இலங்கையின் பல பகுதிகளில் கடும் வெப்பமான காலநிலை நிலவும் என்பதனால் பொது மக்கள் அவதானமாக இருக்குமாறு வளிமண்டலவியல் திணைக்களம் அறிவித்துள்ளது. வடக்கு, வடமத்திய மற்றும் கிழக்கு மாகாணங்களுக்கு இந்த எச்சரிக்கை விடுக்கப்பட்டுள்ளது.

எனினும் கடும் வெப்பமான காலநிலைக்கு மத்தியிலும் வெளிநாட்டு சுற்றுலா பயணிகள் இலங்கையின் கிழக்கு கடற்கரைக்கு சென்று அழகை ரசிப்பதாக தெரிவிக்கப்பட்டுள்ளது. சுற்றுலா பயணிகள் பலர் சுட்டெரிக்கும் வெயில் காயும் காட்சிகள் கமராவில் பதிவாகியுள்ளது.

இலங்கையை சுற்றியுள்ள அழகிய காட்சிகள் வெளிநாட்டு சுற்றுலா பயணிகளுக்கு மிகப்பெரிய ஈர்ப்பை ஏற்படுத்தியுள்ள நிலையில் கடும் வெயிலிலும் அதனை ரசிப்பதே இதன் ஊடாக பார்க்க முடிந்துள்ளது.

சமகாலத்தில் இலங்கையில் நிலவும் கடும் வெப்பமாக காலநிலை காரணமாக உயிராபத்து ஏற்படலாம் என எச்சரிக்கப்பட்டுள்ளமை குறிப்பிடத்தக்கது.

மட்டக்களப்பில் 1000 மாணவர்கள் ஒரே மேடையில் தோன்றி நடன நிகழ்வொன்றை நடத்தி சாதனை படைத்துள்ளனர். மட்டக்களப்பு வெபர் விளையாட்டு மைதானத்தில் நேற்று மாலை இந்த சாதனை படைக்கப்பட்டுள்ளது. மட்டக்களப்பு வலய கல்வி அலுவலகத்தின் ஏற்பாட்டில் சர்வதேச நடன தினத்தினை முன்னிட்டு இந்த நிகழ்வு நடாத்தப்பட்டுள்ளது.

சுவாமி விபுலானந்தரின் 126ஆவது ஜனனதினம் நேற்று அனுஸ்டிக்கப்பட்ட நிலையில் அவருக்கு சமர்ப்பணம் செய்யும் வகையில் 1000 மாணவர்கள் பங்குகொண்ட நாட்டியாஞ்சலி நிகழ்வு நடாத்தப்பட்டது.

மட்டக்களப்பு கல்வி வலயத்தின் நடன ஆசிரிய ஆலோசகர் கலாவித்தகர் திருமதி மலர்விழி சிவஞான சோதி குருவின் ஒழுங்கமைப்பில் இந்த நிகழ்வு நடத்தப்பட்டுள்ளது.

மட்டக்களப்பு கல்வி வலயத்தின் வலய கல்விப்பணிப்பாளர் கே.பாஸ்கரன் தலைமையில் நடைபெற்ற இந்த நிகழ்வில் மட்டக்களப்பு மாநகர முதல்வர் தி.சரவணபவன் பிரதம அதிதியாக கலந்துகொண்டார்.

இதன்போது மட்டக்களப்பு வெபர் மைதானத்தில் சுவாமி விபுலானந்தருக்கு வழிபாடுகள் நடைபெற்றதுடன் மைதானத்தில் தோன்றிய 1000 மாணவர்கள் மற்றும் ஆசிரியர்கள் நடனமாடி சாதனையினை படைத்தனர்.

இந்த நிகழ்வினை கண்டுகளிப்பதற்காக பெற்றோர், பாடசாலைகளின் ஆசிரியர்கள், அதிபர்கள், பொதுமக்கள் என பெருமளவானோர் வருகை தந்திருந்தனர்.

இதன்போது குறித்த நிகழ்வினை நடாத்தி சாதனை படைத்த ஏற்பாட்டாளர்கள், வலய கல்வி பணிப்பாளர் உள்ளிட்டோர் கௌரவிக்கப்பட்டனர்.

இறக்குமதி செய்யப்படுகின்ற பெரிய வெங்காயம் மற்றும் உருளைக் கிழங்கிற்கான விஷேட பண்ட வரி அதிகரிக்கப்பட்டுள்ளதாக நிதியமைச்சு கூறியுள்ளது. நேற்று நள்ளிரவு முதல் அமுலுக்கு வரும் வகையில் இந்த வரி அதிகரிக்கப்பட்டுள்ளது.

அதன்படி ஒரு கிலோ கிராம் பெரிய வெங்காயம் மற்றும் உருளைக் கிழங்கிற்கான வரி 40 ரூபா வரை அதிகரிக்கப்பட்டுள்ளது. பெரிய வெங்காயம் மற்றும் உருளைக் கிழங்கிற்கான விஷேட பண்ட வரி அதிகரிக்கப்பட்டுள்ளதாக நிதியமைச்சு கூறியுள்ளது,

கிளிநொச்சி – பரந்தன் இந்து மகாவித்தியாலயத்தின் அதிபர் கடமை நேரத்தில் பாடசாலை அலுவலகத்தில் வைத்து கடுமையாக தாக்கப்பட்ட நிலையில், கிளிநொச்சி பொது வைத்தியசாலையில் அனுமதிக்கப்பட்டுள்ளார்.

குறித்த சம்பவம் நேற்று இடம்பெற்றுள்ளதுடன், அதேபாடசாலையில் கல்வி கற்பிக்கின்ற ஆசிரியர் ஒருவரின் கணவரே இவ்வாறு அதிபரைத் தாக்கியுள்ளதாக கிளிநொச்சிப் பொலிஸ் நிலையத்தில் முறைப்பாடு செய்யப்பட்டுள்ளது. வலயக் கல்வித் திணைக்களம், கோட்டக்கல்வி பணிமனை ஆகியவற்றில் முறையிடப்பட்டுள்ளது.

பாடசாலையில் நீண்டகாலமாக சேவையாற்றி வரும் ஆசிரியை ஒருவர் பாடசாலையில் பொருள் கொள்வனவில் ஏற்பட்ட பிரச்சினை தொடர்பில் வலயக்கல்வி பணிமனையால் விசாரணை மேற்கொள்ளப்பட்டமை தொடர்பில் இதற்கு அதிபர் காரணமாக இருப்பதாகத் தெரிவித்து குறித்த ஆசிரியையின் கணவர் இன்று பகல் பாடசாலை நேரத்தில் பாடசாலைக்குச்சென்று அதிபரை கடுமையாகத் தாக்கியுள்ளார்.

இது தொடர்பான விசாரணைகளை கிளிநொச்சி பொலிஸார் மற்றும் வலயக்கல்விப் பணிமனையினர் மேற்கொண்டு வருகின்றனர்.

இதவேளை, குறித்த ஆசிரியை நீண்டகாலமாக இந்த பாடசாலையில் கடமையாற்றி வருவதனால் மூன்று தடவைகள் இடமாற்றம் செய்யப்பட்டபோதும், அரசியல் பின்னணியில் அவரது இடமாற்றம் இரத்துச் செய்யப்பட்டதாகவும், ஆசிரியை தொடர்பில் பல்வேறு முறைப்பாடுகள் முன்வைக்கப்பட்டுள்ளதாகவும் தெரிவிக்கப்பட்டுள்ளது.

அத்துடன், இந்த விடயம் தொடர்பில் இன்று பிற்பகல் கிளிநொச்சி கண்டாவளைப்பிரதேச செயலகத்தில் நடைபெற்ற ஒருங்கிணைப்புக்குழுக்கூட்டத்திலும் விவாதிக்கப்பட்டுள்ளது.

மேலும், இவ்வாறு அதிபர் அல்லது ஆசிரியர் மீது தாக்குபவர்கள் கல்வியை பின்நோக்கித்தள்ளுகின்ற அல்லது கல்வியை அழிக்கின்ற ஒரு செயலாக அமையும் என இணைத்தலைவர் சிவஞானம் சிறீதரன் குறிப்பிட்டுள்ளார்.

-தமிழ்வின்-

நுவரெலியா – கந்தப்பளை பார்க் தோட்டத்தில் 3 சிறுமிகளை துஷ்பிரயோகத்திற்கு உட்படுத்தியதாகக் கூறப்படும் சம்பவம் தொடர்பில் 4 பேர் கைது செய்யப்பட்டுள்ளனர். குறித்த அனைவரையும் நேற்று இரவு கைது செய்துள்ளதாக பொலிஸார் தெரிவித்துள்ளனர். சிறுமிகளின் தந்தை, சிறிய தந்தை உள்ளிட்ட நால்வரே இவ்வாறு கைது செய்யப்பட்டுள்ளனர்.

மேலும், இந்த சம்பவத்துடன், சிறுமிகளின் தாயார் தொடர்பு பட்டிருக்கலாம் என பொலிஸார் சந்தேகம் வெளியிட்டுள்ளதுடன், சந்தேகநபர்களை நீதிமன்றில் முன்னிலைப்படுத்தவும் நடவடிக்கை எடுத்துள்ளனர்.

14, 15 மற்றும் 16 வயது சிறுமிகளே இவ்வாறு பாதிக்கப்பட்டுள்ளதாகவும், குறித்த மூவரும் நுவரெலியா பொது வைத்தியசாலையில் அனுமதிக்கப்பட்டுள்ளதாகவும் தெரிவிக்கப்பட்டுள்ளது.

இதேவேளை, பாதிக்கப்பட்ட சிறுமிகள் கொழும்புக்கு தப்பிச்சென்ற நிலையில், நிர்க்கதிக்குள்ளான சிறுமிகளை பொலிஸார் பொறுப்பேற்று விசாரணைகளை முன்னெடுத்திருந்தனர்.

இதன்போது சிறுமிகள் வழங்கிய தகவலுக்கு அமைய, கந்தப்பளை பொலிஸாருக்கு அறிவிக்கப்பட்டு சிறுமிகளின் தந்தை உள்ளிட்ட நால்வர் கைது செய்யப்பட்டுள்ளனர். சம்பவம் தொடர்பில் பொலிஸார் மேலதிக விசாரணைகளை முன்னெடுத்துள்ளனர்.

நாட்டில் நிலவும் மழையுடனான காலநிலை இன்று (04.05) முதல் அதிகரிக்கும் என எதிர்பார்ப்பதாக வளிமண்டலவியல் திணைக்களம் அறிவித்துள்ளது. அதன் அடிப்படையில் நாட்டின் பல பகுதிகளிலும் பிற்பகல் 2 மணிக்கு பின்னர் மழை அல்லது இடியுடன் கூடிய மழை பெய்யலாம் என திணைக்களம் எதிர்வு கூறியுள்ளது.

குறிப்பாக நாட்டின் மேல், வடமேல், தென்பகுதி கடலோர பகுதிகளில் காலை வேலையிலும் மழை பெய்யலாம் என அறிவிக்கப்பட்டுள்ளது. நாட்டின் மேல், மத்திய, சப்ரகமுவ, மற்றும் தென் மாகாணங்களில் சுமார் 100 மில்லி மீற்றர் (10cm) வரையிலான மழை பெய்யக் கூடும் என திணைக்களம் சுட்டிக்காட்டியுள்ளது.

சப்ரகமுவ மற்றும் மத்திய மாகாணங்களில் காலை வேளையில் பனிமூட்டமாக காணப்படும் என்பதுடன், மாலையில் இடியுடன் கூடிய மழை பெய்யும் சந்தர்ப்பங்களில் காற்றின் வேகம் தற்காலிகமாக அதிகரிக்கலாம் எனவும் அறிவிக்கப்பட்டுள்ளது.

அதேவேளை, இடியுடன் கூடிய மழை பெய்யும் சந்தர்ப்பங்களில் பொதுமக்கள் மின்னல் தாக்கங்களிலிருந்து பாதுகாப்பு பெறுமாறு எச்சரிக்கை விடுக்கப்பட்டுள்ளது

முல்லைத்தீவு இளங்கோபுரம் காட்டுப்பகுதியில் ஒரு தொகுதி யுத்த வெடிபொருட்கள இன்று மீட்கப்பட்டுள்ளன. புதுக்குடியிருப்பு பொலீஸாருக்கு கிடைத்த இரகசிய தகவலை தொடர்ந்து பொலிஸாரும் அதிரடிப்படையினரும் இணைந்து குறித்த வெடிபொருட்களை மீட்கும் நடவடிக்கையில் இன்று பிற்பகல் ஈடுபட்டிருந்தனர்.

இதன்போது 737 மோட்டார் குண்டுகள் மற்றும் கைக்குண்டுகள் கனரக துப்பாக்கி ரவைகள் மற்றும் ஆர்.பி.ஜிஇ துப்பாக்கி செலுத்திகள் என்பன மீட்கப்பட்டுள்ளதாக புதுக்குடியிருப்பு பொலீஸார் தெரிவித்துள்ளார்கள்.