நாட்டின் தமிழ்ப் பிரஜைகளை விடுதலைப் புலிகள் என்று நோக்கினால், இலங்கைக்கு எதிர்காலம் என்பது இல்லாமல் போய்விடும் என அமைச்சர் வஜிர அபேவர்தன எச்சரிக்கை விடுத்துள்ளார்.

அலரி மாளிகையில் இன்று நடைபெற்ற ஊடகவியலாளர் சந்திப்பில் அவர் இதனை கூறியுள்ளார். மேலும் கூறுகையில்,

தெற்கில் 1971ஆம் ஆண்டு ஏற்பட்ட கிளர்ச்சிக்கு பின்னர் அப்படி நினைக்கவில்லை. 1988, 89,90ஆம் ஆண்டுகளில் தேசப்பற்றுள்ள அமைப்பினால் ஆயிரக்கணக்கானவர்கள் கொலை செய்யப்பட்டனர்.

அந்த காலத்தில் 10 ஆயிரத்திற்கும் மேற்பட்ட ஐக்கிய தேசியக் கட்சியினர் கொலை செய்யப்பட்டனர். அந்த பிரச்சினைகள் முடிந்த பின்னர், சம்பவங்களை எதிரான கண்ணோட்டத்தில் பார்க்கவில்லை.

தெற்கில் நடந்த இரண்டு கிளர்ச்சியின் போது ஏற்பட்ட சம்பவங்களை நாம் பார்க்கும் கண்ணோட்டத்தில் வடக்கில் நடந்த கிளர்ச்சியை பார்க்க வேண்டும்.

ஆனால் வடக்கில் நடைபெற்றதை நாம் அந்த கண்ணோட்டத்தில் பார்க்கவில்லை. தெற்கில் கிளர்ச்சியில் ஈடுபட்டவர்கள் கொல்லப்பட்டனர்.

நாட்டின் அரசாங்கம், அந்த பெரும்பான்மைக்கு எதிராக ஆயுதங்களை கையில் எடுத்தால், அதனை கட்டுப்படுத்த வேண்டும். அப்போது உயிரிழப்புகள் ஏற்படும்.

அவர்கள் இறந்த பின்னர், பௌத்தர்கள் என்ற வகையில் அவர்களை நினவுகூர சந்தர்ப்பத்தை ஏற்படுத்தி கொடுத்தோம்.

கொழும்பு விகாரமஹாதேவி வெளியரங்கில் மக்கள் விடுதலை முன்னணியின் கார்த்திகை வீரர்கள் தினத்தை அனுஷ்டிக்க நாங்கள் சந்தர்ப்பம் வழங்கி வருகிறோம்.

அதேபோல் வடக்கிலும் அந்த சந்தர்ப்பத்தை வழங்க வேண்டும். இதனால், வடக்கிலும் தெற்கிலும் மனித உரிமை என்பது சமமானது.

ஐக்கிய தேசிய முன்னணி அல்லது ஐக்கிய தேசியக் கட்சி தமிழ், சிங்கள, முஸ்லிம் என அனைத்து மக்களை பிரதிநிதித்துவப்படுத்தும் ஒரே சக்தியாக இருக்கின்றது.

ஐக்கிய தேசிய முன்னணி இலங்கையர்கள் என்ற வகையில் தீர்மானங்களை எடுக்கும் எனவும் வஜிர அபேவர்தன குறிப்பிட்டுள்ளார்.

-தமிழ்வின்-

திருமலை முருகன் ஆலய காணி

கிழக்கு மாகாணத்தின் திருகோணமலை குச்சவெளி பிரதேச செயலர் பிரிவுக்குட்பட்ட தென்னமரவாடி கிராமத்திலுள்ள முருகன் ஆலயம் மற்றும் அரசமலை முதலியவற்றை ஆக்கிரமிக்கும் முயற்சியில் தொல்லியல் திணைக்களம் ஈடுபடுவதாக மக்கள் கூறுகின்றனர்.

இப் பிரதேசத்தை ஆட்சிசெய்த தென்னன் என்ற அரசன் காலத்தில் கந்தசாமி மலை என இம் மலை அழைக்கப்பட்டுள்ளது. மிகவும் பழமை வாய்ந்த ஆலயத்தை பௌத்த இடமாக்கும் முயற்சிகளை இலங்கை தொல்லியல் திணைக்களம் மேற்கொண்டு வருகின்றது.

1984 ஆம் ஆண்டில் இப் பகுதி மக்கள்மீது இன வன்செயல்கள் கட்டவிழ்த்துவிடப்பட்டன. இதனால் இப் பகுதி மக்கள் சொந்த நிலத்திலிருந்து விரட்டியடிக்கப்பட்டனர். இதன்போது குறித்த மலைப் பகுதியில் காணப்பட்ட ஆலயமும் அழிக்கப்பட்டது.

மீண்டும் தமது ஊரில் மீள்குடியேறிய போது குறித்த பகுதியில் முருகன் சிலை மற்றும் வேல் என்பவற்றை வைத்து வழிபாடுகளை மேற்கொண்டனர். அண்மையில் குறித்த மலைப்பகுதியில் புத்தர் சிலை நிறுவுவதற்காக பௌத்த துறவிகள் வருகைதந்தபோது கிராம மக்கள் இணைந்து அதனை எதிர்த்து தடுத்து நிறுத்தினர்.

தற்போது குறித்த மலையடிவாரத்தில் தொல்பொருள் திணைக்களம் தமது பெயர்ப்பலகையை நாட்டி கட்டடம் ஒன்றை அமைத்து வருகின்றது.

தமிழ் மக்களுக்குச் சொந்தமான ஆலய தலத்தை தொல்பொருள் திணைக்களம் அபகரித்து பௌத்த தலமாக்கும் நடவடிக்கைக்கு ஒத்துழைப்பதாக மக்கள் குற்றம் சுமத்துகின்றனர்.

இதனை உரிய தரப்பினர் கருத்திற்கொண்டு தமது மலையையும் தமது முருகன் ஆலயத்தையும் மீட்டுத்தந்து ஆலயத்தில் வழிபாடுகளை மேற்கொள்வதற்கு வழியேற்படுத்தி தர வேண்டும் என்று பிரதேச மக்கள் கோரிக்கை விடுத்துள்ளனர்.

கிராமத்தின் கிராம அபிவிருத்தி சங்க உபதலைவர் கந்தையா பரமநாதன் இது குறித்து கூறுகையில், 1952இல் குறித்த கிராமத்தில் பிறந்து அங்கேயே வாழ்ந்து வந்த தாம் தமது கிராமத்தில் இதுவரையில் பௌத்த மத குரு ஒருவரோ, பௌத்த தலமோ இருக்கவில்லை என்றும் கூறுகின்றார்.

அத்துடன் குறித்த ஆலயத்தோடு இணைந்த தமது காணிகளுக்கு 1803 ஆம் ஆண்டு பிரித்தானியர் காலத்து அரசினால் உறுதி ஆவணங்கள் தம்மிடம் உள்ளதாகவும் 1984 ஆம் ஆண்டு இடம்பெயர்ந்து சென்ற பின்னர் குறித்த பகுதி பெரும்பான்மை இனத்தவரால் சுவீகரிக்கப்பட்டதாகவும் தெரிவித்துள்ளார்.

இதேவேளை தமது வயல் நிலங்கள் விவசாய நிலங்கள் பலவும் அபகரிக்கப்பட்டு இன்று போர் முடிந்து மீள்குடியேற்றம் வந்த நிலையிலும் நிலங்களை மீட்க முடியாது திண்டாடுவதாகவும் தென்னைமரவாடி மக்கள் தெரிவிக்கின்றனர்.

இந்நிலையில் தமது இந்த வரலாற்றுத் தொன்மை மிக்க ஆலயத்தையும் அபகரிக்க இவ்வாறான நடவடிக்கைகளை மேற்கொள்ளப்படுவதாகவும் இவற்றைத் தடுத்து நிறுத்துவதற்கு அனைவரும் ஒன்றிணைய வேண்டும் என்றும் தென்னைமரவாடி மக்கள் அழைப்பு விடுத்துள்ளனர்.

இவ் ஆலயத்தின் தற்போதைய நிலைமை தொடர்பாக நேற்றையதினம் (19.12.2018) ஈழ புரட்சி அமைப்பின் தேசிய அமைப்பாளர் மாணிக்கம் ஜெகன் , ஈழ புரட்சி அமைப்பின் பொருளாளரும் வவுனியா தெற்கு தமிழ் பிரதேச சபை உறுப்பிருமான சசிதரன், வவுனியா வடக்கு பிரதேச சபை உறுப்பினர் து.தமிழ்ச்செல்வன், ஈழ புரட்சி அமைப்பின் உறுப்பினர் ஹிரி நரோன் ஆகியோர் நேரில் சென்று மக்களுடன் கலந்துரையாடியதுடன் ஆலயத்தின் சிதைவுகளையும் தொல்லியல் திணைக்களத்தினால் அவ்விடத்தில் கட்டப்படும் கட்டிடத்தினையும் பார்வையிட்டனர்.

அவ்விடத்தில் தொல்பொருள் திணைக்களத்தினால் கட்டப்படும் கட்டிடம் தொடர்பாக பொதுமக்கள் குச்சவெளி பிரதேச சபைக்கு தெரியப்படுத்தியதையடுத்து பிரதேசபையினால் அனுமதியற்ற இக் கட்டிட வேலைகளை உடனடியாக நிறுத்தி முறையான அனுமதி பெற்றதன் பின்னர் உரிய வேலைகளை ஆரம்பிக்குமாறு தவிசாளர் ஏ.முபாறக் உத்தரவினை பிறப்பித்து உரிய அதிகாரிகளுக்கு கடிதம் மூலம் அனுப்பி வைத்ததுடன் கட்டடிம் அமைக்கப்படும் இடத்திலும் இக் கடிதம் ஒட்டப்பட்டிருந்தது.

அதனை கிழித்தெறிந்துவிட்டு அங்கு கட்டிட வேலைகள் ஆரம்பிக்கப்பட்டுள்ளதாக பொதுமக்கள் தெரிவித்திருந்தமை குறிப்பிடத்தக்கது.

முல்லைத்தீவு – கரைதுரைபற்று பலநோக்கு கூட்டுறவு சங்கம் தலைமையகத்தில் காவல் கடமையில் ஈடுபட்டு வந்த வயோதிபர் ஒருவர் மர்மமான முறையில் உயிரிழந்துள்ளார் என பொலிஸார் தெரிவித்துள்ளனர்.

முல்லைத்தீவு செல்வபுரம் பகுதியை சேர்ந்த, 69 வயதான பெஞ்சமீன் சூசைப்பிள்ளை என்பவரே இவ்வாறு உயிரிழந்துள்ளதாக அப்பகுதியில் இருக்கும் எமது செய்தியாளர் தெரிவித்துள்ளார்.

குறித்த நபர் நேற்று அவரது வீட்டிலிருந்து கரைதுரைபற்று பலநோக்கு கூட்டுறவு சங்கம் தலைமையகத்திற்கு காவல் கடமைக்காக சென்று இன்று காலை வரை வீடு திரும்பவில்லை என தெரிவிக்கப்பட்டுள்ளது.

இந்நிலையில் குறித்த வயோதிபர் உறங்கியவாறே உயிரிழந்துள்ளதாக அங்கு பணிபுரியும் அலுவலகர் ஒருவர் பொலிஸாருக்கும், உறவினர்களுக்கும் தகவல் வழங்கியுள்ளார் என குறிப்பிடப்படுகின்றது.

மேலும், குறித்த சம்பவம் தொடர்பான விசாரணைகளை முல்லைத்தீவு பொலிஸார் மேற்கொண்டு வருகின்றமை குறிப்பிடத்தக்கது.

தனியார் மற்றும் அரச பேருந்து சாரதிகளுக்கு இடையில் இடம்பெற்ற மோதல் சம்பவத்தில் ஒருவர் கொல்லப்பட்டுள்ளதாக வெலிமட பொலிஸார் தெரிவித்துள்ளனர்.

இந்த சம்பவம் வெலிமட பொரலாந்த பகுதியில் நேற்று மாலை இடம்பெற்றுள்ளது. இந்த சம்பவம் தொடர்பில் இலங்கை போக்குவரத்து சபை பணியாளர்கள் 04 பேர் கைது செய்யப்பட்டுள்ளதாகவும் பொலிஸார் கூறியுள்ளனர்.

நேர அட்டவணை தொடர்பில் ஏற்பட்ட வாய்த்தர்க்கம் மோதலாக மாறியதை தொடர்ந்து இந்த தாக்குதல் சம்பவம் இடம்பெற்றுள்ளதாக பொலிஸாரின் ஆரம்ப கட்ட விசாரணைகளில் தெரியவந்துள்ளது.

இந்த தாக்குதல் சம்பவத்தில் 49 வயதான தனியார் பேருந்தின் சாரதி ஒருவரே கொல்லப்பட்டுள்ளார்.

தாக்குதலை மேற்கொண்டதாக கூறப்படும் அரச பேருந்தின் சாரதி மற்றும் நடத்துனர் ஆகியோர் வைத்தியசாலையில் அனுமதிக்கப்பட்டுள்ளனர்.

இந்நிலையில், அவர்களையும் கைது செய்துள்ளதாக தெரிவித்துள்ள பொலிஸார், கைது செய்யப்பட்ட நால்வரையும் நாளைய தினம் நீதிமன்றில் முன்னிலைப்படுத்த உள்ளதாகவும் கூறியுள்ளனர்.