வவுனியா கனகராயன்குளம் பகுதியிலிருந்து நேற்று(22.10) இரவு ஆயுதங்கள் சிலவற்றை மீட்டுள்ளதாக கனகராயன்குளம் பொலிசார் தெரிவித்துள்ளனர். இவ்வியடம் குறித்து மேலும் தெரியவருகையில்,

நேற்று இரவு 7 மணியளவில் கனகராயன்குளம், மன்னகுளம் பகுதியில் வீதி ஓரத்தில் கைக்குண்டு, மகசின் அதற்குரிய ரவைகள் 30 என்பன இருப்பதாக பொலிசாருக்கு பொது மக்களினால் தகவல் வழங்கப்பட்டுள்ளது.

சம்பவ இடத்திற்குச் சென்ற பொலிசார் அதனை பார்வையிட்டுள்ளதுடன் எவ்வாறு எங்கிருந்து கொண்டுவரப்பட்டுள்ளது என்பது தொடர்பாக அப்பகுதியில் மேலதிக விசாரணைகளை மேற்கொண்டு வருகின்றதாகத் தெரிவித்துள்ளனர்.

வவுனியா ஆச்சிபுரம் பகுதியில் நேற்று(21.10) இரவு 9 மணியளவில் இளைஞன் ஒருவர் மீது கத்தி குத்து தாக்குதல் இடம்பெற்றுள்ளது. இச்சம்பவத்தில் படுகாயமடைந்த இளைஞன் வைத்தியசாலையில் அனுமதிக்கப்பட்டுள்ளதாக பொலிசார் தெரிவித்துள்ளனர். இச்சம்பவம் குறித்து மேலும் தெரியவருகையில்,

நேற்று இரவு ஆச்சிபுரம் பகுதியில் வசித்து வரும் 28 வயதுடைய இளைஞன் மீது இனந்தெரியாதவர்கள் மேற்கொண்ட கத்தி குத்து தாக்குதலில் காயமடைந்த இளைஞன் வவுனியா பொது வைத்தியசாலையில் அனுமதிக்கப்பட்டுள்ளதாகவும் இது தொடர்பான மேலதிக விசாரணைகளைப் பொலிசார் மேற்கொண்டு வருவதாகவும் தெரிவித்துள்ளனர்.

தாக்குதல் நடாத்தியவர்கள் தப்பிச் சென்றுவிட்ட நிலையில் அவர்களைக் கைது செய்வதற்கான நடவடிக்கையினை பொலிசார் மேற்கொண்டு வருகின்றனர்.

வவுனியா – ஹொரவப்பொத்தானை வீதியில் பயணித்த தனியார் பேருந்து தடம் புரண்டதில் மூவர் படுகாயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளனர்.
இந்த விபத்துச் சம்பவம் நேற்று(22.10) மாலை 4.30 மணியளவில் இடம்பெற்றது.

வவுனியா, ஹொரவப்பொத்தானை வீதி ஊடாக வவுனியா நகர் நோக்கிச் சென்ற தனியார் பேருந்து மடுகந்தப் பகுதியில் பயணித்த போது வேகக் கட்டுப்பட்டை இழந்து தடம் புரண்டது.

இதேவேளை, திருத்த வேலைக்காக மடுக்கந்த பகுதிக்குச் சென்று வந்த பேருந்தே இவ்வாறு விபத்துக்குள்ளானது. மேலும், இதில் பயணித்த மூவரும் படுகாயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளனர். இந்த சம்பவம் தொடர்பான மேலதிக விசாரணைகளை வவுனியா பொலிஸார் மேற்கொண்டு வருகின்றனர்.

வவுனியா ஈச்சங்குளம் பொலிஸ் பிரிவிற்குட்பட்ட பூம்புகார் கிராமத்தை சேர்ந்த சிறுவன் ஒருவன் நீரில் மூழ்கி மரணமான சம்பவம் அக் கிராமத்தையே சோகமயமாக்கியுள்ளது.

வவுனியா பூம்புகார் கண்ணகி வித்தியாலயத்தில் கல்வி பயின்ற தேவகுமார் அனோஜன் என்ற 14 வயது சிறுவன் கடந்த (19.10) மாலை 5 மணியளவில் தனது வீட்டிற்கு அருகில் உள்ள வைரவ மூன்று முறிப்பு குளத்திற்கு சென்ற போது தவறுதலாக நீரில் வீழ்ந்து மூழ்கி மரணமானார்.

குறித்த மாணவனின் இறுதிக்கிரியை இன்று காலை மாணவனின் இல்லத்தில் நடைபெற்று பாடசாலை மாணவர்களின் பாண்ட் அணிவகுப்புடன் பூம்புகார் கண்ணகி வித்தியாலயத்திற்கு அழைத்து சென்று அஞ்சலிக்காக வைக்கப்பட்டு அஞ்சலி நிகழ்வுகள் நடைபெற்ற பின்னர் பூம்புகார் இந்து மயானத்தில் பூதவுடல் நல்லடக்கம் செய்யப்பட்டது.

இச்சம்பவமானது அப்பாடசாலை சமூகத்தை மட்டுமல்லாது கிராமத்தையே சோகத்தில் ஆழ்த்தியுள்ளது.

வவுனியா, ஓமந்தை பொலிசாரின் விசேட நடவடிக்கையின் காரணமாக போதை மாத்திரை பிரதான விநியோகஸ்தர் உள்ளிட்ட இரு இளைஞர்களை ஓமந்தைப் பொலிசார் கைது செய்துள்ளனர். அவர்களிடம் இருந்து இரண்டாயிரத்து 600 போதை மாத்திரைகளும் மீட்கப்பட்டுள்ளது.

நேற்று மாலை குறித்த இருவரும் ஓமந்தைப் பொலிசாரால் ஏ9 வீதியில் வைத்து கைது செய்யப்பட்டுள்ளனர். இது குறித்து மேலும் தெரிவிக்கையில்,

கடந்த வெள்ளிக்கிழமை ஆயிரத்து 670 போதை மாத்திரைகளுடன் யாழில் இருந்து திருகோணமலை சென்ற இரு இளைஞர்களை ஓமந்தைப் பொலிசார் கைது செய்திருந்தனர். அவர்களை நீதிமன்றில் முற்படுத்தி, மேலதிக விசாரணைக்காக அவர்களை ஓமந்தைப் பொலிசார் தமது கட்டுப்பாட்டில் எடுத்து விசாரணைகளை முன்னெடுத்திருந்தனர்.

அவர்கள் மூலம் மேற்கொள்ளப்பட்ட விசேட நடவடிக்கை காரணமாக சொகுசு கார் ஒன்றில் யாழில் இருந்து இரண்டாயிரத்து 600 போதை மாத்திரைகளுடன் ஏ9 வீதியில் பயணித்த பிரதான விநியோகஸ்தர் உள்ளிட்ட இருவரை ஓமந்தைப் பகுதியில் வைத்து பொலிசார் மடக்கிப் பிடித்தனர்.

வவுனியா மாவட்ட பிரதி பொலிஸ் மா அதிபர் அபய விக்கிரம வழிகாட்டலில் சிரேஸ்ட பொலிஸ் அத்தியட்சகர் ஐ.எம்.எஸ.எம.தென்னக்கோன் நெறிப்படுத்தலில் ஒமந்தை பொலிசிஸ் நிலைய பொறுப்பதிகாரி சுரேஸ் த சில்வா தலைமையிலான பொலிசாரே இவ் விசேட நடவடிக்கையை மேற்கொண்டனர்.

குறித்த இரு இளைஞர்களிடம் இருந்து போதை மாத்திரைகள் மீட்கப்பட்டுள்ளதுடன், சொகுசு காரும் கைப்பற்றப்பட்டுள்ளதுடன், இருவரையும் நீதிமன்றில் முற்படுத்த ஓமந்தை பொலிசார் நடவடிக்கைகளை முன்னெடுத்துள்ளனர். கைது செய்யப்பட்ட இருவரும் 34 மற்றும் 23 வயதுடைய யாழ்ப்பாணம், சுன்னாகத்தைச் சேர்ந்தவர்களாவர்.