குழந்தையைப் பெற்றெடுத்த பாடசாலை மாணவி

மொனராகலை, மெதகம பொலிஸ் பிரிவில் வசிக்கும் தரம் 11 இல் கல்வி பயிலும் சிறுமியொருவர் தனது வீட்டு மலசல கூடத்தில் குழந்தையைப் பெற்றெடுத்துள்ளதாக தெரிவிக்கப்படுகிறது. குழந்தை பிறந்தவுடன், குறித்த சிறுமியின் தாயார் குழந்தையையும் தனது மகளையும் மருத்துவமனையில் அனுமதித்துள்ளார்.

தற்போது, குழந்தை மற்றும் தாய் பிபில ஆதார வைத்தியசாலையில் சிகிச்சை பெற்று வருவதாக தெரிவிகக்கப்படுகிறது. குறித்த சம்பவம் தொடர்பாக பொலிஸாருக்கு கிடைத்த தகவலின் படி பொலிஸார் விசாரணைகளை மேற்கொண்டனர்.

குழந்தை பிறக்கப்போவதாக தான் அறிந்திருக்கவில்லை எனவும் வயிற்று வலி காரணமாக தான் மலசல கூடத்திற்கு சென்றதாகவும் அதன்போது குழந்தை பிறந்ததாகவும் சிறுமி பொலிஸாரிடம் தெரிவித்துள்ளார்.

குறித்த சிறுமி தனது வீட்டுக்கு அருகில் வசிக்கும் இளைஞனைக் காதலித்து வந்துள்ளதாகவும் குறித்த இளைஞனுடன் பல முறை சிறுமி ஒன்றாக இருந்துள்ளதாகவும் கடைசியாக கடந்த வருடம் மார்ச் மாதம் குறித்த இளைஞனுடன் ஒன்றாக இருந்ததாக பொலிஸாரிடம் மேலும் தெரிவித்துள்ளார்.

அதன்படி, சந்தேகநபரை மெதகம பொலிஸார் கைது செய்தனர். அதே பகுதியைச் சேர்ந்த 22 வயதான நபரே இவ்வாறு கைது செய்யப்பட்டுள்ளார். சந்தேக நபர் பிபில நீதவான் நீதிமன்றத்தில் ஆஜர்படுத்தப்பட்டதையடுத்து விளக்கமறியலில் வைக்கப்பட்டுள்ளதாக மெதகம பொலிஸார் தெரிவித்தனர்.

யாழ்ப்பாணத்தில் திட்டமிட்டு பொதுமக்களின் காணிகளை சுவீகரிக்கும் நடவடிக்கை தீவிரமாக இடம்பெற்று வருவதாக பலரும் குற்றம் சாட்டியுள்ளனர். இதற்கமைவாக நெடுங்குளம் பகுதியில் 300 பரப்புக் காணியை அரசாங்கம் சுவீகரிக்க நடவடிக்கை எடுத்துள்ளது.

குறித்த பகுதியில் நேற்று காணி அளவீடுகளை மேற்கொள்ள அதிகாரிகள் சென்ற போது, அங்குள்ள மக்கள் கடும் எதிர்ப்பு வெளியிட்டுள்ளனர். இதனையடுத்து காணி அளக்கும் பணி நிறுத்தப்பட்டுள்ளது.

நெடுங்குளம் பகுதியில் 300 பரப்புக் காணியை சுவீகரிக்கப் போவதாக யாழ்ப்பாணம் பிரதேச செயலகத்தினால் காணி சுவீகரிப்பு அறிவிப்பு ஒன்று ஒட்டப்பட்டுள்ளது.

உரிமை கோரப்படாத காணியை சுவீரிக்கவுள்ளதால், காணி உரிமையாளர்கள் இருந்தால், உடனடியாக பிரதேச செயலகத்தை தொடர்பு கொள்ளுமாறும் சுவீகரிப்பு அறிவிப்பில் குறிப்பிடப்பட்டுள்ளது. இதனயைடுத்து காணி உரிமையாளர்கள், காணி உரிமத்திற்குரிய ஆவணங்களைக் கொண்டு சென்றுள்ளனர்.

இதன்போது காணி சுவீகரிக்க நடவடிக்கை எடுக்கப்படவுள்ளது, யாரும் உரிமை கோர முடியாது. காணிக்கு சொந்தக்காரர்களுக்கு பிரதேச செயலளர் கடும் அச்சுறுத்தல் விடுத்ததாக பாதிக்கப்பட்ட பெண்ணொருவர் தெரிவித்துள்ளார்.

காணிக்குரிய அனைத்து ஆவணங்களும் கையளிக்கப்பட்ட போதும், இவ்வாறான அச்சுறுத்தல் விடுக்கப்பட்டுள்ளதாக அந்தப் பெண் மேலும் தெரிவித்துள்ளார்.

அங்கு இடம்பெற்ற அடாவடித்தனங்கள் குறித்து ஊடகங்களுக்கு குறித்த பெண்மணி தகவல் வெளியிட்டார்.

லொறி விபத்து

திஸ்ஸமஹாராம பகுதியிலிருந்து அக்கரபத்தனைக்கு கால்நடைக்கான தீணிகளை ஏற்றி சென்ற லொறி இன்று காலை விபத்துக்குள்ளாகியுள்ளது. நுவரெலியா – தலவாக்கலை பிரதான வீதியில், ரதல்ல குறுக்கு பாதையில் வைத்து குறித்த லொறி வீதியை விட்டு விலகி குடைசாய்ந்து விபத்துக்குள்ளாகியுள்ளது.

லொறியில் ஏற்பட்ட இயந்திர கோளாரே விபத்துக்கு காரணம் என ஆரம்பகட்ட விசாரணைகளில் இருந்து தெரியவருகிறது. லொறியில் சாரதியும், உதவியாளரும் பயணித்துள்ளதாகவும், சாரதி சிறு காயங்களுக்கு இலக்காகியுள்ளதுடன், உதவியாளர் படுகாயங்களுக்கு உள்ளாகி நுவரெலியா மாவட்ட வைத்தியசாலையில் அனுமதிக்கப்பட்டுள்ளார்.

குறித்த லொறியில் இருந்த கால்நடை தீணிகளை பிரதேச மக்களின் உதவியுடன் மற்றுமொரு லொறிக்கு ஏற்றி, அதனை உரிய இடத்தில் சேர்க்க நடவடிக்கை எடுக்கப்பட்டுள்ளது. சம்பவம் குறித்து மேலதிக விசாரணைகளை நானுஓயா பொலிஸார் மேற்கொண்டு வருகின்றனர்.

வயோதிபர் ஒருவரின் சடலம் மீட்பு

மன்னார் – சௌத்பார் பிரதான வீதி, சாந்திபுரம் உப்பளம் பகுதியில் வயோதிபர் ஒருவருடைய சடலம் மீட்கப்பட்டுள்ளதாக பொலிஸார் தெரிவித்துள்ளனர். குறித்த சடலத்தை மன்னார் பொலிஸார் இன்று காலை மீட்டுள்ளனர்.

சடலமாக மீட்கப்பட்டவர் மன்னார் பனங்கட்டிக்கோட்டு கிராமத்தை வதிவிடமாக கொண்ட கதிர்காமநாதன் அருளானந்தன் (82 வயது) என தெரியவருகிறது. குறித்த வயோதிபர் நேற்று இரவு வீட்டில் இருந்து சென்ற நிலையிலே இன்று காலை சடலமாக மீட்கப்பட்டுள்ளார்.

அப்பகுதியால் சென்றவர்கள் சடலத்தை கண்டு மன்னார் பொலிஸாருக்கு தகவல் வழங்கிய நிலையிலே மன்னார் பொலிஸார் சம்பவ இடத்திற்கு வந்து சடலத்தை மீட்டுள்ளனர். குறித்த வயோதிபரின் மரணம் தொடர்பில் மேலதிக விசாரனைகளை மேற்கொண்டு வருவதாக பொலிஸார் தெரிவித்துள்ளனர்.

உணவுப் பொதியில் மட்டத்தேள்

மதிய உணவுக்காக யாழில் உள்ள உணவகத்தில் வாங்கிய உணவு பொதியில் மட்டத்தேள் காணப்பட்டுள்ளதாக வாடிக்கையாளர் ஒருவர் முறைப்பாடு செய்துள்ளார். யாழ்ப்பாணம் போதனா வைத்தியசாலையின் அருகில் உள்ள உணவகத்தில் வழமை போன்று வாடிக்கையாளர் ஒருவர் நேற்று மதிய உணவுப் பொதி ஒன்றை கொள்வனவு செய்துள்ளார்.

இந்நிலையில், உணவினை பிரித்து பார்த்த போது கறிகளுக்கு இடையே மட்டத்தேள் காணப்பட்டது. இதனால் மீளவும் உணவகத்திற்கு சென்று உரிமையாளரிடம் முறையிட்டுள்ளார்.

எனினும் குறித்த உணவக உரிமையாளர் வாடிக்கையாளரை உதாசீனம் செய்ததுள்ளார். உணவக உரிமையாளர் மீது வாடிக்கையாளர் பொதுச்சுகாதார உத்தியோகத்தரிடம் உரிய ஆதாரத்துடன் நடவடிக்கை மேற்கொள்ளுமாறு முறைப்பாட்டு செய்யப்பட்டுள்ளது.

நாயால் நடந்த விபரீதம்

யாழ்ப்பாணம் – காங்சேன்துறை பிரதேசத்தில் எரிபொருள் நிரப்பு நிலையத்திற்கு முன்னால் உள்ள வீதியில் பயணித்த வேன் ரக வாகனம் ஒன்று வீதியை விலகி மின்சார தூணில் மோதி விபத்து ஏற்பட்டுள்ளது.

காரைநகர் பிரதேச செயலக பிரிவிற்கு சொந்தமான வாகனமே நேற்றைய தினம் இவ்வாறு விபத்திற்கு உள்ளாகியுள்ளது.

வீதியில் குறுக்கிட்ட நாய் ஒன்றை காப்பாற்றுவதற்காக சாரதி வேனை திருப்பியதால் இந்த விபத்து ஏற்பட்டுள்ளது. விபத்தின் போது வேனில் காரைநகர் பிரதேச செயலாளரும், சாரதியும் பயணித்துள்ள நிலையில், அவர்கள் இருவரையும் பிரதேசவாசிகள் காப்பாற்றியதாக எமது செய்தியாளர் தெரிவித்துள்ளார்.

கொலைசெய்த கணவன்

ராகமை – கனேமுல்லை பகுதியில் மனைவியை கத்தியால் வெட்டி கணவன் கொலை செய்தமைக்கான காரணம் வௌியாகியுள்ளது. இந்த சம்பவம் நேற்றைய தினம் இடம்பெற்றமை குறிப்பிடத்தக்கது. கனேமுல்லை பகுதியில் வசிக்கும் 35 வயதுடைய தனியார் வைத்தியசாலையில் தாதியாக கடமை புரியும் பெண் ஒருவரே இவ்வாறு கணவரால் கொலை செய்யப்பட்டுள்ளார்.

குறித்த பெண் தாதியாக கடமையாற்றும் வைத்தியசாலையின் வைத்தியர் ஒருவருடன் தகாத உறவு ஏற்படுத்திக்கொண்டுள்ளமையை அறிந்து கொண்டுள்ள கணவர் பல முறை எச்சரிக்கை விடுத்துள்ளார்.

எனினும் குறித்த பெண், வைத்தியருடன் ஏற்படுத்திக்கொண்ட தகாத உறவினை நிறுத்திக்கொள்ள மறுப்பு தெரிவித்துள்ளார். இந்நிலையில் வழமையை போன்று ஒரு தினம் குறித்த பெண் கடமைக்கு சென்ற பின்னர் கணவருக்கு தொலைபேசி அழைப்பு ஒன்று வந்துள்ளது. வைத்தியருடன் மனைவி தனியார் விடுதியில் இருப்பதாக அந்த அழைப்பு கிடைக்கப்பெற்றுள்ளது.

இதனையடுத்து கோபமடைந்த கணவர், மனைவி வீடு திரும்பியவுடன் அவரை கோபம் தீரும் வரை கத்தியால் வெட்டி கொலை செய்து விட்டு காவல் நிலையத்தில் சரணடைந்துள்ளார். சரணடைந்த குறித்த நபரை கைது செய்த காவல் துறையினர் மனைவியை பார்வையிட அவரின் வீட்டுக்கு சென்றுள்ளனர்.

தரையில் வீழ்ந்து கிடந்த மனைவியை நோயாளர் காவு வண்டியில் ஏற்றி றாகமை வைத்தியசாலைக்கு கொண்டு சென்றுள்ளனர். இரத்தம் அதிகம் சிந்திய நிலையில் குறித்த பெண்ணை சிகிச்சைக்குட்படுத்திய வேளையில் அவர் வைத்தியசாலைக்கு அழைத்து வருவதற்கு முன்னரே உயிரிழந்து விட்டதாக வைத்தியர்கள் அறிவித்துள்ளனர்.

இந்நிலையில் குறித்த பெண்ணுடன் தகாத உறவினை வைத்திருந்த வைத்தியரும் கைது செய்யப்பட்டுள்ளதாக காவல் துறையினர் தெரிவித்துள்ளனர். கைது செய்யப்பட்டுள்ள இருவரும் தடுத்து வைக்கப்பட்டுள்ள நிலையில் காவல் துறையினர் மேலதிக விசாரணைகளை மேற்கொண்டு வருகின்றனர்.

அணிலால் நடந்த விபத்து

மட்டக்களப்பு, களுவாஞ்சிக்குடியில் நபர் ஒருவர் மேற்கொண்ட மனிதாபிமான செயற்பாட்டினால் விபத்தொன்று இடம்பெற்றுள்ளது. இந்த விபத்து இன்று இடம்பெற்றுள்ளது. குறித்த நபர் மோட்டார்சைக்கிளில் பயணித்து கொண்டிருந்த வேளை அணிலொன்று குறுக்கிட்டுள்ளது.

இந்த நிலையில் குறித்த நபர் அணிலை காப்பாற்றுவதற்காக திடீரென பிறேக் பிடித்த போது பின்னால் வந்த முச்சக்கரவண்டி, மோட்டார்சைக்கிளை மோதியுள்ளது.

இவ்விபத்தில் மூவர் படுகாயமடைந்துள்ளதுடன் இரு வாகனங்களும் சேத்திற்குள்ளாகியுள்ளன. சம்பவ இடத்திற்கு விரைந்த பொலிஸார் மேலதிக விசாரணைகளை முன்னெடுத்துள்ளனர்.