இலங்கையை சூழவுள்ள கடல் பிரதேசங்களிலும் காற்றின் வேகம் அதிகரிக்கும் என எதிர்பாரப்பதாக வளிமண்டலவியல் திணைக்களம் தெரிவித்துள்ளது.

மேல், சப்ரகமுவ, மத்திய, வடமேல் மற்றும் மத்திய மாகாணத்திலும், காலி மற்றும் மாத்தறை ஆகிய மாவட்டங்களிலும் ஓரளவு கடும் காற்று வீட கூடும் என தெரிவிக்கப்படுகின்றது. இந்த பகுதிகளில் காற்று 50 கிலோமீற்றர் வேகத்தில் வீசக்கூடும் என கூறப்படுகின்றது.

நாட்டை சுற்றியுள்ள கடல் பிரதேசங்களில் மணிக்கு 60 முதல் 70 கிலோ மீற்றர் வேகத்தில் வீசக்கூடும் என திணைக்களம் அறிவித்துள்ளது.

மன்னாரில் இருந்து புத்தளம், கொழும்பு, காலி மற்றும் ஹம்பாந்தோட்டை ஊடாக மட்டக்களப்பு வரையிலான கடல் பிரதேசங்களிலேயே இவ்வாறு காற்று வீசும் என எதிர்பார்க்கப்படுகின்றது. இந்த நிலைமை எதிர்வரும் 31ஆம் திகதி வரை நீடிக்கும் என கூறப்படுகிறது.

இதேவேளை, மேல், சப்ரகமுவ, மத்திய மற்றும் வடமேல் ஆகிய மாகாணங்களிலும், காலி மற்றும் மாத்தறை ஆகிய மாவட்டத்திலும் இன்றைய தினம் மழை பெய்யும் என திணைக்களம் குறிப்பிட்டுள்ளது.

வவுனியா, பரந்தன் ஊடாக வற்றாப்பளை கண்ணகை அம்மன் ஆலயத்திற்கு சென்ற பக்தர்களின் வாகனத்தை, மோட்டார் சைக்கிளில் வந்த குழுவொன்று இடைமறித்து அவர்களின் தங்க நகைகளை அபகரித்து சென்றுள்ளனர். குறித்த சம்பவம் சற்றுமுன்னர் இடம்பெற்றுள்ளது.

கிளிநொச்சி, தர்மபுரம் பகுதியைச் சேர்ந்த இளைஞர்கள் மற்றும் கரைச்சி பிரதேச சபை உறுப்பினர் ஜீவராசா ஆகியொர் இணைந்து குறித்த மோட்டார் சைக்கிளில் வந்த குழுவைச் சேர்ந்த இருவரை மடக்கிபிடித்துள்ளனர்.

அத்துடன், தர்மபுரம் பொலிஸாரிடம் குறித்த இருவரும் ஒப்படைக்கப்பட்டுள்ளதாகவும், மோட்டார் சைக்கிளும் கைப்பற்றப்பட்டுள்ளதாக தெரிவிக்கப்படுகின்றது.

மேலும், சம்பவம் தொடர்பான விசாரணைகள் தர்மபுரம் பொலிஸாரால் துரிதமாக மேற்கொள்ளப்பட்டு வருவதாகவும் தெரிவிக்கப்பட்டுள்ளது.

கிரிந்திவெல்ல – முதுன்பிட்டிகந்த பகுதியில் கூரிய ஆயுதத்தால் தாக்கி நபரொருவர் கொலை செய்யப்பட்டுள்ளார்.

இருவர் இடையே ஏற்பட்ட வாயத்தகராறு அதிகரித்து நேற்று மாலை இந்த கொலை இடம்பெற்றுள்ளதாக காவல்துறை தெரிவித்துள்ளது. சம்பவத்தில் முதுன்பிட்டிகந்த – ரதாவான பிரதேசத்தை சேர்ந்த 39 வயதான குடும்பஸ்தரே கொல்லப்பட்டுள்ளார்.

கொலை செய்த நபர் இனங்காணப்பட்டுள்ளதாகவும், அவர் தற்போது அப்பகுதியில் இருந்து தப்பிச் சென்றுள்ளதாகவும் காவல்துறை குறிப்பிட்டுள்ளது.

சந்தேக நபரை கைது செய்வதற்கான விசாரணைகள் ஆரம்பிக்கப்பட்டுள்ள நிலையில், சடலம் தொடர்பான பிரேத பரிசோதானை இன்று இடம்பெறவுள்ளது.

தனது மனைவின் சடலத்தை பெற்றுக்கொள்ள முடியவில்லை என தெரிவித்து கணவர் அவரது வீட்டின் அருகில் உள்ள மரமொன்றில் தூக்கிட்டுத் தற்கொலை செய்து கொண்டுள்ளார். பொலன்னறுவை அபேபுரகம பிரதேசத்தை சேர்ந்த நபரொருவரே இவ்வாறு தற்கொலை செய்து கொண்டுள்ளார்.

அவர் இதற்கு சில வருடங்களுக்கு முன்னர் மாவனெல்லையில் உள்ள அவரது உறவினரொருவரின் வீட்டிற்கு வந்துள்ள நிலையில் , அயல்வீட்டில் இருந்த பெண்ணொருவரை காதலித்துள்ளார்.

குறித்த பெண்ணின் பெற்றோர் மற்றும் உறவினர்கள் இந்த தொடர்பிற்கு எதிர்ப்பு தெரிவித்துள்ளதாக குறிப்பிடப்பட்டுள்ளது.எனினும் , இருவரும் வீட்டை விட்டு வௌியேறி பொலன்னறுவை அபேபுரகல பிரதேசத்தில் அமைந்துள்ள இளைஞரின் வீட்டில் வசித்து வந்துள்ளனர்.

பின்னர், பெண்ணின் பெற்றோர் மற்றும் உறவினர்கள் வந்து அந்த பெண்ணை அழைத்துச் செல்ல முற்பட்டிருந்த போதும், அவர்கள் இருவரும் சட்டரீதியாக திருமணம் செய்துக் கொண்டிருந்தமையால் அது வெற்றியளிக்கவில்லை.

சில வருடங்களுக்கு பின்னர் அவர்களுக்கு பெண் குழந்தையொன்று பிறந்துள்ள நிலையில் அவருக்கு ஒன்றரை வயதான நிலையிலேயே இந்த துரதிருஷ்டவசமாக சம்பவத்துக்கு அவர்கள் முகங்கொடுத்துள்ளனர்.

கடந்த தினத்தில் குறித்த இருவரும் உந்துருளியில் உறவினரொருவரின் வீட்டிற்கு சென்று வந்துள்ள நிலையில் , வரும் வழியில் அமைந்துள்ள கால்வாயில் உந்துருளி கவிழ்ந்து விபத்துக்குள்ளாகியுள்ளது.

இதன் போது, பிரதேசவாசிகளால் கணவன் காப்பாற்றப்பட்ட போதும், அவரது மனைவி உயிரிழந்துள்ளார். பின்னர் , குறித்த பெண்ணின் மரணத்தில் சந்தேகம் உள்ளதாக அவரது உறவினர்கள் காவற்துறையில் முறைப்பாடு செய்துள்ளனர்.

இந்நிலையில், தனது மனைவியின் உடலத்தை பெற சில நாட்களாக முயற்சித்து வந்த கணவர் கடந்த தினத்தில் இரவு வீட்டின் அருகில் உள்ள மரமொன்றில் தூக்கிட்டுத் தற்கொலை செய்துக் கொண்டுள்ளதாக தெரிவிக்கப்படுகிறது.

சிறுமயின் விருப்பத்திற்கு மாறாக பெற்றோர் என்றுமே செயற்பட்டதில்லை. அவள் மீது அளவு கடந்த பாசம். சிறுமி கையடக்க தொலைபேசி கேட்டதால் பெறுமதிவாய்ந்த கைபேசி ஒன்றினை பெற்றோர் வாங்கிக்கொடுத்துள்ளனர்.

சிறுமி கைபேசி வாயிலாக முகப்புத்தக கணக்கொன்றை உருவாக்கி பலரையும் நண்பர்களாக இணைத்துக்கொண்டுள்ளார்.

அவரின் முகப்புத்தக கணக்கிற்கு குருநாகல் பகுதியை சேர்ந்த 18 வயதுடைய இளைஞர் ஒருவரும் நண்பராகுவதற்கு கோரிக்கை விடுத்துள்ளார். அவரின் கோரிக்கையை ஏற்றுக்கொண்ட சிறுமி அவருடன் தொடர்ச்சியாக உரையாடி வந்துள்ளார்.

சிறிது காலத்தில் இருவருக்கும் இடையில் காதல் ஏற்பட இருவரும் பல தடவைகள் தனியாக சந்தித்து வந்துள்ளனர்.

காலம் கடந்து செல்ல இருவரும் பிரியாதிருக்க சிந்தித்து திருமணம் புரிந்துக்கொள்ள இணக்கப்பட்டு அவரவர் வீடுகளுக்கு சென்றனர்.

மறுதினம் காலையில் வழமையை போன்று அன்றும் பாடசாலைக்கு சென்றுள்ளார் 14 வயதுடைய அந்த சிறுமி…. ஆனால் மீண்டும் அவள் வீடு திரும்பவில்லை.

அம்பாந்தோட்டை மாவடத்தில் வீரவில பகுதியை சேர்ந்த அந்த மாணவியின் பெற்றோர் பாடசாலைக்கு சென்று தேடியுள்ளனர். மேலதிக வகுப்பு நடாத்தப்படும் இடம், அயவலர்கள், உறவினர்கள் தெரிந்தவர்கள் என அனைவரிடமும் தொலைபேசி வாயிலாக கேட்டு தேடியுள்ளனர்.

எனினும் மாணவியான சிறுமியின் விபரம் பெற்றோருக்கு கிடைக்கவில்லை. பொறுமையிழந்த பெற்றோர் கண்ணீருடன் வீரவில காவல் நிலையத்திற்கு சென்று முறைப்பாடு செய்துள்ளனர்.

இந்நிலையில் குறித்த சிறுமியின் கைபேசி இலக்கத்தினை கொண்டு விசாரணைகளை மேற்கொண்ட காவல் துறையினர் சிறுமி குருநாகல் பகுதியில் இருப்பதனை கண்டறிந்துள்ளனர்.

இதன்பின்னர் அவர்களை தேடிச் சென்ற போது சிறுமி குறித்த இளைஞருடன் வீடொன்றில் இருந்துள்ளார்.

இருவரையும் கைது செய்த காவல் துறை, அவர்களை காவல் நிலையத்திற்கு அழைத்து சென்று பின்னர் விசாரணைகளை மேற்கொண்டுள்ளனர்.

சிறுமியை முதலில் திஸ்ஸமாராம பகுதிக்கு காதலன் அழைத்து பின்னர் அவரின் வீட்டிற்கு கொண்டு சென்று விடுவதாக தெரிவித்து குருநாகல் பகுதிக்கு அழைத்து சென்றுள்ளார்.

சிறுமிக்கு ஆசை வார்த்தைகளை கூறி சிறிது காலம் இருவரும் சேர்ந்து வாழ்ந்து நான்கு வருடங்களின் பின்னர் திருமணம் செய்துக்கொள்ளலாம் எனவும் தெரிவித்துள்ளார். சிறுமிக்கு நான்கு வருடங்கள் சென்றதன் பின்னரே திருமண வயதான 18 வயதை அடைவார் என்பதாலேயே இளைஞர் அவ்வாறு தெரிவித்துள்ளார். இதனை நம்பிய சிறுமி அவருடன் வசிக்க இணக்கம் தெரிவித்துள்ளார்.

சிறுமி குறித்து பெற்றோருக்கு அறவிக்கப்பட்டதன் பின்னர் இளைஞர் மற்றும் சிறுமியின் பெற்றோர்கள் காவல் நிலையத்திற்கு அழைத்துவரப்பட்டுள்ளனர்.

சிறுமியை அவரின் பெற்றோருடன் அனுப்ப மறுத்த இளைஞர் வாய்தர்க்கத்தில் ஈடுப்பட்டதனை தொடர்ந்து இளைஞர் கைவிலங்கிடப்பட்டு தடுத்து வைக்கப்பட்டு நீதிமன்றில் முன்னிலைப்படுத்தப்பட்டார்.

சிறுமி நிபந்தனையுடன் பெற்றோரிடம் ஒப்படைக்கப்பட்டுள்ளதுடன் இளைஞரை நீதிமன்றம், நிபந்தனை பிணையில் விடுதலை செய்துள்ளது.

திருகோணமலை சீனன்குடா விமானப்படை முகாமில் கடமையில் ஈடுபட்டிருந்த சிப்பாய் ஒருவர் கடமைக்கு வழங்கப்பட்டிருந்த ரி 56 ரக துப்பாகி 90 தோட்டாக்கள் மற்றும் மூன்று ரவைக் கூடுகளுடன் இன்று காலை தப்பியோடியுள்ளார். இது குறித்து விசாரணைகளை ஆரம்பித்துள்ளதாக சீனன் குடா பொலிஸார் தெரிவித்துள்ளனர்.

மட்டக்களப்பு, பெரியமடு முருகன் கோயில் வீதியை வசிப்பிடமாக கொண்ட இந்த விமானப்படை சிப்பாய் இன்று காலை 2 மணிக்கும் 6 மணிக்கும் இடைப்பட்ட காலத்தில் சீருடையுடன் முகாமில் இருந்து தப்பிச் சென்றுள்ளார்.

குறித்த சிப்பாய், அவருக்கு வழங்கப்பட்டிருந்த 60 தோட்டக்களுடன் இரண்டு ரவைக் கூடுகள் மற்றும் அவருடன் கடமையில் ஈடுபட்டிருந்த சிப்பாயின் 30 தோட்டங்கள் அடங்கிய ஒரு ரவைக் கூட்டை எடுத்துக்கொண்டு தப்பிச் சென்றுள்ளார். இது குறித்து விமானப்படையினர் சீனன்குடா பொலிஸ் நிலையத்தில் முறைப்பாடு செய்துள்ளனர்.

முறைப்பாட்டுக்கு அமைய மூதூர் உதவி பொலிஸ் அத்தியட்சகர் புத்திக மனதுங்கவின் வழிகாட்டலின் கீழ் சீனன்குடா பொலிஸ் நிலைய பொறுப்பதிகாரியின் தலைமையில், விமானப்படை சிப்பாய் தப்பிச் சென்றதாக கூறப்படும் காட்டு வழியில் தேடுதல்களை மேற்கொண்டு வருகின்றனர்.

இந்த தேடுதலின் போது விமானப்படை சிப்பாய்க்கு வழங்கப்பட்டிருந்த தண்ணீர் போத்தல் வைக்கும் சீருடையின் பகுதி கப்பற்துறை பிரதேசத்தில் கிடந்த நிலையில் கைப்பற்றப்பட்டுள்ளது.

தப்பிச் சென்ற விமானப்படை சிப்பாயை கண்டுபிடிக்கும் நோக்கில் பொலிஸாரும் விமானப்படையினரும் தேடுதல்களை நடத்தி வருகின்றனர்.

காலி, ஊரகஸ் சந்தி பிரதேசத்தில் யுவதி ஒருவரை பாலியல் வல்லுறவுக்கு உட்படுத்திய குற்றச்சாட்டில் பிரபல பிக்கு ஒருவரும் அவரது சாரதியும் கைதுசெய்யப்பட்டுள்ளனர்.

கவிதை வடிவில் தர்ம உபதேசம் செய்வதில் பிரபலமான குறித்த பிக்குவும் அவரது சாரதியும் தெலிகடை பொலிஸாரினால் கைதுசெய்யப்பட்டு பத்தேகம நீதவான் நீதிமன்றத்தில் ஆஜர்ப்படுத்தியுள்ளனர்.

சந்தேக நபர்களை தலா 2 லட்சம் ரூபாய் சரீரப் பிணைகளில் விடுதலை செய்யுமாறு நீதவான் தம்மிக்க ஹேமபால உத்தரவிட்டுள்ளார்.

சம்பவம் குறித்து மேலதிக விசாரணைகளை நடத்தி அறிக்கை சமர்பிக்குமாறு பொலிஸாருக்கு உத்தரவிட்டுள்ள நீதவான் வழக்கு விசாரணைகளை எதிர்வரும் ஜூன் 6 ஆம் திகதிக்கு ஒத்திவைத்துள்ளார்.

தெளிகடை சுனந்தாராமய விகாரையில் வசித்து வரும் 26 வயதான மான்பிட்டியே சிறிசுமண என்ற பிக்குவும் அவரது சாரதியுமே இவ்வாறு பிணையில் விடுவிக்கப்பட்டுள்ளனர்.

இவர்கள் ஊரகஸ்சந்தி பிரதேசத்தை சேர்ந்த 19வயதான யுவதியை பாலியல் வல்லுறவுக்கு உட்படுத்தியுள்ளனர். இந்த யுவதி இரண்டாவது சந்தேக நபரின் நண்பி என பொலிஸார் கூறியுள்ளனர்.

ஹிக்கடுவை பிரதேசத்தில் அண்மையில் நடைபெற்ற இரவு விருந்து ஒன்று அழைத்துச் சென்று விடுவதாக கூறி சந்தேக நபர்கள், யுவதியை தமது காரில் அழைத்துச் சென்றுள்ளனர். யுவதிக்கும் பியர் மதுபானத்தை பருக கொடுத்துள்ளதுடன் சந்தேக நபர்களும் பியர் பருகியுள்ளனர்.

இதனையடுத்து இரவு ஒரு மணியளவில் யுவதியை காரில் அழைத்துச் சென்றுக்கொண்டிருந்த போது, யுவதியை பாலியல் வல்லுறவுக்கு உட்படுத்தியுள்ளனர். அப்போது யுவதி காரின் ஸ்டேரிங்கை சுழற்றியதை அடுத்து வண்டி வீதியை விட்டு விலகி பத்தை ஒன்றுக்குள் விழுந்துள்ளது.

இதனையடுத்து சந்தேக நபர்கள் அங்கிருந்து தப்பிச் சென்றுள்ளதுடன் பிரதேசவாசிகள் யுவதியை மீ்ட்டு தெலிகடை பொலிஸ் நிலையத்தில் ஒப்படைத்துள்ளனர். பத்தைக்குள் கிடந்த காரையும் பொலிஸார் கைப்பற்றியுள்ளனர்.

சம்பவம் குறித்து பொலிஸார் தொடர்ந்தும் விசாரணைகளை மேற்கொண்டு வருகின்றனர்.

-தமிழ்வின்-

மன்னார்-சௌத்பார் கடற்கரைக்கு செல்லும் பாதையில் புகையிரத நிலையத்துக்கு முன் பகுதியில் கத்தோலிக்க கன்னியர் மடம் அமைக்க ஒதுக்கப்பட்ட இடத்தில் அமைந்திருந்த மரியன்னை சிலை இனம் தெரியாத நபர்களினால் உடைத்து சேதப்படுத்தப்பட்டுள்ளது.

மன்னார்-சௌத்பார் கடற்கரைக்கு செல்லும் பாதையில் புகையிரத நிலையத்துக்கு முன் பகுதியில் அமைந்திருந்த மரியன்னையின் சிலை வீதி ஓரத்தில் பல வருடங்களாக காணப்பட்ட சிறிய கோவில் போன்று அமைக்கப்பட்டு அதனுள் வைக்கப்பட்டிருந்த மரியாளின் சிலையே இனம் தெரியாத நபர்களினால் நேற்று உடைத்து சேதப்படுத்தப்பட்டுள்ளது.

குறித்த மரியன்னையின் சிலை வைக்கப்பட்டிருந்த சிறிய கண்ணாடி போலையானது மேற்பகுதி உடைக்கப்பட்டதோடு, அதனுள் வைக்கப்பட்டிருந்த மரியன்னை சிலை உள்ளிருந்தவாறே சேதப்படுத்தப்பட்டுள்ளது.

குறித்த வீதியூடாக இன்று காலை பயணித்த மக்கள் குறித்த சிலை உடைக்கப்பட்ட நிலையில் காணப்பட்டதை கண்டு உரிய தரப்பினருக்கு தெரியப்படுத்தியுள்ளதோடு, மன்னார் பொலிஸ் நிலையத்திலும் முறைப்பாடு தெரிவித்துள்ளனர்.

அண்மைக் காலங்களாக மன்னார் மாவட்டத்தில் மதச்சிலைகள் இனம் தெரியாத நபர்களினால் உடைக்கப்பட்டு சேதப்படுத்தப்பட்டு வருகின்ற போதும், பொலிஸார் விசாரணைகளை முன்னெடுத்து வருகின்ற போதும், சிலைகள் உடைப்பு தொடர்பில் இது வரை எவரும் கைது செய்யப்படவில்லை என்பது குறிப்பிடத்தக்கது.