வெலிகம பிரதேசத்தில் நேற்று மாலை இடம்பெற்ற பாரிய விபத்தில் இளைஞர் ஒருவர் உயிரிழந்துள்ளதுடன், மேலும் ஐந்து பேர் காயமடைந்துள்ளனர்.

டிபர் ரக வாகனம் ஒன்றும் முச்சக்கர வண்டி ஒன்றும் மோதிக் கொண்டதில் இந்த விபத்து இடம்பெற்றதாக பொலிஸார் தெரிவித்தனர்.

விபத்தில் ஒருவர் ஸ்தலத்திலேயே பலியாகியுள்ளதுடன், காயமடைந்தவர்கள் வெலிகம, வலான வைத்தியாசலைக்கு கொண்டு செல்லப்பட்டு, பின்னர் மேலதிக சிகிச்சைக்காக மாத்தறை பொது வைத்தியசாலைக்கு மாற்றப்பட்டுள்ளனர்.

வெலிகம, கொஹுனுகம பிரதேசத்தைச் சேர்ந்த 17 வயதுடைய ஒருவரே விபத்தில் உயிரிழந்துள்ளார்.

விபத்து தொடர்பாக டிபர் வாகனத்தின் சாரதி கைது செய்யப்பட்டுள்ளதுடன், வெலிகம பொலிஸார் மேலதிக விசாரணைகளை ஆரம்பித்துள்ளனர்.

பேருவளை பொலிஸ் நிலையத்தின் நிலைய பொறுப்பதிகாரிக்கு இலஞ்சம் கொடுக்க முற்பட்ட ஒருவர் கைது செய்யப்பட்டுள்ளார்.

மாடு திருடப்பட்ட சம்பவம் தொடர்பில் நீதிமன்றத்தில் முன்னிலைப்படுத்தப்பட்டிருந்த வேனை விடுவிப்பதற்கு 25,000 ரூபா பணத்தை, பொலிஸ் நிலையத்தின் நிலைய பொறுப்பதிகாரிக்கு சந்தேகநபர் இலஞ்சமாக கொடுக்க முற்பட்டுள்ளார்.

இதன்போது சந்தேகநபர் பொலிஸாரால் கைது செய்யப்பட்டுள்ளார்.

கைது செய்யப்பட்ட சந்தேகநபர் பேருவளை பிரதேசத்தைச் சேர்ந்த 35 வயதுடைய ஒருவர் என்பதுடன், அவர் இன்று களுத்துறை நீதவான் நீதிமன்றில் ஆஜர் செய்யப்பட உள்ளார்.

 
இறுதி யுத்தத்தின் பின்னர் புதுக்குடியிருப்பு, வேணாவில் பகுதியில் மீள்குடியேறிய சிறுமி ஒருவர் அடிப்படை வசதிகள் அற்ற நிலையில் தற்பொழுது உயர்தரக் கல்வியினை தொடர்ந்துள்ளதாக கவலை தெரிவித்துள்ளார்.

புதுக்குடியிருப்பு மத்திய கல்லூரியில் விஞ்ஞானப்பிரிவில் கல்வி கற்று வரும் குறித்த சிறுமி வேணாவில் கிராமத்தில் தற்காலிக ஓலைக்குடிசை ஒன்றில் கடந்த 6 வருடங்களாக வாழ்ந்து வருகின்றதாக குறிப்பிடப்படுகின்றது.

இந்த சிறுமியின் குடும்பத்தை சார்ந்தவர்கள் 2012ம் ஆண்டு குறித்த கிராமத்தில் மீள்குடியேறியுள்ள போதும் இதுவரை அவர்களுக்கு நிரந்தர வீடு வழங்கப்படவில்லை என்று தெரிவிக்கப்படுகின்றது.

மேலும் மின்சாரம் உள்ளிட்ட அடிப்படை வசதிகள் அற்ற நிலையில் குறித்த சிறுமி ஒரு சிறந்த வைத்தியராகி பொதுமக்களுக்கு சேவை செய்ய வேண்டும் என்ற இலட்சியத்துடன் கல்வியை தொடர்ந்துள்ளதாக அவர் குறிப்பிட்டுள்ளார்.

 
சுப்பர் மூன் (Super Moon) மற்றும் பூரண சந்திர கிரகணத்தை ஒரே நேரத்தில் காணும் அரிதான சந்தர்ப்பம் இன்று இலங்கையர் அனைவருக்கும் கிடைத்தது.

152 வருடங்களுக்கு பின்னர் இவ்வாறானதொரு சந்தர்ப்பம் கிடைத்துள்ளதாக கொழும்பு பல்கலைக்கழகத்தின் வானியல் மற்றும் விண்வெளிப் பிரிவின் பணிப்பாளர், பேராசிரியர் சந்தன ஜெயரத்ன தெரிவித்துள்ளார்.

இந்த சந்திர கிரகணம் நேற்று (31.01) பிற்பகல் 4.21 முதல் தென்பட்டதாக தெரிவிக்கப்படுகின்றது.

36 ஆண்டுகளுக்கு பின்னரே சுப்பர் மூன் தென்பட்டுள்ளமை குறிப்பிடத்தக்கது.

யாழ்ப்பாணம் மாதகல் பகுதியில் நேற்று (31.01) காலை மர்மமான முறையில் உயிரிழந்த பெண்ணொருவரின் சடலம் கண்டெடுக்கப்பட்டுள்ளது.

குறித்த சடலம் அன்ரன் உதயராஜ் டிலக்சி என்ற 22 வயதான பெண்ணுடையது என அடையாளம் காணப்பட்டுள்ளது.

நேற்று காலை குறித்த பெண்ணின் கணவர் மற்றும் பெற்றோர் ஆகியோர் கோவிலுக்கு சென்று விட்டு வீடு திரும்பிய போதே குறித்த பெண் உயிரிழந்த நிலையில் சடலமாக கண்டெடுக்கப்பட்டுள்ளார்.

இச்சம்பவம் தொடர்பான மேலதிக விசாரனைகளை மேற்கொண்டு வருவதாக இளவாலை பொலிஸார் தெரிவித்துள்ளனர்.

இலங்கையில் பேஸ்புக் பயன்படுத்துவோருக்கு அவசர எச்சரிக்கை விடுக்கப்பட்டுள்ளது. இந்த மாதத்தில் மாத்திரம் பேஸ்புக் தொடர்பாக 250 முறைப்பாடு கிடைத்துள்ளதாக கணனி அவசர பிரிவின் பாதுகாப்பு பொறியியலாளர் ரொஷான் சந்திர குப்தா தெரிவித்துள்ளார்.

பேஸ்புக் பயனர்கள் பாதுகாப்பு மற்றும் பாதுகாப்பை உறுதி செய்ய கூடுதல் கவனம் செலுத்த வேண்டும் என அவர் குறிப்பிட்டுள்ளார். தங்கள் புகைப்படங்களை பேஸ்புக்கில் வெளியிடும் போது ‘நண்பர்கள் மட்டும்’ பிரிவின் கீழ் வெளியிடுமாறு அவர் கேட்டு கொண்டுள்ளார்.

பேஸ்புக் பயனர்கள், தனிப்பட்ட முறையில் அறியப்பட்டவர்களிடமும், அறியப்படாதவர்களிடமும் இருந்து வரும் நட்பு கோரிக்கைகளை ஏற்றுக்கொள்வது தொடர்பில் அவதானமாக இருக்க வேண்டும் என்பதை மனதில் வைத்து கொள்ள வேண்டும் என அவர் சுட்டிக்காட்டியுள்ளார்.

கடந்த வருடம் டிசம்பர் மாதம் போலி பேஸ்புக் கணக்கு தொடர்பில் 3400 முறைப்பாடுகள் இலங்கை கணனி அவசர பிரிவிற்கு கிடைத்துள்ளது. தங்கள் சொந்த படங்களை வேறு நபர்கள் தவறாக பயன்படுத்தி போலி கணக்குகள் திறந்துள்ளதாகவே அதிக முறைப்பாடுகள் கிடைத்துள்ளதாகவும் அவர் குறிப்பிட்டுள்ளார்.

கடந்த வருடத்தில் 80 சதவீதமான போலிக் கணக்குகளை பேஸ்புக் தலைமையம் முடக்கியுள்ளதாக கணனி அவசர பிரிவின் பாதுகாப்பு பொறியியலாளர் ரொஷான் சந்திர குப்தா மேலும் தெரிவித்துள்ளார்.