கொலை செய்த மூன்று மாணவர்கள்

மாத்தறை எலவெல்ல வீதியில் மூன்று மாணவர்கள் இணைந்து கூரிய ஆயுதம் ஒன்றில் தாக்கி மற்றுமொரு மாணவனை கொலை செய்துள்ளனர். இந்த சம்பவம் இன்று மதியம் நடந்துள்ளது.

பகுதி நேர வகுப்பு முடிந்து சென்று கொண்டிருந்த மாணவனை மோட்டார் சைக்கிளில் வந்த மேலும் சில மாணவர்கள் தாக்கியுள்ளனர். இந்த சம்பவத்தில் இரண்டு மாணவர்கள் காயமடைந்துள்ளனர். இவர்களில் ஒருவர் வைத்தியசாலைக்கு கொண்டு செல்லும் வழியில் உயிரிழந்துள்ளதாக பொலிஸ் ஊடகப் பேச்சாளரின் அலுவலகம் தெரிவித்துள்ளது.

திஹாகொட பிரதேசத்தில் வசித்து வந்த மாத்தறையில் உள்ள பிரதான பாடசாலையில் 13 ஆம் ஆண்டில் பயிலும் மாணவனே உயிரிழந்துள்ளார். சம்பவத்தில் காயமடைந்த மற்றைய மாணவன் மாத்தறை வைத்தியசாலையில் சிகிச்சை பெற்று வருகிறார்.

எந்த காரணத்திற்காக இந்த கொலை சம்பவம் நடந்தது என்ற தகவல் வெளியாகவில்லை. தாக்குதல் நடத்திய மாணவர்கள் தப்பியோடியுள்ளனர். இவர்களை கைதுசெய்ய பொலிஸார் விசாரணைகளை ஆரம்பித்துள்ளனர்.

சிறுவனின் கண்ணீர் கதை

மட்டக்களப்பு – சவுக்கடி கடற்கரையில் மாவீரர் ஒருவரின் பிள்ளை கச்சான் விற்பதை அவதானித்தோம். உலகெலாம் மாவீரர் நாளை உணர்வுபூர்வமாக அனுஷ்டிக்க தயாராகிவரும் நிலையில் கடற்கரையில் கச்சான் விற்கும் அந்த சிறுவனின் பேச்சு எம்மை சோகத்தில் ஆழ்த்தியது.

தனது தந்தை இயக்கத்திற்கு போய் இறந்து விட்டதாக கூறிய அந்த சிறுவன் அப்பா இறந்த பின் தனது தாய் வேறு திருமணம் செய்து கொண்டதாகவும் அதன் பின்னர் தனது தாத்தாவுடன் வாழ்ந்து வருவதாகவும் கூறினான். தனது தாத்தாவான தவராசா சவுக்கடி கடற்கரையில் கூலிக்கு மீன்பிடித்து வருவதாகவும் அவர்களுக்கு மிகு‌ந்த கஷ்டம் எனவும் தெரிவித்தான்.

தாத்தாவின் வறுமை நிலை காரணமாக பாடசாலை விட்டு வந்து சவுக்கடி கடற்கரையில் தினமும் சவுக்கடி கடற்கரையில் கச்சான் விற்பதாக கூறிய அந்த சிறுவன் தனக்கு படிப்பதற்கு சரியான விருப்பம் எனவும் தெரிவித்தான்.

தான் பஸ்ஸில் பயணம் செய்தே பாடசாலைக்கு செல்வதாகவும் தன்னிடம் இருந்த சைக்கிள் உடைந்து விட்டதாகவும் மிகுந்த மனவேதனையுடன் தெரிவித்தான். அந்த சிறுவன் எங்களிடம் கூறிய வார்த்தைகள் சில எங்களின் மனசாட்சிகளை ஏன் உண்மையான உணர்வுள்ள தமிழர்களின் மனசாட்சிகளை நெருடிக்கொண்டே இருக்கும்.

‘அப்பா இயக்கத்திற்கு போய் இறந்து விட்டார் அம்மா வேற கல்யாணம் கட்டிட்டு போயிட்டாங்க நான் மட்டும் தனியாத்தான் இருக்கிறன் தாத்தா தான் என்னை பார்க்கிறார்.’ ‘அம்மா நான் இருக்கிறதை சொல்லாம கலியாணம் கட்டினதால என்னை அம்மா சேர்க்கிறதில்லை சேர்க்க மாட்டன் என்று தாத்தாட்டை சொல்லிட்டாங்க. நான் தனிய தாத்தாவுடன் இருக்கன் எங்கட அப்பா தயா என்று சொல்லுவாங்க. அவர் இயக்கத்திற்கு போய் காட்டிக் கொடுக்காம செத்து போயிட்டாரு.

ஊருல எல்லாரும் சொல்லுராங்க அப்பா நல்லவர் என்று. ஆனா நான் அவரை பார்க்கள. நான் இப்ப அப்பாவு இல்லாம அம்மாவும் இல்லாம தாத்தாவுடன் இருக்கன் பள்ளிக்கூடம் போறதற்கு தான் கச்சான் விற்கிறன்’ என்றான்.

-தமிழ்வின்-

கொழும்பிலிருந்து யாழ்ப்பாணம் நோக்கி பயணித்துக் கொண்டிருந்த குளிரூட்டப்பட்ட புகையிரதம் மோதி நபர் ஒருவர் பலியாகியுள்ளதாக தெரிவிக்கப்படுகின்றது.

கிளிநொச்சி – முகமாலையில், இன்று முற்பகல் 11.30 மணியளவில் இச்சம்பவம் இடம்பெற்றுள்ளது. குறித்த நபர் புகையிரதம் முன் பாய்ந்து தற்கொலை செய்து கொண்டதாக பொது மக்கள் தெரிவிக்கின்றனர்.

எனினும், பொலிஸார் மேலதிக விசாரணைகளை மேற்கொண்டு வருவதாக தெரிவிக்கப்படுகின்றது. குறித்த நபரின் சடலம் இதுவரை கண்டுபிடிக்கப்படவில்லை என்பது குறிப்பிடத்தக்கது

மாவீரர் நாள் நிகழ்வுகளை நடத்த எந்த சந்தர்ப்பத்திலும் அரசாங்கத்தினால் அனுமதி வழங்கப்படவில்லை என அரசாங்க தகவல் திணைக்களம் அறிவித்துள்ளது.

அவ்வாறு அனுமதி வழங்கப்பட்டுள்ளது என உணரும் வகையில் மேற்கொள்ளப்படும் பிரசாரங்களில் எவ்வித உண்மையும் இல்லை என்றும் தகவல் திணைக்களம் தெரிவித்துள்ளது.

அரசாங்க தகவல் திணைக்கள பணிப்பாளர் நாயகம் நாலக கலுவெலவின் கையொப்பத்துடன் இன்று மதியம் வெளியிடப்பட்ட ஊடக அறிவிப்பில் இந்த அறிவித்தல் வெளியிடப்பட்டுள்ளது.

யாழ்ப்பாணம் கோப்பாயில் உள்ள படை முகாமிற்கு முன்னால் எதிர்வரும் 27ஆம் திகதி மாவீரர் தினம் நடாத்துவதற்கு ஏற்பாடு செய்யப்பட்டிருந்த நிலையில், தமிழீழ விடுதலைப் புலிகளின் சின்னங்கள், கொடிகள் பயன்படுத்தி அந் நினைவு தினத்தை அனுஸ்டிக்க யாழ்.நீதிவான் நீதிமன்றம் தடை விதித்து நேற்று கட்டளை பிறப்பித்திருந்தது.

இந்த நிலையில், அரசாங்க தகவல் திணைக்களம் இவ்வாறானதொரு அறிவிப்பை வெளியிட்டுள்ளது.

அரசாங்கத்தின் முக்கிய அறிவிப்பு

பொதுத் தேர்தலுக்கு இணங்கினால் ஐக்கிய தேசியக் கட்சியுடன் காபந்து அரசாங்கம் ஒன்றை அமைக்க தயார் என்று அரசாங்கம் அறிவித்துள்ளது. நாடாளுமன்ற உறுப்பினர் லக்ஸ்மன் யாப்பா அபேவர்த்தன இதனை குறிப்பிட்டுள்ளார்.

அவர் மேலும் கூறுகையில், ஐக்கிய தேசியக் கட்சியை பொறுத்தவரையில் அது பொது தேர்தலுக்கு தயாரில்லை. இந்த நிலையில் அந்த கட்சியை கூட்டாட்சி ஒன்றை அமைக்க வருமாறு அழைப்பு விடுக்கிறோம்.

ஏனைய கட்சிகளும் இந்த காபந்து அரசாங்கத்தில் பங்கேற்க முடியும். இந்த காபந்து அரசாங்கத்தின் கீழ் பொது தேர்தல் ஒன்றுக்கு செல்ல முடியும். குறித்த காபந்து அரசாங்கத்தில் ஐக்கிய தேசியக் கட்சியோ அல்லது ஏனைய கட்சிகளோ பிரதமர் ஒருவரை நியமிக்க முடியும்.

எனினும் ரணில் விக்ரமசிங்கவை பிரதமராக்க ஜனாதிபதி விருப்பம் கொண்டிருக்காமையால் வேறு ஒருவரை ஐ.தே.க பரிந்துரை செய்ய முடியும் என்றும் அவர் தெரிவித்துள்ளார்.

தீவிரமாக சோதனையிட்ட நாய்

நாடாளுமன்றத்தில் சபாநாயகரின் ஆசனங்கள் விசேட சோதனைக்கு உட்படுத்தப்பட்டுள்ளது. நேற்றைய தினம் நாடாளுமன்ற அமர்வுகள் ஆரம்பிப்பதற்கு முன்னர் விசேட அதிரடிப்படையினர் மற்றும் பொலிஸ் நாய்களினால் சபாநாயகரின் மேசை மற்றும் கதிரை சோதனைக்கு உட்படுத்தப்பட்டுள்ளது.

அதேபோன்று நாடாளுமன்றத்தின் அனைத்து உறுப்பினர்களின் மேசைக்குள் புகுந்து நாய்கள் சோதனையிட்டுள்ளதாக தெரிவிக்கப்படுகின்றது. சபாநாயகரின் மேசை மீது மற்றும் மேசைக்கு கீழ் கடுமையான சோதனைகளை மேற்கொள்வதற்கு விசேட அதிரடிப்படையினரின் நாய் ஒன்று பயன்படுத்தப்பட்டுள்ளது. அதன் பின்னர் அனைத்து உறுப்பினர்களினதும் மேசை, கதிரை மற்றும் ஆவணங்கள் பரிசோதனைக்கு உட்படுத்தப்பட்டுள்ளது.

நாடாளுமன்ற உறுப்பினர்கள் சபைக்குள் நுழையும் பகுதியில், உத்தியோகபூர்வ இலக்க தகடுகள் கொண்ட பொலிஸ் அதிகாரிகள் உறுப்பினர்களை முழுமையாக சோதனையிட்டுள்ளனர். அத்துடன் நாடாளுமன்ற வளாகத்தில் ஏனைய நாட்களை விடவும் அதிக பொலிஸார் பாதுகாப்பு நடவடிக்கையில் ஈடுபடுத்தப்பட்டுள்ளனர்.

மிளகாய் தூள்

சபாநாயகருக்கு எதிராக சபையில் அரங்கேறிய செயற்பாடுகளுக்கு கட்சிபேதம் பார்க்காது விசாரணைகளை முன்னெடுத்து கடுமையான தண்டனை வழங்க வேண்டும் என தமிழ்த் தேசியக் கூட்டமைப்பு சபையில் வலியுறுத்தியுள்ளது. அத்துடன், சபாநாயகரின் பாதுகாப்பு இனிவரும் காலங்களில் உறுதிப்படுத்தப்பட வேண்டுமெனவும் கோரிக்கை முன்வைக்கப்பட்டுள்ளது.

நாடாளுமன்றம் நேற்று சபாநாயகர் கரு ஜயசூரிய தலைமையில் கூடியது. இதன்போது நாட்டில் ஏற்பட்டுள்ள அரசியல் நெருக்கடிகள் தொடர்பிலான சபை ஒத்திவைப்பு பிரேரணை கொண்டு வரப்பட்டிருந்தது. இந்த விவாதத்தில் கலந்துகொண்டு உரையாற்றியபோதே தமிழ்த் தேசியக் கூட்டமைப்பின் நாடாளுமன்ற உறுப்பினர் செல்வம் அடைக்கலநாதன் மேற்கண்டவாறு கூறியுள்ளார். அவர் மேலும் தெரிவிக்கையில்,

கடந்த 15ஆம் திகதி சபை கூடியபோது இடம்பெற்ற சம்பவங்களும், சபாநாயகருக்கு பாதுகாப்பு அச்சுறுத்தலை ஏற்படுத்தியிருந்தமையும் வன்மையாகக் கண்டிக்கத்தக்கது. நாடாளுமன்ற உறுப்பினர்கள் சபாநாயகர் மீது தாக்குதல்களை நடத்தியதை ஏற்றுக்கொள்ள முடியாது. நாடாளுமன்ற குடும்பத்துக்குத் தலைவரான சபாநாயகருக்குப் பாதுகாப்பற்ற நிலைமை ஏற்பட்டிருந்தமை குறித்து நாம் கவலைப்பட வேண்டும்.

சிலர் மோசமான வார்த்தைகளைப் பயன்படுத்தியிருந்தனர். ஒரு நாடாளுமன்ற உறுப்பினர் ஒரு மாவட்டத்தின் சார்பில் தான் நாடாளுமன்றத்துக்கு தெரிவு செய்யப்படுகின்றார். அவரின் நடவடிக்கை சரியில்லை என்றால் மாவட்ட மக்களின் நடவடிக்கையும் சரியில்லை என்பதே பொருள்படும். இந்தச் செயல்கள் எம்மை தலை குனிய வைத்துள்ளன. அதேபோல் கடந்த 16ஆம் திகதி சபாநாயகரின் கதிரைகள், சட்ட புத்தகங்கள் வீசியெறிப்பட்டமை மிக மோசமான செயல்.

மிளகாய்த் தூள் பற்றாக்குறை ஏற்பட்டுள்ளது, நாடாளுமன்றில் அதனை வாங்க முடியுமா? என்று வெளியில் கேட்கின்றனர். அந்த நிலைக்கு நாடாளுமன்றம் தள்ளப்பட்டுள்ளமை குறித்து கவலையடைகின்றோம். சபாநாயகருக்கு இழைக்கப்பட்ட அநீதிக்கு எதிராக நடவடிக்கை எடுக்கப்பட வேண்டும். எனவே, வன்முறையில் ஈடுபட்டவர்கள் தண்டிக்கப்பட வேண்டும்.

ஒரு கட்சித் தலைவர் அவர்களின் பிரிநிதிகளை கட்டுப்படுத்த வேண்டிய பொறுப்பு உள்ளது. ஆனால், அவர்கள் பார்வையாளர்களாக இருந்து வன்முறைகளுக்கு ஆதரவளித்தனர்.
இந்த சம்பவங்கள் இனியும் இடம்பெறக்கூடாது. சட்டங்களை இயற்றுகின்ற உயர் சபை இது. சபாநாயகரின் பாதுகாப்பு கேள்விக்குறியாகியுள்ளது.

சபாநாயகருக்கும், செயலாளர்களுக்கும் நாடாளுமன்ற உறுப்பினர்களால் பாதுகாப்பு அச்சுறுத்தல் இருந்தால் சாதாரண மக்களுக்கு எவ்வாறு பாதுகாப்பு இருக்கும்? எந்த கட்சியாக இருந்தாலும் சம்பந்தப்பட்டவர்களைத் தண்டிக்கும் நடைமுறையைக் கொண்டுவர வேண்டும். வேறு எந்த நாட்டிலும் ஏற்படாத அபகீர்த்திகள் இந்த நாட்டில் இன்று ஏற்பட்டுள்ளன.

நடந்த சம்பவங்களை விசாரணை செய்து சரியான தண்டனை வழங்கப்பட வேண்டும் என்பதுடன், நீதியும் நிலைநாட்டப்பட வேண்டும் என தெரிவித்துள்ளார்.

ஜனாதிபதி தந்தை 41 இடங்களில் துஷ்பிரயோகம் செய்யப்பட்டுள்ளார் என ஐக்கிய தேசியக் கட்சியின் நாடாளுமன்ற உறுப்பினர் துஷார இந்துநில் தெரிவித்துள்ளார்.

நாடாளுமன்றத்தில் நேற்றய தினம் இடம்பெற்ற சபை ஒத்திவைப்பு வேளை பிரேரணையில் ஐக்கிய தேசியக் கட்சியின் உறுப்பினர் முஜிபுர் ரஹ்மான் உரையாற்றிக்கொண்டிருந்தபோது அருகில் அமர்ந்திருந்த துஷார இந்துநில் ஆபாச புத்தகம் ஒன்றினை வாசித்துக்கொண்டுள்ளார் என தெரிவித்துள்ளார்.

இதன்போது எழுந்து பதில் கூறிய துஷார இந்துநில், நான் ஆபாச புத்தகம் வாசிக்கவில்லை, சத்துரிகா சிறிசேன எழுதிய “ஜனாதிபதி தந்தை” என்ற புத்தகத்தையே வாசித்துக்கொண்டுள்ளேன்.

எனினும் இதில் சத்துரிகா சிறிசேன ஜனாதிபதியின் பெயரை 41 இடங்களில் துஷ்பிரயோகம் செய்துள்ளார். அதனைத்தான் நான் வாசித்துக்கொண்டிருந்தேன். இதனையே முஜிபுர் எம்.பி ஆபாசப் புத்தகம் படிப்பதாக கூறுகின்றார் எனக் குறிப்பிட்டார்.

ஜனாதிபதி மைத்திரிபால சிறிசேன

சமகாலத்தில் மஹிந்த ராஜபக்ஷவை விட மிகவும் ஆபத்தானவராக ஜனாதிபதி மைத்திரிபால சிறிசேன உள்ளதாக பிரபல நடிகையான சமனலி பொன்சேகா தெரிவித்துள்ளார். தற்போதைய அரசியல் நிலைமை தொடர்பில் சிங்கள ஊடமொன்றுக்கு கருத்து வெளியிடும் போதே அவர் இவ்வாறு குறிப்பிட்டுள்ளார்.

நாங்கள் கலைஞர்களாக ஒன்றையும் எதிர்பார்க்காமல் 2015ஆம் ஆண்டு ஜனாதிபதி தேர்தலுக்காக வேலை செய்தோம். இந்த அனைத்தையும் ஜனாதிபதி காட்டிக் கொடுத்திருப்பது வருத்தமாக உள்ளதாகவும், நாட்டிற்கு பாதிப்பை ஏற்படுத்தியுள்ளதென அவர் குறிப்பிட்டுள்ளார்.

சுத்தமான அரசியல் ஒன்றை மேற்கொள்வார் என்ற எண்ணத்தில் நாங்கள் மைத்திரியை அதிகாரத்திற்கு கொண்டு வரவில்லை. எனினும் சில மாற்றங்களை பொது மக்களின் அழுத்தங்களுக்கமைய செய்வார் என எதிர்பார்த்தோம்.

மஹிந்த ராஜபக்சவின் கலாச்சாரத்தை இல்லாமல் செய்ய முடியும் என்ற உணர்வு எங்களுக்கு இருந்தது. எனினும் இந்த நேரத்தில் மைத்திரிபால சிறிசேன என்பவர் மஹிந்த ராஜபக்சவை விட ஆபத்தானவராகியுள்ளார். அண்மையில் பாதுகாப்பு பிரிவு பிரதானி ஒருவருக்கு தற்போதைய ஜனாதிபதி மைத்திரிபால சிறிசேன கடிதம் ஒன்றை அனுப்பியிருந்தார். அந்த சம்பவம் மிகவும் ஆபத்தான ஒன்றாகும்.

அனைத்திலும் உள்ள ஆபத்து மக்களுக்கு புரிகின்றதா என தெரியவில்லை. இந்த அரசியலில் ஆபத்து வேறு தளத்தில் உள்ளது. எப்படியிருப்பினும் ஐக்கிய தேசிய கட்சியினரும் கடந்த காலங்களில் தங்களுக்கு கிடைத்த மக்கள் பலத்தை வீணடித்து விட்டார்கள் என்பதனை கூற வேண்டும்.

ஜனாதிபதியை தனிமைப்படுத்தவும் அவர்கள் செயற்பட்டிருப்பார். ஜனாதிபதியின் காட்டிக்கொடுப்பை நியாயப்படுத்த நான் இதனை கூறவில்லை. அடுத்த தரப்பும் சுத்தம் இல்லை என்பதனை நினைவுப்படுத்துகின்றேன் என அவர் மேலும் தெரிவித்துள்ளார்.