பாலியல் வன்புணர்விற்கு உட்படுத்தப்பட்டு படுகொலை செய்யப்பட்ட யாழ். புங்குடுதீவைச் சேர்ந்த மாணவி வித்தியா சிவலோகநாதனின் மூத்த சகோதரியான யாழ். பல்கலைக்கழகப் பட்டதாரி நிஷாந்தி சிவலோகநாதனுக்கு அபிவிருத்தி அலுவலர் நியமனம் வழங்கப்பட்டுள்ளது.

அவர் தனது நியமனத்தை இன்று முற்பகல் ஜனாதிபதி அலுவலகத்தில் வைத்து ஜனாதிபதி மைத்திரிபால சிறிசேனவிடமிருந்து பெற்றுக்கொண்டுள்ளார்.

கடந்த வருடம் ஜனாதிபதி, வவுனியாவுக்குச் சென்ற போது மாணவி வித்தியாவின் வீட்டிற்கும் விஜயம் சென்றிருந்தார். இதன்போது அவர்களுக்கு வழங்கப்பட்ட வாக்குறுதிக்கு ஏற்ப இந்த நியமனம் வழங்கப்பட்டுள்ளது.

மாணவி வித்தியாவின் தாயாரான சரஸ்வதி சிவலோகநாதன் மற்றும் வித்தியா சிவலோகநாதன் மன்றத்தின் தலைவி திரைப்பட கலைஞர் சுவினீதா வீரசிங்க ஆகியோரும் இந்த நியமனம் வழங்கும் நிகழ்வில் கலந்து கொண்டனர்.

உலகிலேயே மிகவும் பிரபலமான சட்டம் பயிலும் மாணவர்களுக்காக Willem C. Vis International Commercial Arbitration Moot போட்டி நிகழ்ச்சி ஒன்றை நடத்தி வருகின்றது. ஆங்கில மொழியில் நடைபெறும் இந்த போட்டிக்கு உலகெங்கும் பல பாகங்களிலும் இருந்து ஏராளமானவர்கள் கலந்து கொள்வார்கள்.

உலகளாவிய ரீதியில் இப்போட்டி இரு பகுதிகளாக இடம்பெற்றன. ஒன்று எழுத்து, மற்றையது வாய்மொழி. இதில் The University of Geneva’s team குழு எழுத்தில் (Written pleadings) முதலிடத்தை பெற்று சரித்திரம் படைத்தது.

உலகெங்கும் இருந்து மொத்தம் 366 குழுக்கள் பங்கு கொண்ட நிலையில், வாய் (Oral pleadings) பேச்சில் 64ஆவது இடத்தை The University of Geneva’s team பெற்றுள்ளது.

ஜெனிவாவில் சட்டத்துறையில் (Master in Business Law) மாஸ்ரர் இறுதியாண்டில் பயிலும் நம் தாய் நாட்டின் பெயர் பொறிக்கும் செல்வி சஜிகா இரத்தினம் முதலிடம் வகிக்கும் ஜெனிவா குழுவில் (The University of Geneva’s Team) உள்ள ஆறு பெண்களில் ஒருவராக இருந்துள்ளார்.

கடல் கடந்து அகதிகளாக சென்றாலும் எதிர்காலச் சந்ததியினர் இங்கு அதிதியாக உயர் கல்வியுடன் வலம் வரும் காலம் ஆரம்பமாகிவிட்டது.

தாயகத்தின் பெருமையை உலகெங்கும் பரவியிருக்கும் நம் எதிர்காலச் சந்ததியினர் வளர்த்தெடுப்பார்கள் என்பது திண்ணம். தமிழ் மக்களின் சொத்து அன்றும் இன்றும் என்றும் கல்வியே. அது எந்த அலையடித்தாலும் கலையாது வளரும், வளர வேண்டும்.

பிரஞ்மொழியில் கற்று ஆங்கில மொழியில் (சர்வதேச போட்டிக்கான) தேர்வு எழுதி, தமிழ் மொழியில் செய்தி சொன்ன சஜிகா இரத்தினம். இந்த வெற்றி குறித்து சஜிகா இரத்தினம் தெரிவிக்கையில்,

“எழுத்தில் நாம் முதல் இடத்தைப் பெற்றோம். நாம் ஆறு பேரும் இரவு பகலாக சிறப்பாதொரு ஆக்கத்தை படைக்கப் பாடுபட்டோம். அப்போது எமக்கு முதல் இடம் கிடைக்கும் என்று எண்ணவில்லை.

ஆனால் நம்மால் முடிந்த உச்சத்தை கொடுக்க வேண்டும் என்பதில் உறுதியாக இருந்தோம். அந்த கடும் உழைப்பு கைமேல் பலன் தந்தது.

வாய் மொழிவாதம் (Oral pleadings): இதில் நாம் 3ஆம் இடத்திற்குள் வராதபோதும், எழுத்து போட்டியில் நாம் முதல் இடம்பெற்றமையால் நம்மை கௌரவப்படுத்தும் முகமாக எமது குழுவையும் சிறப்பாக அறிவித்தார்கள்.

வாதாட்டத்தில் முதலாம் இடத்தை இந்தியா கைப்பற்றும் என நாம் எண்ணிய போதும் ரஷ்யாவே முதல் இடத்தைப் பிடித்துக் கொண்டது.

என்னைப் பற்றி கூறுவது என்றால் நான் Master in Business Lawவும் (இறுதியாண்டில்) Diploma in Accountiongs, Finance and Taxationவும் படித்துக் கொண்டு இருக்கிறேன்.

என்னுடைய விருப்பம் Tax Lawவில் ஒரு பிரபல சட்டத்தரணியாக வரவேண்டும் என்பதே” என குறிப்பிட்டுள்ளார்.

யட்டியந்தோட்டையில் பெற்ற பிள்ளைகளால் கைவிடப்பட்ட பெற்றோரின் அவல நிலை குறித்து கொழும்பு ஊடகம் ஒன்று தகவல் வெளியிட்டுள்ளது.

அந்த செய்தியில், குறித்த பகுதியில் நீண்ட நாட்களாக கவனிப்பாரற்று இருக்கின்ற இந்த தம்பதி தங்குமிட வசதியின்றியும், முழுமையாக ஒரு வேளை உணவை கூட உண்ண முடியாமலும் அவதிப்பட்டு வருகின்றனர்.

70 வயதான ரண் பண்டா, அவரின் மனைவியான 62 வயது குசுமாவதி ஆகியோரே இவ்வாறு பிள்ளைகளினால் கைவிடப்பட்டுள்ளனர். இவர்கள் யட்டியந்தோட்டை – வெரன்னாவ பகுதியைச் சேர்ந்தவர்கள். தற்பொழுது யட்டியந்தோட்டை – ருவன்வெல சந்திக்கு அருகிலுள்ள பாழடைந்த கட்டடமொன்றில் வசித்து வருகின்றனர்.

வாகன விபத்தொன்றில் சிக்கிய ரண் பண்டா உளநலம் பாதிக்கப்பட்ட நிலையில் பிள்ளைகளால் வீட்டிலிருந்து துரத்தப்பட்டதாக குசுமாவதி தெரிவித்துள்ளார்.

இது தொடர்பில் குசுமாவதி கருத்து தெரிவிக்கையில், என்னுடைய உயிர் இருக்கும் வரையில் நான் கணவருடன் இருக்கவே விரும்புகிறேன்.

அவரை நான் விருப்பத்துடன் பராமரிப்பேன். எனக்கு பிள்ளைகள் தேவையில்லை. எங்களை வெளியில் அனுப்பி ஆறு மாதங்களாகிய போதும் பிள்ளைகள் எங்களை தேடவில்லை. ஒவ்வொருவரிடமும் உணவிற்காக கையேந்துகிறோம்.

இந்த ஆறு மாதத்தில் ஒருவேளை கூட சரியாக சாப்பிடவில்லை. பலரும் எங்களுக்கு உணவு தந்தார்கள். சிலவேளைகளில் குடிப்பதற்கு நீர் கூட இருப்பதில்லை. அப்பொழுது கரவனெல்ல ஆற்றிலுள்ள நீரை குடிப்போம் என தெரிவித்துள்ளனர்.

இந்த காணொளியானது பலரையும் கலங்க வைத்துள்ளது. அத்துடன் குறித்த பெற்றோரின் பிள்ளைகள் தொடர்பிலும் சிலர் அதிருப்தி வெளியிட்டுள்ளனர்.

ஜனாதிபதியின் பேண்தகு பாடசாலை நிகழ்ச்சித் திட்டத்தில் போதைப் பொருள் பாவனையில் இருந்து சமூகத்தை பாதுகாப்போம் என்னும் தொனிப் பொருளில் வாழைச்சேனை வை.அஹமட் வித்தியாலயத்தினால் இன்று விழிப்புணர்வூ பேரணியூம் விழிப்புணர்வு கூட்டமும் இடம்பெற்றது.

வித்தியாலயத்தின் அதிபர் என்.எம்.கஸ்ஸாலி தலைமையில் நடைபெற்ற நிகழ்வில் மட்டக்களப்பு மத்தி கல்வி வலய பிரதிக் கல்விப் பணிப்பாளர் ஏ.ஜே.அஜ்மீர், ஆசிரிய ஆலோசகர் எம்.சபூர், வாழைச்சேனை ஜும்ஆ பள்ளிவாசல் தலைவர் மௌலவி. எம்.முஸம்மில் மற்றும் பெற்றோர்கள் கலந்து கொண்டனர்.

இதன்போது பாடசாலையில் இருந்து ஆரம்பமான போதை ஒழிப்பு பேரணி வாழைச்சேனை சந்தை வழியாக சென்று பிரதேசசபை வீதியினூடாக பாடசாலையை சென்றடைந்ததும் அங்கு விழிப்புணர்வு கூட்டம் இடம்பெற்றது.

இதன்போது கருத்து தெரிவித்த ஓட்டமாவடி கோட்டக் கல்விப் பணிப்பாளர் எம்.எஸ்.கே.றஹ்மான், “கடந்த காலத்தில் மது, கஞ்சா, அவின், ஹேரோயின் பாவனையில் இருந்து எமது சமூகம் விடுபட்டு வருகின்ற வேளையில் மிகக் கொடூரமான செயற்பாடாக போதை மாத்திரைகள் பாவிக்கப்படுகின்றது.

கடந்த காலத்தில் மது, கஞ்சா, அவின், ஹேரோயின் பாவிப்பவர்களை எளிதில் அறிந்து கொள்ள முடியும். ஆனால் தற்போது போதை மாத்திரை பாவிப்பவர்களை அறிந்து கொள்ள முடியாது. ஆனால் படிப்படியான சில வருடங்களில் மாத்திரம் கண்டு கொள்ள முடியும்.

எனவே பெற்றோர்கள் இந்த விடயத்தில் கூடிய கவனம் செலுத்தி அவர்கள் வீட்டை விட்டு செல்லும் வரை எங்கெல்லாம் செல்கின்றார்கள், யாருடன் பழக்கம் வைத்துள்ளனர் என்பதை அறிந்து கொள்ள வேண்டும்” என்றார்.

வாழைச்சேனை பொலிஸ் நிலைய போதை ஒழிப்பு பிரிவு பொறுப்பதிகாரி எஸ்.சிவதர்சன் கருத்து தெரிவிக்கையில், மட்டக்களப்பு மாவட்டத்திலுள்ள பொலிஸ் நிலைய பிரிவுகளில் வாழைச்சேனை பொலிஸ் நிலைய பிரிவிற்குட்ட பகுதியில் அதிக போதைப் பாவனையாளர் உள்ளார்கள்.

மட்டக்களப்பு மாவட்டத்தில் பன்னிரண்டு பொலிஸ் நிலையங்கள் உள்ளது. அதில் வாழைச்சேனை பொலிஸ் நிலையத்தில் மாத்திரம் போதை பாவனை தொடர்பான விசாரணைகள் அதிகம் காணப்படுகின்றது.

வாழைச்சேனை பொலிஸாரால் போதை மாத்திரைகள் தொடர்பாக விசாரணைகளை மேற்கொண்டதில், பாடசாலை மாணவர்களே அதிகம் பாவிக்கின்றனர் என தெரியவந்துள்ளது.

சமூகத்தில் நல்ல நிலையில் உள்ளவர்களின் பிள்ளைகளே அதிகம் போதை மாத்திரைகளை பயன்படுத்துகின்றனர்.

பாடசாலை மாணவர்கள் விளையாடும் இடங்களுக்கு சென்று அவர்களை சோதனை செய்யும் போது சட்டைப்பையில் போதை மாத்திரைகள் காணப்படுகின்றது.

இவ்விடயம் தொடர்பில் பாடசாலைகளுக்கு சென்று விழிப்புணர்வுகளை மேற்கொண்டு வருகின்றோம். மேலும், ஆழ்கடலுக்குச் மீன்பிடிக்கச் செல்லும் மீனவர்கள் போகும் போது கஞ்சா கொண்டு சென்று அங்கு பாவனையில் ஈடுபடுவதாகவும் தகவல் கிடைத்துள்ளதாக” ஓட்டமாவடி கோட்டக் கல்விப் பணிப்பாளர் எம்.எஸ்.கே.றஹ்மான் தெரிவித்துள்ளார்.

வல்லை நாகதம்பிரான் ஆலயத்தில் நெகிழ்ச்சியான சம்பவம் ஒன்று நேற்று இடம்பெற்றுள்ளது. விபத்தில் சிக்கி உயிருக்குப் போராடிக் கொண்டிருந்த நாகபாம்புக்கு பால் ஊற்றி காப்பாற்றப்பட்டுள்ளது.

ஆலய வளாகத்திற்கு அருகில் இடம்பெற்ற விபத்து ஒன்றில் நாகப்பாம்பு காயமடைந்துள்ளது. இதனையடுத்து பாம்புக்கு பால் உற்றி வழிபாடு செய்ததன் மூலம் அதன் மயக்கத்தை அங்கிருந்தவர்கள் போக்கியுள்ளனர்.

வீதியை கடக்க முயன்ற நாகபாம்பு மோட்டார் சைக்கிளுக்குள் சிக்கி காயமடைந்தது. அதைக் கண்டவர்கள் பாம்மை நாகதம்பிரான் ஆலயத்தில் வைத்து பாலூற்றி மயக்கத்தைப் போக்கினர். பின்னர் அந்தப் பாம்பை வழிபட்டனர். பாம்பு மயக்கம் நீங்கி அங்கிருந்து அகன்று சென்றுள்ளது.