இந்தியாவின் கேரள மாநிலத்தில் நிலச்சரிவில் சிக்கவிருந்த குடும்பத்தை நாய் ஒன்று காப்பாற்றியுள்ளது நெகிழ்ச்சியை ஏற்படுத்தி உள்ளது.

கேரளாவில் வரலாறு காணாத அளவுக்கு மழை பெய்து வருகிறது. பேய் மழைக்கு இதுவரை 37 பேர் மரணமடைந்துள்ளனர். குடியிருப்புகளை இழந்த 35,000 க்கும் மேற்பட்டோர் முகாம்களில் தங்க வைக்கப்பட்டுள்ளனர். மட்டுமின்றி மாநிலத்தில் உள்ள 24 அணைகள் நிரம்பி முழு கொள்ளளவை எட்டியுள்ளன.

இடுக்கி அணையில் நீர்மட்டம் உயர்ந்து கொண்டே வருவதால் அதன் துணை அணையான செருதோணி அணையில் உள்ள 5 மதகுகளில் 3வது மதகில் மட்டும் நேற்று முன்தினம் தண்ணீர் திறக்கப்பட்டது.

அணையில் கூடுதல் தண்ணீர் திறக்கப்பட்டதால் செருதோணி ஆற்றில் வெள்ளப்பெருக்கு ஏற்பட்டு இருக்கிறது. இதனால் கரையோரத்தில் வசிப்பவர்களை பாதுகாப்பான பகுதிகளுக்கு சென்று தங்கும்படி அதிகாரிகள் அறிவுறுத்தி வருகிறார்கள்.

இந்நிலையில் மோகனன் என்பவர் இடுக்கி மாவட்டத்தின் கஞ்சிகுழி என்ற பகுதியில் தனது குடும்பத்தாருடன் வீட்டில் தூங்கிக் கொண்டிருந்தார்.

அதிகாலை 3 மணி அளவில் அவர் வீட்டின் நாய் குரைத்துள்ளது. ஆனால் அது வழக்கமான ஒன்று தான் என்று எண்ணி அவர் தூங்க சென்றுவிட்டார்.

சிறிது நேரத்திற்கு பின் வழக்கத்திற்கு மாறாக அந்த நாய் ஊளையிட்டுள்ளது. இதையடுத்து வெளியே வந்து பார்த்த மோகனன், வீட்டின் அருகே நிலச்சரிவு ஏற்படுவதை கண்டு அதிர்ச்சி அடைந்தார்.

உடனே தன் மனைவி மற்றும் ஒரு வயது குழந்தையுடன் வீட்டை விட்டு வெளியேறினார். மாடியில் இருந்த அவரது தாத்தா, பாட்டியை காப்பாற்ற முடியாமல் போனது.

இது பற்றி அவர் கூறுகையில் “என் வீடு பெரியார் அணையை ஒட்டி உள்ள இடத்தில் இருந்ததால் எங்களை அதிகாரிகள் வெளியேற கூறினார்கள்.

இதை அடுத்து ஒரு கிலோமீற்றர் தொலைவில் உள்ள இந்த வீட்டிற்கு வாடகைக்கு வந்தேன். அப்படி இருந்தும் இங்கேயும் நிலச்சரிவு ஏற்பட்டு என் தாத்தா, பாட்டியை இழந்துவிட்டேன் என கண்ணீர் மல்க கூறியுள்ளார்.

இந்தியாவில் சாலையில் சென்று கொண்டிருந்த பெண்ணை, இளைஞர் கத்தியால் குத்தி கொலை செய்த வழக்கில் இளைஞரை நீதிமன்ற காவலில் வைக்க உத்தரவிடப்பட்டுள்ளது.

மகாராஷ்டிர மாநிலத்தின் தானேவை சேர்ந்தவர் பிரச்சி (20). கல்லூரி மாணவியான இவர் ஆகாஷ் பவர் (23) என்ற இளைஞரை மூன்றாண்டுகளாக காதலித்து வந்த நிலையில் சமீபத்தில் பிரிந்தார்.

ஆனால் பிரச்சியை விடாமல் துரத்திய ஆகாஷ் தன்னை காதலிக்கும்படி வலியுறுத்தி வந்தார். ஆனால் இதற்கு பிரச்சி ஒத்து கொள்ளாததால் அவர் மீது ஆத்திரத்தில் இருந்துவந்தார் ஆகாஷ்.

இந்நிலையில் சில தினங்களுக்கு முன்னர் சாலையில் ஸ்கூட்டரில் பிரச்சி சென்று கொண்டிருந்த போது அவரை வழிமறித்த ஆகாஷ் தான் மறைத்து வைத்திருந்த கத்தியால் குத்தி பிரச்சியை கொலை செய்துள்ளார். பின்னர் தப்பியோடிய ஆகாஷை பொலிசார் கைது செய்தனர்.

நேற்று ஆகாஷ் நீதிமன்றத்தில் ஆஜர்படுத்தப்பட்ட நிலையில் அவரை வரும் 22ம் திகதி வரை நீதிமன்ற காவலில் வைக்க நீதிபதி உத்தரவிட்டுள்ளார்.

பெல்ஜியமிலிருந்து மனைவியை பார்க்க இந்தியாவுக்கு வந்த கணவன் மனைவியை பார்க்கும் முன்னரே உயிரிழந்துள்ளது சோகத்தை ஏற்படுத்தியுள்ளது.

ஜார்க்கண்ட் மாநிலத்தை பூர்வீகமாக கொண்டவர் தேஜஸ் துபே (32). இவர் பெல்ஜியமில் வேலை செய்து வந்தார். இவரின் மனைவி புனேவில் தங்கி பணிபுரிந்து வந்தார்.

இந்நிலையில் தேஜஸின் மனைவிக்கு கடந்த வெள்ளிக்கிழமை அன்று பிறந்தநாள் ஆகும். அவருக்கு இன்ப அதிர்ச்சி கொடுக்க நினைத்த தேஜஸ் இந்தியா வந்த நிலையில் வியாழன் அன்று தனது இரண்டு நண்பர்களுடன் மும்பையில் உள்ள அடுக்குமாடி வீட்டில் தங்கியிருந்தார்.

வெள்ளிக்கிழமை மனைவியை காண புனே செல்லலாம் என நினைத்திருந்தார் தேஜஸ். இந்நிலையில் நண்பர்களுடன் தங்கிய அறையின் ஜன்னலில் கம்பிகள் இல்லை. இதை கவனிக்காத தேஜஸ் தூக்க கலக்கத்தில் இரண்டாவது மாடியிலிருந்து ஜன்னல் வழியாக கீழே விழுந்துள்ளார்.

தேஜஸின் அலறல் சத்தம் கேட்ட அக்கம்பக்கத்தினர் அவரை மருத்துவமனைக்கு கொண்டு சென்ற நிலையில் அவர் ஏற்கனவே உயிரிழந்துவிட்டதை மருத்துவர்கள் உறுதி செய்தனர்.

இதனிடையில் பொலிசாரின் முதற்கட்ட விசாரணையில், தேஜஸின் மரணத்தில் எந்தவொரு சந்தேகப்படும்படியான விடயங்கள் இல்லை என தெரியவந்துள்ளது.

இந்தியாவின் ராஜஸ்தானில் இளம் மனைவி தற்கொலை செய்து கொண்ட நிலையில் அவரின் கணவர் மற்றும் மாமியார் மீது வழக்குப்பதிவு செய்யப்பட்டுள்ளது.

பின்னி ஷர்மா என்ற பெண் இரு தினங்களுக்கு முன்னர் தனது வீட்டில் தூக்கிட்டு தற்கொலை செய்து கொண்டார்.

சம்பவம் குறித்து தகவலறிந்த பொலிசார் பின்னியின் சடலத்தை கைப்பற்றியதோடு அவர் எழுதி வைத்திருந்த கடிதத்தையும் கைப்பற்றினார்கள்.

அதில், தனது கணவர் குர்பிரித் மற்றும் மாமியார் வாலியா தன்னை எவ்வாறு துன்புறுத்தினார்கள் என எழுதியுள்ளார். மேலும், தன் உறவுகள் எல்லாரும் போலியாக இருந்து ஏமாற்றினார்கள் என குறிப்பிட்டுள்ளார்.

பின்னியின் பெற்றோர் தனது மகளை அவரின் குடும்பத்தார் அதிகளவு கொடுமைப்படுத்தியதாக பொலிசில் புகார் அளித்தார். இதையெல்லாம் வைத்து பொலிசார் குர்பிரித் மற்றும் வாலியா மீது வழக்குப்பதிவு செய்துள்ளனர்.

இருவரும் தலைமறைவாக உள்ளதால் அவர்களை தேடும் பணி நடைபெற்று வருகிறது.

இந்தியாவில் வேறு சாதி இளைஞரை மகள் திருமணம் செய்ததால் அவரை ஆட்களை வைத்து சுட்டு கொலை செய்த தந்தையின் செயல் அதிர்ச்சியை ஏற்படுத்தியுள்ளது.

பஞ்சாப் மாநிலத்தை சேர்ந்தவர் ரமேஷ். இவரின் மகள் மம்தா (18). மம்தா ரமேஷின் சொந்த மகள் கிடையாது. அவருக்கு இரண்டு வயதாக இருக்கும் போது ரமேஷ் தத்தெடுத்து வளர்த்து வந்தார்.

இந்நிலையில் மம்தா இளைஞர் ஒருவரை காதலித்து வந்த நிலையில் கடந்தாண்டு அவரை திருமணம் செய்தார்.

இளைஞர் வேறு சாதியை சேர்ந்தவர் என்பதால் திருமணத்துக்கு எதிர்ப்பு தெரிவித்த ரமேஷ் இது குறித்து பொலிசில் புகார் அளித்த நிலையில் பொலிசார் மம்தாவின் கணவரை கைது செய்தனர்.

அதன் பின்னரும் அப்பாவுடன் மம்தா வரவில்லை. இது தொடர்பான வழக்கு நீதிமன்றத்தில் நடந்து வந்தது. சில தினங்களுக்கு முன்னர் வழக்கு தொடர்பாக மம்தா நீதிமன்றத்துக்கு வந்தார்.

அப்போது அங்கு வந்த ரமேஷ், மகளை தன்னுடன் வந்துவிடும்படி கூறினார், ஆனால் இதற்கு மம்தா மறுத்துவிட்டார். இதையடுத்து ஆத்திரமடைந்த ரமேஷ் சில ஆட்களை வைத்து மம்தாவை கொல்ல முடிவெடுத்தார்.

பின்னர் இரண்டு பேர் நீதிமன்ற வளாகத்துக்கு வந்த நிலையில் மம்தாவை சுட்டு கொன்றனர், இதோடு அங்கிருந்த நரேந்தரகுமார் என்ற காவலரும் கொல்லப்பட்டார்.

இதையடுத்து ரமேஷ் கைது செய்யப்பட்டுள்ளதாக தகவல்கள் தெரிவிக்கின்றன. ஆனால் அவர் கைது குறித்து அதிகாரபூர்வ அறிவிப்பு வெளியாகவில்லை.

இந்திய மாநிலம் ராஜஸ்தானில் உள்ள ஒரு கிராமத்தில் 10 ஆண்டுகளுக்கும் மேலாக திருமணம் நடைபெறாததை கண்டு, அந்த கிராமத்தின் பெயரை அங்குள்ள மக்கள் மாற்றியுள்ள சம்பவம் விவாதத்தை ஏற்படுத்தியுள்ளது.

ராஜஸ்தான் மாநிலத்தில் உள்ள பார்மெர் மாவட்டத்தின் மியான் கா பாரா கிராமத்தின் பெயர், மகேஷ் நகர் என மாற்றப்பட்டுள்ளது.

இஸ்லாமியர்களின் வீடு எனப் பொருள்படும் மியான் கா பாரா கிராமத்தில் உள்ள 2000 குடும்பத்தில், வெகு சிலரே இஸ்லாமியர்கள்.

ஆனால், இந்தப் பெயரைப் பார்த்ததுமே இங்குள்ளவர்களைத் திருமணம் செய்ய யாருமே முன்வருவதில்லை.

இதனால் கடும் அதிருப்தியடைந்த இப்பகுதி மக்கள் அரசாங்கத்திற்கு கோரிக்கை முன்வைத்தனர். இதனையடுத்து தற்போது இந்த கிராமத்திற்கு மகேஷ் நகர் என பெயர் மாற்றப்பட்டுள்ளது.

ஆனால், ராஜஸ்தானில் சட்டசபை தேர்தல் வரவிருப்பதால் மக்களை பிளவுப்படுத்தும் நோக்கில் அங்கு ஆட்சியில் இருக்கும் பாரதிய ஜனதா கட்சி செயல்படுகிறது என குற்றச்சாட்டு எழுந்துள்ளது.

அந்த மாநிலத்தில் இஸ்லாமியப் பெயர்களைப்போல உள்ள கிராமங்களின் பெயர்கள் மாற்றம் செய்யப்பட்டுவருகின்றன. அந்த வகையில், ஜூஞ்ஹூனா மாவட்டத்தின் இஸ்மாயில்பூர் கிராமம் தற்போது, பிச்சான்வா குர்த் என மாற்றப்பட்டது.

அத்துடன், ஜலோர் மாவட்டத்தின் நார்பாரா என்ற கிராமத்தின் பெயர், நார்புரா என மாற்றம் செய்யப்பட்டுள்ளது.

கடந்த ஓராண்டில் மட்டும் நாடு முழுவதும் உள்ள 27 கிராமங்களின் பெயர்களை மாற்ற மத்திய உள்விவகார அமைச்சகம் பரிசீலித்துவருவதாகவும் குற்றச்சாட்டு எழுந்துள்ளது.