அங்கவீம்முற்ற தந்தை மற்றும் தாயுடன் வாழும் 14 வயது சிறுமியொருவர் தங்களுக்கு நிம்மதியாக வாழ இடம் தருமாறு கோரி போராட்டத்தில் ஈடுபட்டுள்ளார்.

அம்பாறை மணிக்கூட்டுக் கோபுரத்திற்கு அருகில் குறித்த சிறுமி போராட்டத்தில் ஈடுபட்டுள்ளார்.

ஜனாதிபதி அவர்களே நாட்டின் சட்டம் அனைவருக்கும் சமமானதா? என எழுதிய பதாகையினை ஏந்தியபடி கண்ணீருடன் சிறுமி போராட்டத்தை முன்னெடுத்துள்ளார்.

இந்த நிலையில், அம்பறை நகர சபையின் உறுப்பினர்கள் அனைவரும் குறித்த இடத்திற்குச் சென்று உரிய அதிகாரிகளுக்கு அறிவித்துள்ளனர்.

குறித்த சிறுமியின் தந்தை அங்கவீனமுற்ற இராணுவச் சிப்பாய். தாய் மற்றும் தந்தையுடன் அம்பாறை பொலிஸ் விசேட அதிரடிப்படைக்கு அருகில் வீட்டைக் கட்டி வசித்து வந்துள்ளார்.

குறித்த இடம் வனஜீவராசிகள் திணைக்களத்துக்கு சொந்தமானது எனக் கூறி குறித்த இடத்திற்கு வழக்கு தாக்கல் செய்யப்பட்டுள்ளதாக சிறுமி தெரிவித்துள்ளார்.

இதனையடுத்து வனஜீவராசிகள் திணைக்களத்தால் குறித்த குடும்பம் வீதிக்கு தள்ளப்பட்டுள்ளது.

குறித்த பகுதியில் 700 வீடுகள் கட்டப்பட்டுள்ள நிலையில். பொலிஸ் விசேட அதிரடிப்படை, அம்பறை மனநல வைத்தியசலை மற்றும் நகர சபை என்பன அந்தப் பகுதியில் நிர்மாணிக்கப்பட்டுள்ளன.

கைவிடப்பட்ட குறித்த குடும்பத்திற்கு அப்பகுதி கிராம உத்தியோகத்தர் தான் வசிக்கும் இடத்தில் ஒரு பகுதியில் தங்குவதற்கு இடம்கொடுத்துள்ளார்.

அதன் பின்னர் நீதிமன்றத்தில் உத்தரவிட்டதாகக் கூறி வனஜீவராசிகள் திணைக்கள உத்தியோகத்தர்கள் சிறுமியின் தாய்க்கு எதிராக அம்பாறை பொலிஸில் மேற்கொண்ட முறைப்பாட்டுக்கமைய சிறுமியின் தாய் 7 நாட்கள் விளக்கமறியலில் வைக்கப்பட்டுள்ளதாக சிறுமி தெரிவித்துள்ளார்.

அம்பாறை பிரதிக் காணி ஆணையாளர், தக்ஷிலா குணரத்ன குறித்த இடத்திற்கு சென்று சிறுமியுடன் கலந்துரையாடி, அம்பாறை மாவட்ட செயலகத்திற்கு அழைத்துச் சென்றுள்ளார். குறித்தசிறுமி மாவட்ட செயலாளரிடம் சம்பவம் தொடர்பாக குறிப்பிட்டதாக தெரிவிக்கப்படுகிறது.

பலாங்கொட மொரகெல- உடவெல பிரதேசத்தில் அமைந்துள்ள சணச வங்கியில் 15கோடி ரூபாய் பணத்துடன் தப்பியோடிய குறித்த வங்கியின் முகாமையாளராக பெண்ணை தேடி பின்னவல பொலிஸார் விரிவான விசாரணைகளை ஆரம்பித்துள்ளனர்.

இது தொடர்பாக பொலிஸ் நிலையப்பொறுப்பதிகாரி எஸ்.பீ.அமரதுங்க கருத்துத் தெரிவிக்கையில்,

குறித்த நபர் வெளிநாட்டுக்கு தப்பிச் செல்லாதபடி நடவடிக்கை எடுக்கப்பட்டுள்ளது. பலாங்கொட நீதிமன்றில் இது தொடர்பான அறிக்கை செய்யப்பட்டுள்ளது. சம்பவம் தொடர்பாக வாடிக்கையாளர்கள் பலர் முறைப்பாடு செய்துள்ளனர்.

சந்தேக நபரான குறித்தபெண்ணும் அவரது கணவரும் குறித்த பிரதேசத்தை விட்டு தப்பிச்சென்றுள்ளதாக தகவல்கள் வெளியாகியுள்ளதாக அவர் குறிப்பிட்டார்.

குறித்த சம்பவம் தொடர்பாக இரத்தினபுரி விசேட குற்றத்தடுப்பு பிரிவினர் மேலதிக விசாணைகளை மேற்கொண்டுள்ளனர்.

இலங்கை பெண்ணொருவர் சபரிமலை சென்று ஐயப்பனை தரிசித்த சம்பவத்தை இந்தியாவின் கேரள பொலிஸார் உறுதி செய்துள்ளார்கள்.

சகிகலா என்ற பெயருடைய 46 வயதுடைய பெண் நேற்றிரவு 18 படிகளில் ஏறி ஐயப்பனுக்கு பூஜை செய்ததாக இந்திய ஊடகங்கள் தகவல் வெளியிட்டுள்ளன.

சபரிமலை தேவஸ்தானத்திற்கு மாதவிடாய் வயதுடைய பருவத்தைச் சேர்ந்த பெண்கள் அனுமதிக்கப்படுவதில்லை.

இந்தத் தடை அரசியல் யாப்பிற்கு முரணானது என இந்தியாவின் உச்சநீதிமன்றம் தீர்ப்பளித்திருந்தது. நீதிமன்றத் தீர்ப்பு ஆர்ப்பாட்டங்களுக்கு வித்திட்டுள்ளது.

எனினும் மருத்துவ சான்றிதழுடன் சென்ற இலங்கை பெண்ணுக்கு சபரிமலை ஆலயத்திற்குள் செல்ல அனுமதி மறுக்கப்பட்டுள்ளது. இது குறித்து சகிகலா கருத்து வெளியிடுகையில்,

“நான் ஐயப்ப பக்தை. முறையாக 48 நாட்கள் விரதமிருந்து வந்துள்ளேன். நான் என்னுடைய கர்ப்பப் பையை மருத்துவ காரணங்களுக்காக எடுத்து விட்டேன்.

அதற்கான மருத்துவ சான்றிதழும் என்னிடம் இருக்கிறது. ஆனாலும், என்னை திருப்பி அனுப்பிவிட்டனர். 18 படிகள் மட்டுமே ஏறினேன், சாமி தரிசனம் செய்ய என்னை அனுமதிக்கவில்லை எனத் தெரிவித்துள்ளார்.

சபரிமலை ஐயப்பன் கோவிலில் கேரளாவைச் சேர்ந்த 2 பெண்கள் தரிசனம் செய்ததையடுத்து இந்து அமைப்புகளின் போராட்டம் தீவிரமடைந்துள்ளன.

நேற்று நடைபெற்ற முழு அடைப்பு போராட்டத்தின்போது பல்வேறு இடங்களில் வன்முறை வெடித்தது. இது தொடர்பாக ஏராளமானோரை பொலிசார் கைது செய்துள்ளமை குறிப்பிடத்தக்கது.

இருவர் மரணம்

கொழும்பில் இருந்து யாழ்ப்பாணம் நோக்கி சென்ற வாகனம் விபத்துக்குள்ளானதில் காயமடைந்த மற்றுமொருவர் இன்று உயிரிரிழந்துள்ளார். சாவகச்சேரி வைத்தியசாலையில் அனுமதிக்கப்பட்டிருந்த நிலையில் சிகிச்சை பலனின்றி அவர் உயிரிழந்துள்ளார்.

கொடிகாமத்தைச் சேர்ந்த 71 வயதான சின்னத்தம்பி கந்தையா என்பவரே இன்று உயிரிழந்துள்ளார். நேற்றைய தினம் விபத்து ஏற்பட்ட நிலையில் மீசாலையைச் சேர்ந்த 38 வயதான கந்தசாமி விமலரூபன் ஸ்தலத்தில் உயிரிழந்தார். விபத்தின் போது படுகாயம் அடைந்த மற்றுமொருவர் யாழ்ப்பாணம் போதனா வைத்தியசாலையில் தற்போதும் சிகிச்சை பெற்று வருகிறார்.

கிளிநொச்சி முகமாலைப் பகுதியில் டிப்பருடன் ஹைஏஸ் மோதியதில் இந்த விபத்து ஏற்பட்டதாக பளை பொலிஸார் தெரிவித்துள்ளனர். புதிய பஸ் ஒன்றை கொள்வனவு செய்வதற்காக கொழும்புக்குச் சென்று கட்டுப்பணம் செலுத்தித் திரும்பிய வழியிலேயே இந்த விபத்து ஏற்பட்டுள்ளது.

நேற்று அதிகாலை 3.45 மணியளவில் முகமாலைப் பகுதியில் ஒரு டிப்பர் வாகனத்தைப் பொலிசார் மறித்துச் சோதனை நடத்தியுள்ளனர். இதன்போது நிறுத்தி வைக்கப்பட்டிருந்த டிப்பர் வாகனத்துடன் ஹைஏஸ் மோதியுள்ளது.

வாகனத்தில் பயணித்த மூவரும் படுகாயங்களுடன் பளை வைத்தியசாலைக்கு எடுத்துச் செல்லப்பட்டனர். விமலரூபன் ஸ்தலத்தில் உயிரிழந்ததை பளை வைத்தியசாலை உறுதி செய்தது. ஏனைய இருவரும் சாவகச்சேரி வைத்தியசாலைக்கு மாற்றப்பட்டனர்.

சின்னத்தம்பி கந்தையா சிகிச்சை பயனளிக்காத நிலையில் சாவகச்சேரி வைத்தியசாலையில் உயிரிழந்தார். குறித்த விபத்து தொடர்பில் பளைப் பொலிஸார் மேலதிக விசாரணைகளை முன்னெடுத்து வருகின்றனர்.

உயிருடன் எரித்து கொல்லப்பட்ட நாய்

உயிருடன் நாய் ஒன்று எரித்து கொல்லப்பட்ட சம்பவம் தொடர்பில் நாளை மாபெரும் போராட்டம் ஒன்று முன்னெடுக்கப்படவுள்ளது. Save a Pet With Love என்ற மிருகங்களை பாதுகாக்கும் அமைப்பால் இந்த போராட்டம் முன்னெடுக்கப்படவுள்ளதாக தெரிவிக்கப்பட்டுள்ளது.

நீர்கொழும்பு – கொப்பரவத்தை பிரதேசத்தில் உள்ள வீடொன்றில் வளர்த்துவரப்பட்ட, சாலி என்ற பெயருடைய நாயொன்றை, அடையாளம் தெரியாத நபர்கள் மண்ணெண்ணெய் ஊற்றி தீயிட்டு எரித்துள்ளனர்.

உயிருடன் எரிந்துகொண்டிருந்த நாயை சமூக ஆர்வலர்கள் சிலர் மீட்டு கால் நடை மருத்துவமனையில் அனுமதித்துள்ளனர். எனினும், குறித்த நாய் சிகிச்சை பலன் இன்றி உயிரிழந்துள்ளது.

இந்த சம்பவம் தொடர்பில் நாளை (04) நீர்கொழும்பு பிரதேசத்தில், மாபெரும் எதிர்ப்பு நடவடிக்கைகளில் ஈடுபடவுள்ளதாகவும், மிருகங்களை பாதுகாக்கும் அமைப்புக்கள் அனைத்துக்கும் அழைப்பு விடுப்பதாக தெரிவிக்கப்பட்டுள்ளது.

இதனிடையே, குறித்த நாயை இவ்வாறு தீயிட்டு கொழுத்திய நபர் பற்றி தகவல்கள் தெரியவருமாயின், உடனடியாக அறிவிக்கும்படியும், குறித்த நபரை கண்டுபிடிக்க உதவி செய்யும் நபருக்கு ஒரு லட்சம் ரூபாய் பணம் வழங்கப்படுமென்றும் அறிக்கப்பட்டுள்ளது.

save a pet with love அமைப்பால் இந்த அறிவிப்பு விடுக்கப்பட்டுள்ளது.

இதேவேளை, நாளை மறுதினம் பிரதமர் ரணில் விக்ரமசிங்கவுடன் இவ்விடயம் குறித்து கலந்துரையாடப்படவுள்ளதாகவும் தெரிவிக்கப்பட்டுள்ளது.