சமையல் எரிவாயுவின் விலையை அதிகரிப்பதற்கு சமையல் எரிவாயு நிறுவனங்கள் அரசாங்கத்திடம் வேண்டுகோள் விடுத்துள்ளதாக தெரிவிக்கப்படுகின்றது.

கடந்த வாரம் கூடிய வாழ்க்கைச் செலவுக் குழுக் கூட்டத்திலும் இது தொடர்பில் கலந்துரையாடப்பட்டதாகவும் தெரிவிக்கப்படுகின்றது.

கடந்த மாதம் 29 ஆம் திகதி சமையல் எரிவாயுவின் விலை குறைவடைந்தது. இருப்பினும், உலக சந்தையிலுள்ள விலை மட்டத்தை நோக்கும் போது சமையல் எரிவாயுவின் விலை அதிகரிக்கப்பட வேண்டும் எனவும் அந்நிறுவனங்கள் சுட்டிக்காட்டியுள்ளன.

இருப்பினும், இது தொடர்பில் நுகர்வோர் அதிகார சபையினர் குறிப்பிடுகையில்,

வாயளவில் விலை அதிகரிப்பு தொடர்பில் கருத்துக்கள் தெரிவிக்கப்பட்டுள்ள போதிலும், எழுத்து மூலமான கோரிக்கைகள் எதுவும் இதுவரையில் எந்தவொரு நிறுவனத்தினாலும் முன்வைக்கப்படவில்லையென குறிப்பிட்டுள்ளது.

எழுத்து மூலம் வேண்டுகோள் விடுக்கப்படும் சந்தர்ப்பத்திலேயே இது தொடர்பில் கருத்தில் கொள்ளப்படும் எனவும் நுகர்வோர் அதிகார சபை மேலும் கூறியுள்ளது.

போதைப்பொருள் வர்த்கத்தில் ஈடுபட்டுள்ளவர்களிற்கு மரணதண்டனையை நிறைவேற்றும் முடிவு முன்னரே எடுத்திருக்கப்பட வேண்டும் என கிரிக்கெட் வீரர் திலகரட்ன தில்சான் தெரிவித்துள்ளார்.

போதைப் பொருள் வர்த்தகத்தில் ஈடுபடுபவர்களுக்கு மரண தண்டனை வழங்கப்பட வேண்டும் என்ற கருத்து அதிகரித்துவருவதுடன், ஜனாதிபதியும் இது தொடர்பாக ஆராய்ந்துவருகின்றார். இந்நிலையில் இது தொடர்பாக கருத்து வெளியிட்டுள்ள அவர்,

போதைப்பொருள் வர்த்கத்தில் ஈடுபட்டுள்ளவர்களிற்கு மரணதண்டனையை நிறைவேற்றும் ஜனாதிபதியின் முடிவு வரவேற்கத்தக்கது.

இந்த தீர்மானத்தை நீண்ட காலத்திற்கு முன்னர் எடுத்திருக்கவேண்டும். போதைப்பொருள் குற்றங்களிற்கு மாத்திரமல்ல சிறுவர் துஸ்பிரயோகங்கள் போன்றவற்றிற்கும் மரண தண்டனையை நிறைவேற்றவேண்டும்.

போதைப்பொருள் தொடர்பான குற்றங்களும் சிறுவர் துஸ்பிரயோகமும் அச்சப்படும் விதத்தில் அதிகரித்துள்ளன. இதன் காரணமாக மரண தண்டனையை நிறைவேற்றுவது அவசியம் என்று குறிப்பிட்டுள்ளார்.

இலங்கையில் அபூர்வ பலா மரம் ஒன்று வளர்ந்துள்ளதாக தெரிவிக்கப்படுகின்றது. கடுகன்னாவ, லகபுவ பிரதேசத்தை சேர்ந்த ஜயவர்தன என்பவரின் வீட்டிலேயே இந்த மரம் வளர்ந்துள்ளது.

ஜயவர்தன என்பவரின் தாத்தாவின் தாத்தாவால் இந்த மரத்தின் கன்று நாட்டப்பட்டுள்ளது.

கிட்டத்தட்ட 250 வருடங்களாக தங்கள் தோட்டத்தில் வளரும் இந்த அபூர்வ பலா மரத்தினால் இன்னமும் பலர் பயன் பெறுகின்றனர்.

வருடத்திற்கு இரண்டு முறை இந்த மரத்தில் பலா காய்கள் காய்ந்து தொங்கும் எனவும், இதனை வீதியில் செல்வோர் பறித்து செல்வதாக ஜயவர்தன தெரிவித்துள்ளார்.

வழமையை விடவும் மிகவும் அதிகமான பலாப்பழங்கள் இந்த மரத்தில் காய்ப்பதே சிறப்பு அம்சமாகும்.

250 வருடங்களுக்கு பழைமையான ஒரு மரத்தில் இன்றும் பலன் பெறுவதென்பது ஒரு அபூர்வ விடயமாகவே கருதப்படுகின்றது.

இலங்கையில் இலத்திரனியல் கடவுச்சீட்டு வெளியிடுவதில் தொடர்ந்து சிக்கல் நிலைமை காணப்பட்டு வருவதாக தெரிவிக்கப்படுகின்றது.

இந்த கடவுச்சீட்டு ஒப்பந்தம், வெளிப்படைத்தன்மை இல்லாமல் மற்றும் கொள்முதல் விதிகளை மீறி பிரித்தானிய நிறுவனத்திற்கு வழங்க அமைச்சரவை அனுமதி கிடைத்துள்ளது.

இதன் காரணமாக இலங்கைக்கு வருடத்திற்கு 214 கோடி ரூபாய் நட்டம் ஏற்பட்டுள்ளதாக தெரிவிக்கப்படுகிறது.

இந்த ஒப்பந்தம் 20 அல்லது 25 வருடங்களுக்கு வழங்கப்படவுள்ளமையினால், பொதுமக்களின் 5300 கோடி ரூபாய் பணத்திற்கு நட்டம் ஏற்படுவதாக குறிப்பிடப்படுகின்றது.

கடந்த 2003ஆம் ஆண்டில் இருந்து குடிவரவு குடியகல்வு திணைக்களத்திற்கு வெளிநாட்டு கடவுச்சீட்டு வழங்குவதற்கு குறைந்த கட்டணம் பெற்ற நிறுவனத்திற்கு இந்த ஒப்பந்தம் வழங்காமல், பிரித்தானிய நிறுவனத்திற்கு வழங்ககப்பட்டுள்ளதாக கூறப்படுகின்றது.

கிளிநொச்சி – முழங்காவில் பகுதியில் விபத்திற்கு உள்ளாகி பாதிக்கப்பட்டிருகின்ற மாணவனின் சிகிச்சைக்கு உதவுமாறு அவரது பெற்றோர் உருக்கமான கோரிக்கையொன்றை முன்வைத்துள்ளனர்.

முழங்காவில் பகுதியில் கடந்த ஆண்டு நவம்பர் மாதம் 25ஆம் திகதி மேலதிக வகுப்புக்காக சென்ற 16 வயதான திருச்செல்வம் கஜேந்திரன் என்ற மாணவன் விபத்தில் சிக்கி படுகாயமடைந்துள்ளார்.

இதனையடுத்து அவர் வைத்தியசாலையில் அனுமதிக்கப்பட்ட நிலையில் சிகிச்சை பெற்று தற்போது பெற்றோரின் பராமரிப்பில் வீட்டில் இருந்து வருகின்றார்.

இவருக்கான மேலதிக சிகிச்சை மேற்கொள்ள வேண்டியிருப்பதனால் அதற்கான நிதியுதவி இன்மை மற்றும் குடும்ப வறுமை காரணமாக பாதிக்கப்பட்டிருப்பதாக தெரிவித்து பெற்றோர் உதவி கோரியுள்ளனர்.

அநுராதபுர மாவட்டத்தில் தம்புத்தேகம பிரதேசத்தில் அமைந்துள்ள பாடசாலையில் உயர்தரத்தில் படிக்கும் 18 வயதுடைய மாணவியை அவருடைய பெற்றோர் மனமுவந்து பொலிஸார் ஊடாக காதலனிடம் ஒப்படைத்த சம்பவமொன்று இடம்பெற்றுள்ளது.

பாடசாலைக்குச் செல்வதாகக் கூறி குறித்த மாணவி வீட்டிலிருந்து சென்றுள்ளார். எனினும் பாடசாலை செல்லாமல் சீருடையுடன் நொச்சியாகமத்திலுள்ள தனியார் பஸ் நிலையத்தில் தனது காதலனுடன் இருக்கும் போது, குறித்த பாடசாலையின் இரண்டு ஆசிரியர்கள் மற்றும் பாடசாலையில் புத்தமதத்தினைப் போதிக்கும் பௌத்த பிக்குவும் பிடித்து தம்புத்தேகம பொலிஸ் நிலையத்தில் ஒப்படைத்துள்ளனர்.

இதனையடுத்து, மாணவியின் பெற்றோர் மற்றும் குறித்த இளைஞனின் பெற்றோரை விசாரணைக்கு வருமாறு பொரிஸார் அழைத்துள்ளனர்.

விசாரணையின் பின்னர் குறித்த மாணவியை பொலிஸார் தனது பெற்றோரிடம் ஒப்படைத்தபோது, அவர்கள் அம்மாணவியை ஏற்க மறுத்துள்ளதாக தெரிவிக்கப்படுகிறது.

ஏனென்றால் தனது மகளுக்கு காதல் விவகாரத்தில் பல முறை அறிவுரை செய்ததாகவும் அதற்கு அவள் கீழ்ப்படியவில்லை எனவும் பெற்றோர் தெரிவித்துள்ளனர்.

இந்த நிலையில், பெற்றோர் ஏற்றுக்கொள்ள மறுத்ததால் அம்மாணவி 18 வயதுடையவர் என்பதால், அவரது காதலனிடம் ஒப்படைக்க பொலிஸார் நடவடிக்கை எடுத்துள்ளனர்.

லண்டனின் வெம்ப்லி (Wembley) பகுதியில் கடந்த செவ்வாய் கிழமை இடம்பெற்ற உதைப்பந்தாட்ட போட்டியை பார்வையிட சென்ற இலங்கையின் வடபகுதி இளைஞர் உயிரிழந்துள்ளதாக கூறப்படுகின்றது.

உயிரிழந்த இளைஞரின், 22 வயதுடைய நண்பரே இவ்வாறு கொலை செய்துள்ளதாக அந்நாட்டு ஊடகங்கள் செய்தி வெளியிட்டுள்ளன.

உதைப்பந்தாட்ட போட்டியை பார்வையிட சென்ற குறித்த இலங்கை இளைஞர்கள் இருவருக்குள் ஏற்பட்ட மோதலே உயிரிழப்புக்கான காரணம் என்றும் ஆரம்பக்கட்ட விசாரணைகள் மூலம் தெரிய வந்துள்ளது.

இந்த சம்பவம் தொடர்பிலான மேலதிக விசாரணைகளை லண்டன் பொலிஸார் மேற்கொண்டு வருகின்றனர்.

இதேவேளை, இலங்கையில் அண்மை காலமாக வன்முறை சம்பவங்கள் அதிகரித்துள்ள நிலையில் புலம்பெயர் தேசமான லண்டனிலும் இதன் தாக்கம் ஏற்பட்டுள்ளதாக அந்நாட்டு ஊடகங்கள் செய்தி வெளியிட்டுள்ளன.

மஹியங்கனை ரஜமஹா விகாரைக்கான அபிவிருத்தி திட்டத்திற்காக மரம் ஒன்று வெட்டி ஒதுக்கப்பட்டுள்ளது.

அங்கு மரத்தின் ஓட்டையில் பாரிய பாம்பு ஒன்று தனது 28 முட்டைகளை பாதுகாத்துள்ள நிலையில் மஹியங்கனை பொலிஸார் கண்டுபிடித்துள்ளனர்.

பொலிஸார் மற்றும் பிரதேசவாசிகள் இணைந்து அந்த பாம்பு மற்றும் முட்டைகளை கிராதுருகோட்டையில் அமைந்துள்ள வனவிலங்கு திணைக்கள அதிகாரிகளிடம் அறிவித்து, பாதுகாப்பான இடத்திற்கு கொண்டு சென்றுள்ளனர்.

மரத்தை வெட்டி கீழே சாய்த்த போது மரம் ஆடியமையினால் பாம்பு பதற்றமடைந்து மரத்திற்கு வெளியே வந்துள்ளது. அதனை அவதானித்த மரம் வெட்டும் நபர் மஹியங்கனை பொலிஸாருக்கு அறிவித்துள்ளார்.

அங்கு வந்த பொலிஸார், வனவிலங்கு அதிகாரிகள் தாய் மற்றும் முட்டைகளை பாதுகாப்பாக எடுத்துள்ளனர். அவ்வாறு மீட்கப்பட்ட பாம்பு சுமார் 12 அடி நீளமானதென தெரிவிக்கப்படுகின்றது.