத்தில் இருந்து சுமார் 10 கி.மீ தொலைவிலுள்ள பகுதியாகும்.

கம்ரானை கடந்த பல ஆண்டுகளாகவே இராணுவம் தேடி வந்தது. ஆனால், கிராமம் கிராமமாக இருப்பிடத்தை மாற்றிக்கொண்டு இளைஞர்களை தீவிரவாதிகள் பக்கம் இழுக்கும் வேலையில் கம்ரான் ஈடுபட்டு வந்ததால், பிடிக்க முடியவில்லை. இந்த நிலையில்தான், இப்போது சுட்டுக்கொல்லப்பட்டுள்ளார்.

இந்திய இராணுவம் நேற்று நள்ளிரவு முதல் தொடர்ந்து 12 மணி நேரங்களாக காஷ்மீர் எல்லையில் தொடர்ந்து அதிரடி வேட்டை நடத்தி வந்தமை குறிப்பிடத்தக்கது.

குழந்தையை துடிதுடிக்க கொலை செய்த தாய்

வேலூர் மாவட்டத்தில் இரண்டாவது திருமணம் செய்துகொள்வதற்கு தடையாக இருந்த காரணத்தால் தனது ஒன்றரை வயது குழந்தையை கொலை செய்ததாக தாய் அதிர்ச்சி வாக்குமூலம் அளித்துள்ளார்.

பாஸ்கரன் – நளினி தம்பதியினருக்கு இரண்டு மகன்களும், ஒன்றரை வயதில் ஒரு குழந்தையும் உள்ளனர். பாஸ்கரன் வெளியூரில் கட்டிட வேலை பார்த்து வந்துள்ளார். இந்நிலையில் நளினிக்கு, முரளி என்பவருடன் காதல் மலர்ந்துள்ளது. இந்த விவகாரம் தெரிந்து பாஸ்கரன் தனது மனைவியை கண்டித்துள்ளார்.

இதனால் தனது இரண்டு மகன்களையும் கணவருடன் விட்டு, ஒன்றரை வயது பெண் குழந்தையை மட்டும் அழைத்துக்கொண்டு காதலன் முரளியுடன் சென்றுவிட்டார். இந்நிலையில் தனது மகள் ரித்விகா மயங்கிவிட்டதாக திடீரென மருத்துவமனைக்கு அழைத்து சென்றுள்ளார், அங்கு குழந்தையை சோதித்து பார்த்ததில் ஏற்கனவே குழந்தை இறந்துவிட்டதாக தெரிவித்தனர்,

மேலும் குழந்தையின் உடலில் இருக்கும் காயங்களை பார்த்து சந்தேகம் அடைந்த ஊழியர்கள் இதுகுறித்து பொலிசில் புகார் அளித்ததையடுத்து, நளினியிடம் பொலிசார் கிடுக்கிப்பிடி விசாரணை நடத்தினர்.

அதில் நளினி அளித்துள்ள வாக்குமூலத்தில், முரளியை இரண்டாவது திருமணம் செய்துகொள்ள முடிவுசெய்தேன், எனது கணவரிடம் இருந்து விவாகரத்து கிடைக்கவில்லை, இதற்கு எனது குழந்தை தடையாக இருந்தது.

குழந்தையை கொன்றுவிட்டால் நாம் இருவரும் திருமணம் செய்துகொண்டு வாழலாம் என முரளி கூறினார். இதனைத்தொடர்ந்து நாங்கள் இருவரும் சேர்ந்து குழந்தையை அடித்துக்கொலை செய்தோம் என வாக்குமூலம் அளித்துள்ளார். தற்போது இவர்கள் இருவரும் கைது செய்யப்பட்டு சிறையில் அடைக்கப்பட்டுள்ளனர்.