வளிமண்டலத்தில் ஏற்பட்டுள்ள மாற்றம் காரணமாக மழையுடன் கூடிய காலநிலை தீவிரம் பெறும் என வளிமண்டலவியல் திணைக்களம் தெரிவித்துள்ளது.

தெற்கு, ஊவா, கிழக்கு, சப்ரகமுவ மாகாணங்களிலும் பொலன்னறுவை மாவட்டத்திலும் இன்று மழை பெய்யும் என எதிர்பார்க்கப்படுகின்றது.

அந்தப் பகுதிகளில் 100 மில்லி மீற்றருக்கும் அதிகமான மழை பெய்யும் என எதிர்பாரக்கப்படுவதாக குறிப்பிடப்படுகின்றது.

விசேடமாக கிழக்கு, தெற்கு மற்றும் தெற்கு கடல் பிரதேசங்களிலும், மட்டக்களப்பில் இருந்து ஹம்பாந்தோட்டை மற்றும் காலி ஊடாக கொழும்பு வரையிலான கடல் பகுதிகளிலும் மழை அல்லது இடியுடன் கூடிய மழை பெய்யும் என எதிர்பார்க்கப்படுகின்றது.

காற்றின் வேகம் மணிக்கு 70 – 80 கிலோ மீற்றர் வேகத்தில் வீசும் என்பதனால் கடல் எல்லைகளில் கொந்தளிப்பான நிலை காணப்படும் எனவும் இதன் காரணமாக மீனவர்கள் அவதானமாக செயற்படுமாறும் வளிமண்டலவியல் திணைக்களம் குறிப்பிட்டுள்ளது.

வெளிநாட்டு நாணயங்களுடன் ஒப்பிடும் போது இலங்கை ரூபாவின் பெறுமதி பாரிய வீழ்ச்சியை பதிவு செய்துள்ளதாக, இலங்கை மத்திய வங்கி தெரிவித்துள்ளது.

அமெரிக்க டொலருடன் ஒப்பிடும் போது இலங்கை ரூபாய் வீழ்ச்சியை பதிவு செய்துள்ளது.

2018ஆம் ஆண்டு ஏப்ரல் மாதம் 4ஆம் திகதி வரையிலான காலப்பகுதியில் அமெரிக்க டொலருக்கு எதிராக இலங்கை ரூபாயின் பெறுமதி 1.7 வீதம் வீழ்ச்சியடைந்துள்ளது.

2018ஆம் ஆண்டில் இருந்து இதுவரையிலான காலப்பதியில் இலங்கை ரூபாய் ஜப்பான் யென்னுக்கு எதிராகவே அதிக வீழ்ச்சியடைந்துள்ளது. அது 7.1 வீதமாகுமாக பதிவாகி உள்ளது.

இதேவேளை, ஸ்ரேலிங் பவுண்டுடன் ஒப்படும் போது 6.2 வீதத்திலும், யூரோவுடன் ஒப்பிடும் போது 4.4 வீதமும் இலங்கை ரூபாய் வீழ்ச்சியடைந்துள்ளதாக மத்திய வங்கி குறிப்பிட்டுள்ளது.

2018ஆம் ஆண்டு ஏப்ரல் 3ஆம் திகதி வரையிலான காலப்பகுதியினுள் இலங்கை மத்திய வங்கி 403.5 மில்லியன் அமெரிக்க டொலர்களை கொள்வனவு செய்துள்ளது.

2017ஆம் ஆண்டு அதன் அளவு 1,665 மில்லியன் அமெரிக்க டொலர் கொள்வனவு செய்யப்பட்டுள்ளதாக இலங்கை மத்திய வங்கி மேலும் தெரிவித்துள்ளது.

27 ஆண்டுகளாக காணாமல் போயிருந்த தமது தந்தை இலங்கையில் இருப்பதை கண்டறிந்துள்ளதாக சிங்கப்பூர் யுவதி தெரிவித்துள்ளார்.

துர்கா கேசவ் என்ற இந்த யுவதி, தமது தந்தை தொடர்பில் பல தகவல்கள் கிடைத்துள்ளதாக தெரிவித்துள்ளார்.

தமது தந்தையான கனகசுந்தரம் சோமசுந்தரம் கடந்த 1991ஆம் ஆண்டு சிங்கப்பூரில் தம்மையும் தாயையும் விட்டு இலங்கைக்கு சென்ற பின்னர் சிங்கப்பூருக்கு திரும்பவில்லை என்று துர்கா கேசவ் முன்னதாக தெரிவித்திருந்தார்.

தமது தந்தை யாழ்ப்பாணம் பருத்தித்துறையை சேர்ந்தவர் என்றும் அவரின் சகோதரர்கள் மன்னார் மடு – பண்டிவிரிச்சான் பகுதியில் வசித்து வருவதாகவும் துர்கா கேசவ் குறிப்பிட்டிருந்தார்.

இந்த நிலையில், தமது தந்தை இலங்கையில் இருப்பதை தாம் உறுதி செய்துள்ளதாகவும், தமது தந்தையுடன் தொலைபேசியில் பேசியதாகவும் அவர் தெரிவித்துள்ளார்.

இந்த நிலையில், தமது தந்தை உள்ளிட்ட உறவுகளைக் காண விரைவில் இலங்கைக்கு பயணம் மேற்கொள்ள உள்ளதாகவும் துர்கா கேசவ் குறிப்பிட்டுள்ளார்.

வரவு – செலவுத்திட்ட யோசனைக்கு அமைய வீதி ஒழுங்கு விதிகளை மீறும் வாகன சாரதிகளுக்கு ஸ்தலத்திலேயே அறவிடுவதற்காக பிரேரிக்கப்பட்ட அதிகூடிய தண்டப்பணமான 25,000 ரூபாவை, 3000 ரூபாவாக அரசாங்கம் குறைத்துள்ளது.

இதற்கு பாராளுமன்றம் நேற்று அங்கீகாரம் வழங்கியது. இது தொடர்பாக முன்வைக்கப்பட்ட மோட்டார் வாகன சட்டத்தின் கீழான ஒழுங்கு விதிகளுக்கு பாராளுமன்றம் நேற்று ஏகமனதாக அங்கீகாரம் வழங்கியது.

இவ்விவாதத்தை ஆரம்பித்து உரையாற்றிய போக்குவரத்து மற்றும் சிவில் விமான சேவைகள் பிரதியமைச்சர் அசோக்க அபேசிங்க, இந்த ஒழுங்கு விதிகளால் வீதி ஒழுங்குகளை மீறும் சாரதிகளிடம் அறவிடப்படக்கூடிய 25,000 ரூபா தண்டப்பணம் 3,000 ரூபாவாக குறைக்கப்படுகிறது என்றார்.

தொடர்ந்தும் உரையாற்றிய பிரதியமைச்சர்,  அதிகரித்துள்ள வீதி விபத்துக்களைக் கட்டுப்படுத்தும் நோக்கில் விதிகளை மீறும் வாகன சாரதிகளிடம் அதிகூடிய ஸ்தல தண்டப் பணமாக 25,000 ரூபா அறவிடப்படும் என 2018ஆம் ஆண்டு வரவு செலவுத்திட்டத்தில் யோசனை முன்வைக்கப்பட்டிருந்தது.

எனினும், இந்த யோசனைக்கு தனியார் பஸ் உரிமையாளர்கள் சங்கம் உள்ளிட்ட பல சங்கங்கள் எதிர்ப்பைத் தெரிவித்தன.

இந்த நிலையில் குறித்த விடயம் ஜனாதிபதியின் கவனத்துக்குக் கொண்டு செல்லப்பட்டதுடன், இது பற்றி ஆராய்வதற்கு ஜனாதிபதி குழுவொன்றையும் நியமித்தார்.

இந்தக் குழுவின் பரிந்துரைக்கு அமைய ஆகக் கூடிய தண்டப்பணமாக 3,000 ரூபா தீர்மானிக்கப்பட்டுள்ளது. இதற்கமைய விதிகளை மீறிய சாரதிகளிடம் ஸ்தலத்தில் ஆகக் கூடிய தண்டப் பணமாக 3,000 ரூபாவும், ஆகக் குறைந்த தண்டப் பணமாக 500 ரூபாவும் அறவிடப்படும்.

இன்று முதல் 33 வீதி விதி மீறல்களுக்கு 3,000 ரூபா முதல் 500 ரூபா ஸ்தல தண்டப்பணம் அறவிடப்படும். இது தொடர்பாக வர்த்தமானி அறிவித்தல் விடுக்கப்பட்டுள்ளது. இதனை பாராளுமன்றம் அங்கீகரிக்க வேண்டும் எனக் கேட்டுக் கொண்டார்.

மாங்குளம் பகுதியில் தனியார் பேருந்தொன்று விபத்துக்குள்ளானதில் 30 பேர் வரையில் காயமடைந்துள்ளதாக தெரிவிக்கப்படுகின்றது.

இன்று (06.04.2018) மாலை வவுனியாவிலிருந்து விசுவமடு நோக்கி பயணித்த தனியார் பேரூந்து ஒன்று மாலை 5.15 மணியளவில் வவுனியா மாங்குளம் பகுதியில் பயணித்த போது வீதியின் குறுக்கே மாடு பாய்ந்ததையடுத்து வேகக்கட்டுப்பாட்டை இழந்த பேருந்து விபத்துக்குள்ளாகி குடைசாய்ந்தது.

இவ் விபத்தில் பேருந்தில் பயணித்த 30 பேர்வரையில் காயமடைந்து வவுனியா வைத்தியசாலையில் அனுமதிக்கப்பட்டுள்ளனர். இவ்விபத்து சம்பந்தமான மேலதிக விசாரணைகளை மாங்குளம் பொலிஸார் மேற்கொண்டு வருகின்றனர்.

ஈழ தமிழ் மாணவர்களுக்காக தனியான பல்கலைக்கழகம் ஒன்றை உருவாக்குவதற்காக தென்னிந்திய நடிகர் கருணாஸ் இன்று யாழ்.குடாநாட்டுக்கு வருகைதந்துள்ளார்.

பல்கலைக்கழத்திற்காக அடிக்கல்லை நாட்ட வருமாறு வடமாகாண முதலமைச்சர் சீ.வி.விக்னேஸ்வரனுக்கு கருணாஸ் அழைப்பு விடுத்துள்ளார்.

யாழ்.வந்த நடிகர் கருணாஸ் காலை 9.30 மணிக்கு வடமாகாண முதலமைச்சர் சீ.வி.விக்னேஸ்வரனை முதலமைச்சரின் வாசஸ்தலத்தில் சந்தித்து கலந்துரையாடினார்.

சுமார் ஒரு மணி நேரம் நடைபெற்ற இந்த பேச்சுவார்த்தையின் நிறைவில் கருணாஸ் ஊடகங்களுக்கு கருத்து வெளியிட்டுள்ளார்.

இதன்போது, தமிழகத்தில் முகாம்களில் உள்ள ஈழ தமிழ் மாணவர்கள் மற்றய பல்கலைக்கழகங்களில் கல்விக்காக கையேந்தக் கூடாது என்பதற்காக தனியான பல்கலைக்கழகம் ஒன்றை உருவாக்க உள்ளதாகவும் கூறியுள்ளார்.

அந்த பல்கலைக்கழக கட்டடத்திற்கு ஒட்டுமொத்த தமிழ் மக்களாலும் அங்கீகரிக்கப்பட்ட ஒருவர், பொது நலவாதியான ஒருவர், என்ற அடிப்படையில் முதலமைச்சரை அடிக்கல் நாட்டுவதற்கு அழைத்துள்ளதாகவும் அவர் குறிப்பிட்டுள்ளார்.

நான் தமிழகம் திரும்பிய பின்னர் முதலமைச்சரை தமிழகத்திற்கு அழைப்பதற்கான திகதியை அறிவிப்பதாகவும் தெரிவித்துள்ளார்.

முதலமைச்சர் சீ.வி.விக்னேஸ்வரன் தமிழக மக்கள் ஆந்திராவில் தாக்கப்பட்டபோதும், தமிழக மக்கள் ஜல்லிக்கட்டுக்கு ஆதரவாக போராடியபோதும் உற்சாகம் ஊட்டும் வகையில் அறிக்கைகளை விடுத்தவர்.

அந்தவகையில் காவிரி நீர் பிரச்சினைக்காக ஒட்டுமொத்த தமிழ் மக்களும் இணைந்த பாரிய அறவழி போராட்டத்திற்கான அறைகூவலை முதலமைச்சர் விடுக்கவேண்டும் எனவும் கோரிக்கை விடுத்துள்ளார்.

இதேவேளை, அவர் அதனை ஆழமாக பார்த்து வருகிறார் என்பதை நான் அறிந்து கொண்டேன் என்றும் தென்னிந்திய நடிகர் கருணாஸ் கூறியுள்ளார்.

இலங்கையில் ஒவ்வொரு நாளும் ஏற்படும் மரணங்களில் விபத்தால் ஏற்படும் மரணங்களே அதிகமாக இருக்கின்றன.

விபத்தால் ஏற்படும் மரணங்களின் எண்ணிக்கை நாளுக்கு நாள் அதிகரித்துக் கொண்டே செல்கின்றன. இதை நாம் கூறவில்லை. புள்ளி விபரத்தகவல்கள் தெரிவிக்கின்றன.

இலங்கையின் எல்லா இடங்களிலும் விபத்துக்கள் ஏற்படுகின்றன. கிராமமாக இருக்கட்டும் நகரமாக இருக்கட்டும் விபத்துக்கள் ஏற்படத்தான் செய்கின்றன.

எனினும், அப்போதைய காலக்கட்டத்தில் வாகனங்களின் எண்ணிக்கை குறைவாகும். வீதிகளில் வாகனங்களை விரல் விட்டு எண்ணலாம். விபத்துக்களும் குறைவாகவே ஏற்பட்டன. ஆனால் தற்போது அந்த நிலை இல்லை.

இன்று இலங்கையின் எல்லா பக்கங்களிலும் விபத்துக்கள் ஏற்பட்டவண்ணமே உள்ளன. மற்ற இடங்களை விட கொழும்பிலேயே அதிக வாகன விபத்துக்கள் ஏற்படுகின்றன.

அந்த வகையில் கொழும்பில் முதன்முதலாக எப்போது வாகன விபத்து ஏற்பட்டது தெரியுமா?

1910ஆம் ஆண்டு, அதாவது 108 வருடங்களுக்கு முன்னர் கொழும்பில் முதன்முதலாக வாகன விபத்து ஏற்பட்டது. இதன்போது எடுக்கப்பட்ட புகைப்படம் தற்போது சமூகவலைத்தளத்தில் பரவி வருகின்றது.

கொழும்பு – கோட்டைக்கு பயணிகளை ஏற்றிச்செல்லும் வண்டி ஒன்றும், மற்றைய வண்டி பிரிட்டிஷ் அதிகாரியால் பயன்படுத்தப்படும் ஒரு தனியார் வாகனமாக இருக்கலாம் என்றும் தகவல்கள் தெரிவிக்கின்றன.

இலங்கையில் முச்சக்கர வண்டிக்கு பதிலாக நான்கு சக்கர வாகனம் ஒன்று அறிமுகப்படுத்தி வைக்கப்படவுள்ளது.

மோட்டார் வாகன சட்டமூலத்திற்கான 3 உத்தரவுகளுக்கு நேற்று நாடாளுமன்றத்தில் அனுமதி கிடைத்துள்ளது.

2017ஆம் ஆண்டு அறிமுகப்படுத்தி வைக்கப்பட்ட முச்சக்கர வண்டிகளுக்கு பதிலாக நான்கு வாகனம் ஒன்றை இலங்கை சட்டத்திற்குள் உள்ளடக்குவது, அந்த வாகனங்களை அதிவேக நெடுஞ்சாலைகளில் அனுமதிக்காமை, மோட்டார் வீடு என்ற பெயரில் புதிய வாகன கட்டமைப்பு அறிமுகப்படுத்தி வைத்தல் ஆகியவை இதற்குள் உள்ளடக்கப்பட்டுள்ளது.

போக்குவரத்து பிரதி அமைச்சர் அஷோக் அபேசிங்கவினால் இந்த தகவல் வெளியிடப்பட்டுள்ளது.