மாத்தறை நகர மத்தியில் அமைந்துள்ள தங்க ஆபரண விற்பனை நிலையம் ஒன்றில் கொள்ளையிட வந்த கொள்ளையர்களுக்கும் பொலிஸாருக்கும் இடையில் பரஸ்பரம் துப்பாக்கி பிரயோகம் நடைபெற்றுள்ளது.

இந்த சம்பவம் இன்று காலை இடம்பெற்றுள்ளதுடன், இதில் காயமடைந்த மூன்று பொலிஸார் வைத்தியசாலையில் அனுமதிக்கப்பட்டிருந்த நிலையில் ஒருவர் உயிரழந்துள்ளார். இதனால் அப்பகுதியில் சற்று பதற்ற நிலை காணப்படுவதாக தெரிவிக்கப்படுகின்றது.

மாத்தறை நகரில் உள்ள தங்க ஆபரண விற்பனை நிலையத்தில் கொள்ளையிட 6 பேர் கொண்ட குழு வந்துள்ளது. இதில் இரண்டு பேர் கொள்ளையில் ஈடுபட்டிருந்த நேரத்தில் அருகில் மற்றுமொரு நபர் பொலிஸாரை நோக்கி துப்பாக்கிப் பிரயோகம் செய்துள்ளார்.

உடனடியாக செயற்பட்ட பொலிஸார் கொள்ளையர்கள் இருக்கும் இடத்திற்கு சென்றுள்ளனர். அங்கு இரண்டு தரப்பினருக்கும் இடையில் துப்பாக்கிப் பிரயோகம் நடந்துள்ளது.

கொள்ளையில் ஈடுபட வந்த சிலர் அங்கிருந்து தப்பிச் சென்றுள்ளனர். காயமடைந்த மூன்று பொலிஸார் மற்றும் மேலும் இருவர் வைத்தியசாலையில் அனுமதிக்கப்பட்டுள்ளனர்.

காயமடைந்தவர்களில் பெண் ஒருவரும் உள்ளடங்குவதாக வைத்தியசாலை வட்டாரங்கள் தெரிவித்துள்ளன.

இதேவேளை கொள்ளையர்கள் வந்த இரண்டு மோட்டார் சைக்கிள்கள் மற்றும் இயந்திர துப்பாக்கி என்பவற்றை பொலிஸார் கைப்பற்றியுள்ளனர்.

திருகோணமலை துறைமுக அதிகார சபைக்கு சொந்தமான வனப்பாதுகாப்பு பகுதிக்குள் அனுமதியின்றி நுழைந்து “செல்பி” எடுத்த நான்கு பேரையும் ஒரு இலச்சம் ரூபாய் சரீர பிணையில் செல்லுமாறு நீதவான் உத்தரவிட்டுள்ளார்.

இலங்கை துறைமுக அதிகார சபைக்கு சொந்தமான லைட் பார் என்ற இடத்திற்கு நான்கு பேர் சென்று செல்பி எடுத்துக் கொண்டிருக்கும் போது கடற்படையினர் கைது செய்துள்ளனர்.

கைது செய்யப்பட்ட நான்கு பேரையும் துறைமுக அதிகார சபை அதிகாரிகளிடம் கடற்படையினர் ஒப்படைத்துள்ளர்.

இதனையடுத்து நேற்று நான்கு பேரையும் திருகோணமலை நீதிமன்ற பிரதான நீதவான் எம்.எச்.எம்.ஹம்ஸா முன்னிலையில்ஆஜர்படுத்திய போதே இந்த உத்தரவு பிறப்பிக்கப்பட்டுள்ளது.

இவ்வாறு கைது செய்யப்பட்டு பிணையில் விடுவித்தவர்கள் சீனக்குடா பகுதியைச் சேர்ந்த 15,17,19 வயதுடையவர்கள் எனவும் துறைமுக பொலிஸார் குறிப்பிட்டுள்ளனர்.

லபுதுவ உயர் தொழில்நுட்ப நிறுவனத்தின் விவசாய பீடத்தில் இரண்டாம் ஆண்டு பயிலும் புதிய மாணவிகளுக்கு பாலியல் ரீதியாக பகிடிவதை கொடுத்ததாக கூறப்படும் 4 மாணவிகளையும் ஒரு மாணவரையும் கைதுசெய்துள்ளதாக அக்மீமன பொலிஸார் தெரிவித்துள்ளனர்.

புதிய மாணவிகளுக்கு பாலியல் ரீதியான பகிடிவதை கொடுக்கப்படுவதாக கிடைத்த முறைப்பாட்டை அடுத்தே இந்த மாணவர்கள் கைதுசெய்யப்பட்டுள்ளனர்.

கைதுசெய்யப்பட்ட மாணவர்களிடம் வாக்குமூலம் பெறப்பட்டு வருவதாக பொலிஸார் கூறியுள்ளனர்.

விடுதியில் தங்கியிருந்த மாணவிகளே பாலியல் ரீதியான பகிடிவதை உள்ளாக்கப்பட்டுள்ளனர். கைதுசெய்யப்பட்ட மாணவிகளும், மாணவரும் காலி நீதவான் நீதிமன்றத்தில் ஆஜர்ப்படுத்தப்பட உள்ளனர்.

ரயிலில் யாசகத்தில் ஈடுபட்டு கொண்டே ஹெரோயின் போதைப்பொருள் விற்பனையில் ஈடுபட்ட பெண் ஒருவர் கைது செய்யப்பட்டுள்ளார். கம்பஹா பொலிஸ் நிலைய புலனாய்வு பிரிவினர் இவரை கைது செய்துள்ளனர்.

தெமட்டகொடயிலிருந்து ரயிலில் போதை பொருள் விற்பனை செய்யப்படுவதாக கம்பஹா பொலிஸிற்கு கிடைத்த தகவல் ஒன்றின் அடிப்படையில் இந்த கைது நடவடிக்கை இடம்பெற்றுள்ளது.

இதனை தொடர்ந்து 13 ஹெரோயின் பக்கட்களுடன் குறித்த பெண் கைது செய்யப்பட்டார். இப்பக்கற்றுக்கள் ஒவ்வொன்றும் ஆயிரத்து 200 ரூபாவுக்கு விற்பனை செய்யப்பட்டுள்ளன. குறித்த பெண் தனது ஆடையில் மறைத்து வைத்து இவற்றை விற்பனை செய்துள்ளார்.

இந்த ஹெரோயின் பக்கற்றுக்கள் கிராம பகுதிகளுக்கு விநியோகிக்கப்பட்டு வந்ததாக ஆரம்ப கட்ட விசாரணைகள் மூலம் தெரிய வந்தது. 49 வயதான குறித்த பெண் வத்துரகட தெமட்டலந்த பகுதியை சேர்ந்தவர் என பொலிஸார் தெரிவித்துள்ளனர்.

வெள்ளவத்தை – பம்பலப்பிட்டி பகுதியில் வேக கட்டுப்பாட்டை இழந்த கார் ஒன்று கால்வாய்க்குள் பாய்ந்து விபத்துக்கு உள்ளாகி உள்ளது.

பம்பலப்பிட்டி சென் பீற்றர் கல்லூரிக்கு அருகிலுள்ள பாலத்தை உடைத்துக் கொண்டு பயணித்த கார் கடுமையாக சேதமடைந்துள்ளது.

பாலத்துக்கு துணையாக அமைக்கப்பட்ட இரும்பு சட்டகத்தில் கார் பயணித்துள்ளதுடன், அருகிலிருந்த தூணில் மோதியுள்ளது.

இன்று அதிகாலையில் இந்த அனர்த்தம் ஏற்பட்டதாக பம்பலப்பிட்டி பொலிஸார் தெரிவித்துள்ளனர்.

காரில் பயணித்தவர்கள் ஆபத்தான நிலையில் களுபோவில வைத்தியசாலையில் அனுமதிக்கப்பட்டுள்ளனர்.

விபத்துக்குள்ளானவர்களின் பெயர் விபரங்கள் இன்னும் வெளியாகவில்லை. சம்பவம் தொடர்பில் பம்பலப்பிட்டி பொலிஸார் மேலதிக விசாரணைகளை மேற்கொண்டு வருகின்றனர்.

பேய், பூதம் தொடர்பில் பொய் பிரச்சாரம் செய்ய வேண்டாம் என யாழ். ஊடகங்களிடம் சுகாதாரப் பிரிவினர் கோரிக்கை விடுத்துள்ளனர்.

யாழ்ப்பாணத்தின் பல இடங்களில் இரவில் அமானுஸ்ய சக்திகளின் நடமாட்டம் அதிகரித்துள்ளதாகவும், அவை வீதிகளில் ஆங்காங்கே தென்படுவதாகவும் யாழ். ஊடகங்கள் செய்தி வெளியிட்டுள்ளன.

ஒரு கையில் இரத்தம் வழியும் கறுப்பு சேவல் ஒன்றை தாங்கியவாறு வெள்ளை உடையணிந்த பெரிய உருவமொன்று உலவுவதாக யாழ்ப்பாணத்தைச் சேர்ந்தவர்கள் தெரிவிக்கின்றனர்.

சாதாரண மனிதர்களை விடவும் இந்த பேய் உயரமானது எனவும், கடந்த காலங்களில் வீடுகளில் தென்பட்ட பூதம் தற்போது வீதிகளிலும் தென்படுவதாக தெரிவிக்கப்படுகிறது.

இந்த அமானுஸ்ய சக்தி தொடர்பில் செய்தி வெளியிட்ட யாழ்ப்பாண ஊடகங்களிடம் மாகாண சுகாதார அதிகாரிகள், இவ்வாறு பிரச்சாரம் செய்ய வேண்டாம் என கோரியுள்ளனர்.

அத்துடன், பேய்கள் மற்றும் பூதங்கள் என்று எதுவும் கிடையாது எனவும் சுகாதார அதிகாரிகள் தெரிவித்துள்ளனர்.

எனினும் யாழில் உலவி வரும் பேய் பூதம் தொடர்பிலான புகைப்படங்களை ஊடகங்கள் வெளியிட்டிருந்த நிலையில் யாழ். ஊடகங்கள் மீது சுகாதார அதிகாரிகள் அழுத்தங்களை பிரயோகிப்பதனை நிறுத்திக் கொண்டுள்ளதாக தெரிவிக்கப்படுகிறது.

இலங்கையின் பிரபல நடிகையான உதாரி பெரேரா அழகு கலை நிலையத்தில் இருந்து விரட்டியடிக்கப்பட்டதாக தகவல் வெளியாகி உள்ளது.

நாவலப்பிட்டியில் உள்ள அழகு கலை நிலையத்திற்கு இன்று காலை குறித்த நடிகை சென்றுள்ளார்.

அழகு கலை நிலையத்தில் இருந்த பெண்ணுக்கு, குறித்த நடிகையை நீண்ட காலம் தெரியும் என்பதனால், அவரது வேலைகளை வேகமாக செய்து கொடுத்துள்ளார்.

திடீரென அழகு கலை நிலையத்தில் இருந்த பெண்ணுக்கும் நடிகைக்கும் இடையில் வாய்த்தகராறு ஏற்பட்டுள்ளது.

குறித்த நிலையத்தில் சேவை செய்யும் ஊழியர்கள் இந்த வாய்த்தகராறினை நிறுத்துவதற்கு முயற்சித்துள்ளனர்.

வாய்த்தகராறு நீடித்தமையினால் குறித்த நடிகையின் கழுத்தை பிடித்து வெளியே விரட்டியடிக்கப்பட்டுள்ளதாக தெரிவிக்கப்படுகின்றது.

கிளிநொச்சி – அம்பாள்குளம் கிராமத்தில் இன்று காலை 7 மணி முதல் மதியம் 12.30 மணி வரை வன ஜீவராசி திணைக்கள உத்தியோகத்தர் ஒருவர் உட்பட பத்து பேரை தாக்கிய சிறுத்தை புலியை பொது மக்கள் அடித்துக் கொலை செய்துள்ளனர்.

அம்பாள்குளம் விவேகானந்தா வித்தியாலயத்திற்கு பின்புறமாக மக்கள் குடியிருப்பு பகுதியில் ஆட்களற்ற காணியில் புகுந்த சிறுத்தையை பிடிக்க சென்ற இருவரை முதலில் தாக்கியுள்ளது.

இதனை தொடர்ந்து கிளிநொச்சி வனஜீவராசிகள் திணைக்களத்திற்கு பொது மக்களால் அறிவிக்கப்பட்டுள்ளது.

இதனையடுத்து சம்பவ இடத்திற்கு புலியை பிடிப்பதற்கான ஆயத்தமின்றி வனஜீவராசிகள் திணைக்கள அதிகாரிகள் வருகை தந்துள்ளனர். இதனால் பொது மக்களுக்கும் அவர்களுக்குமிடையே கருத்து முரண்பாடுகள் ஏற்பட்டுள்ளது.

இதன்பின்னர் யாழ்ப்பாணத்தில் இருந்து வனஜீவராசிகள் திணைக்கள மருத்துவர் வருவதாகவும் அறிவிக்கப்பட்டுள்ளது.

மதியம் பதினொரு மணியளவில் வனஜீவராசிகள் திணைக்கள மருத்துவர் உட்பட சில அதிகாரிகள் வருகைதந்தனர். இதற்கு இடையில் எட்டு பேரை சிறுத்தை தாக்கியுள்ளது.

பின்னர் வனஜீவராசிகள் திணைக்கள அதிகாரிகள் சுற்றி வளைத்த போது அத் திணைக்கள உத்தியோகத்தர் ஒருவரையும் சிறுத்தை தாக்கியுள்ளது.

இதன் பின்னர் கிராம பொது மக்கள் பொல்லுகளுடன், சென்று சுற்றி வளைத்து தேடிய போது பற்றைக்குள் இருந்து வெளியேறிய சிறுத்தை அங்கிருந்த ஒருவரை தாக்க முற்பட்டுள்ளது.

இதன்போது மக்கள் பொல்லுகளைக் கொண்டு தாக்கி சிறுத்தையை கொலை செய்துள்ளனர்.

இதேவேளை, தற்போது சிறுத்தை தாக்கிய அனைவரும் கிளிநொச்சி மாவட்ட வைத்தியசாலையில் சிகிச்சை பெற்றுவருகின்றனர்.

மேலும், சம்பவ இடத்தில் கிளிநொச்சி பொலிஸார், கிராம அலுவலர் உட்பட பலர் இருந்துள்ளமை குறிப்பிடத்தக்கது.

மன்னார் பிரதான பாலத்தடி கடற்பகுதியில் இன்று காலை மீன் பிடிக்கச் சென்ற மீனவர் ஒருவரின் வலையில் மர்மப்பொருள் ஒன்று சிக்கிய நிலையில் குறித்த பொருள் பிள்ளையார் சிலை என தெரிய வந்துள்ளது.

மன்னார் பிரதான பாலத்தடி கடற்கரையில் இன்று வியாழன் (21) காலை மீனவர் ஒருவர் மீன் பிடிக்க கடலில் போட்டிருந்த வலையை கடலில் இருந்து எடுத்துக்கொண்டிருந்தார்.

இதன் போது குறித்த வலையில் மர்ம பொருள் ஒன்று சிக்கிய நிலையில் குறித்த மீனவர் மர்மப்பொருளை மீட்டு கடற்கரைக்கு கொண்டு சென்றார்.

இதன் போது பலர் அதனை பார்க்க ஒன்று கூடியனர். இதன் போது அந்தப் பொருளில் உள்ள மண்ணை அகற்றிய நிலையில் குறித்த மர்மப்பொருள் பிள்ளையார் சிலை என தெரிய வந்துள்ளது.

இப்பிள்ளையார் சிலை பழைமை வாய்ந்ததா?அல்லது அண்மைக்காலங்களாக மன்னாரில் இனம் தெரியாத நபர்களினால் உடைக்கப்பட்டு கொண்டு செல்லப்பட்ட சிலையா? என்பது தொடர்பில் மீனவர்கள் மத்தியில் சந்தேகம் ஏற்பட்டுள்ளது.

யாழ்ப்பாணத்தின் சில பிரதேசங்களைச் சேர்ந்த மக்கள் மீண்டுமொருமுறை அமானுஷ்ய பயத்தில் உறைந்து போயுள்ளார்கள்.

அங்குள்ள சில பிரதேசங்களில் மக்கள் மத்தியில் பேய்கள் தொடர்பான பயம் தோன்றியுள்ளது.பேயைக் கண்டதாகவும், அப்பேய் ஒரு கையில் இரத்தம் வடியும் கோழியை ஏந்தியுள்ளதைப் பார்த்ததாகவும் சிலர் கூறுகின்றார்கள்.

மிகவும் உயரமான, முகம் தெளிவற்ற, வெள்ளை ஆடையைப் போர்த்தியபடி பேய் உலாவுவதாக அவர்கள் கூறுகின்றார்கள். பேய் வெளியே வருவது அதிகாலை ஒரு மணி அளவிலாகும் என்கிறார்கள் அவர்கள்.

ஆவிகளின் தொல்லை இருப்பதால் இரவில் யார் பேசினாலும் கதவைத் திறக்காத நிலைமை தற்போது ஏற்பட்டுள்ளது. அவர்கள் இரவில் செல்லும் பயணங்களையும் குறைத்துக் கொண்டுள்ளார்கள்.

வடமாகாண முதலமைச்சர் சீ. வி. விக்னேஸ்வரன் தனக்கு நாகம் ஒன்றின் உதவி உள்ளதாக யாழ்ப்பாணத்தில் கோயிலொன்றில் இடம்பெற்ற வருடாந்த உற்சவத்தில் பங்குபற்றும் போது குறிப்பிட்டுள்ளார்.

அவர் தனக்கும் நாகத்துக்கும் பல வருடங்காக தொடர்புள்ளதாகக் கூறியுள்ளார்.தனது வாழ்க்கையின் மிக முக்கிய சந்தர்ப்பங்களில் நாகம் உதவியுள்ளதாக அவர் கூறியுள்ளார்.

அவர் சொல்லாமல் சொல்வதென்னவென்றால் வட மாகாண முதலமைச்சர் பதவி கிடைக்கும் போது அந்த நாகம் உதவி செய்துள்ளதாக குறிப்பிடுகின்றார்.

உயர்நீதிமன்ற நீதிபதியாகவிருந்து, பிரபுத்துவ அரசியலின் மூலம் அறிவு பெற்ற, ஆராயும் புத்தியுடைய அமைச்சர் விக்னேஸ்வரனே தனக்கு முன்னால் நாகம் தோன்றுவதாகக் கூறும் போது சாதாரண யாழ்ப்பாண மக்களுக்கு கண்முன்னால் பேய் தோன்றுவது ஆச்சரியப்படக் கூடிய விடயமல்ல.

யாழ்ப்பாணத்தில் ஓரிடத்தில் பேயிருப்பதாக முதன் முதலில் தகவலை யாழ்ப்பாண சந்தைக்கு அதிகாலையில் கொண்டு வந்தவர் மானிப்பாயைச் சேர்ந்த சின்னையா கிரிதரன் ஆவார்.

“நான் இரவு வீட்டுக்கு வரும் போது பாதையில் வெள்ளைத்துணி போர்த்திய ஒருவரைக் கண்டேன். கையில் கறுப்புநிற பொதியொன்று இருந்தது.’யார்’ என்று கேட்ட போது ஒரேயடியாக அவர் காணாமல் போய் விட்டார். அது நிச்சயம் பேய்தான்” எனக் கூறினார் அவர்.

கதையைக் கேட்ட சந்தையிலிருந்த நண்பர்கள் சின்னையாவை கேலி செய்ததோடு எச்சரிக்கையும் செய்தார்கள். இந்தக் கதை பரவினால் ஆவிகளுக்குப் பயந்து போய் இந்த சந்தையின் வியாபாரமும் குறைந்து விடும். வாழ்க்கையை நடத்துவதிலும் சிரமம் ஏற்படும் என அவர்கள் கூறினார்கள்.

ஆகவே சின்னையாவின் இந்தக் கதையை யாருக்கும் கூறுவதில்லையென முடிவு செய்தார்கள். ஆனால் நான்கு நாட்கள் கூடச் செல்லவில்லை.மரக்கறி வாங்க வந்த ஒருவர் வியாபாரிகளுக்கு புதிய செய்தியொன்றைக் கூறினார்.

“தெரியுமா செய்தி? யாழ்ப்பாணம் கொழும்புத்துறை கிராமத்துக்கு நேற்று இரவு பேயொன்று வந்ததாக ஆட்களெல்லாம் பயந்து போய் இருக்கிறார்கள். அந்தப் பேயின் ஒரு கையில் கறுப்பு நிறக் கோழியொன்று உண்டென்றும் அந்தக் கோழி இரத்தம் வடிந்தபடி இருப்பதாகவும், அதனை பேய் அணைத்தபடி சென்றதாகவும் கூறுகின்றார்கள். முழு உடம்பையும் வெள்ளை ஆடையால் போர்த்தியபடி இருந்ததாம் அந்த உருவம்” என்று கூறினார் அவர்.

வியாபாரிகள் அமைதியாகக் கேட்டுக் கொண்டிருந்தார்கள். மரக்கறி வாங்க வந்தவர் சைக்கிளில் ஏறி சென்றவுடன் மீண்டும் கலந்துரையாடத் தொடங்கினார்கள்.“அதுதான் நானும் கூறினேன். நான் கூறியதை நீங்கள் நம்பவில்லை. நானும் அதையே தான் கண்டேன். நான் கறுப்பு நிற பார்சல் என்று கூறினேன். ஆனால் அது கறுப்பு நிற கோழிதான்” என்று சின்னையா திரும்பவும் கூறத் தொடங்கினார்.

சிறிது நாட்களிலேயே யாழ்ப்பாணம் முழுவதும் பேய்க்கதை பரவி விட்டது. தமிழ் இணையத்தளங்கள் பலவற்றிலும் இச்செய்தி வெளியானது.

அதேவேளையில் சுகாதார அதிகாரிகள் இணையத் தள ஆசிரியர்களை எச்சரித்தார்கள்.”கடந்த முறையும் நீங்கள்தான் ஆவி இருப்பதாகக் கூறி முழு யாழ்ப்பாணத்தையும் பயமுறுத்தினீர்கள். யாழ்ப்பாண மக்கள் இன்புளுவன்சா காய்ச்சல் காரணமாகத்தான் இறந்தார்கள். தற்போது காலியிலும் அந்த நோய் காரணமாகத்தான் நோயாளிகள் இறக்கின்றார்கள். அதனால் தயவு செய்து இந்த வேலையை நிறுத்துங்கள்.

இனிமேல் யாழ்ப்பாணத்தில் பேய் உலாவுவதாக எழுத வேண்டாம்”.யாழ்ப்பாண சுகாதார அதிகாரிகள் இணையத் தள ஆசிரியர்களுக்கு விடுத்த வேண்டுகோள் சில இணையத் தளங்களில் வெளிவந்தாலும், “யாழ்ப்பாணத்தில் பேய்கள் இல்லை. அது பொய்” என எந்தவோரு இணையத்தளமும் பதிவிடவில்லை.

அடுத்த நாள் அவர்கள் பணிபுரிய வந்த போது சிலர் அவர்களைச் சந்திக்க வந்திருந்தார்கள். அவர்கள் சும்மா வரவில்லை. பேயின் படங்கள் இரண்டையும் கொண்டு வந்திருந்தார்கள்.

“நேற்று கமெராவில் பேயின் படம் பிடிபட்டுள்ளது” என்று கூறியபடி கராஜ் உரிமையாளரொருவர் பேயின் புகைப்படத்தை முதன் முதலாக காட்டினார்.

“நேற்று அதிகாலை சில அமானுஷ்யமான சத்தங்கள் கராஜிலிருந்து கேட்டன. நாம் காலையில் அங்கு சென்று பார்த்த போது வித்தியாசமாகத் தெரிந்ததால் சீ.சீ.ரி.வி கமெராவை பரிசோதித்த போது மங்கலாக இப்படங்கள் தெரிந்தன” என்று அவர் கூறினார்.

பேயோ ஆவியோ புகைப்படங்களில் அகப்படாது என்பது பேய்களை நம்புவோரின் கருத்தாகும். ஆனால் யாழ்ப்பாணப் பேய் சீ.சீ.ரி. வி காட்சிகளிலும் பதிவாகியுள்ளது.

கராஜ் உரிமையாளருக்குக் கிடைத்த யாழ்ப்பாணப் பேயின் புகைப்படத்தை யாழ்ப்பாணத்திலுள்ள இணையத்தளங்கள் மற்றும் பத்திரிகைகள் முன்பக்கச் செய்தியாக வெளியிட்டிருந்தன.

அதேவேளை பேயை ஏற்கனவே பார்த்தவர்களும் “இந்தப் பேயைத்தான் நாங்களும் கண்டோம்” என உறுதி செய்தார்கள்.

தற்போது யாழ்ப்பாணத்தில் பேயைக் கண்டவர்கள் பேயைப் பற்றிக் கதைக்கிறார்கள். ஆனால் பேயைப் பற்றி எதுவித முறைப்பாடும் பொலிஸாருக்குக் கிடைக்கவில்லை. அதனால் அவர்களும் அது பற்றி ஆராய முயற்சி செய்யவில்லை.

அதற்குக் காரணம் இந்தப் பேய் யாருக்கும் எவ்வித தீங்கும் செய்யவில்லை. வேண்டுமேன்றே யாரையும் பயமுறுத்தவும் இல்லை. அதைத் தவிர பேயை தேடுவதை விட யாழ்ப்பாணத்திலுள்ள ஆயுதங்களைப் பொலிஸார் தேட வேண்டியுள்ளது.

யாழ்ப்பாண சுகாதார அதிகாரிகளின் கருத்துப்படி உலகில் பேயென்று ஒன்றுமில்லை. இவ்வாறு நடிப்பது மாறு வேடமணிந்த மனிதன் என்றால் வெகுவிரைவில் யாழ்ப்பாண மக்களிடம் அகப்பட்டு, வயிறு புடைக்க சாப்பிட்டு ஏதோவொரு சந்தியில் கிடப்பதைக் காணலாம்.

இந்தப் பேய்க் கதையின் பின்னணியில் உள்ள நாடகம் என்னவென்று வெளிவரும் வரை மக்களின் பயம் போகாது.அவர்கள் வழமை போல் இரவில் பயணங்கள் செல்ல மாட்டார்கள். யாழ்ப்பாணப் பேயின் விபரங்கள் வெளிவரும் வரை பொறுமையுடன் காத்திருப்போம்.

-தமிழ்வின்-