நேர்ந்த அதிர்ச்சி

தமிழகத்தில் ஒருதலை காதலில் மனமுடைந்த கல்லூரி மாணவர் ஒருவர் தூக்கில் தொங்குவது போல் செல்பி எடுத்து மாணவிக்கு அனுப்பிவிட்டு தற்கொலை செய்து கொண்ட சம்பவம் அதிர்ச்சியை ஏற்படுத்தியுள்ளது.

கோவை சிங்காநல்லூர் பகுதியை சேர்ந்த 20 வயதான ஹரிகரசுதன் என்பவரே தூக்கிட்டு தற்கொலை செய்து கொண்டவர். இவர் கோவை ஈச்சனாரியில் உள்ள தனியார் கல்லூரியில் பி.காம் 2-ம் ஆண்டு படித்து வந்தார்.

ஹரிகரசுதன் தனது கல்லூரியில் படிக்கும் மாணவி ஒருவரை ஒருதலையாக காதலித்து வந்ததுள்ளார். அந்த மாணவியிடம் தனது காதலை தெரிவித்துள்ளார். அதற்கு அந்த மாணவி சம்மதம் தெரிவிக்கவில்லை என கூறப்படுகிறது. இதனால் மாணவர் கடந்த சில நாட்களாக யாரிடமும் பேசாமல் மிகுந்த மன உளைச்சலில் இருந்துள்ளார்.

சம்பவத்தன்று மாணவரின் தந்தை சத்தியசீலன் கடலூர் சென்றிருந்தார். வீட்டில் யாரும் இல்லாத நேரத்தில் விரக்தியில் இருந்த கல்லூரி மாணவர் தற்கொலை செய்ய முடிவு எடுத்துள்ளார். மட்டுமின்றி தமது முடிவை மாணவிக்கு தெரிவிக்கவும் எண்ணியுள்ளார். உடனே வீட்டில் உள்ள ஒரு அறையில் அவர் தூக்கிட்டுள்ளார்.

பின்னர் மாணவர் தூக்கில் தொங்குவது போல செல்பி எடுத்துள்ளார். அதனை மாணவியின் வாட்ஸ் அப் எண்ணிற்கு அனுப்பியுள்ளார். இதனையடுத்து தூக்குப்போட்டு தற்கொலை செய்து கொண்டுள்ளார். இரவு வீடு திரும்பிய அவரது தாயார் சாவித்திரி, தனது மகன் தூக்கில் பிணமாக தொங்கிக் கொண்டிருப்பதைக் கண்டு அதிர்ச்சியடைந்து கதறியுள்ளார். இந்த சம்பவம் குறித்து சிங்காநல்லூர் பொலிசார் வழக்குப்பதிவு செய்து விசாரணை மேற்கொண்டு வருகின்றனர்.

கணவரின் இரக்கமற்ற செயல்

இந்தியாவில் கணவர் மற்றும் குடும்பத்தார் வரதட்சணை கேட்டு துன்புறுத்தியதால் இளம் பெண் தூக்கிட்டு தற்கொலை செய்து கொண்டது அதிர்ச்சியை ஏற்படுத்தியுள்ளது. ஆந்திர மாநிலம் குண்டூரை சேர்ந்தவர் பிரியங்கா. இவரும் நவீன் என்ற இளைஞரும் தீவிரமாக காதலித்த நிலையில் இவர்கள் திருமணத்துக்கு பிரியங்கா குடும்பத்தார் முதலில் சம்மதிக்கவில்லை.

பின்னர் மகள் மேல் உள்ள பாசத்தில் அவர்கள் சம்மதம் தெரிவிக்க, கடந்தாண்டு நவீன் – பிரியங்கா திருமணம் நடைபெற்றது. திருமணமாகி ஒரு ஆண்டு கூட ஆகாத நிலையில் நேற்று முன்தினம் பிரியங்கா வீட்டில் தூக்கு கயிற்றில் தொங்கினார்.

அந்த நேரம் பார்த்து அவரின் தாய் அங்கு வந்த நிலையில் மகள் தூக்கில் தொங்குவதை பார்த்து அதிர்ச்சியடைந்து அவரை மீட்டு மருத்துவமனைக்கு கொண்டு சென்றார். அங்கு சிகிச்சை பலனின்றி பிரியங்காவின் உயிர் பிரிந்தது.

இது குறித்து பிரியங்காவின் தாய் கூறுகையில், திருமணத்துக்கு பின்னர் வரதட்சணை கேட்டு நவீனும், அவர் குடும்பத்தாரும் என மகளை துன்புறுத்தி வந்தனர். என் மகள் சாவுக்கு நவீன் மற்றும் அவர் குடும்பத்தார் தான் காரணம் என தெரிவித்துள்ளார். சம்பவம் குறித்து வழக்குப்பதிவு செய்துள்ள பொலிசார் விசாரணை நடத்தி வருகிறார்கள்.

மனைவியின் நடவடிக்கையால் ஆத்திரமடைந்த கணவன்

இந்தியாவில் பேஸ்புக் மோகத்தால் இளம் பெண் ஒருவர் கணவனால் கொடூரமாக கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது. பெங்களூர் ராம் நகர் பகுதியை சேர்ந்தவர் ராஜ். இவரும் சுஷ்மா என்ற பெண்ணிற்கும் கடந்த இரண்டு ஆண்டுகளுக்கு முன்பு பேஸ்புக்கில் பழக்கம் ஏற்பட்டுள்ளது. இவர்களின் இந்த நட்பு நாளைடைவில் காதலாக மாற, இருவரும் மணிக்கணக்கில் போனில் பேசி வந்துள்ளனர்.

இவர்களின் காதலுக்கு பெண்ணின் பெற்றோர் எதிர்ப்பு தெரிவித்ததால், சுஷ்மா வீட்டிலிருந்து வெளியேறி ராஜை திருமணம் செய்துகொண்டார். இவர்களது திருமண வாழ்க்கை நன்றாக சென்றுகொண்டிருக்க அதனை கெடுக்கும் விதமாக சுஷ்மா நடந்துகொண்டார்.

எப்போதும் கையில் போனும் கையுமாக இருந்துள்ளார். வீட்டு வேலையை கூட செய்யாமல் போனை உபயோகப்படுத்திக் கொண்டே இருந்துள்ளார். வீட்டில் சாப்பாடு கூட சரியாக செய்யாமல் இருந்து வந்ததால், ஒரு கட்டத்தில் ஆத்திரமடைந்த ராஜ், அவரின் செல்போனை வாங்கிப் பார்த்த போது அதிர்ச்சியடைந்தார்.

அதில் சுஷ்மா, பலருடன் இணையத்தில் சாட் செய்து வந்தது தெரியவந்தது. இதனால் அதை மறக்க முடியாமல் தவித்த ராஜ், மனைவியை தீம் பார்க் அழைத்து செல்வதாக கூறி சுஷ்மா மற்றும் 3 மாத கைக்குழந்தையை அழைத்துச் சென்றுள்ளார்.

அங்கிருக்கும் தைலமரக்காட்டில் வண்டியை விட்ட ராஜ், மனைவியின் தலையில் கல்லை போட்டு கொடூரமாக கொலை செய்துள்ளார். அதன் பின் பிஞ்சுக்குழந்தை என்றும் பாராமல் குழந்தையையும் கொலை செய்துள்ளார். பின்னர் அவர்களை எரித்துவிட்டு அங்கிருந்து தப்பித்துள்ளான்.

2 நாட்கள் கழித்து அப்பகுதிக்கு ரோந்து சென்ற பொலிசார் அங்கிருந்த உடல்களை கைப்பற்றி விசாரணை நடத்தினர். இதற்கிடையே சுஷ்மாவும் தனது பேரக்குழந்தையும் காணவில்லை என சுஷ்மாவின் தந்தை போலீஸில் புகார் அளித்திருந்தார். மருமகன் ராஜ் மீது சந்தேக இருப்பதாகவும் அவர் கூறியிருந்தார். இதையடுத்து பொலீசார் அவரை பிடித்து விசாரித்ததில் அனைத்து உண்மைகளும் அம்பலமானது. ராஜை கைது செய்த பொலிசார் தொடர்ந்து விசாரணை மேற்கொண்டு வருகின்றனர்.

வைரலான புகைப்படம்

தன்னை விட அதிக வயது மூத்த பெண்ணை இளைஞர் பணத்துக்காக திருமணம் செய்து கொண்டார் என சமூகவலைதளங்களில் புகைப்படத்துடன் செய்தி வெளியான நிலையில் அது பொய் என தெரியவந்துள்ளது.

கேரளாவை சேர்ந்தவர் அனூப் செபஸ்டின் (29) இவருக்கும் ஜூபி ஜோசப் (27) என்ற பெண்ணுக்கும் கடந்த 4-ஆம் திகதி திருமணம் நடைபெற்றது. இருவரின் புகைப்படங்களும் மலையாள பத்திரிக்கையின் திருமண நிகழ்வு பக்கத்தில் வந்தது.

இதிலிருந்து தான் அனூப்புக்கும், ஜூபிக்கும் தலைவலி தொடங்கியது. அதாவது, ஜூபி தோற்றத்தை வைத்து அவர் 48 வயதான பெண் என்றும், அனூப் 25 வயதான ஆண் என்றும் சமூகவலைதலங்களில் இருவரின் புகைப்படத்தோடு செய்தி பரப்பப்பட்டது.

மேலும், ஜூபியின் ரூ.25 கோடி சொத்துக்கள் மற்றும் 101 சவரன் நகைக்காக தான் அனூப் வயதான பெண்ணான அவரை திருமணம் செய்கிறார் என்றும் கூறப்பட்டது. இந்த வதந்தியை பார்த்து அனூப்பும், ஜூபியும் அதிர்ச்சியடைந்ததோடு வேதனையும் அடைந்தனர். வேண்டுமென்றே சில விஷமிகள் இப்படியான செய்தியை பரப்பியதை அவர்கள் உணர்ந்தனர்.

இதன் காரணமாக இருவரையும் கிண்டல் செய்து போனும், மெசேஜும் வந்த வண்ணம் இருந்தன. இது குறித்து தம்பதி பொலிசில் புகார் அளித்துள்ளனர். பொலிசார் இந்த செயலை தொடங்கியவரை கண்டுப்பிடிக்கும் முயற்சியில் ஈடுபட்டுள்ளனர். அனூப் இந்தியாவின் சண்டிகரில் பணிபுரியும் நிலையில், ஜூபி சார்ஜாவில் பணிபுரிகிறார் என்பது குறிப்பிடத்தக்கது.

57 பேர் உயிரிழந்த பரிதாபம்

இந்தியாவில் மரணச் சடங்கில் கலந்துகொள்ளச் சென்ற இடத்தில் கள்ளச்சாராயம் குடித்ததில் 57 பேர் பலியான சம்பவம் பெரும் அதிர்ச்சியை ஏற்படுத்தி உள்ளது. இந்தியாவில் உத்தரகாண்ட் மாநிலத்தில் மரண நிகழ்வில் கலந்து கொள்ள உத்திரபிரதேச மாநிலத்திலிருந்தும் பலர் வந்திருந்தனர்.

இந்நிலையில் அங்கு வந்தவர்கள் இணைந்து கள்ளச்சாராயம் வாங்கி குடித்துள்ளனர். சிலர் அதை எடுத்து கொண்டு ஊரில் இருந்தவர்களுக்கும் வழங்கி உள்ளனர். இதில் அனைவருக்கும் வாந்தி மயக்கம் ஏற்பட்டுள்ளது. மருத்துவமனையில் அனுமதிக்கப்பட்ட நிலையில்அடுத்ததுடுத்து 57 பேர் பலியாகினர்.

மேலும் 33 பேர் அபாய கட்டத்தை தாண்டி உள்ளதாக மருத்துவமனை நிர்வாகம் தெரிவித்துள்ளது. இது குறித்து பொலிசார் விசாரணை நடத்தி வருகின்றனர்.