மன்னார் தமிழ்ச் சங்கத்தின் ஏற்பாட்டில் இடம் பெற்ற ஊடகவியலாளர் திரு.பி.மாணிக்கவாசகம் அவர்களின் “கால அதிர்வுகள்” நூல் அறிமுக விழா மன்னார் நகர மண்டபத்தில் நேற்று சனிக்கிழமை மிகவும் சிறப்பாக இடம்பெற்றது.

வரவேற்புரையினை அருட்பணி தமிழ்நேசன் அடிகளாரும் வரவேற்பு நடனத்தினை பரதகலாலய நாட்டியப்பள்ளி மாணவிகளும் ஆசியுரையினை மும்மதத் தலைவர்களும் வழங்க தலைமையுரையினை திரு நிக்சன் குரூஸ் அவர்களும் நூல் அறிமுகவுரையினை எழுத்தாளர் வெற்றிச்செல்வி சந்திரகலா அவர்களும் வழங்கியிருந்தனர்.

அருட்பணி தமிழ்நேசன் அடிகளார் ஊடகவியலாளர் திரு.பி.மாணிக்கவாசகம் அவர்களின் “கால அதிர்வுகள்” நூலை வெளியிட அவர்களிடம் இருந்து முதல் பிரதியினை வன்னி மாவட்ட பாராளுமன்ற உறுப்பினர் இ.சாள்ஸ் நிர்மலநாதன் பெற்றுக்கொண்டார்

அதனைத்தொடர்ந்து அரச அதிகாரிகள் முன்னாள் பாராளுமன்ற உறுப்பினர்கள் நகரசபை மற்றும் பிரதேச சபை உறுப்பினர்கள் அழைக்கப்பட்ட விருந்தினர்கள் அனைவரும் பெற்றுக்கொண்டனர்.

நூல் மதிப்பீட்டுரையினை எழுத்தாளர் துறையூரான் சிவானந்தன் சிறப்பாக வழங்கினர்.

40 ஆண்கள் கடந்தும் ஊடகத்துறையில் நிலைத்து நின்று மக்களின் பிரச்சினைகளை நடுநிலையாக வழங்கி வரும் ஊடகவியலாளர் திரு.பி.மாணிக்கவாசகம் அவர்களின் “கால அதிர்வுகள்” நூல் போர்கால வரலாற்றினையும் தமிழர்களின் வாழ்வியலையும் மையமாக கொண்டு தனது கட்டுரையாக்கத்தினை வெளியிட்டு இருப்பது கடந்து வந்த மறக்கமுடியாத வாழ்வின் சம்பவங்களின் ஒரு ஆவணத்தொகுப்பாகும்.

நன்றியுரையினை மாக்ஸ் மில்லன் குரூஸ் வழங்க நிகழ்ச்சி தொகுப்பினை கவிஞர் மயூரன் வழங்கினார் ஊடகவியலாளர் திரு.பி.மாணிக்கவாசகம் அவர்களின் ” கால அதிர்வுகள்” நூல் அறிமுக விழா இனிதே நிறைவுபெற்றது.

அகதேசிய முற்போக்கு கழகம்

வவுனியாவில் அகதேசிய முற்போக்கு கழகம் எனும் புதிய கட்சியின் அங்குரார்ப்பண நிகழ்வு இடம்பெற்றுள்ளது. வவுனியா, பண்டாரிக்குளத்தில் இன்று இந் நிகழ்வு இடம்பெற்றுள்ளது. இக் கழகம் வடக்கு மற்றும் கிழக்கு வாழ் தமிழ் மக்கள் ஒன்றியமாக இயங்கிவந்த நிலையில் இன்று அகதேசிய முற்போக்கு கழகம் எனும் கட்சியாக அங்குரார்ப்பணம் செய்யப்பட்டுள்ளது.

இதன் போது கட்சியின் கொள்கைகள் மற்றும் எதிர்கால நடவடிக்கைகள் குறித்து முன்னாள் வடமாகாண சபை உறுப்பினரும், வடக்கு கிழக்கு வாழ் தமிழ் மக்கள் ஒன்றியத்தின் தலைவரும், கட்சியின் தற்போதைய தலைவருமான எம்.பி.நடராஜாவினால் தெரிவிக்கப்பட்டுள்ளது. இந்நிகழ்வில் கட்சியின் முக்கியஸ்தர்கள், உறுப்பினர்கள் என பலரும் கலந்து கொண்டிருந்தனர்.

அண்மையில் நடைபெற்ற உள்ளூராட்சி தேர்தலின் போது வடக்கு மற்றும் கிழக்கு வாழ் தமிழ் மக்கள் ஒன்றியமானது மீன் சின்னத்தில் போட்டியிட்டு இரு உறுப்பினர்களை பெற்றுக்கொண்டிருந்தமை குறிப்பிடத்தக்கது.

சிறுவனின் மரணத்திற்கான மருத்துவ அறிக்கை

வவுனியா சிதம்பரபுரம் கற்குளம் பகுதியில் நேற்று முன்தினம் மாலை அப்பம்மாவுடன் சென்ற சிறுவன் நேற்று காலை கிணற்றிலிருந்து சடலமாக மீட்க்கப்பட்டுள்ளமை கிராமத்தையே சோகமாக மாற்றியிருந்ததுடன் மரணத்தில் சந்தேகம் இருப்பதாகவும் உறவினர்கள் தெரிவித்ததையடுத்து இன்று மருத்துவ அறிக்கை வெளிவந்ததானது உறவினர்களை மேலும் சோகத்திற்குள்ளாக்கியுள்ளது. மேலும் இச்சம்பவம் பற்றி தெரியவருவதாவது,

நேற்று முன்தினம் மாலை சுந்தரபுரத்திலிருந்து சிதம்பரபுரம் கற்குளம் படிவம் 3 பகுதிக்கு தொண்ணூறாம் நாள் நினைவஞ்சலிக்கு முன் ஆயத்த வேலைக்காக சிவானந்தம் தருண் என்ற ஆறு வயது சிறுவன் அப்பம்மாவுடன் சென்றிருந்தார்.

அங்கு ஏனைய சிறுவர்களுடன் விளையாடிக்கொண்டிருந்ததாகவும் இரவாகியதால் சிறுவனை காணவில்லை என நீண்ட நேரமாக தேடியும் எங்குமே கிடைக்கவில்லை. இதனையடுத்து நேற்று காலை கிணற்றில் இருந்து குறித்த சிறுவன் சடலமாக மீட்கப்பட்டுள்ளார்.

மேலும் குறிப்பிட்ட கிணறானது முழுமையாக நிர்மானிக்கப்பட்டுள்ளதுடன் கிணற்றின் கட்டு 3அடிக்கு உயற்றப்பட்டுள்ளதுடன் பாதுகாப்பாக அமைக்கப்பட்டுள்ள கிணறு என்றும் மரணத்தில் சந்தேகம் இருப்பதாகவும் உறவினர்கள், அயலவர்கள் தெரிவித்திருந்த நிலையில் இன்று மருத்துவ பரிசோதனை இடம்பெற்றிருந்தது.

எனினும் வவுனியா குற்றத்தடுப்பு பொலிஸார் தீவிர விசாரணைகளை முன்னெடுத்திருந்தனர். சட்ட வைத்திய அதிகாரி பிரசன்ன அப்புகாமி பிரேத பரிசோதனையின் பின்னர் நீரில் மூழ்கி மூச்சுதிணறியே சிறுவன் உயிரிழந்துள்ளதாக மருத்துவ அறிக்கையில் தெரிவிக்கப்பட்டுள்ளது. சடலம் இன்று உறவினர்களிடம் ஒப்படைக்கப்பட்டுள்ளது.

ஒரு மாதக் குழந்தை மரணம்

வவுனியா, சாம்பல் தோட்டம் பகுதியில் தாய்பால் புரையேறியதில் ஒரு மாதக் குழந்தை ஒன்று மரணித்த சம்பவம் இடம்பெற்றுள்ளது. இன்று மதியம் இடம்பெற்ற குறித்த சம்பவம் தொடர்பில் மேலும் தெரியவருவதாவது,

வவுனியா, சாம்பல் தோட்டம் பகுதியில் வசித்து வந்த இளம் குடும்பம் ஒன்றின் ஒரு மாதக் குழந்தை பாலுக்கு அழுத நிலையில் தாய் பாலினை ஊட்டியுள்ளார். இதன்போல் தாய்பால் புரையேறியுள்ளது.

உடனடியாக குழந்தையை வவுனியா வைத்தியசாலைக்கு கொண்டு சென்ற போதும் குழந்தை மரணமடைந்துள்ளது. ரங்கநாதன் ரவீன் என்கின்ற ஒரு மாத ஆண் குழந்தையே இவ்வாறு மரணித்துள்ளது.