வட மாகாணத்தில் பல இடங்களில் பெயரளவில் மாத்திரம் பெண்களின் பெயர்கள் வேட்புமனுவில் குறிப்பிடப்பட்டுள்ளது என கபே அமைப்பின் தேசிய அமைப்பாளர் அகமட் மனாஸ் குற்றம் சாட்டியுள்ளார்.

வவுனியாவில் உள்ளுராட்சி அதிகாரசபை தேர்தல் வாக்கெடுப்பு சட்ட திருத்தங்கள் மற்றும் பெண்கள் பிரதிநிதித்துவம் தொடர்பில் வேட்பாளர்களுக்கு அறிவுறுத்தும் நிகழ்ச்சித்திட்டம் இன்று இடம்பெற்றதன் பின்னர் ஊடகங்களுக்கு கருத்து தெரிவிக்கும் போதே கபே அமைப்பின் தேசிய அமைப்பாளர் அகமட் மனாஸ் மக்கீன் தெரிவித்தார்.
மேலும் அவர் கருத்து தெரிவிக்கையில்,

வட மாகாணத்தில் பல இடங்களில் பெயரளவில் மாத்திரம் பெண்களின் பெயர்கள் வேட்புமனுவில் குறிப்பிடப்பட்டுள்ள நிலையில் அவர்கள் வட்டார ரீதியில் வெற்றி பெற்றாலும் சரி, பெறாவிட்டாலும் சரி என்ற மனோபாவத்துடன் தேர்தல் பிரசார வேலைத்திட்டத்தினை ஆண்கள் முன்னெடுத்து வருவதனை அவதானிக்க முடிகின்றது.

இந்த ரீதியில் வட்டார ரீதியில் பெண்கள் தெரிவு செய்யப்படாமல் எல்லா கட்சிகள் மற்றும் சுயேற்சைக்குழுகளில் ஆண்கள் மாத்திரம் வெற்றிபெற்றால் மேலதிக பெயர்ப்பட்டியலில் இருந்து பெண்களின் பெயர்களை மாத்திரமே தெரிவு செய்து அனுப்பக்கூடிய சந்தர்ப்பத்தில் கட்சி செயலாளருக்கு பாரிய பின்னடைவை சந்திக்க வேண்டிய நிலை ஏற்படும்.

எனவே கட்சிகள் மற்றும் சுயேற்சைக்குழுக்கள் பெண்கள் போட்டியிடும் வட்டாரங்களில் கூடுதல் கவனம் செலுத்தி அவர்கள் வெற்றி பெறுவதற்கான ஆலோசனைகளையும் அவதானத்தினையும் வழங்க வேண்டும்.

இதேவேளை சில அபேட்சகர்களும் கட்சிகளும் இனரீதியிலான பிரசாரங்களை முன்னெடுப்பதனை அவதானிக்க முடிகின்றது. சில கட்சிகளின் பெயர்கள் இனத்தினை அடையாளப்படுத்தும் பெயர்களில் காணப்பட்டாலும் அவர்கள் குறிப்பாக அந்த இனத்திற்குத்தான் வாக்குகளை வழங்கவேண்டும் வேறு இனத்தவர்கள் பிரசாங்களில் ஈடுபட முடியாது என்கின்ற செயற்பாடுகளில் ஈடுபடுகின்றனர்.

ஆகவே இனரீதியாகவோ அல்லது பிரதேசவாத்தினை தூண்டும் வகையிலோ பிரசாரங்களில் ஈடுபடுவதை கபே அமைப்பு வன்மையாக கண்டிக்கின்றது. ஆகவே இவ்வாறான நிலைப்பாட்டை நாம் எமது கண்காணிப்பாளர்கள் அதிகளவானோரை வட மாகாணத்தில் நிறுவி கண்காணிப்போம் எனத் தெரிவித்தார்.

 
வவுனியா ஏ9 வீதியில் அமைந்துள்ள புதிய பேரூந்து நிலையத்திற்கு முன்பாக பேரூந்துகளை தரித்து பயணிகளை ஏற்றிய 8 சாரதிகளுக்கு வவுனியா போக்குவரத்து பொலிஸார் தண்டப்பணம் விதித்துள்ளனர்.

வெளிமாவட்டத்திலிருந்து வவுனியாவில் நிறைவடையும் பேரூந்து சேவைகள் மாத்திரமே வவுனியா புதிய பேரூந்து நிலையத்தினுள் செல்ல முடியுமெனவும், வெளிமாவட்டத்திலிருந்து வேறோரு மாவட்டத்திற்கு செல்லும் பேரூந்துகள் புதிய பேரூந்து நிலையத்திற்கு முன்பாக தரித்து பயணிகளை ஏற்றிச்செல்ல முடியுமெனவும் தீர்மானம் எடுக்கப்பட்டு புதிய பேரூந்து நிலையத்திலிருந்து தனியார், இ.போ.ச பேரூந்துகள் கடந்த வாரம் முதல் சேவையினை முன்னெடுத்து வருகின்றன.

இந் நிலையில் இன்று (11.01.2018) காலை தொடக்கம் மதியம் வரை புதிய பேரூந்து நிலையத்திற்கு முன்பாக பேரூந்துகளை தரித்து பயணிகளை ஏற்றிய 8 சாரதிகளுக்கு வவுனியா போக்குவரத்து பொலிஸார் தண்டப்பணம் விதித்துள்ளனர்.

புதிய பேரூந்து நிலையத்திற்கு முன்பாக பாதசாரிகள் கடவையில்லை, வாகனம் தரிப்பதற்கு தடையென எவ்வித பாதாதைகளும் காணப்படவில்லை மற்றும் புதிய பேரூந்து நிலையத்திலிருந்து அடுத்த பயணிகள் தரிப்பிடம் சுமார் 500மீற்றர் தூரத்தில் வைத்தியசாலைக்கு முன்பாக அமைந்துள்ளது. மற்றும் வீதியின் அருகே ( வெள்ளைக் கோட்டிற்கு கீழே) பேரூந்தினை நிறுத்தி பயணிகளை ஏற்றுவது தவறா? அவ்வாறாயின் புதிய பேரூந்து நிலையத்தினுள் தரித்து பயணிகளை ஏற்றுவதற்கு அனுமதியினை பெற்றுத்தருமாறு வெளிமாவட்டத்தினை சேர்ந்த பேரூந்து சாரதிகள் வேண்டுகோள் விடுக்கின்றனர்.

புதிய பேரூந்து நிலையத்தினுள் வெளிமாவட்டத்தினை சேர்ந்த பேரூந்துகள் தரித்து பயணிகளை ஏற்றாமல் நேராக செல்வதினால் நாங்கள் புதிய பேரூந்து நிலையத்திற்கு முன்பாக நின்று பேரூந்துகளின் பயணம் மேற்கொள்ளுகின்றோம். ஆனால் அதனையும் போக்குவரத்து பொலிஸார் தடுத்து அவ்விடத்தில் தரிக்கும் பேரூந்து சாரதிகளுக்கு எதிராக தண்டப்பணம் விதிக்கின்றார்கள். எனவே நாங்கள் எங்கு நின்று எமது சேவையினை பெற்றுக்கொள்ள முடியும் என பயணிகள் விசனம் தெரிவிக்கின்றனர்.

இவ் விடயம் தொடர்பாக வவுனியா பொலிஸ் நிலைய பொறுப்பதிகாரியின் கவனத்திற்கு கொண்டு வந்த சமயத்தில் இவ் விடயம் தொடர்பாக தான் தீர்க்கமான முடிவினை தெரிவிப்பதாக தெரிவித்தார்.

​