தமிழகத்தில் கடையநல்லூர் அருகே பேருந்து- மோட்டார் சைக்கிளுடன் மோதிக் கொண்ட விபத்தில் அண்ணன்- தங்கை பலியான சம்பவம் சோகத்தை ஏற்படுத்தியுள்ளது.

நெல்லை மாவட்டம் கடையநல்லூரை சேர்ந்தவர் செல்வராஜ், சிங்கப்பூரில் வேலை பார்த்து வரும் இவருக்கும், ஹேமலதா என்பவருக்கு கடந்த 1ம் திகதி திருமணம் நடந்தது.

இந்நிலையில் புதுமண தம்பதியினர் நேற்று காலை மோட்டார்சைக்கிளில் இலத்தூரில் உள்ள குலதெய்வ கோவிலுக்கு சென்றனர்.

இவர்களுடன் ஹேமலதாவின் தந்தை மற்றும் அண்ணனும் சென்றனர், கோவிலுக்கு சென்றுவிட்டு வீடு திரும்பி கொண்டிருந்த போது மங்களாபுரம் விலக்கு அருகே எதிரே வந்த அரசு பேருந்துடன் பைக் மோதியது.

இதில் ஹேமலதா மற்றும் அவரது அண்ணன் தூக்கி வீசப்பட்டு ரத்த வெள்ளத்தில் துடிதுடித்து இறந்தனர், தங்கள் கண்முன்னே நடந்த விபத்தை பார்த்து செல்வராஜ் மற்றும் ஹேமலதாவின் தந்தை கதறி அழுதனர்.

தகவலறிந்து விரைந்து வந்த பொலிஸ் அதிகாரிகள், இருவரின் சடலத்தை கைப்பற்றி அரசு மருத்துவமனைக்கு அனுப்பி வைத்தனர்.

மதுரையில் தன் பிள்ளைகளை கொன்று விட்டு தூக்கிட்டு தற்கொலை செய்து கொண்ட பெண்ணின் உருக்கமான கடிதம் சிக்கியுள்ளது.

மதுரை டிவிஎஸ் நகர் முருகன் கோவில் தெருவை சேர்ந்தவர் ராஜா, மினி லொறி டிரைவர்.

இவரது மனைவி மைக்கேல்ஜீவா, இவர்களுக்கு ஹரிதா(வயது 4), ஹரிகிஷோர் குமார்(வயது 3) என இரு குழந்தைகள் உள்ளனர்.

இருவரும் காதல் திருமணம் செய்தாலும், மைக்கேல்ஜீவாவின் நடத்தையில் ராஜாவுக்கு சந்தேகம் வந்தது.

இதனால் அடிக்கடி இருவருக்கும் தகராறு எழ மன உளைச்சலில் இருந்துள்ளார் ஜீவா. பிரச்சனை தொடர்ந்து கொண்டே செல்ல, இரு குழந்தைகளையும் கொன்றுவிட்டு தற்கொலை செய்ய முடிவெடுத்தார்.

இதன்படி நேற்று குழந்தைகளின் முகத்தில் பிளாஸ்டிக் பையை கட்டிவிட்டு, தூக்கி மாட்டி தற்கொலை செய்தார். இரவு வேலை முடிந்து வீட்டுக்கு திரும்பிய ராஜாவுக்கு அதிர்ச்சி காத்திருந்தது.

உடனடியாக விரைந்து வந்த அதிகாரிகள் சடலத்தை கைப்பற்றி அரசு மருத்துவமனைக்கு அனுப்பி வைத்தனர். வீட்டில் சோதனையிட்டதில் மைக்கேல்ஜீவா எழுதிய இரண்டு கடிதங்கள் இருந்தன.

ஒன்றில், நான் போடும் உயிர் பிச்சை, யார் பெயரையும் குறிப்பிட விரும்பவில்லை, எனக்கு செய்த துரோகத்துக்கு நீ அனுபவிப்பாய்.

அதையும் நான் பார்க்கத்தான் போகிறேன், என்னையும், என் குழந்தைகளையும் தவறாக பேசியதால் நொறுங்கி விட்டேன்.

நீயும் சரி, உன் குடும்பமும் சரி அனுபவிப்பீங்க என எழுதப்பட்டிருந்தது. மற்றொரு கடிதத்தில், அம்மாவை பார்த்துக்கோங்க அக்கா, அனாதை போல் எங்களை எரித்துவிடவும், கணவர் கொள்ளி போடக்கூடாது என தெரிவிக்கப்பட்டிருந்தது. இதனையடுத்து ராஜாவை கைது செய்த பொலிசார் விசாரணை நடத்தி வருகின்றனர்.

இந்தியாவின் மத்தியபிரதேச மாநிலத்தில் துப்பாக்கி காட்டி இளம் மொடலை மிரட்டி காதலிக்க ஒப்புக்கொள்ள வைத்த முரட்டு இளைஞன் மீது பொலிசார் வழக்குப்பதிவு செய்துள்ளனர்.

மத்திய பிரதேச மாநிலம் போபாலில், மிஸ்ராட் பகுதியில் உள்ள அடுக்குமாடி குடியிருப்பில் இளம் மொடல் ஒருவர் வசித்து வந்தார்.

இவரது குடியிருப்புக்கு நேற்று அதிகாலை அத்துமீறி நுழைந்த இளைஞர் ஒருவர் துப்பாக்கி முனையில் மொடலின் பெற்றோரை ஓர் அறையிலும் மற்றொரு அறையில் மொடலையும் சிறை வைத்தார்.

மட்டுமின்றி குறித்த மொடலை அடித்து துன்புறுத்தியதுடன் கத்திரியாலும் தாக்கியுள்ளார். இச்சம்பவத்தை அறிந்த அக்கம் பக்கத்தினர் உடனடியாக பொலிசாருக்கு தகவல் தெரிவித்துள்ளனர்.

தகவல் அறிந்து விரைந்து வந்த பொலிசார் கதவை உடைத்து உள்ளே நுழைய முயன்றனர். ஆனால் உள்ளே வந்தால் துப்பாக்கியால் சுட்டு, தற்கொலை செய்வேன் என்று அந்த இளைஞர் மிரட்டல் விடுத்தார்.

இதனையடுத்து அந்த இளைஞரிடம் பேச்சுவார்த்தை நடத்திய பொலிசார், மொடலை சிறை வைத்திருப்பதன் காரணம் குறித்து விசாரித்தனர்.

அப்போது அந்த இளைஞர், தனது பெயர் ரோகித் என்கிற ரீகல் சிங் எனவும் தாமும் குறித்த மொடலும் மும்பையில் வசித்தபோது காதலித்ததாகவும் தெரிவித்துள்ளார்.

ஆனால் அவர் போபால் திரும்பிய பின்னர் தமது காதலை நிராகரித்து வருவதாகவும், அவரது குடும்பத்தினர் எதிர்ப்பு தெரிவிப்பதுதான் இதற்கு காரணம் எனவும் தெரிவித்துள்ளார்.

அவர் தன்னை காதலிக்க வேண்டும். அதை பத்திரத்தில் எழுதி தரவேண்டும். இல்லையென்றால் விட மாட்டேன் எனவும் தெரிவித்துள்ளார். இதனையடுத்து இருவருக்கும் உணவு மற்றும் தேவையானவற்றை பொலிசார் செய்து தந்துள்ளனர்.

நள்ளிரவு வரை நடந்த இந்தப் போராட்டம் பின்னர் முடிவுக்கு வந்தது. காதலுக்கும் திருமணத்துக்கும் அவர் சம்மதித்துவிட்டதாகவும் அது தொடர்பாக முத்திரைத்தாளில் எழுதிய வாங்கியதாகவும் ரோகித் தெரிவித்துள்ளார்.

இதனையடுத்து ரோகித் கதவைத் திறந்தார். உடனடியாக பொலிசாரும் சட்டத்துறை அதிகாரிகளும் உள்ளே சென்று அந்தப் பெண்ணை பார்த்தனர்.

மொடலின் உடலில் ரத்தக் காயம் இருந்தது. ரோகித்தின் கைகளிலும் ரத்தம் வடிந்திருந்தது. இதையடுத்து இரண்டு பேரையும் மருத்துவமனையில் சேர்த்தனர்.

காதலும் காதலியும் கிடைத்த மகிழ்ச்சியில் ரோகித் இருக்க, திடீரென்று அதிகாரிகளிடம் கண்ணீர் விட்டு கதறினார், அந்த மாடல்.

“என்னை எப்படியாவது காப்பாத்துங்க. வேறு வழியில்லாமல் அவனிடமிருந்து தப்பிக்க, காதலிப்பதாக எழுதி கொடுத்துவிட்டேன். அதைத் தவிர வேறு வழியில்லை. அவனை எனக்கு திருமணம் செய்துகொள்ள விருப்பமில்லை. அவனை காதலிக்கவும் இல்லை” என்று அதிகாரிகள் முன்பு கண்ணிர் மல்கக் கூறியுள்ளார் அந்த மொடல்.

இதனையடுத்து ரோகித்தை கைது செய்த பொலிசார் அவர் மீது வழக்குப் பதிந்து விசாரணை மேற்கொண்டு வருகின்றனர்.

டெல்லி புராரி வழக்கில் கடைசி நேரத்தில் உயிர் தப்ப 3 பேர் முயன்றதாக புதிய தகவல்கள் வெளியாகியுள்ளது. டெல்லியில் புராரி பகுதியில் கடந்த சில வாரங்களுக்கு முன்னர் ஒரே குடும்பத்தைச் சேர்ந்த 11 பேர் தூக்கில் தொங்கிய நிலையில் இறந்து கிடந்தனர்.

தகவலறிந்த பொலிசார் சம்பவயிடத்திற்கு சென்று உடல்களை மீட்டு வழக்கு பதிவு செய்து விசாரணை மேற்கொண்டு வருகின்றனர்.

குறித்த குடியிருப்பில் பணம், நகை என பொருட்கள் எதுவும் கொள்ளையடிக்கப்படவில்லை என முதற்கட்ட விசாரணையில் தெரியவந்தது.

மேலும் பிரேத பரிசோதனை அறிக்கையில் 11 பேரும் எந்தவித போராட்டமுமின்றி உயிரிழந்ததும் தெரியவந்தது.

எனவே இது தற்கொலைதான் என்று விசாரணை அதிகாரிகள் முடிவுக்கு வந்தனர். இந்நிலையில் வீட்டிலிருந்து அமானுஷ்ய கடிதம் மற்றும் டைரிகள் பொலிசாரிடம் சிக்கியது.

உயிரிழந்த நாராயணியின் மகன் லலித் பாட்டியா 10 ஆண்டுகளுக்கு முன்பு இறந்த தந்தையை போல் நடந்து கொள்வதாகவும் கடவுளை தரிசிக்க 11 பேரும் தூக்கில் ஆலமரம் விழுதுகளை போல் தொங்க வேண்டும் என்றும் லலித் மற்றவர்களை மூளைச் சலவை செய்திருந்ததாக தெரிய வந்தது.

தூக்கிட்டு கொள்ளும் எண்ணம் இருந்த இவர்கள் மறுநாள் சிற்றுண்டிக்காக கடலை பருப்பை நீரில் ஊறவைத்திருந்தனர்.

பாலை தயிராக்கும் முறையையும் செய்திருந்தனர். மேலும் அக்குடும்பத்தை சேர்ந்த பிரியங்கா என்பவருக்கு திருமணம் நடைபெறவிருந்தது.

இந்த சூழலில் அவர்கள் தற்கொலை செய்ய வாய்ப்பிருக்கிறதா என்ற கேள்வி எழுந்தது. கடவுளை தரிசிக்க தூக்கிட்டு கொண்டால் கடவுளும் இறந்த தந்தையும் தங்களை காப்பாற்றுவர் என்ற மூடநம்பிக்கையை அந்த குடும்பத்தினர் கொண்டிருந்தனர்.

மேலும் கடவுளை தரிசிப்பது எப்படி என்பது தொடர்பாக 2015-ஆம் ஆண்டு முதல் அக்குடும்பத்தினர் டைரியில் குறிப்புகளை எழுதி வந்தனர்.

ஏராளமான மர்மங்கள் நிறைந்துள்ள இந்த மரணத்தில் 3 பேர் தப்பிக்க முயன்றனர் என்ற தகவல் தற்போது தெரியவந்துள்ளது.

மட்டுமின்றி 11 பேரில் குறிப்பிட்ட 3 பேரின் கைகட்டுகள் அவிழ்ந்து இருந்தது தெரியவந்துள்ளது. எனவே இவர்கள் மூவரும் இந்த தூக்கில் இருந்து தப்பிக்க நினைத்திருக்கலாம் என்று பொலிசார் சந்தேகம் எழுப்பியுள்ளனர்.

இந்தியாவின் கேரள மாநிலத்தில் கடந்த 4 மாதங்களாக மாயமான இளம்பெண் தொடர்பில் பொலிசாருக்கு முக்கிய தகவல் கிடைத்துள்ளதாக தெரியவந்துள்ளது.

கேரள மாநிலம் பத்தனம்திட்டா மாவட்டத்தில் உள்ள முண்டக்கயம் பகுதியில் இருந்து ஜெஸ்னா மரியா என்ற 19 வயது மாணவி கடந்த மார்ச் 22 ஆம் திகதியில் இருந்து மாயமாகியுள்ளார்.

சிறப்பு குழு அமைத்து பொலிசார் தீவிரமாக தேடியும் குறித்த இளம்பெண் உயிருடன் உள்ளாரா அல்லது கொல்லப்பட்டாரா என்ற தகவல் இதுவரை இல்லை.

சம்பவத்தன்று பேருந்து ஒன்றில் ஏறிச்செல்லும் மாணவி குறித்த கண்காணிப்பு கமெரா காட்சிகளின் அடிப்படையில் பொலிசார் விசாரணை மேற்கொண்டனர்.

மட்டுமின்றி முண்டக்கயம் பகுதியில் உள்ள கடை ஒன்றில் கடந்து செல்லும் கமெரா காட்சிகளையும் பொலிசார் விசாரணைக்கு உட்படுத்தினர்.

இருப்பினும் மாயமான மாணவி தொடர்பில் எந்த தகவலும் இன்றி பொலிசார் விழிபிதுங்கியுள்ள நிலையில், மாயமான மாணவியை கர்நாடக மாநிலம் பெங்களூருவில் உள்ள விமான நிலையத்தில் கண்டதாக பொலிசாருக்கு தகவல் கிடைத்துள்ளது.

மே மாதம் 5 ஆம் திகதி கிடைத்த இந்த தகவலின் அடிப்படையில் பெங்களூரு சென்ற பொலிசாருக்கு அந்த தகவலில் உண்மை இல்லை என தெரியவந்தது.

தற்போது மீண்டும் கர்நாடகாவில் உள்ள மடிவாளா பகுதியில் ஜெஸ்னா என்ற அந்த மாணவியை கண்டுள்ளதாக பொலிசாருக்கு தகவல் கிடைத்துள்ளது.

ஜெஸ்னா மாயமாவதற்கு முன்னர் தமது ஆண் நண்பர் ஒருவருக்கு தொலைபேசியில் பலமுறை அழைத்ததாகவும், அவருக்கு அனுப்பிய கடைசி குறுஞ்செய்தியில் தாம் தற்கொலை செய்துகொள்ள இருப்பதாகவும் தெரிவிக்கப்பட்டிருந்தது.

குறித்த ஆண் நண்பரை பொலிசார் விசாரணைக்கு உட்படுத்தியும், இந்த வழக்கு தொடர்பில் எந்த முன்னேற்றமும் ஏற்படவில்லை என விசாரணை அதிகாரிகள் தெரிவித்திருந்தனர்.

மட்டுமின்றி விசாரணைக்கு உட்படுத்திய கமெரா காட்சிகளில் அந்த ஆண் நண்பர் இல்லை எனவும் பொலிசார் தெரிவித்துள்ளனர்.

இந்தியாவில் வரதட்சணை கொடுமை காரணமாக இளம் பெண் கணவர் குடும்பத்தாரால் உயிரோடு எரித்து கொல்லப்பட்டுள்ள சம்பவம் அதிர்ச்சியை ஏற்படுத்தியுள்ளது.

ஒடிசா மாநிலத்தை சேர்ந்தவர் தெபஷிஸ். இவர் மனைவி சந்திரகாந்தி. தம்பதிக்கு இரண்டு குழந்தைகள் உள்ளனர்.

திருமணமானது முதலேயே சந்திரகாந்தியை அவர் கணவரும், மாமியாரான மனோரமாவும், மாமனாரான ரவீந்திராவும் 50,000 பணம் மற்றும் பைக்கை வரதட்சணையாக கேட்டு கொடுமைபடுத்தியுள்ளனர்.

இது குறித்து தனது தந்தையிடம் சந்திரகாந்தி கூறிய போதும் ஏழ்மை நிலை காரணமாக அவரால் அதை தர முடியவில்லை. இந்நிலையில் நேற்று மீண்டும் சந்திகாந்திக்கு வரதட்சணை கொடுமை நடந்துள்ளது.

அப்போது ஆத்திரமடைந்த அவரின் கணவர் மற்றும் மாமியார், மாமனார் சந்திரகாந்தி மீது மண்ணெணெய் ஊற்றி தீவைத்து கொளுத்தியுள்ளனர்.

வலியால் துடித்த அவரை அக்கம்பக்கத்தினர் மருத்துவமனைக்கு கொண்டு சென்ற நிலையில் அங்கு சந்திரகாந்தி பரிதாபமாக உயிரிழந்தார்.

சம்பவம் குறித்து வழக்குப்பதிவு செய்துள்ள பொலிசார் தலைமறைவாக உள்ள மூவரையும் தேடி வருகிறார்கள்.

திண்டுக்கல் மாவட்டத்தை சேர்ந்த அந்தோனி அம்மாள் என்ற மூதாட்டி 13 பிள்ளைகள் பெற்றெடுத்தும் கோயில் தெருவில் பிச்சையெடுத்து வாழ்க்கை நடத்தி வந்துள்ளது பரிதாபத்தை ஏற்படுத்தியுள்ளது.

கடந்த 5 ஆண்டுகளாக வேலூர் விண்ணரசி மாதா கோயிலில் பிச்சை எடுத்து வாழ்க்கை நடத்தி வந்துள்ளார். பிச்சை எடுக்கும் பணத்தையும் தனது மகள் வாங்கி சென்றதாகவும் அந்தோனி அம்மாள் குற்றம்சாட்டியுள்ளார்.

இதுகுறித்து மாவட்ட ஆட்சியரிடம் கண்ணீர் மல்க புகார் அளித்துள்ளார் அந்தோனி அம்மாள். எனக்கு 13 பிள்ளைகளும் பேரன்களும் இருந்தும் அனாதையாக உள்ளேன். எனது கணவர் கேரளாவில் உள்ள அவரது தம்பி வீட்டில் உள்ளார். நான் மட்டும் இப்படி கஷ்டத்தை அனுபவித்து வருகிறேன்.

எனக்கு அந்த ஆண்டவர் மட்டுமே துணை என்றும் நான் இறக்கும் வரை என்னை பாதுகாத்து எனக்கு உணவு வழங்கினால் போதும். கால் உடைந்திருப்பதால் என்னால் நடக்கக் கூடிய முடியவில்லை என்றும் கண்ணீர் மல்க கூறினார். மேலும் நான் இறந்தாலும் என்னை எனது உறவுகள் யாரும் பார்க்கக் கூடாது என்றும் கூறியுள்ளார்.

சமூக ஆர்வலர் மணிமாறன் கூறும் போது, 95 வயதான் மூதாட்டி நிலை குறித்து தங்களுக்கு தகவல் கிடைத்ததும் அவரை மாவட்ட ஆட்சியரிடம் அழைத்து வந்து மனு கொடுத்துள்ளோம். மூதாட்டியை கைவிட்ட அவரது வாரிசுகள் மீது முதியோர் வன்கொடுமை சட்டத்தின் கீழ் நடவடிக்கை எடுக்கவேண்டும் என கோரிக்கை விடுத்துள்ளோம்.

மேலும் அவருக்கான உணவு கிடைக்க நடவடிக்கை எடுக்க வேண்டும் என்றும் கேட்டுள்ளோம் என கூறியுள்ளார்.

இதையடுத்து மாவட்ட ஆட்சியர் எஸ்.ஏ.ராமன் மாவட்ட சமுக நலத்துறை சார்பில் தொண்டு நிறுவன முதியோர் காப்பகத்தில் ஒப்படைக்க உத்தரவிட்டார். மேலும் அவரின் உறவினர்கள் மீது நடவடிக்கை எடுக்கப்படும் என்றும் கூறியுள்ளார்.