ஸ்ரீலங்கா பொதுஜன பெரமுனவின் அடுத்த ஜனாதிபதி வேட்பாளர் தொடர்பாக ஒரு இணக்கப்பாட்டுக்கு வந்துள்ளதாக தகவல்கள் தெரிவிக்கின்றன.

எதிர்வரும் 2020ஆம் ஆண்டு ஜனாதிபதித் தேர்தலில் தனது இடத்தை தக்கவைக்கவே ஜனாதிபதி மைத்திரிபால சிறிசேன, ரணில் விக்ரமசிங்கவை பிரதமர் பதவியில் இருந்து நீக்கிவிட்டு மகிந்த ராஜபக்சவை அந்த பதவிக்கு நியமித்ததாக தகவல்கள் வெளியாகி இருந்தன.

மகிந்த ராஜபக்ச தனக்கான அந்த இடத்தை பறிக்க மாட்டார் என்ற நிலையான முடிவுக்கு ஜனாதிபதி மைத்திரிபால சிறிசேன வந்திருக்கக் கூடும். இவர்களுக்கு இடையில் நடைபெற்றதாக கூறப்படும் பேச்சுவார்த்தையில் இந்த விடயமும் கட்டாயம் உள்ளடங்கி இருந்திருக்கும்.

எவ்வாறாயினும் மகிந்த ராஜபக்ச, ஸ்ரீலங்கா சுதந்திரக்கட்சியில் இருந்து விலகி, ஸ்ரீலங்கா பொதுஜன பெரமுனவில் இணைந்து கொண்டதுடன் நாமல் ராஜபக்ச உட்பட ஸ்ரீலங்கா சுதந்திரக் கட்சியின் அதிகளவான உறுப்பினர்கள், பொதுஜன பெரமுனவில் இணைந்து விட்டனர்.

இதற்கு அமைய ஸ்ரீலங்கா பொதுஜன பெரமுனவின் ஜனாதிபதி வேட்பாளர் தொடர்பிலும் அவர்கள் ஒரு இணக்கத்திற்கு வந்துள்ளதாக தெரியவருகிறது.

இந்த நிலையில், எதிர்வரும் 2020 ஆம் ஆண்டு ஜனாதிபதித் தேர்தலில் மைத்திரிபால சிறிசேனவை ஜனாதிபதி வேட்பாளராக நிறுத்தும் அவசியம் ஸ்ரீலங்கா பொதுஜன பெரமுனவிற்கு இல்லை என அந்த கட்சியின் உட்தரப்புத் தகவல்கள் கூறுகின்றன.

நாட்டில் நிலவும் நிலைமைக்கு அமையவும் ஏற்பட்டுள்ள ஸ்திரமற்ற நிலையிலும் மைத்திரிபால சிறிசேன 25 சதவீத வாக்குகளை கூட பெற முடியாத சூழல் காணப்படுவதாக பொதுஜன பெரமுனவினர் கணக்கிட்டுள்ளனர்.

இந்த நிலையில், எதிர்வரும் ஜனாதிபதித் தேர்தலில் தனது சகோதரர் கோத்தபாய ராஜபக்ச அல்லது தனது நீண்டகால நண்பர் குமார வெல்கம ஜனாதிபதித் தேர்தலில் நிறுத்த மகிந்த ராஜபக்ச இணக்கம் தெரிவித்துள்ளதாக கூறப்படுகிறது. இது சம்பந்தமாக ஐக்கிய தேசியக்கட்சியின் தலைவர்களுக்கு தெளிவுப்படுத்தப்பட்டுள்ளதாக தெரியவருகிறது.

குமார வெல்கம அரசியல் ரீதியாக நாகரீகமாக நடந்துக்கொள்வது அவருக்கு மதிப்பை ஏற்படுத்தியுள்ளது. இதனால், அவரை ஜனாதிபதி வேட்பாளராக நிறுத்துவதில் எதிர்ப்புகள் கிளம்பாது எனவும் தெரிவிக்கப்படுகிறது.

இதனிடையே ஜனாதிபதி மைத்திரிபால சிறிசேன தன்னை ஜனாதிபதியாக தெரிவு செய்த மக்களை காட்டிக்கொடுத்துள்ளமை தொடர்பாக ஸ்ரீலங்கா பொதுஜன பெரமுன உறுப்பினர்களிடையே பரவலாக பேசப்பட்டு வருகிறது.

ஜனாதிபதியின் நடவடிக்கை காரணமாக நாட்டில் ஏற்பட்டுள்ள நிலைமையால், மக்கள் மத்தியில் ஜனாதிபதிக்கு எதிரான நிலைப்பாடு உருவாகியுள்ளமை தொடர்பிலும் ஸ்ரீலங்கா பொதுஜன பெரமுன கவனம் செலுத்தியுள்ளது.

இப்படியான நிலையில், அடுத்த ஜனாதிபதித் தேர்தலில் போட்டியிட மைத்திரிபால சிறிசேனவுக்கு சந்தர்ப்பம் கிடைக்காமல் போகலாம் எனவும் தெரிவிக்கப்படுகிறது.

-தமிழ்வின்-

ஐக்கிய தேசிய கட்சி நாடாளுமன்ற உறுப்பினர் ஹிருணிக்கா பிரேமசந்திர பெருந்தொகை பணத்திற்கு பேரம் பேசப்பட்டுள்ளார்.

நாடாளுமன்றத்தில் பெரும்பான்மையை பெற்றுக் கொள்வதற்காக மஹிந்த ராஜபக்ச தரப்பு இன்னமும் உறுப்பினர்களை தம் பக்கம் இழுக்கும் முயற்சியில் ஈடுபட்டு வருவதாக நாடாளுமன்ற உறுப்பினர் ஹிருணிக்கா பிரேமசந்திர தெரிவித்துள்ளார்.

நேற்று மாலை அலரி மாளிகையில் இடம்பெற்ற ஊடகவியலாளர் சந்திப்பில் கலந்து கொண்டு கருத்து வெளியிடும் போதே அவர் இவ்வாறு குறிப்பிட்டுள்ளார்.

கட்சி தாவ வைப்பதற்காக தனக்கு தொடர்ந்து தொலைபேசி அழைப்புகள் வந்து கொண்டிருப்பதாக அவர் குறிப்பிட்டுள்ளார். இது தொடர்பில் தொடர்ந்து தனது தாயிடம் பேரம் பேசப்பட்டுள்ளதாக ஹிருணிக்கா கூறியுள்ளார்.

அதற்கமைய கட்சி மாறுவதற்காக தனக்கு 65 கோடி ரூபாய் வழங்குவதற்கு அவர்கள் தயாராக இருப்பதாக தாயாரிடம் அறிவித்துள்ளதாக அவர் குறிப்பிட்டுள்ளார்.

அதேபோன்ற தொலைபேசி அழைப்பு ஒன்று ரஞ்சன் ராமநாயக்கவுக்கும் அண்மையில் கிடைத்துள்ளதென ஹிருணிக்கா மேலும் தெரிவித்துள்ளார்.

ராஜபக்ச ஆட்சிக்காலத்தில் நடந்ததாக கூறப்படும் சில பாரிய குற்றச் செயல்கள் சம்பந்தமாக குற்றப் புலனாய்வு திணைக்களம் சார்பில் விசாரணைகளை நடத்தி வந்த பொலிஸ் பரிசோதகர் நிஷாந்த சில்வாவுக்கு வழங்கப்பட்ட இடமாற்றம் ரத்து செய்யப்பட்டுள்ளது.

ஜனாதிபதி மைத்திரிபால சிறிசேனவின் உத்தரவிற்கமைய பொலிஸ் ஆணைக்குழு இதனை ரத்து செய்துள்ளதாக தெரிவிக்கப்பட்டள்ளது.

நேற்றிலிருந்து அமுலுக்கு வரும் வகையில் பொலிஸ் பரிசோதகர் நிஷாந்த சில்வாவுக்கு இடமாற்றம் வழங்கி ஜனாதிபதி உத்தரவிட்டிருந்தார். இதையடுத்து இன்றைய தினம் குறித்த இடமாற்றத்தை ஜனாதிபதி ரத்து செய்துள்ளார்.

நிஷாந்த சில்வா கொழும்பில் 11 தமிழ் இளைஞர்கள் கடத்தி கொலை செய்யப்பட்ட விவகாரம், லசந்த விக்கிரமதுங்க கொலை செய்யப்பட்ட விவகாரம், வஷீம் தாஜூடீன் படுகொலை, ஊடகவியலாளர் கீத் நொயார் விவகாரம் உட்பட பல சம்பவங்கள் தொடர்பில் விசாரணை மேற்கொண்டு வருகின்றார்.

நிவித்திகல தொலஸ்வல பாரதி தமிழ் வித்தியாலயத்தில் தரம் 6 இல் கல்வி கற்கும் மாணவன் மகேஸ்வரன் சுஜீவன் (வயது 11) நேற்று(19) தொலஸ்வல பிரதேசத்தில் கற்பாறை ஓடை ஒன்றைக் கடந்து செல்லும்போது அதில் தவறி விழுந்து உயிரிழந்தார்.

மேற்படி சம்பவம் குறித்துத் தெரியவருகையில், நேற்று பாடசாலை விட்டு தமது நண்பர்களுடன் வீட்டுக்குச் சென்ற போது தொலஸ்வல கற்பாறை ஓடை ஒன்றில் தவறி விழுந்து நீரில் அடித்துச் சென்றுள்ளார். இதைக் கண்டு அவருடன் சென்ற நண்பர்கள் அப்பிரதேச மக்களிடம் கூறியதையடுத்து பிரதேச மக்கள் மேற்படி குறித்த சிறுவனை உயிரிழந்த நிலையில் நீரிலிருந்து எடுத்து வைத்தியசாலைக்குக் கொண்டு சென்றுள்ளனர்.

இந்நிலையில் மாணவனின் சடலம் தற்போது இரத்தினபுரி பொது வைத்தியசாலையில் வைக்கப்பட்டு பிரேத பரிசோதனைகள் இடம்பெற்று வருகின்றன. இதனையடுத்து குறித்த சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றமை குறிப்பிடத்தக்கது.

மேல் மாகாணசபையில் அதன் உறுப்பினர்கள் ஆபாச படங்களை பார்த்துக் கொண்டிருந்தமை தொடர்பில் சர்ச்சை ஏற்பட்டுள்ளது.

மேல் மாகாணசபையில் நேற்று வரவுசெலவுத் திட்ட உரையை முதலமைச்சர் இசுரு தேவப்பிரிய ஆற்றிக் கொண்டிருந்தார்.

இதன்போது ஆளும் ஐக்கிய மக்கள் சுதந்திர முன்னணி உறுப்பினர்கள், ஆபாசப்படங்களைப் பார்த்துக் கொண்டிருந்தனர்.

பத்தரமுல்லவில் அமைக்கப்பட்ட புதிய சபா மண்டபத்தில், மாகாண சபை உறுப்பினர்களுக்கு அதிகாரபூர்வ கணினி உள்ளிட்ட வசதிகளும் செய்து கொடுக்கப்பட்டுள்ளன.

இந்த கணினிகளிலேயே, வயதான மாகாணசபை உறுப்பினர்கள் கூட, ஆபாசப்படங்களைப் பார்த்துக் கொண்டிருந்தனர்.

மாகாண சபை உறுப்பினர்கள் மோசமான செயற்பாடு பெரும் சர்ச்சையை ஏற்படுத்தியுள்ளது.

பிரதமர் செயலகத்தை செயற்பட விடாமல் முடக்கும் புதிய நகர்வு ஒன்றில் ஐக்கிய தேசியக் கட்சி இறங்கியுள்ளதாக அரசியல் அவதானிகள் கூறியுள்ளனர்.

கடந்த மாதம் 26ஆம் திகதி பிரதமர் பதவியிலிருந்து ரணில் விக்ரமசிங்க நீக்கப்பட்டு, மகிந்த ராஜபக்சவை பிதமராக ஜனாதிபதி மைத்திரிபால சிறிசேன நியமித்திருந்தார்.

இதனால் கொழும்பு அரசியலில் பெரும் குழப்பம் ஏற்பட்டிருந்தது. இந்நிலையில், பிரதமர் பதவிக்கு ரணில் மற்றும் மகிந்த ஆகியோர் உரிமை கோரி வருகின்றனர்.

இந்நிலையில், பிரதமராக பதியேற்றுள்ள மகிந்த ராஜபக்சவிற்கு எதிராக பல்வேறு நடவடிக்கைகளை ஐக்கிய தேசியக் கட்சி மேற்கொண்டு வருகின்றது.

அந்த வகையில், பிரதமர் செயலகத்தை செயற்பட விடாமல் முடக்கும் புதிய நகர்வு ஒன்றில் ஐக்கிய தேசியக் கட்சி இறங்கியுள்ளது.

பிரதமர் செயலகத்துக்கான நிதி ஒதுக்கீட்டை இடைநிறுத்தும் பிரேரணை ஒன்றை ஐக்கிய தேசியக் கட்சி இன்று நாடாளுமன்றக் குழு அறையில் சபாநாயகர் கரு ஜயசூரியவின் தலைமையில் நடைபெற்ற கட்சித் தலைவர்களின் கூட்டத்தில் முன்வைத்துள்ளது.

இந்தப் பிரேரணை நாடாளுமன்ற ஒழுங்குப் பத்திரத்தில் சேர்த்துக் கொள்ளப்பட்டு, எதிர்வரும் 29ஆம் திகதி விவாதத்துக்கு எடுத்துக்கொள்ளப்படவுள்ளது. அரச நிதி ஒதுக்கீடுகளை நாடாளுமன்றமே கட்டுப்படுத்துகின்றது.

அந்தவகையில் மகிந்த ராஜபக்சவின் செயலகம் மற்றும் பணியாளர்களுக்கான நிதி ஒதுக்கீடுகளை இடைநிறுத்தும் பிரேரணையை நிறைவேற்றுவதன் மூலம் தமது பெரும்பான்மைப் பலத்தை நிரூபிக்க ஐக்கிய தேசியக் கட்சி திட்டமிட்டுள்ளது.

ஐக்கிய தேசியக் கட்சியின் இந்த நடவடிக்கை மகிந்த ராஜபக்ச தலைமையிலான அரசாங்கத்திற்கு பெரும் நெருக்கடிகளை ஏற்படுத்தும் என அரசியல் அவதானிகள் கூறியுள்ளனர்.

ஐ.தே.கவின் இந்த நடவடிக்கை மஹிந்த அரசுக்குப் புதிய நெருக்கடிகளை ஏற்படுத்தும் என்று எதிர்பார்க்கப்படுகின்றது.

நாடாளுமன்றத்தில் கடந்த வாரத்தில் இடம்பெற்ற தாக்குதல் சம்பவத்தின் போது பொலிஸ் அதிகாரிகளோ அல்லது அரச அதிகாரிகளோ பாதிக்கப்பட்டிருந்தால் அதற்காக வருந்துவதாக ஐக்கிய மக்கள் சுதந்திரக் கூட்டமைப்பின் நாடாளுமன்ற உறுப்பினர் பிரசன்ன ரணவீர தெரிவித்துள்ளார். அறிக்கை ஒன்றின் மூலம் அவர் இன்று இதனை அறிவித்துள்ளார்.

ரணவீர பொலிஸ் அலுவலர் ஒருவரை தாக்குவதும், அவர்கள் மீது மிளகாய்த்தூளை வீசுவதுமான காட்சி தொலைக்காட்சியில் ஒளிப்பரப்பாகியுள்ளது.

இந்த நிலையில் தம்மைப்பொறுத்தவரை பொலிஸாரை போன்று வந்தவர்கள் ஐக்கிய தேசியக் கட்சியின் ஆட்கள் என்று எண்ணத்தோன்றியதாக ரணவீர குறிப்பிட்டுள்ளார்.

எனவே தாம் தாக்கியவர் உண்மையான பொலிஸ்காரராக இருந்தால் அதற்கு மன்னிப்புக்கோருவதாக பிரசன்ன ரணவீர குறிப்பிட்டுள்ளார்.

தம்புள்ளை – இனாமலுவ பிரதேசத்தில் சுற்றிவளைப்பிற்கு சென்ற பொலிஸ் அதிகாரிகள் மீது மிளகாய் தூள் தாக்குதல் மேற்கொள்ளப்பட்டுள்ளது.

இனாமலுவ பிரதேசத்தில் விற்பனை நிலையமொன்றில் நடத்திச் செல்லப்பட்ட போதைப்பொருள் வர்த்தகத்தை நேற்று சுற்றிவளைக்கும் போதே இந்த சம்பவம் இடம்பெற்றுள்ளது.

இதன்போது குறித்த வர்த்தக நிலையத்தில் இருந்த நபர்கள் மிளகாய் தூள் தாக்குதலை மேற்கொண்டு விட்டு தப்பிச் சென்றுள்ளார். இதில் 5 அதிகாரிகளே பாதிக்கப்பட்டுள்ளதாக தெரிவிக்கப்படுகின்றது.

மிளகாய் தூள் தாக்குதலுக்கு உள்ளான குறித்த 5 அதிகாரிகளும் தற்போது தம்புள்ளை வைத்தியசாலையில் அனுமதிக்கப்பட்டுள்ளதாக தெரிவிக்கப்படுகிறது.

இலங்கையில் தற்போது மோசமான ஆயுதங்களில் மிளகாய் தூளும் ஒன்றாக மாறிவிட்டது.

அண்மையில் இடம்பெற்ற நாடாளுமன்ற அமர்வுகளின் போதும், உறுப்பினர்களுக்கு இடையில் மிளகாய் தூள் தாக்குதல் இடம்பெற்றுள்ளதுடன், பாதுகாப்பிற்காக வந்த பொலிஸ் அதிகாரிகள் மீதும் மிளகாய் தூள் தாக்குதல் மேற்கொள்ளப்பட்டு இருந்தது.

இந்த நிலையில் தம்புள்ளையில் மீண்டும் பொலிஸ் அதிகாரிகள் மீது மிளகாய் தூள் தாக்குத் மேற்கொள்ளப்பட சம்பவம் அனைவர் மத்தியிலும் அதிருப்தியை ஏற்படுத்தியுள்ளது.

சமகாலத்தில் ஏற்பட்டுள்ள அரசியல் நெருக்கடிகள் காரணமாக தமிழ் தேசிய கூட்டமைப்பு நம்பிக்கை இழந்துள்ளதாக தகவல்கள் வெளியாகி உள்ளன.

இதன் காரணமாக வெளிநாட்டு ராஜதந்திரிகளை சந்தித்து கலந்துரையாடல் மேற்கொள்ளவுள்ளதாக கட்சியின் உள்ளக தகவல்கள் தெரிவிக்கின்றன.

இலங்கையிலுள்ள வெளிநாட்டு தூதுவர்களை சந்தித்து, இது தொடர்பில் கலந்துரையாடல்களை நடத்த கூட்டமைப்பு தயாராகி வருகிறது.

நாட்டின் தற்போதைய அரசியல் நிலைமை தொடர்பில் தீர்க்கமான முடிவு ஒன்றை பெறும் நோக்கில் இந்த கலந்துரையாடல்கள் இடம்பெறவுள்ளன.

தற்போது நடைமுறையிலுள்ள அரசாங்கத்திற்கு எதிர்ப்பு வெளியிடுவதற்கு தமிழ் தேசிய கூட்டமைப்பு மேற்கொண்ட தீர்மானம் தொடர்பில் தெளிவுபடுத்தப்படவுள்ளன.

பொதுநலவாய நாடுகளின் நாடுகளை பிரதிநிதித்துவப்படுத்தும் அனைத்து இராஜதந்திரகளையும் சந்தித்து கலந்துரையாடல் மேற்கொள்ளவுள்ளதாக தமிழ் தேசிய கூட்டமைப்பு தெரிவித்துள்ளது.

இதேவேளை, தற்போது நாட்டிள் ஏற்பட்டுள்ள அரசியல் ஸ்திரத்தன்மைக்கு மத்தியில் வடக்கு, கிழக்கு தமிழ் மக்களின் பிரச்சினைகளுக்கு தீர்வு ஒன்றை எதிர்பார்ப்பதில் பயனில்லை என தமிழ் தேசிய கூட்டமைப்பின் நாடாளுமன்ற உறுப்பினர் சுமந்திரன் தெரிவித்துள்ளார்.

அரசியலமைப்பு திருத்தம் நோக்கி செல்வதற்கு எந்த விதத்தில் வாய்ப்பு இல்லை என அவர் குறிப்பிட்டுள்ளார்.