இலங்கையில் நிலவும் சீரற்ற காலநிலை காரணமாக புத்தளம் மாவட்டம் பெரிதும் பாதிக்கப்பட்டுள்ளது. அந்தப் பகுதியில் தற்போதும் மழை பெய்து வருவதால் ஆபத்தான நிலை நீடிப்பதாக வளிமண்டலவியல் திணைக்களம் தெரிவித்துள்ளது

அடைமழையைத் தொடர்ந்து நீர்த்தேக்கங்களின வான் கதவுகள் அனைத்தும் திறக்கப்பட்டுள்ளன. இந்நிலையில் உயிருக்கு ஆபத்து ஏற்படும் என்பதனை அறிந்து கொள்ளாத சிலரின் அறியாமை குறித்து புகைப்படங்கள் வெளியாகியுள்ளது.

வான் கதவுகள் திறக்கப்பட்டுள்ள கொட்டுகச்சி, கச்சிமடுவ நீர்த்தேக்கத்தின் மதில் மீது நின்று, சிலர் மீன் பிடித்துள்ளனர்.

குறித்த பகுதி ஆபத்தான பிரதேசமாக அறிவிக்கப்பட்டிருந்தது. எனினும் அதனை கருத்திற் கொள்ளாமல் நீரில் அடித்துச் செல்லும் மீன்களை பிடிப்பதற்கு சிலர் நடவடிக்கை மேற்கொண்டுள்ளனர்.

இலங்கையில் தொடரும் சீரற்ற காலநிலை காரணமாக இதுவரை 24 பேர் உயிரிழந்துள்ளனர். பலர் காணாமல் போயுள்ளமை குறிப்பிடத்தக்கது.

யாழ்ப்பாணத்தில் ஆடம்பரத்திற்காக மிகவும் விலை உயர்ந்த கையடக்க தொலைபேசி வாங்கிக் கொடுக்க மறுத்தமையினால் மாணவன் ஒருவர் தற்கொலை செய்துள்ளார்.

நீர்வேலி தெற்கைச் சேர்ந்த 17 வயதான கிருஸ்ணபிள்ளை கோபு என்ற மாணவனே இவ்வாறு உயிரிழந்துள்ளார்.

கடந்த 25ஆம் திகதி தாயாரிடம் இலட்ச ரூபா பெறுமதியான தொலைபேசியை வாங்கித் தருமாறு கோரியுள்ளார். எனினும் அதற்கு தாய் மறுப்புத் தெரிவித்துள்ளார். இதனால் ஆத்திரமடைந்த மாணவன் அறைக்குள் சென்று தூக்கில் தொங்கி தற்கொலை செய்துள்ளார்.

தூக்கில் தொங்கிய மகனை உடனடியாக மீட்டு வைத்தியசாலையில் சேர்ந்த போதும், அவர் உயிரிழந்து விட்டதாக வைத்தியர்கள் தெரிவித்துள்ளனர்.

உயிரிழந்த மாணவனின் குடும்பத்தார் கமத்தொழிலில் ஈடுபடுகின்றனர். அவரிடம் ஏற்கனவே இரண்டு தொலைபேசிகள் உள்ளதாகவும், இறப்பு விசாரணையின்போது கூறப்பட்டுள்ளது.

மரண விசாரணையை, திடீர் மரண விசாரணை அதிகாரி ந.பிறேம்குமார் மேற்கொண்டதன் பின்னர் சடலம் உறவினர்களிடம் கையளிக்கப்பட்டது.

60இற்கும் மேற்பட்ட உலக சாதனைகளை படைத்து, உலக சாதனையாளர்களில் இரண்டாம் இடத்தில் இருக்கும் தமிழரான சுரேஷ் ஜோக்கிம் “உலக சமாதானத்திற்கான மரதன்” என்ற கருப்பொருளில் பல நாடுகளை கடந்து லண்டனை வந்தடைந்துள்ளார்.

கடந்த டிசம்பர் மாதம் கிருஸ்மஸ் தினத்தன்று பெத்லகேமிலிருந்து ஆரம்பித்த அவரது பயணத்தின் தொடர்ச்சி கடந்த 26ஆம் திகதி லண்டனில் இடம்பெற்றுள்ளது.

இதன்மூலம் தமிழ் மக்கள் மீது மேற்கொள்ளப்பட்ட யுத்த அழிவுகளை உலகின் முன்கொண்டு வரும் வகையிலான ஏற்பாடுகள் செய்யப்பட்டுள்ளன.

சுரேஷ் ஜோக்கிம், வறுமை, நோய், யுத்தம் இல்லாத உலகம் எனும் உயரிய நோக்கங்களுக்காக இந்த மரதன் ஓட்டப்போட்டி மூலம் உலகின் கவனத்தினை ஈர்க்க கடும் சவால்கள் மத்தியில் உலகின் 72 நாடுகளில் தன் பயணத்தினை மேற்கொண்டுள்ளார்.

பிரித்தானிய தமிழர் பேரவையின் ஒருங்கிணைப்பில் இந்த நிகழ்வு ஏற்பாடு செய்யப்பட்டுள்ளது.

தன் பயணத்தை தொடரும் சுரேஷ் அடுத்ததாக அயர்லாந்தில் மரதன் ஓட்டத்தினை நாளை முன்னெடுப்பதோடு பின் தென் அமெரிக்காவின் சிலி (CHILE) நாட்டிலிருந்து அமெரிக்காவின் பல நகரங்களில் பயணித்து இறுதியில் செப்டெம்பரில் கனடாவில் தனது உலகப் பயணத்தை பல்லாயிரம் மக்கள் மத்தியில் முடிவுக்கு கொண்டு வர திட்டமிட்டுள்ளார்.

யாழில் பிரதேச ஊடகவியலாளர் மீது வாள்வெட்டு சம்பவம் ஒன்று இடம்பெற்றுள்ளது. வாள்வெட்டுக்கு இலக்கானவர் யாழ்.போதனா வைத்தியசாலையில் அனுமதிக்கப்பட்டுள்ளார்.

யாழ்.கொழும்புத்துறை துண்டிப் பகுதியில் இன்று திங்கட்கிழமை (28) அதிகாலை 4.30மணியளவில் இந்த வாள்வெட்டுச் சம்பவம் இடம்பெற்றுள்ளது. கோப்பாய் பகுதியைச் சேர்ந்த செல்வராசா ராஜேந்திரன் (வயது 56) என்பவர் மீதே வாள்வெட்டு இடம்பெற்றுள்ளது.

யாழில் சட்டவிரோத கேபிள் இணைப்புக்கள் செய்பவர்கள் மீது சட்ட நடவடிக்கைகள் முன்னெடுக்கப்பட்டு வரும் நிலையில், யாழில் இருந்து இயங்கும் பிரபல தொலைக்காட்சி நிறுவனத்தின் துணை பத்திரிகை நிறுவனமான காலைக்கதிர் பத்திரிகையின் ஊடகவியலாளரும், பத்திரிகை விநியோகத்தருமான இவர் இன்று அதிகாலை 4.30 கொழும்புத்துறை துண்டிப் பகுதிக்கு பத்திரிகை விநியோகிப்பதற்காக வந்துள்ளார்.

இதன்போது, 5 மோட்டார் சைக்கிளில் 10 ற்கும் மேற்பட்டவர்கள் வந்து கோடரி மற்றும் வாள்களினால் சரமாரியாக வெட்டியுள்ளனர். அதன்போது உயிருடன் விட்டால் தப்பு என்றும் வயரினாலும் தாக்கப்பட்டுள்ளார்.

தாக்குதலுக்கு இலக்கானவர் சம்பவ இடத்தில் இருந்து கத்திய போது, வாள்வெட்டுக்காரர்கள் அவ்விடத்தில் இருந்து தப்பி ஓடியுள்ளனர்.

தாக்குதலுக்கு இலக்கானவர் யாழ். போதனா வைத்தியசாலையில் அனுமதிக்கப்பட்டுள்ளார். தாக்குதலுக்கு இலக்கானவர் 3 பிள்ளைகளின் தந்தையார் என்பதும் குறிப்பிடத்தக்கது.

மீதிப்பணம் அல்லது பற்றுச்சீட்டு வழங்காத பேருந்து சாரதிகள் மற்றும் நடத்துநர்கள் தொடர்பில் அறிவிக்குமாறு தேசிய போக்குவரத்து ஆணைக்குழு, பொது மக்களிடம் கோரிக்கை விடுத்துள்ளது.

இது தொடர்பில் கிடைக்கும் முறைப்பாடுகளை விசாரணை செய்வதற்கு தமது ஆணைக்குழு தயாராக உள்ளதாக ஆணைக்குழுவின் மேல் மாகாண சபை தலைவர் துசித குலரத்ன தெரிவித்துள்ளார்.

உரிய விலையை விடவும் அதிக கட்டணம் அறிவிடும் பேருந்து தொடர்பில் அறிவிக்குமாறு கேட்டுக் கொள்ளப்பட்டுள்ளது. இதற்காக விசேட தொலைபேசி இலக்கம் ஒன்று அறிமுகப்படுத்தி வைக்கப்பட்டுள்ளது.

அவ்வாறான சம்பவங்கள் நிகழ்ந்தால் 0115559595 என்ற இலக்கத்திற்கு தொடர்பு கொள்ளுமாறு கேட்டுகொள்ளப்பட்டுள்ளது.

சட்டவிரோதமான போதைப்பொருட்களை பாவித்து கொண்டாட்டங்களில் ஈடுபட்டுக்கொண்டிருந்த 53 இளைஞர்களையும் 8 யுவதிகளையும் பொலிஸார் கைது செய்துள்ளனர்.

வெயங்கொடை நகரில் நேற்று முன்தினம் (26.05) காலை குடிபோதையில் விபத்துக்குள்ளான மோட்டார் வாகன சாரதியை பொலிஸார் கைது செய்திருந்தனர்.

குறித்த நபரிடமிருந்து கிடைத்த தகவலையடுத்து வெயங்கொடை நகரில் உள்ள விடுதியொன்றில் சட்டவிரோதமான போதைப்பொருட்களை பாவித்து கொண்டாட்டங்களில் ஈடுபட்டுக்கொண்டிருந்த 53 இளைஞர்களையும் 8 யுவதிகளையும் பொலிஸார் கைது செய்துள்ளனர்.

நண்பருடைய பிறந்த நாள் கொண்டாட்டங்களில் இவ்வாறு போதைப்பொருள் பாவித்ததாக குறித்த இளைஞர்கள் பொலிஸாரிடம் தெரிவித்துள்ளனர்.

சம்பவம் தொடர்பில் வெயங்கொடை பொலிஸார் மேலதிக விசாரணைகளை மேற்கொண்டு வருகின்றனர்.