கொழும்பில் பெண்களின் அந்தரங்க பகுதிகளை காணொளியாக பதிவு செய்யும் நபர்கள் தொடர்பில் அதிர்ச்சித் தகவல் வெளியாகி உள்ளது.

நுகேகொடயில் தொழில் நிறுவனம் ஒன்றில் பணியாற்றும் பெண்களின் அந்தரங்க பகுதிகளை அதன் முகாமையாளர் காணொளியாக பதிவு செய்துள்ளார்.

தொழில் முகவர் நிறுவனம் ஒன்றின் முகாமையாளராக பணியாற்றி வரும் குறித்த நபர், பல வருடங்களாக பெண்களை ஆபாசமாக அவர்களுக்கு தெரியாமல் காணொளியாக பதிவு செய்து வந்துள்ளார்.

பல பெண்கள் இந்த நபரின் இரகசிய காணொளிக்குள் சிக்கியுள்ளதாக தெரியவந்துள்ளது.

தொழில் எதிர்பார்ப்பில் வரும் பெண்கள் மற்றும் அலுவலக பணியாளர்களை, குறித்த நபர் மிகவும் நுட்பமான முறையில் படம் பிடித்துள்ளார்.

அலுவலக முகாமையாளரின் மேசைக்கு கீழ் ஒரு பையை வைத்து அதற்குள் கையடக்க தொலைபேசி ஒன்றின் கமராவை இயக்கிய நிலையில் மறைத்து வைக்கப்படுகின்றது.

அதற்கு நேராக பெண்கள் அழைக்கப்படுகின்றார்கள். அந்த பெண்களுக்கு தெரியாமலேயே அவர்களின் அந்தரங்க பகுதிகள் அந்த கமராவில் பதிவாகின்றது.

அந்த கமரா சரியாக படம் பிடிக்கின்றதா என்பதனை குறித்த முகாமையாளர் தொடர்ந்து சோதனையிட்டு வந்துள்ளதும் தெரியவந்துள்ளது.

இவ்வாறான மோசடியான கும்பல்களிடமிருந்து தம்மை பாதுகாத்துக் கொள்ளுமாறு பெண்களிடம் பொலிஸார் வேண்டுகோள் விடுத்துள்ளனர்.

பிரித்தானியாவில் வாழும் இலங்கையை சேர்ந்த பெண் வைத்தியர் ஒருவருக்கு விருது வழங்கி கௌரவிக்கப்பட்டுள்ளது. பல்வேறு பிரிவுகளில் சேவை செய்யும் நபர்களுக்காக பிரித்தானிய அரசு வருடாந்தம் விருது வழங்கி வருகிறது.

இந்தப் பட்டியலில் OBE – Order of the British Empire என்ற விருது இலங்கையை சேர்ந்த ட்ரூடி நிமாலி செனவிரத்ன என்ற பெண்ணுக்கு கிடைத்துள்ளது.

நிமாலி பிரித்தானியாவில் மனநல வைத்தியராக செயற்பட்டு வருகின்றார். நிமாலியின் தந்தை வைத்தியராக செயற்பட்டதுடன் அவரது தாயார் ஒரு தாதியாக செயற்பட்டுள்ளார்.

7 வயதாக இருக்கும் போது பிரித்தானியா சென்ற நிமாலி, வைத்தியராக பட்டம் பெற்றுள்ளார்.

லண்டனில் உள்ள மோட்ஸ்லி தேசிய சுகாதார அறக்கட்டளையில் நிமாலி பணியாற்றி வருகிறார். அவர் கர்ப்பிணி பெண்களுக்கு பிரசவத்தின் போதும் பிரசவத்திற்கு பின்னரும் மன நல ஆலோசனை மற்றும் சுகாதார அபிவிருத்திக்காக செயற்பட்டு வரும் வைத்தியராகும்.

விருது வழங்கப்பட்டமை தொடர்பில் நிமாலி பிபிசி செய்தி சேவைக்கு கருத்து வெளியிட்டார்.

தான் மிகவும் மகிழ்ச்சியாக இருப்பதாகவும், இவ்வாறு ஒன்று நடக்கும் என தான் நினைக்கவே இல்லை என்றும் நிமாலி குறிப்பிட்டுள்ளார்.

மாணவியின் மகத்தான கண்டுபிடிப்பு

இலங்கையில் ஏற்பட்டுள்ள நெருக்கடி நிலைக்கு பாடசாலை மாணவி ஒருவர் வித்தியாசமான கண்டுபிடிப்பு ஒன்றில் ஈடுபட்டுள்ளார். தருஷி விதுஷிக்கா ராஜபக்ச என்ற 17 வயதான மாணவி சுற்றுச் சூழலுக்கு நெருக்கமான பை ஒன்றையே தயாரித்துள்ளார்.

இலங்கையில் பிளாஸ்டிக் மற்றும் பொலீத்தின் பாரிய பிரச்சினையாக மாறியுள்ளது. இந்நிலையில் குறித்த மாணவியின் கண்டுபிடிப்பு அந்த பிரச்சினையை தீர்க்கும் என எதிர்பார்க்கப்படுகின்றது. நாளாந்தம் ஒரு மில்லியனுக்கும் அதிகமான பொலீத்தின் பைகள் வீசப்படுவதாகவும் அதனை கட்டுப்படுத்துவதற்கு அவர் தீர்மானித்துள்ளார்.

அதற்கமைய துணி வகை ஒன்றின் உதவியுடன் அவர் இந்த பையை தயாரித்துள்ளார். அந்த பையை சிறிது காலம் பயன்படுத்திய பின்னர் சூரிய ஒளி ஊடாக அழிந்து போய்விடும் எனவும் அது சுற்றுச் சூழலுக்கு பாதிப்பை ஏற்படுத்தாது எனவும் தருஷி தெரிவித்துள்ளார்.

மிகவும் ஏழ்மையான குடும்பத்தில் பிறந்த தருஷி பல்வேறு கண்டுபிடிப்புகளின் ஊடாக சாதிக்கும் முயற்சியில் ஈடுபட்டுள்ளார். அவரது கண்டுபிடிப்பை பிபிசி உலக சேவை பாராட்டி அவரது கற்கை நடவடிக்கைகளுக்கு புலமை பரிசில் ஒன்றை வழங்கியுள்ளமை குறிப்பிடத்தக்து.

சினிமா பாணியில் பெற்றோரை வாள்கள் உள்ளிட்ட ஆயுதங்களைக் காண்பித்து மிரட்டி இளம் பெண் ஒருவரைக் கடத்திய சம்பவம் மிருசுவில் படித்த மகளிர் திட்டம் பகுதியில் நேற்றிரவு இடம்பெற்றது.

வட்டுக்கோட்டை வடக்கிலிருந்து சென்ற கும்பல் ஒன்றே இந்தக் கடத்தலை மேற்கொண்டுள்ளதாக ஆரம்ப கட்ட விசாரணைகளில் தெரியவந்துள்ளது.

இந்தச் சம்பவம் தொடர்பில் கொடிகாமம் பொலிஸார் அசமந்தப் போக்கைக் கடைப்பிடிப்பதுடன், பாதிக்கப்பட்ட பெண்ணை சுமார் 17 மணிநேரம் தடுத்துவைத்திருந்துவிட்டு விடுவித்தனர் என்று உறவினர்களால் குற்றஞ்சாட்டப்பட்டது. குறித்த சம்பவம் தொடர்பில் தெரியவருவதாவது,

வட்டுக்கோட்டை வடக்கைச் சேர்ந்த ஒருவர் மன்னார் பகுதியில் விவசாயப் போதனா ஆசிரியராகக் கடமையாற்றுகிறார்.

அவரது தலைமையில் சுமார் 20 பேர் கொண்ட கும்பல் மோட்டார் சைக்கிள்களில் வாள்கள் உள்ளிட்ட கூரிய ஆயுதங்களுடன் நேற்றிரவு 8 மணியளவில் மிருசுவில் படித்த மகளிர் திட்டம் பகுதியில் உள்ள பெண் ஒருவரின் வீட்டுக்குள் அத்துமீறி நுழைந்துள்ளது.

வீட்டின் முன்கதவை ஆயுதங்களால் கொத்தி அதனை உடைத்து வீட்டுக்குள் புகுந்த கும்பல், பெண்ணின் பெற்றோர் மற்றும் சகோதரனுக்கு வாள்களைக் காண்பித்து மிரட்டியுள்ளது.

அந்த சமயம் விவசாயப் போதனா ஆசிரியர், அங்கிருந்த இளம் பெண்ணை இழுத்துச் சென்று மோட்டார் சைக்கிளில் ஏற்றிச் சென்றுள்ளார்.

சம்பவம் தொடர்பில் கொடிகாமம் பொலிஸ் நிலையம் மற்றும் பொலிஸ் அவசர சேவை 119 ஆகியவற்றுக்கு பெண்ணின் உறவினர்களால் அறிவிக்கப்பட்டது.

இந்தச் சம்பவம் காதல் விவகாரமாக இருக்கும் உடனடியாக நடவடிக்கை எடுக்க முடியாது என்று கொடிகாமம் பொலிஸாரால் பதிலளிக்கப்பட்டதாக பெண்ணின் உறவினர்கள் தெரிவித்தனர்.

அதேவேளை, கடத்தல் கும்பலை அந்தப் பகுதியைச் சேர்ந்தவர்கள் துரத்திச் சென்ற போது, கொடிகாமம் சந்தியில் பொலிஸார் கடமையிலிருந்த நிலையில் கும்பல், பெண்ணை மோட்டார் சைக்கிளிலிருந்து வாகனத்துக்கு மாற்றி ஏற்றிச் சென்றுள்ளது.

இந்த நிலையில் ஆணைக்கோட்டைப் பகுதியில் கடத்தல் கும்பலின் வாகனம் பயணித்த போது, பெண்ணின் அவலக் குரல் கேட்டு அந்தப் பகுதி இளைஞர்கள் வாகனத்தை துரத்தி மடக்கப்பிடித்தனர். பெண்ணை மீட்டனர். பெண் மீட்கப்பட்டதை அடுத்து கடத்தல்கார்கள் அங்கிருந்து தப்பி சென்றிருந்தனர்.

அந்நிலையில், பெண் கூறிய தகவலின் அடிப்படையில் அவரை யாழ்ப்பாணம் பகுதியில் வைத்து உறவினர்களிடம் ஒப்படைத்தனர்.

சம்பவம் தொடர்பில் கொடிகாமம் பொலிஸ் நிலையத்தில் நேற்றிரவு 10 மணியளவில் முறைப்பாடு வழங்கப்பட்டது. அத்துடன், கடத்தப்பட்டு மீட்கப்பட்ட பெண் கொடிகாமம் பொலிஸாரிடம் ஒப்படைக்கப்பட்டார்.

கடத்தல் சம்பவம் இடம்பெற்றால் சட்ட மருத்துவ அதிகாரியிடம் முற்படுத்தி சட்ட மருத்துவ அறிக்கை பெறுவது பொலிஸாரின் கடமை. எனினும் கொடிகாமம் பொலிஸார் இன்று நண்பகலுக்கு பின்னரே, யாழ்ப்பாணம் போதனா வைத்தியசாலை சட்ட மருத்துவ அதிகாரி முன்னிலையில் முற்படுத்தினர் என தெரிவிக்கப்படுகின்றது.

சாவகச்சேரி வைத்தியசாலை சட்ட மருத்துவ அதிகாரியிடம் முற்படுத்தாமல் அந்தப் பெண்ணை யாழ்ப்பாணம் போதனா வைத்தியசாலை சட்ட மருத்துவ அதிகாரி முன்னிலையில் முற்படுத்தியமை தொடர்பில் கொடிகாமம் பொலிஸாரின் மீது பெண்ணின் உறவினர்களுக்கு சந்தேகத்தை ஏற்படுத்தியது.

அத்துடன், பாதிக்கப்பட்ட பெண்ணை சுமார் 17 மணிநேரம் கொடிகாமம் பொலிஸ் நிலையத்தில் தடுத்துவைத்திருந்த பின்னரே பொலிஸார் இன்று மாலை விடுவித்துள்ளனர்.

எனினும் முறைப்பாட்டுக்கு அமைய விவசாயப் போதனா ஆசிரியர் உள்ளிட்ட சிலரின் பெயர்கள் வழங்கப்பட்ட போதும் கடத்தல் கும்பலைக் கைது செய்வதற்கு கொடிகாமம் பொலிஸார் முயற்சிக்கவில்லை என உறவினர்கள் தெரிவித்தனர்.

-தமிழ்வின்-

இலங்கைக்கு விஜயம் மேற்கொண்டு கொழும்பு, யாழ்ப்பாணம், முல்லைத்தீவு மற்றும் மட்டக்களப்பு ஆகிய பிரதேசங்களுக்கு விஜயம் செய்து அங்கு வசிக்கும் அனைத்து இன மக்களையும் சந்திக்கவுள்ளேன் என இலங்கையில் பிறந்த நோர்வேயின் தலைநகரான ஒஸ்லோவின் பிரதி மேயரான கம்சாயினி குணரத்னம் தெரிவித்துள்ளார்.

இதேவேளை, அங்குள்ள பெண்கள், இளைஞர் யுவதிகளுக்கு முக்கியத்துவமளித்து சந்திப்புக்களை முன்னெடுக்கத் தீர்மானித்துள்ளேன்.

நாமனைவரும் சந்தித்து பேச்சுவார்த்தை ஊடாக நம்பிக்கை, உண்மையைக் கட்டியெழுப்ப முடியும் என நம்புகின்றேன் எனவும் அவர் தெரிவித்துள்ளார்.

தனது இலங்கைக்கான விஜயம் குறித்து கம்சாயினி குணரத்னம் மேலும் தெரிவிக்கையில்,

சுதந்திரமாக சிந்திப்பதிலும் மக்களுக்கு இருக்கும் அதிகாரத்திலும் நான் நம்பிக்கை கொண்டிருக்கின்றேன்.

அத்தோடு ஜனநாயகத்தின் மீது நம்மனைவருக்கும் இருக்க வேண்டிய நம்பிக்கையின் முக்கியத்துவம் தொடர்பிலும் நான் நம்பிக்கை கொண்டிருக்கின்றேன்.

ஜனநாயகம் என்பது வெறும் சொல் என்பதற்கும் அப்பாற்பட்டது என்பதுடன் ஜனநாயகம் என்பது எப்போதும் முடிவுறாதவாறு தொடர்ந்து கொண்டேயிருக்கும் ஒரு செயன்முறையாகும்.

ஒஸ்லோ நகரின் பிரதி மேயர் என்ற வகையில் ஒஸ்லோவை பசுமையாக்குவதிலும் செழிப்பாக்குவதிலும் புத்தாக்கம் நிறைந்ததாக மாற்றியமைப்பதிலும் அனைவருக்கும் தங்குவதற்கான இடமொன்றை உருவாக்குவதிலுமே எனது பணியின் மிகுதியான காலத்தை செலவழித்திருக்கின்றேன்.

சிறந்த நாடொன்றில் வாழ்வதற்கான தேவையை பூர்த்தி செய்வதற்கு இவை இன்றியமையாதனவாகும்.

அன்றாடம் நாமாக முன்வந்து நம்மையும் நாம் வாழும் சமூகத்தையும் அபிவிருத்தி செய்துகொள்ள வேண்டும். எமக்காவும் எமது எதிர்கால சந்ததியின் நன்மைக்காகவும் நாம் அதனைச் செய்ய வேண்டும்.

நான் பதினொரு வருட காலமாக அரசியலில் ஈடுபட்டிருக்கின்றேன். உலகம் முழுவதும் சென்று வருவதற்கும், எண்ணங்களையும் சிந்தனைகளையும் பகிர்ந்து கொள்வதற்கும் அதன்மூலம் வாய்ப்பு அமைந்ததுடன் என்னுடைய சொந்த நாடான நோர்வேயிலேயே தூதுவராக இருந்து, சிறந்த அனுபவங்களைப் பெற்றுக்கொள்ளவும் முடிந்தது.

இம்முறை நான் பிறந்த நாடான இலங்கைக்கு பயணம் மேற்கொள்வதற்கு தீர்மானித்துள்ளேன். என்னுடைய அனுவங்களை சமூகத்தின் கடைநிலை மனிதர்களுடன் பகிர்ந்து கொள்வதன் ஊடாக அவர்களை சிறந்த செயற்பாடுகளில் ஈடுபடுவதற்கு தூண்டுதலை வழங்க விரும்புகின்றேன்.

உன்னுடைய நாடு உனக்கு என்ன செய்ய முடியும் எனக் கேட்காதே, உனது நாட்டிற்காக உன்னால் என்ன செய்ய முடியும் எனக் கேட்டுப்பார் என்ற மறைந்த ஜனாதிபதி ஜோன்.எப்.கென்னடியின் வார்த்தைகளில் அதிக நம்பிக்கை கொண்டுள்ளேன்.

இம்மாதம் 3 – 12 ஆம் திகதி வரையில் இலங்கைக்கு விஜயம் மேற்கொள்வுள்ளேன். அங்கு கொழும்பு, யாழ்ப்பாணம், முல்லைத்தீவு மற்றும் மட்டக்களப்பு ஆகிய பிரதேசங்களுக்கு விஜயம் செய்யவுள்ளேன்.

அப்பிரதேசங்களில் வசிக்கும் அனைத்து இன மக்களையும் சந்திக்கவுள்ளேன். குறிப்பாக பெண்கள், இளைஞர் யுவதிகளுக்கு முக்கியத்துவமளித்து சந்திப்புக்களை முன்னெடுக்கத் தீர்மானித்துள்ளேன்.

நாமனைவரும் சந்தித்து பேச்சுவார்த்தை ஊடாக நம்பிக்கை, உண்மையைக் கட்டியெழுப்ப முடியும் என நம்புகின்றேன் என அவர் மேலும் தெரிவித்துள்ளார்.

இரண்டு வீடுகளில் திருடிய நபர் ஒருவரை கிராமவாசிகள் மடக்கிப் பிடித்து தாக்கி, பொலிஸாரிடம் ஒப்படைத்துள்ளதாக தெரிவிக்கப்படுகிறது.

புத்தள பொலிஸ் பகுதிக்குட்பட்ட உனாவட்டுன பிரதேசத்தில் அமைந்துள்ள இரண்டு வீடுகளில் இன்று அதிகாலை நுழைந்து வீட்டினுள் இருந்த பொருட்களையும் மற்றும் கைப்பை போன்றவற்றை திருடியதுடன் பின்னர் மற்றொரு வீட்டிற்குள் நுழைந்த நேரத்தில் கிராமவாசிகள் குறித்த திருடனை மடக்கிப் பிடித்துள்ளனர்.

கைகள் மற்றும் கால்களை கட்டி தாக்குதல் நடத்தியதுடன், பின்னர் குறித்த நபரை புத்தள பொலிஸாரிடம் ஒப்படைத்தனர்.

சந்தேகநபரும் மற்றொருவரும் திருட்டு சம்பவத்தில் ஈடுபட்டதாக தெரிவிக்கப்படுகின்ற நிலையில் மற்ற நபர் ஓடிவிட்டதாக தெரிவிக்கப்படுகிறது.

இவ்வாறு கைது செய்யப்பட்டவர் புதுருவாகல பிரதேசத்தைச் சேர்ந்த 19 வயதான நபர் என பொலிஸார் தெரிவித்தனர்.

வெல்லவாய நீதவான் நீதிமன்றத்தில் இன்று சந்தேகநபர் ஆஜர்படுத்தப்படவுள்ளதாகவும் எனவும் மேலதிக விசாரணைகளை மேற்கொண்டு வருவதாகவும் புத்தள பொலிஸார் தெரிவித்தனர்.