யாழ்ப்பாணத்தில் பெண்ணொருவர் தீயிட்டு தற்கொலை செய்து கொண்டுள்ளதாக வைத்தியசாலைத் தகவல்கள் தெரிவிக்கின்றன. ஆனைக்கோட்டை சாவற்கட்டைச் சேர்ந்த 35 வயதான க.விஜயா என்பவரே நேற்று உயிரிழந்துள்ளார்.

பிள்ளைகள் இல்லை என்ற மன உளைச்சல் காரணமாக விரக்தியில் தற்கொலை செய்து கொண்டதாக மரண விசாரணையில் தெரிய வந்துள்ளது.

கடந்த 21 ஆம் திகதி அவர் வீட்டுக் குளியலறையில் மண்ணெண்ணெய் ஊற்றி தீ மூட்டி தற்கொலைக்கு முயன்றுள்ளார்.

எனினும் அதன் வலியை தாங்க முடியாமல் வீட்டுக்குள் ஓடிச் செல்ல அவரது தாயார் தீயை அணைத்துள்ளார். உடனடியாகவே யாழ். போதனா வைத்தியசாலையில் சேர்த்தார். எனினும் சிகிச்சை பயனளிக்காது அவர் நேற்று உயிரிழந்தார்.

தமக்குப் பிள்ளை இல்லையே என்று அவர் கடுமையாக மன உளைச்சலுக்கு ஆளாகியிருந்தார். இந்தியாவுக்குச் சென்று தீர்வு பெறலாம் என்று அவரது கணவன் கூறியிருந்த நிலையில் இப்படி நடந்துள்ளது. மனைவியின் தவறான முடிவு குறித்து கணவன் பெரிதும் அதிர்ச்சியடைந்துள்ளதாக உறவினர்கள் தெரிவித்துள்ளனர்.

திடீர் இறப்பு விசாரணை அதிகாரி ந.பிறேமகுமார் விசாரணையை மேற்கொண்ட நிலையில், சடலம் உறவினர்களிடம் ஒப்படைக்கப்பட்டது.

யாழ். குறிகட்டுவான் கடலிற்கு மீன்பிடிக்கச் சென்ற மீனவர்கள் மூவரைக் காணவில்லை என யாழ்ப்பாணம் பொலிஸ் நிலையத்தில் முறைப்பாடு பதிவு செய்யப்பட்டுள்ளது.

யாழ். நாவாந்துறை வடக்குப் பகுதியைச் சேர்ந்த தோனிஸ் மல்கன் (வயது 44) உட்பட செபமாலை அலெக்ஸ் மற்றும் ரூபன் ஆகியோரே காணாமல் போயுள்ளனர்.

நேற்று முன்தினம் மதியம் குறிகட்டுவான் கடலிற்கு மீன்பிடிக்கச் செல்வதாக மனைவியிடம் கூறிச் சென்ற படகு உரிமையாளர் மற்றும் அவருடன் வேலைபார்க்கும் இருவரும், இன்று காலை வரை வீடு திரும்பவில்லை.

நேற்று ஞாயிற்றுக்கிழமை காலை 8 மணியளவில் தோனிஸ் மல்கன் தனது மனைவிக்கு தொலைபேசி அழைப்பினை மேற்கொண்டு நடுக்கடலில் திசை தெரியாது நிற்பதாகவும், இந்த தகவலை நயினாதீவு கடற்படையினருக்கு அறிவிக்குமாறு தெரிவித்துள்ளார்.

அதன் பின்னர் தோனிஸ் மல்கனின் தொலைபேசி செயலிழந்து இருந்துள்ளது. இதன்பின்னர், தோனிஸ் மல்கனின் மனைவி நேற்று யாழ்ப்பாணம் பொலிஸ் நிலையத்தில் முறைப்பாடு பதிவு செய்துள்ளார்.

அந்த முறைப்பாட்டின் பிரகாரம், கடற்படையின் உதவியுடன் தேடுவதற்கான நடவடிக்கைகளை முன்னெடுக்கவுள்ளதாக யாழ்ப்பாணம் பொலிஸார் தெரிவித்தனர்

கேரளாவில் இருந்து கொழும்புக்கு 227 பயணிகளுடன் புறப்பட்ட ஸ்ரீலங்கன் ஏர்லைன்ஸ் விமானம் ஓடுதள விளக்கில் மோதியதால் விமான நிலையத்தில் சிறிது நேரம் பரபரப்பு ஏற்பட்டது.

கொச்சியிலிருந்து 227 பயணிகளுடன் ஸ்ரீலங்கன் ஏர்லைன்ஸ் விமானம் இன்று மாலை கொழும்புக்கு புறப்பட்டு சென்றது.

ஓடுதளத்தில் இருந்து விமானம் மேலே எழும்பும் போது விமானத்தின் சக்கரம் ஓடுதளத்தின் எல்லையில் இருக்கும் விளக்கில் பயங்கரமாக மோதியதையடுத்து, விமானம் உடனடியாக நிறுத்தப்பட்டது.

இதனைத்தொடர்ந்து பயணிகள் பத்திரமாக தரையிறக்கப்பட்டனர், சிறிது நேரத்திற்கு ஓடுதளம் மூடப்பட்டு, நிலைமை சரிசெய்யப்பட்ட பின்னர் ஓடுதளம் திறக்கப்பட்டது. இந்த விபத்தில் விமானத்தின் சக்கரம் சேதமடைந்ததாக தெரிவிக்கப்பட்டுள்ளது.

மே 18ம் திகதி கிளிநொச்சியில் அமைந்துள்ள தனியார் வங்கி ஒன்றில் நினைவேந்தல் நிகழ்வினை செய்தமை தொடர்பில், குறித்த வங்கியின் முகாமையாளர் ஒருவரும் சிற்றூழியர் ஒருவரும் பதவி நீக்கம் செய்யப்பட்டுள்ளதாக தகவல்கள் வெளியாகியுள்ளன.

இது தொடர்பில் ஜனநாயக மக்கள் முன்னணியின் அமைப்புச் செயலாளர் வி.ஜனகன் ஆகிய நான் குறித்த வங்கியின் நடவடிக்கைக்கு எனது கண்டனத்தை தெரிவித்து கொள்கிறேன்.

போர் நடந்து பல்லாயிரம் மக்கள் இறந்த இடத்தில் இருக்கும் தனியார் வங்கி, மக்களின் மன நிலையினைப் புரிந்துகொள்ளத் தவறியதா என்ற கேள்வியே என் மனதில் எழுகின்றது.

கிளிநொச்சியில் இயங்கும் இந்தக் கிளையில் இருந்த ஊழியர்கள் செய்தது நிறுவனம் ஒன்றின் வரையறைகளுக்குள் வரவில்லை என்றாலும், அதனைக் கையாளும் போது அங்கு உள்ள மக்களின் மனநிலையையும் கருத்தில் எடுத்திருக்க வேண்டும்.

அந்த ஊழியர்களும் வாடிக்கையாளர்களும் அந்தக் கொடிய போரில் தங்கள் உறவுகளை இழந்தவர்களாக இருக்கலாம். அவர்களுக்கு மற்றவர்கள் போல் துக்கம் அனுஸ்டிக்க தேவை ஏற்பட்டிருக்கலாம்.

ஒருவேளை இதனை அந்த வங்கியின் தலைமை விரும்பாமல் இருந்தால் கூட, அப்பிரதேச மக்களின் உணர்வுளுக்கு மதிப்பளித்து அந்த ஊழியர்களை இடைநிறுத்தாது இந்த நிகழ்வு இனிவரும் காலங்களில் தங்கள் கிளைகளில் இடம்பெறாமல் தடுப்பதற்கான அலுவலக ரீதியான கட்டளையைப் போட்டிருக்கலாம்.

அது சரி வங்கியின் தலைமையே, நீங்கள் கூறிய அறிக்கையில் இனமத ரீதியான செயற்பாடுகளுக்கு எமது வங்கி ஒத்துழைப்பு வழங்குவதில்லை எனக்குறிப்பிட்டுள்ளீர்கள்.

அப்படியாயின் கிறிஸ்மஸ் பண்டிக்கைக்கு ஏன் உங்கள் கிளைகளை அலங்கரிக்கிறீர்கள்? வெசக், பொசன் வரும்போது அலங்கரிப்பது மட்டும் அல்லாமல் உங்கள் ஊழியர்கள் தன்சல் (அன்னதானம்) வழங்குகிறார்களே? தைப்பொங்கலுக்கு பொங்குகிறீர்கள். சிங்கள, தமிழ் புது வருடத்துக்கு அந்த கொண்டாடங்களையும் செய்கின்றீர்கள்.

அந்த இடத்தில் மாபெரும் துயரச் சம்பவம் இடம்பெற்றதை நினைவுகூர்கிறார்கள். இதே போல் தானே சுனாமியால் மக்கள் இறந்ததும் நினைவுகூரப்பட்டது. அப்போதும் உங்கள் பல கிளைகள் இந்த அனுதாப நினைவுகூரலை செய்தார்கள். அது தவறாகவில்லையா? அப்போ தமிழர்கள் தங்கள் கொத்துக் கொத்தாக இறந்த உறவுகளை நினைவுகூர்ந்தால் தான் அது இனவாதமா?

இவர்கள் என்ன புலிகளின் மாவீரர் நாளையா அனுஷ்டித்தார்கள்? ஒரு சில இனவாத சக்திகளின் சிந்தனை போல் போரில் இறந்த தமிழர்கள் எல்லாம் புலிகள் என்கிறீர்களா? அப்போது தமிழர்கள் எல்லாம் புலிகளாக? பிறகு எதற்கு அந்தப் புலிகளின்(தமிழர்களின்) வைப்புக்கள், கணக்குகள் உங்கள் வங்கியில்?

அந்த பிரசேதங்களில் உங்கள் கிளைகள்தான் எதற்கு? இந்த நடவடிக்கையினை மீள நீங்கள் பெற்றுக்கொள்ளாவிட்டால் தமிழ் மக்கள் உங்கள் வங்கிக்கு எதிராக திரும்புவதினை நீங்கள் தடுக்க முடியாத விடயமாக மாறும் என்பதனை கவனத்தில் கொள்ளவும்.

இந்த விடயம் தொடர்பில் தேசிய நல்லிணக்க, சகவாழ்வு மற்றும் அரச கரும மொழிகள் அமைச்சரும், எமது கட்சியின் தலைவருமான கௌரவ அமைச்சர் மனோ கணேசனுடன் பேசியுள்ளேன்.

இந்த நடவடிக்கையானது நிச்சயமாக நல்லிணக்கத்துக்கான பாதிப்பை ஏற்படுத்தும் நிகழ்வு. மிக விரைவில் இந்த நடவடிக்கை தொடர்பில் அமைச்சர் குறித்த தரப்பினருக்கு தெரியப்படுத்தி உரிய நடவடிக்கை எடுப்பதாக கூறியுள்ளார்.

வி.ஜனகன்
அமைப்புச் செயலர்கள்
ஜனநாயக மக்கள் முன்னணி

கட்டுநாயக்க பண்டாரநாயக்க சர்வதேச விமான நிலையத்தில் நிறுத்தி வைக்கப்பட்டிருந்த ஸ்ரீலங்கன் விமானத்துடன் நீர் கொண்டு செல்லும் பவுசர் ஒன்று மோதியுள்ளது.

ஸ்ரீலங்கன் விமான சேவைக்கு சொந்தமான A-320 எயார் பஸ் ரகத்திற்கு சொந்தமான விமானமே இவ்வாறு விபத்துக்குள்ளாகியுள்ளது.

இந்த விமானம் இந்தியாவில் இருந்து பயண நடவடிக்கைகளை நிறைவு செய்து விட்டு கட்டுநாயக்க விமான நிலையத்தை வந்தடைந்துள்ளது.

பின்னர் இந்த விமானத்திற்கு நீர் கொண்டு சென்ற பவுசர் ஒன்று அந்த விமானத்தின் பின் பக்கத்தில் மோதியுள்ளது. இதனால் ஒன்றரை கோடி ரூபாய் நட்டம் ஏற்பட்டுள்ளதாக விமான நிலைய பேச்சாளர் ஒருவர் தெரிவித்துள்ளார்.

குறித்த நீர் பவுசரை செலுத்திய ஸ்ரீலங்கன் விமான சேவை சாரதி பணி நீக்கம் செய்யப்பட்டுள்ளார். சாரதி தொடர்பில் தீவிர விசாரணைகள் முன்னெடுக்கப்பட்டு வருகின்றது.