கனடா ரொரன்றோவின் முன்னணி வைத்தியசாலைகளை உள்ளடக்கிய University Health Network எனப்படும் உலக முதன்மை மருத்துவ ஆராய்ச்சி மையத்தின் அதியுயர் பாராட்டினையும் அதன் நிர்வாகசபை உறுப்பினர் பதவியையும் ஈழத்தைச் சேர்ந்த அபிசா யோகரத்தினம் என்ற யுவதி பெற்று சாதனைப்படைத்துள்ளார்.

தமிழ்ஈழ இனத்தில் உச்சமாக சாதிப்பவர்கள் சிலர். அதிலும் அதீத சமூக அக்கறை கொண்டு அதன் செயற்பாடுகளை தமது மூச்சாகக் கொண்டு அதேவேளை துறைசார்நது தமது கல்வியிலும் உச்சமாக சாதிப்பவர்களை விரல்விட்டு எண்ணிவிடலாம். அச்சாதனையூடாகவும் தமது இனத்திற்கும் அதன் வாழ்விற்கும் வலுச்சேர்ப்பவர்கள் பெருமை சேர்ப்பவர்கள் அபூர்வமானவர்களே!

இவ்வாறான இளையவரே அபிசா யோகரத்தினம். தனது முதற்பட்டப்படிப்பில் முதன்மை தேர்ச்சி பெற்று அதனூடாக மருத்துவக்கல்விக்கான வாய்ப்பை ரொரன்றோ பல்கலைக்கழகத்தில் பெற்று அதன் முதல் ஆண்டிலேயே மீண்டும் முதன்மை நிலையை எய்தி அதியுயர் விருதைப் பெற்றுள்ளார்.

அது மட்டுமல்ல தனது ஆராச்சிகளினூடாக ரொரன்ரோவின் முன்னணி வைத்தியசாலைகளை உள்ளடக்கிய யூனிவசிற்றி கெல்த் நெற்வேக் எனப்படும் உலக முதன்மை மருத்துவ ஆராய்ச்சி மையத்தின் அதியுயர் பாராட்டைப் பெற்று அதன் நிர்வாகசபை உறுப்பினர் பதவியையும் தனதாக்கியுள்ளார்.

சமூக நிகழ்வு எங்கென்றாலும் தனது பிரசன்னத்தை மட்டுமல்ல, அதன் பிரதான செயற்பாட்டாளராகவும் காணப்படும் அபிசா அடுத்த தலைமுறைக்கான சிறந்த முதன்மை வழிகாட்டி மட்டுமல்ல இனத்தின் ஒரு பெரும் நம்பிக்கை நட்சத்திரம். இளையவர்களின் இவ்வாறான வளர்ச்சியும், எழுச்சியும், சாதனைகளும் ஈழத் தமிழினத்திற்கான பெரும் ஊக்கமருந்து என குறிப்பிடப்படுகின்றது.

சர்ச்சைக்குரிய ஆடை அணிந்து வந்தமையினால் பெண் சட்டத்தரணியான சுகந்திகா பெர்ணான்டோவை நீதிமன்றம் கடுமையாக எச்சரித்துள்ளது.

மாரவில நீதிமன்றத்தில் இடம்பெற்ற வழக்கு விசாரணையின் போது அவர் பியாமா போன்ற ஆடை ஒன்றை அணிந்து வந்துள்ளார்.

இது நீதிமன்றத்தை அவமதிக்கும் செயல் என கூறி மாரவில சட்டத்தரணிகள் சங்கம் அவருக்கு எதிராக முறைப்பாடு செய்தது.

சட்டத்திற்கு உட்பட்டு நீதிமன்றத்திற்கு தகுதியற்ற ஆடை அணிந்து வந்துள்ள விடயம் அவதானிக்கப்பட்டுள்ளதாக நீதிபதி கேமிந்த பெரேரா குறிப்பிட்டுள்ளார்.

இதனால் அவரால் ஏற்றுக் கொள்ளப்பட்ட மற்ற வழக்கில் கலந்து கொள்ளாமல் சுகந்திகா நீதிமன்றத்தை விட்டு வெளியேற்றப்பட்டார்.

இது தொடர்பில் அவரிடம் கேட்ட போது, தான் வேறு விதமான ஆடை அணிந்து வந்ததனை ஏற்றுக்கொண்டுள்ளார்.

கடந்த காலங்களில் பேஸ்புக் ஊடாக இலங்கை சட்டத்துறை தொடர்பில் சர்ச்சைக்குரிய கருத்துக்களை சட்டத்தரணி சுகந்திகா பெர்ணான்டோ வெளியிட்டிருந்தார்

இந்நிலையில் நீதிமன்றத்தில் இடம்பெற்ற வழக்கு விசாரணைக்கு சுகந்திகா பெர்ணான்டோ அணிந்து வந்த ஆடை தொடர்பில் கடுமையாக எச்சரிக்கப்பட்டுள்ளார்.

வெளிநாட்டில் உள்ள 800 இலங்கையர்களுக்கு இரட்டை குடியுரிமை வழங்கப்படவுள்ளதாக குடிவரவு குடியகல்வு திணைக்களம் அறிவித்துள்ளது.

அடுத்த மாதம் முதல் வாரம் இந்த நடவடிக்கை மேற்கொள்ளப்படவுள்ளதாக திணைக்களம் அறிவித்துள்ளது.

இரட்டை குடியுரிமைக்காக மாதாந்தம் 1000 விண்ணப்பங்கள் கிடைப்பதாக திணைக்களத்தின் கட்டுப்பாட்டு ஜெனரால் நிஹால் ரணசிங்க சுட்டிக்காட்டியுள்ளார். விசேட குழுவின் மூலம் விண்ணப்பங்கள் ஆய்வு செய்யப்படுவதாக அவர் தெரிவித்துள்ளார்.

பாதுகாப்பு மற்றும் வெளிவிவகார அமைச்சின் அதிகாரிகள் அந்த குழுவில் உள்ளடக்கப்பட்டுள்ளனர்.

அவர்களின் பரிந்துரைக்கு அமைய 800 பேருக்கு இரட்டை குடியுரிமை வழங்கப்படவுள்ளதாக திரு. நிஹால் ரணசிங்க மேலும் தெரிவித்துள்ளார்.

இதேவேளை வெளிநாடுகளில் உள்ள இலங்கையர்கள் இரட்டை குடியுரிமையை பெற்றுக் கொள்வதில் மிகவும் ஆர்வம் காட்டி வருவதாக குடிவரவு குடியகல்வு கட்டுப்பாட்டாளர் நாயகம் நிஹால் ரணசிங்ஹ தெரிவித்துள்ளார்.

பிரித்தானியாவில் இருந்து இலங்கையர் ஒருவர் நாடு கடத்தலை எதிர்நோக்கியுள்ளதாக அந்நாட்டு ஊடகம் ஒன்று தகவல் வெளியிட்டுள்ளது.

இலங்கை கிரிக்கெட் பயிற்சியாளரான ஹேமகே பத்திரனகே என்பவரே இந்த நிலைக்கு முகங்கொடுத்துள்ளார்.

பிரித்தானியாவின் Worcester பகுதியில் வசிக்கும் இலங்கை பயிற்சியாளரே இவ்வாறு நாடு கடத்தலை எதிர்நோக்கியுள்ளார்.

பிரித்தானியாவில் சிறுவர்கள் மற்றும் ஊனமுற்றோருக்கு கிரிக்கெட் பயிற்சி வழங்கும் குறித்த இலங்கையர், போதுமான பணம் சம்பாதிக்காத காரணத்தினால் இந்த நிலைமை ஏற்பட்டுள்ளது.

Worcester பல்கலைக்கழகத்தின் பட்டதாரியான ஹேமகே பத்திரனகே விசா பெற தகுதி பெற்றுக் கொள்ள 30,000 யூரோ சம்பாதிக்க வேண்டும் என தெரிவிக்கப்படுகின்றது.

27 வயதான அவர் மனித உரிமைகள் அடிப்படையில் தங்கியிருப்பதற்கு உள்துறை அலுவலகத்தில் முறையிட்டுள்ளார்.

எனினும், அவரது மேல்முறையீடு நிராகரிக்கப்பட்டுள்ளதுடன், நாட்டை விட்டு செல்ல 20 நாட்கள் வழங்கப்பட்டுள்ளதாக குறித்த ஊடகம் மேலும் தெரிவித்துள்ளது.

இலங்கையில் ஏற்பட்ட கோர விபத்தில் கொல்லப்பட்ட அவுஸ்திரேலியர்கள் தொடர்பில் தகவல் வெளியாகியுள்ளது.

கடந்த இரண்டு நாட்களுக்கு முன்னர் அதிவேக நெடுஞ்சாலையில் இடம்பெற்ற விபத்தில் 2 அவுஸ்திரேலிய நாட்டவர்கள் உயிரிழந்த நிலையில் இருவர் காயமடைந்தனர்.

Louise Collins என்ற பெண் மற்றும் அவரது மகளான 4 வயதுடைய Poppy என்பவருமே உயிரிழந்துள்ளனர்.

உயிரிழந்த இருவர் மற்றும் குடும்பத்தினர் இலங்கைக்கு சுற்றுலா பயணம் மேற்கொண்டிருந்தனர். கடந்த புதன்கிழமை நாகொட பிரதேசத்தில் இவர்கள் பயணித்த வாகனம் விபத்துக்குள்ளாகியுள்ளது.

Louise என்பவரின் கணவர் Patrick மற்றும் அவர்களது மகன் Fred மற்றும் மகள் Poppy ஆகியோர் பயணித்த வாகனம் நிறுத்தி வைக்கப்பட்டிருந்த லொறியுடன் மோதியமையினால் இந்த விபத்து நிகழ்ந்துள்ளது.

Patrick மற்றும் மகன் Fred ஆகியோர் அவசரமாக வைத்தியசாலைக்கு கொண்டு செல்லப்பட்டனர். எனினும் மகள் மற்றும் மனைவி சம்பவ இடத்திலேயே உயிரிழந்துள்ளனர்.

மகன் Fredஇன் முகத்தில் சத்திரசிகிச்சை ஒன்று மேற்கொள்ளப்பட்டுள்ள நிலையில் தந்தை ஆபத்தான நிலையில் தீவிர சிகிச்சை பிரிவில் அனுமதிக்கப்பட்டுள்ளார்.

Patrick மத்திய கிழக்கு நாடுகளின் விமான சேவையான கட்டார் எயார்வேஸ் விமான சேவையில் பிரபல விமானியாக செயற்பட்டு வருகின்றார்.

மிகவும் அன்பான ஒரு குடும்பத்தை இழந்து விட்டோம் என உயிரிழந்த பெண்ணின் உறவினர்கள் சமூக வலைத்தளங்களில் இரங்கல்களை வெளியிட்டுள்ளனர்.

விளையாட்டுத்துறை அமைச்சும் விளையாட்டுத்துறை அபிவிருத்தி திணைக்களமும் ஏற்பாடு செய்துள்ள 44ஆவது தேசிய விளையாட்டு விழாவில் ஓர் அம்சமான பெண்களுக்கான பளுதூக்கலில் வடக்கு மாகாணத்தின் விஜயபாஸ்கர் ஆஷிகா மூன்று புதிய தேசிய சாதனைகளை நிலைநாட்டி தங்கப் பதக்கத்தை சுவீகரித்தார்.

இவ் வருட தேசிய விளையாட்டு விழாவில் வடக்கு மாகாணத்துக்கு கிடைத்த முதலாவது தங்கப் பதக்கம் இதுவாகும்.

மேலும் பெண்களுக்கான பளுதூக்கலில் வடக்கு மாகாணத்துக்கு இரண்டு வெண்கலப் பதக்கங்களும் கிடைத்துள்ளன.

பொலன்னுறுவை விளையாட்டுத் தொகுதி உள்ளக அரங்கில் நடைபெற்றுவரும் பளுதூக்கல் போட்டிகளின் ஆரம்ப தினமான நேற்றைய தினம் பெண்களுக்கான 63 கிலோ கிராம் எடைப் பிரிவில் ஸ்னெச், க்ளீன் அண்ட் ஜேர்க் மற்றும் ஒட்டுமொத்த எடை ஆகியவற்றிலேயே ஆஷிகா புதிய தேசிய சாதனைகளை நிலைநாட்டினார்.

ஸ்னெச் முறையில் 76 கிலோ கிராம் எடையையும் க்ளீன் அண்ட் ஜேர்க் முறையில் 97 கிலோ கிராம் எடையையும் தூக்கிய ஆஷிகா, மொத்தமாக 173 கிலோ கிராம் எடையைத் தூக்கினார்.

இதன் மூலம் கடந்த வருடம் (ஸ்னெச் 74 கி.கி., க்ளீன் அண்ட் ஜேர்க் 96 கி.கி. மொத்தம் 170 கி.கி.) நிலைநாட்டிய தனது சொந்த தேசிய சாதனையை ஆஷிகா புதுப்பித்தார்.

அத்துடன் இந்த மூன்று சாதனைகளும் கனிஷ்ட தேசிய மற்றும் இளையோர் தேசிய பிரிவுகளிலும் புதிய தேசிய சாதனைகளாகப் பதிவாகியுள்ளன.

பெண்களுக்கான 58 கிலோ கிராம் எடைப் பிரிவு பளுதூக்கலில் வடக்கு மாகாணத்தின் பிரதாபன் நிலோஜினி வெண்கலப் பதக்கத்தை வென்றெடுத்தார்.

இவர் (ஸ்னெச் 53 கி.கி., க்ளீன் அண்ட் ஜேர்க் 67 கி.கி.) மொத்தமாக 120 கிலோ கிராம் எடையைத் தூக்கினார்.

90 கிலோ கிராம் மற்றம் அதற்கு மேற்பட்ட எடைப்பிரிவில் வட மாகாணத்தின் மேரி லக்ஷிகா வெண்கலப் பதக்கம் வென்றார்.

இவர் (ஸ்னெச் 44 கி.கி., க்ளீன் அண்ட் ஜேர்க் 56 கி.கி.) மொத்தமாக 100 கிலோ கிராம் எடையைத் தூக்கினார்.

வாழைச்சேனை – நாசிவன்தீவு கிராமசேவகர் பிரிவில் உருக்குலைந்த நிலையில் ஆணொருவரின் சடலம் மீட்கப்பட்டுள்ளது.

குறித்த சடலம் இன்று மீட்கப்பட்டுள்ளதாக வாழைச்சேனை பொலிஸ் நிலைய பொறுப்பதிகாரி தனஞ்ஜய பெரமுன தெரிவித்துள்ளார்.

நாசிவந்தீவு கட்டுமுறிவு பாலத்தின் வாவிக்கரையில் மீன் பிடிக்க சென்ற மீனவர் ஒருவர் வாவிக்கரை கண்ணா காட்டுப் பகுதியிலிருந்து துர்நாற்றாம் வீசுவதை அறிந்து குறித்த இடத்திற்கு சென்று பார்வையிட்டுள்ளார்.

இதன்போது அந்த இடத்தில் சடலமொன்று கிடப்பதை பார்த்து இது தொடர்பில் பொலிஸாருக்கு தகவல் வழங்கியுள்ளார். அங்கு விரைந்த பொலிஸார் சடலத்தை மீட்டுள்ளனர்.

அத்துடன் சடலத்திற்கு அருகிலிருந்து 2 கைத்தொலைபேசிகளும், பொதி ஒன்றும் கண்டெடுக்கப்பட்டுள்ளது.

சடலம் பிரேத பரிசோதனைக்காக மட்டக்களப்பு போதனா வைத்தியசாலைக்கு கொண்டு செல்லப்பட்டுள்ளதுடன், மேலதிக விசாரணைகளை வாழைச்சேனை பொலிஸார் மேற்கொண்டு வருவதாக பொறுப்பதிகாரி கூறியுள்ளார்.

மாணவர்கள் சிலர் மேற்கொண்ட தாக்குதலில் படுகாயமடைந்து கொழும்பு தேசிய வைத்தியசாலையில் சிகிச்சை பெற்ற பாடசாலை மாணவன் ஒருவர் இன்று அதிகாலை உயிரிழந்துள்ளார்.

சிலாபம் பிரதேச பாடசாலையின் பிரதான மாணவ தலைவனாக செயற்பட்ட 11 வகுப்பில் கல்வி கற்றும் 16 வயதுடைய மாணவனே இவ்வாறு உயிரிழந்துள்ளார்.

கடந்த 15ஆம் திகதி இரவு இடம்பெற்ற மத நிகழ்வில் கலந்து கொண்டு திரும்பி வந்த மாணவனை, வீதியில் நின்ற மாணவர்கள் குழுவொன்று கொடூரமாக தாக்கியுள்ளனர்.

தாக்குதலினால் படுகாயமடைந்த மாணவன் சிலாபம் மாவட்ட வைத்தியசாலையில் அனுமதிக்கப்பட்ட நிலையில் பின்னர் மேலதிக சிகிச்சைக்காக கொழும்பு தேசிய வைத்தியசாலைக்கு மாற்றி அனுப்பப்பட்டுள்ளார்.

அங்கு மாணவனுக்கு சத்திரசிகிச்சை மேற்கொள்ளப்பட்டு அதி தீவிர சிகிச்சை பிரிவில் சிகிச்சை பெற்று வந்துள்ளார். இந்நிலையில் இன்று அதிகாலை அவர் உயிரிழந்துள்ளார்.

தாக்குதல் மேற்கொண்டமை தொடர்பில் அதே பாடசாலையில் கல்வி கற்கும் 3 மாணவர்கள் கைது செய்யப்பட்டுள்ளனர்.

கைது செய்யப்பட்டவர்கள் சிலாபம் நீதிமன்றத்தில் ஆஜர்படுத்தப்பட்ட வேளை இருவர் பிணையில் விடுவிக்கப்பட்டனர். ஒரு மாணவன் மாத்திரம் விளக்கமறியலில் வைக்கப்பட்டுள்ளார்.

சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்ற நிலையில் பிரேத பரிசோதனை இன்றைய தினம் இடம்பெறவுள்ளது.

ஹட்டன் -மஸ்கெலியா பிரதான வீதியில் இடம்பெற்ற விபத்தில் பெண் ஒருவர் ஸ்தலத்திலே பலியானதாக நோர்வூட் பொலிஸார் தெரிவித்தனர்.

இவ்வாறு உயிரிழந்த பெண் தொடர்பில் இதுவரை அடையாளம் காணப்படவில்லை என நோர்வூட் பொலிஸார் மேலும் தெரிவிக்கின்றனர். சம்பவம் தொடர்பில் தெரியவருகையில்,

குறித்த பெண் பாதையை கடக்க முற்பட்ட போது, ஹட்டனிலிருந்து மஸ்கெலியாவை நோக்கிச் சென்ற தனியார் பஸ்ஸின் முன்சில்லில் சிக்குண்டு ஸ்தலத்திலேயே பலியானதாக தெரிவிக்கப்படுகின்றது.

இவ் விபத்து இன்று 5 மணியளவில் சம்பவித்துள்ளதாகவும், பஸ்ஸின் சாரதி பொலிஸாரினால் கைது செய்யப்பட்டுள்ளதுடன் விபத்து தொடர்பிலான மேலதிக விசாரணைகளை தொடர்வதாகவும் நோர்வூட் பொலிஸார் மேலும் தெரிவித்தனர்.