தெலங்கானா மாநிலம் வாரங்கல்லில், கணவர் போன் அழைப்பை ஏற்காததால் ஏற்பட்ட மன உளைச்சலில் திருமணமான 20 வயது இளம்பெண் எலி விஷம் குடித்து தற்கொலை செய்துகொண்ட சம்பவம் பெரும் சோகத்தை ஏற்படுத்தியுள்ளது.

தெலுங்கானா மாநிலம் வாரங்கல் மாவட்டம் நெக்கொண்டா மண்டலத்திலுள்ள பொல்லிகொண்டா கிராமத்தைச் சேர்ந்தவர் அகிலா (20). இவருக்கு இரண்டு ஆண்டுகளுக்கு முன்பு மஹபூபாபாத்தைச் சேர்ந்த வீட்டுவசதி நிதி மேலாளரான பனோத் ஹுசைன் என்பவருடன் பெற்றோரின் விருப்பப்படி திருமணம் நடைபெற்றது. இவர்களுக்கு ஒரு பெண் குழந்தை உள்ளது.

அகிலா தனது பெற்றோர் வீட்டிற்குச் சென்றிருந்த நிலையில், கடந்த செப்டம்பர் 2ம் தேதி குழந்தை அழுது கொண்டிருந்த போது அவனுடன் பேசுவதற்காகக் கணவர் ஹுசைனுக்கு வீடியோ கால் செய்துள்ளார்.

கணவர் ஹுசைன் அந்த அழைப்பை ஏற்கவில்லை. இதனால் கடும் மன உளைச்சலுக்கு ஆளான அகிலா, மஹபூபாபாத்தில் உள்ள தனது மாமியார் வீட்டிற்குத் திரும்பிச் சென்று எலியைக் கொல்வதற்காகப் பயன்படுத்தப்படும் பசையை சாப்பிட்டுள்ளார்.

இதனைக் கவனித்த குடும்பத்தினர் அவரை உடனடியாக மீட்டு மருத்துவமனைக்குக் கொண்டு சென்றனர். அங்குத் தீவிர சிகிச்சை அளிக்கப்பட்ட போதிலும், உடல்நிலை மோசம் அடைந்த நிலையில் அவர் பரிதாபமாக உயிரிழந்தார். இந்தச் சம்பவம் குறித்துத் தகவல் அறிந்த காவல்துறையினர் வழக்குப் பதிவு செய்து தீவிர விசாரணை நடத்தி வருகின்றனர்.

அகமதாபாத்தில் சொந்த மகளையே அவரது தந்தை மற்றும் சகோதரர் கொடூரமாக தாக்கி கொன்ற சம்பவம் அதிர்ச்சியை ஏற்படுத்தியுள்ளது. அகமதாபாத்தில் சோபியா என்ற 22 வயது பெண் மருத்துவமனையில் வரவேற்பாளராக பணியாற்றி வந்த நிலையில், மூன்று மாதங்களுக்கு முன்பு ஆண் ஒருவருடன் சோபியா இருக்கும் வீடியோ ஒன்று இணையத்தில் பரவியுள்ளது.

இதனால் கடும் கோபமடைந்த சோபியாவின் குடும்பத்தினர், சமூக அவமானத்துக்கு பயந்து அவரை கொலை செய்ய திட்டமிட்டுள்ளனர்.

இதையடுத்து ஆகஸ்ட் 12ம் திகதி இரவு சோபியாவை மோட்டார் சைக்கிள் சவாரிக்கு செல்வோம் என்று அவரது தந்தை மொஹமந்த் ஃபரூக் மற்றும் அவரது 38 வயது சகோதரர் மொஹமந்த் ஹபில் ஆகிய இருவரும் வெளியே அழைத்து சென்றுள்ளனர்.

கெல்ஜிபுரா கிராமத்திற்கு அருகில் உள்ள தனிமைப்படுத்தப்பட்ட மண் பாதையில் பைக்கை நிறுத்திய சகோதரர் ஹபில், சோபியாவின் தலையில் இரும்பு சுத்தியால் மூன்று முறை தாக்கியுள்ளார்.

பின்னர் கொலையை மறைப்பதற்காக மீண்டும் சோபியாவின் உடலை சாலைக்கு கொண்டு வந்து, வாகன விபத்து போல் சித்தரிப்பதற்காக அவர்கள் வந்த மோட்டார் சைக்கிளையும், அவர்களையும் சேதப்படுத்தி கொண்டனர்.

பின்னர் பொலிஸார் தகவல் கொடுத்த அவர்கள், கெல்ஜிபுரா சந்திப்பு அருகில் வேகமாக வந்த கார் ஒன்று தங்களை மோதிவிட்டு நிற்காமல் சென்றதாகவும், இதில் தன்னுடைய சகோதரிக்கு தலையில் பலத்த காயம் ஏற்பட்டு இருப்பதாகவும் தெரிவித்துள்ளனர்.

இதையடுத்து மருத்துவமனையில் அனுமதிக்கப்பட்ட சோபியா அடுத்த நாள் சிகிச்சை பலனின்றி உயிரிழந்ததாக அறிவிக்கப்பட்டார். சோபியாவின் தந்தை மற்றும் சகோதரர் அளித்த விவரங்கள் முன்னுக்கு பின் முரணாக இருந்த காரணத்தினால் விசாரணையை தீவிரப்படுத்தியுள்ளனர்.

அப்போது மூன்று மாதங்களுக்கு முன்பு இணையத்தில் வெளியான வீடியோ குறித்தும், சோபியா மீது குடும்பத்தினர் கொண்டிருந்த கோபம் குறித்தும் பொலிஸார் கண்டுபிடித்தனர்.

மேலும் சோபியாவை அடித்து கொன்றுவிட்டு விபத்து போல் காட்சிப்படுத்தியதையும் பொலிஸார் விசாரணையில் உறுதிப்படுத்தினர்.

இந்நிலையில் சோபியாவின் தந்தை மொஹமந்த் ஃபரூக் மற்றும் சகோதரர் மொஹமந்த் ஹபில் இருவரும் கைது செய்யப்பட்டு கொலை குற்றச்சாட்டை எதிர்கொண்டுள்ளனர்.

இந்தியா அசாம் மாநிலம் கவுகாத்தியில் 25 வயதான இளம் பெண் கொடூரமாக கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. கொலை செய்ததைவிட, கொலைக்கு பிறகு நடந்த பயங்கரம்தான், அதற்கு மேல் பீதியை ஏற்படுத்தியுள்ளது.

சம்பவம் தொடர்பில் இந்திய ஊடகங்க்கள் குறிப்பிட்டுள்ளதாவது, கடந்த ஆண்டு செப்டம்பர் மாதம் ரியாவும் ராமானுஜ் கோஸ்வாமியும் காதலித்து திருமணம் செய்துகொண்ட நிலையில், பின்னர் இருவருக்கும் அடிக்கடி கருத்து வேறுபாடுகள் ஏற்பட்டதாக போலீஸ் விசாரணையில் தெரிவிக்கப்பட்டுள்ளது.

கடந்த செப்டம்பர் 3-ம் தேதி இருவருக்கும் ஏற்பட்ட தகராறு விபரீதமாகி, ராமானுஜ் தனது மனைவியை கொலை செய்ததாக போலீசார் தெரிவிக்கின்றனர். சம்பவத்துக்குப் பிறகு வீட்டை பூட்டிவிட்டு அவர் தப்பிச் சென்றதாகவும், அக்கம் பக்கத்தினர் அளித்த தகவலின் பேரில் போலீசார் வீட்டை சோதனை செய்தபோது கொலை சம்பவம் வெளிச்சத்துக்கு வந்ததாகவும் கூறப்படுகிறது.

விசாரணையில், ரியாவின் உடல் வீட்டில் கண்டெடுக்கப்பட்டதுடன், அவரது தலையும் வீட்டில் இருந்த ஃபிரிட்ஜில் கண்டெடுக்கப்பட்டதாக போலீசார் தெரிவித்துள்ளனர். கொலைக்கு பயன்படுத்தப்பட்டதாக சந்தேகிக்கப்படும் ஆயுதமும் கைப்பற்றப்பட்டுள்ளது. இந்த வழக்கில் ராமானுஜ் பின்னர் போலீஸ் நிலையத்தில் சரணடைந்தார்.

போலீசாரிடம் அவர் அளித்ததாக வாக்குமூலத்தில், தனது மனைவிக்கு வேறு ஒருவருடன் தொடர்பு இருந்ததாக சந்தேகித்ததால்தான் இருவருக்கும் அடிக்கடி பிரச்சனை ஏற்பட்டதாக தெரிவித்துள்ளார்.

அதுமட்டுமல்லாது , தனது மனைவியுடன் தொடர்பு வைத்திருந்ததாக அவர் சந்தேகிக்கும் அந்த நபரையும் கொலை செய்வேன் என்று ராமானுஜ் கூறியதாகவும் தெரிவிக்கப்பட்டுள்ளமை பொலிஸாருக்கே அதிர்ச்சியை ஏற்படுத்தியுள்ள நிலையில் மேலதிக விசாரணைகள் இடம்பெற்று வருகின்றது.

பீகார் மாநிலம் ரோஹ்தாஸ் மாவட்டம் கூச்செஸ் வட்டாரத்திற்குட்பட்ட பகீரத் கிராமத்தில் கிருஷ்ணர் வேடமணிந்து விளையாடிக் கொண்டிருந்த 5 வயது சிறுவன் ஆர்யன், தான் கழுத்தில் அணிந்திருந்த முத்து மாலையின் மணியைப் பற்களால் கடித்து இழுத்தபோது மாலை அடியோடு அறுந்துள்ளது.

அதன் ஒரு மணி எதிர்பாராத விதமாக அவனது தொண்டைக்குள் சிக்கி மூச்சுத் திணறல் ஏற்பட்ட இக்கட்டான கட்டத்தில் சிறுவன் ஆர்யன் மயங்கி விழுந்துள்ளான். பதறிப்போன பெற்றோர் அவனை அருகில் உள்ள மருத்துவமனைக்குக் கொண்டு சென்றபோதிலும், சிறுவனைப் பரிசோதித்த மருத்துவர்கள் அவன் ஏற்கனவே உயிரிழந்துவிட்டதாகத் தெரிவித்துள்ளனர்.

ஆசையாகக் கொண்டாடிய கிருஷ்ண ஜெயந்தி பண்டிகை கண் இமைக்கும் நேரத்தில் ஒரு வீட்டின் துக்க நாளாக மாறிய இந்தத் துயரச் சம்பவம் ஒட்டுமொத்தப் பகுதியையும் உரைய வைத்துள்ளது.

எதிர்காலக் கனவுகளுடன் இருந்த ஒரு பிஞ்சு உயிர் இப்படிப் பறிபோயுள்ள நிலையில், பெற்றோர்கள் தங்களது குழந்தைகளுக்குச் சிறிய முத்து மாலைகளையோ அல்லது வாயில் வைக்கக்கூடிய சிறிய அளவிலான பொருட்களையோ எக்காரணம் கொண்டும் அணிவிக்கக் கூடாது என்ற விழிப்புணர்வு எழுந்துள்ளது.

குழந்தைகளின் பாதுகாப்பில் பெற்றோர்கள் எவ்வளவு உஷாராக இருக்க வேண்டும் என்ற விவாதத்தையும் இச்சம்பவம் ஏற்படுத்தியுள்ளது. சிறுவயது குழந்தைகளை இதுபோன்ற விழாக்களுக்காக அலங்கரிக்கும் போது பெற்றோர்கள் கூடுதல் கவனத்துடன் இருக்க வேண்டும் என்று சமூக ஆர்வலர்கள் கோரிக்கை விடுத்துள்ளனர்.

எளிய பொருட்களினால் குழந்தைகளுக்கு ஏற்படக்கூடிய ஆபத்துகள் குறித்து விழிப்புணர்வு ஏற்படுத்துவது அவசியமானது என்றும் வலியுறுத்தப்பட்டு வருகிறது.

அசாம் மாநிலம் குவஹாத்தியில் மனைவியை அடித்துக் கொன்று உடலைத் துண்டு துண்டாகக் வெட்டி ஃபிரிட்ஜுக்குள் பதுக்கி வைத்த கொடூரச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

குவஹாத்தியின் பசிஸ்தாபூர் பகுதியில் உள்ள ஒரு அடுக்குமாடி குடியிருப்பில் வசித்து வந்தவர் ராமானுஜன். இவருக்கு கடந்த ஆறு மாதங்களுக்கு முன்பு நூன்மதியைச் சேர்ந்த ரியா (25) என்பவருடன் திருமணம் நடந்துள்ளது. ரியா ஃபேன்சி பஜாரின் ஏசி மார்க்கெட் பகுதியில் உள்ள ஆடை அலங்காரக் கடையில் பணிபுரிந்து வந்துள்ளார். பெற்றோர் இல்லாத இவருக்கு ஒரே ஒரு சகோதரர் மட்டுமே உள்ளார்.

இந்நிலையில் கடந்த வாரம் திங்கட்கிழமையன்று இரவு 8 மணியளவில் ரியாவுக்கும் ராமானுஜனுக்கும் இடையே கடுமையான வாக்குவாதம் ஏற்பட்டுள்ளது. அப்போது ஆத்திரமடைந்த ராமானுஜன் தனது மனைவியைக் கொலை செய்துள்ளார்.

வீட்டிலிருந்து துர்நாற்றம் வருவதாகக் காவல்துறையினருக்கு அக்கம்பக்கத்தினர் தகவல் தெரிவித்துள்ளனர். அதன்பேரில் நிகழ்விடத்திற்கு வந்த காவல்துறையினர், வீட்டின் பூட்டை உடைத்து உள்ளே சென்று சோதனையிட்டனர். அப்போது ரியாவின் தலை மற்றும் விரல்கள் துண்டிக்கப்பட்டு, கருப்பு பாலித்தீன் பையில் வைக்கப்பட்டு பிரிட்ஜில் மறைத்து வைக்கப்பட்டுள்ளது கண்டுபிடிக்கப்பட்டது.

துண்டு துண்டாக மீட்கப்பட்ட உடல் பிரேத பரிசோதனைக்காக குவஹாட்டி மருத்துவக் கல்லூரி மற்றும் மருத்துவமனைக்கு அனுப்பி வைக்கப்பட்டது. இதற்கிடையே, தனது மனைவியைக் கொன்றதாகக் கூறி கணவர் ராமானுஜன் காவல்துறையிடம் நேரில் சரணடைந்து குற்றத்தை ஒப்புக் கொண்டுள்ளார். குற்றத்திற்குப் பயன்படுத்தப்பட்டதாகச் சந்தேகிக்கப்படும் ஆயுதமும் காவற்துறையினரால் கைப்பற்றப்பட்டுள்ளது.

பெண்ணின் வயிற்றில் இருந்து 14 பேனாக்கள், 5 மரக் கரண்டிகள் இருந்த சம்பவம் பெரும் அதிர்ச்சியை ஏற்படுத்தியுள்ளது. இந்தியாவின் ஆந்திரப் பிரதேசத்தில் இடம்பெற்ற இச்சம்பவம் குறித்து இந்திய ஊடகங்க்கள் குறிப்பிட்டுள்ளதாவது,

ஆந்திரா , பல்நாடு மாவட்டம், நரசராவ்பேட்டை மண்டலத்திற்கு உட்பட்ட பெட்லூரிவாரிபாலெம் கிராமத்தைச் சேர்ந்த 33 வயது பெண் ஒருவர், கடந்த சில நாட்களாகக் கடுமையான நெஞ்சு மற்றும் வயிற்று வலியால் அவதிப்பட்டு வந்தார்.

வலியின் தாக்கம் அதிகரித்ததையடுத்து, அவரது குடும்பத்தினர் அவரை நரசராவ்பேட்டையில் உள்ள மாதாஸ்ரீ என்ற தனியார் வைத்தியசாலையில் சிகிச்சைக்காகச் சேர்த்தனர். வைத்தியசாலையில் அனுமதிக்கப்பட்ட பெண்ணுக்குக் முதல்கட்டப் பரிசோதனைகள் மற்றும் வயிற்றுப்பகுதி ஸ்கேனிங் செய்யப்பட்டது.

ஸ்கேன் அறிக்கையைப் பார்த்த வைத்தியர்கள் அதிர்ச்சியில் உறைந்தனர். அப்பெண்ணின் வயிற்றுக்குள் ஏராளமான அநாவசியப் பொருட்கள் உள்கொள்ளப்பட்டுச் சிக்கியிருப்பது தெரியவந்தது. வைத்தியர் பி.ராமசந்திர ரெட்டி தலைமையிலான நிபுணர் குழுவினர், பெண்ணுக்கு உடனடியாக ‘லாப்ரோஸ்கோபி’ எனும் நுண் துளை அறுவை சிகிச்சையைத் தொடங்கினர்.

வயிற்றுப் பகுதியில் சிறிய துளையிட்டு மேற்கொள்ளப்பட்ட இந்த அறுவை சிகிச்சையின் மூலம், பெண்ணின் வயிற்றிலிருந்து மொத்தம் 14 பேனாக்கள், 5 மரக் கரண்டிகள் மற்றும் 1 மெழுகுவர்த்தி ஆகிய 20 பொருட்கள் பத்திரமாக வெளியே எடுக்கப்பட்டன.

வெளியே எடுக்கப்பட்ட பேனாக்களில் ஒன்றின் மூடி கழன்ற நிலையில் இருந்தது. அந்தப் பேனாவின் கூர்மையான பகுதி பெண்ணின் வயிற்றின் உட்புறச் சுவரில் குத்தியதால் தான் அவருக்குத் தாங்க முடியாத அளவு கடுமையான வலியும் அசௌகரியமும் ஏற்பட்டுள்ளது என்று வைத்தியர்கள் தெரிவித்தனர்.

தற்போது அப்பெண் நலமாக இயல்பு நிலைக்குத் திரும்பி வருகிறார். அப்பெண் இவ்வளவு பொருட்களை எவ்வாறு விழுங்கினார் என்பது குறித்து ஆராய்ந்தபோது, அவர் கடந்த 10 ஆண்டுகளாகப் மனநலப் பாதிப்பினால் சிகிச்சையில் இருந்து வந்தது தெரியவந்தது.

மேலும், இரண்டு மாதங்களுக்கு முன்பாகவே அவரது கணவர் அவரை விவாகரத்து செய்துள்ளார். உணவு அல்லாத பிற தேவையற்ற பொருட்களை உண்ணும் ‘பைகா சின்ட்ரோம்’ அல்லது தீவிர மன அழுத்தப் பாதிப்பே பெண்ணின் இந்தச் செயலுக்குக் காரணமாக இருக்கலாம் என வைத்தியர்கள் கணித்துள்ளனர்.