பலாங்கொடை – ரன்தொலவத்த பகுதியில் பாதிமா சௌம்யா என்ற 10 வயது சிறுமி தூக்கில் தொங்கிய நிலையில் நேற்று சடலமாக மீட்கப்பட்டார்.

வீட்டில் யாரும் இல்லாத நிலையிலேயே இந்த அனர்த்தம் ஏற்பட்டுள்ளதாக தெரிவிக்கப்படுகின்றது.

கைத்தொலைபேசி பிரச்சினை காரணமாக இவர் தற்கொலை செய்துகொண்டிருக்கலாம் என பொலிஸார் சந்தேகம் வெளியிட்டுள்ளனர்.

குறித்த சிறுமியின் தந்தை இவர்களை விட்டுச் சென்ற நிலையில், சம்பவம் நடைபெற்ற தினம் தாயார் வேலைக்கு சென்றுள்ளார்.

வேலையை முடித்துக்கொண்டு சிறுமியின் தாய் வீடு திரும்பிய போது, மகளை காணவில்லை என தேடியுள்ளார்.

இதன்போது வீட்டின் பின்பகுதியில் சிறுமி தூக்கில் தொங்கிய நிலையில் சடலமாக காணப்பட்டுள்ளார்.

இந்த சம்பவம் தொடர்பில் விசாரணைகளை முன்னெடுத்த பொலிஸார் கைத்தொலைபேசி பிரச்சினை காரணமாக இவர் தற்கொலை செய்துகொண்டிருக்கலாம் என சந்தேகம் வெளியிட்டுள்ளனர்

வட்டிக்குக் கடன் கொடுத்து காசோலை மோசடியில் ஈடுபட்ட ஒருவருக்கு யாழ். மேல் நீதிமன்றம் நேற்று இரண்டு வருட சிறைத்தண்டனை விதித்துள்ளது.

யாழ்ப்பாணத்திலுள்ள அரச வங்கியொன்றில் பணியாற்றும் அதிகாரியொருவருக்கே சிறைத்தண்டனை விதிக்கப்பட்டுள்ளது. யாழ். மேல் நீதிமன்ற நீதிபதி மாணிக்கவாசகர் இளஞ்செழியனால் இந்த உத்தரவு பிறப்பிக்கப்பட்டது.

மோசடி செய்யப்பட்டதாகக் கூறப்படும் 47,85,000 ரூபா காசோலை பணத்தை திரும்பி செலுத்த தேவையில்லை எனவும் நீதிபதி உத்தரவிட்டுள்ளார்.

இத்தகைய சட்ட முரணான செயற்பாடுகளில் ஈடுபட்டால், நீதிமன்றத்தினூடாக அந்த பணத்தை மீளப்பெற முடியாது எனவும் நீதிபதி மாணிக்கவாசகர் இளஞ்செழியன் சுட்டிக்காட்டியுள்ளார்.

மீட்டர் வட்டி , பிரமிட் வட்டி என்பன சட்டத்திற்கு முரணான செயற்பாடு என தெரிவித்துள்ள நீதிபதி, கொடுக்கல் வாங்கல்களில் ஈடுபடும் இருவரும் குற்றவாளிகளாவர் என அறிவித்துள்ளார்.

இத்தகைய மீட்டர் வட்டி யாழ்ப்பாணத்தில் ஒரு குடும்பத்தையே காவு கொண்டுள்ளதை நினைவுபடுத்திய நீதிபதி, இத்தகைய செயற்பாடுகளால் ஒன்றுமே அறியாத பச்சிளம் குழந்தைகள் இறந்துபோயுள்ளதாகவும் கூறியுள்ளார்.

இதேவேளை, மணித்தியால வட்டி, நாள் வட்டி, மாத வட்டி, மீட்டர் வட்டி மற்றும் பிரமிட் வட்டி என்பன யாழ்ப்பாணத்தில் நடைமுறையில் உள்ளதாகவும் இவற்றை அனைவரும் உடனடியாக நிறுத்த வேண்டும் எனவும் நீதிபதி உத்தரவிட்டுள்ளார்.

இவ்வாறான நிதி நிறுவனங்களைக் கண்காணித்து, இவை தொடர்பில் மத்திய வங்கியின் ஆளுநர் நடவடிக்கை எடுக்க வேண்டும் எனவும் நீதிபதி மாணிக்கவாசகர் இளஞ்செழியன் கூறியுள்ளார்.

ஒரு அரச வங்கி உத்தியோகத்தருக்கு கோடிக்கணக்கில் எவ்வாறு பணம் கிடைத்தது என்பது தொடர்பில் வங்கியின் முகாமையாளர் ஆராய வேண்டும் எனவும் நீதிபதி உத்தரவிட்டுள்ளார்.

கினிகத்தேனை பொலிஸ் பிரிவிற்கு உட்பட்ட எபர்டீன் நீர்வீழ்ச்சிக்கு நண்பர்களுடன் நீராடச் சென்ற இளைஞன் நீரில் மூழ்கி உயிரிழந்தார். நேற்று பிற்பகலில் இந்த சம்பவம் இடம்பெற்றதாக கினிகத்தேனை பொலிஸார் தெரிவித்தனர்.

குறித்த பிரதேசத்தில் உள்ள நீர்வீழ்ச்சியில் 11 இளைஞர்கள் நீராடச் சென்றனர். நீராடிக் கொண்டிருக்கும் வேளையில் குறித்த இளைஞன் சுழியொன்றில் சிக்கியுள்ளார்.

குறித்த இளைஞனை ஏனைய நண்பர்கள் மீட்க முயற்சித்த போதும் முயற்சி பயனளிக்காத நிலையில் மேற்படி இளைஞன் நீரில் மூழ்கி உயிரிழந்தார்.

இதனையடுத்து, மாலை நேரம் கினிகத்தேனை பொலிஸ் பாதுகாப்பு பிரிவினரும், ராணுவத்தினரும், பிரதேச மக்களும் இணைந்து குறித்த இளைஞனின் சடலத்தை ஆற்றிலிருந்து மீட்டுள்ளனர்.

கண்டி தர்மராஜ வித்தியாலயத்தில் உயர்தரம் கல்வி கற்கும் 18 வயதான விரோஜன பண்டார என்பவரே உயிரிழந்தவர் என அடையாளம் காணப்பட்டுள்ளார்.

மரண விசாரணைகளின் பின்னர் பிரேத பரிசோதனைக்காக சடலம் நாவலப்பிட்டி பிரதேச வைத்தியசாலையில் ஒப்படைக்கப்பட்டுள்ளதாக பொலிஸார் தெரிவித்தனர்.

நியூசிலாந்தின் குயின்ஸ்டவுனில் வசிக்கும் இலங்கை குடும்பம் ஒன்று நாடு கடத்தலை எதிர்நோக்கியுள்ளதாக அந்நாட்டு ஊடகங்கள் தகவல் வெளியிட்டுள்ளன.

நவம்பர் மாதம் 21ஆம் திகதி விஜேரத்ன என்பவரும் அவரது மனைவி மற்றும் 3 ஆண் பிள்ளைகள் இவ்வாறு நாடு கடத்தப்படவுள்ளனர்.

11, 10 மற்றும் 8 வயதுடைய விஜேரத்ன என்பவரின் பிள்ளைகள் குயின்ஸ்டவுன் முதன்மை பாடசாலையில் கல்வி கற்பதோடு, அவர்கள் சிறந்த மாணவர்களாக கருதப்படுகின்றனர்.

அண்மையில் Otago-Southland பகுதியில் இடம்பெற்ற போட்டி ஒன்றில் இரண்டு பிள்ளைகளும் சாதனை படைத்துள்ளனர்.
அவர்கள் அவுஸ்திரேலிய கல்விப் பரீட்சைகளில் கலந்துகொள்ள அழைக்கப்பட்டுள்ளனர். நீச்சல் மற்றும் கிரிக்கெட் வீரர்களாக உள்ளனர், குயின்ஸ்டவுன் கழகத்தில் விளையாடி வருகின்றனர்.

2010ஆம் ஆண்டு இந்த சிறுவர்களின் தாயார் தினேஷா அமரசிங்க நியூசிலாந்தில் மருத்துவ மாணவியாக பதிவு செய்துள்ளார். அவருக்கு 10 ஆண்டு தொழில் அனுபவம் உள்ளதோடு, நியூசிலாந்தின் திறமையான புலம்பெயர்ந்தோர் பிரிவின் கீழ் 2011ஆம் ஆண்டு முதல் ஒக்லாந்தில் சமையல் கலைஞராக பணியாற்றி வருகின்றார்.

2011 ஆம் ஆண்டின் பிற்பகுதியில், இந்த குடும்பம் குயின்ஸ்டவுனுக்கு மாற்றப்பட்டது, அங்கு பிரபலமான Lone Star உணவகத்தில் தினேஷா சமையல் கலைஞராக பணியாற்றி வந்துள்ளார். அவரது விசாவில் கணவருக்கு திறந்த பணி செய்ய அனுமதி வழங்கப்பட்டது. அதற்கமைய அவர் New World சுப்பர் மார்க்கெட்டில் பணி புரிந்ததோடு, டெக்ஸி சாரதியாகவும் செயற்பட்டு வந்துள்ளார்.

2014ஆம் ஆண்டு தினேஷா தவறி விழுந்தமையினால் அவரது இடுப்பு பகுதியில் பாதிப்பு ஏற்பட்டுள்ளது. அவரது காலில் வலி இருந்த போதிலும், சிகிச்சை மேற்கொள்ள வேண்டிய கட்டாயம் இருந்த போதிலும் அவர் தொடர்ந்து பணி செய்து வந்துள்ளார். எனினும் 2015 ஆம் ஆண்டு ACC என வருத்தம் அவருக்கு ஏற்பட்டுள்ளது.

2015ஆம் ஆண்டு மே மாதம் அவரது தனது மூளையை பரிசோதித்து பார்த்த போது அவர் ஸ்களீரோசிஸ் (sclerosis) எனப்படும் நோயால் பாதிக்கப்பட்டுள்ளார் என கண்டறியப்பட்டுள்ளது.

கடந்த ஒக்டோம்பர் மாதம் தினேஷாவினால் பணி புரிய முடியவில்லை என்பதால், அவரது திறமையான தொழிலாளிக்கான தற்காலிக விசா நிராகரிக்கப்பட்டது. இதனால் அவரது கணவரால் இனி வேலை செய்ய முடியாது என கூறப்பட்டதுடன், அவர்களது குடும்பம் நவம்பர் 21 நாட்டிலிருந்து வெளியேற வேண்டும் என அறிவிக்கப்பட்டுள்ளது.

பல்வேறு சட்ட சிக்கல்கள் காரணமாக அவர்கள் 2013ஆம் ஆண்டு விண்ணப்பித்த நிரந்தர விசா தாமதமாகியதாக கூறப்படுகின்றது. எனினும் அவர்களை தொடர்ந்து நியூசிலாந்தில் தங்க வைப்பதற்கான நடவடிக்கைகளை அவரது வழக்கறிஞர் மேற்கொண்டு வருவதாக ஊடகங்கள் சுட்டிக்காட்டியுள்ளன.

 
இலங்கையில் பிறந்த பிரித்தானியாவின் பிரபல பெண் ஷெரி எசேஸன் தன்னை பெற்ற தாயை தேடி இலங்கையை வந்தடைந்துள்ளார்.

இவர் நேற்று தனது கணவருடன் பிரித்தானியாவில் இருந்து கட்டுநாயக்க விமான நிலையத்தை வந்தடைந்துள்ளார்.

பிரித்தானியாவின் தொழில்நுட்ப துறையில் பலமான 35 பெண்களில் இணைந்துள்ள இலங்கை பெண், தனது தாயாரை கண்டுபிடிப்பதற்கான நடவடிக்கைகளை மேற்கொண்டிருந்தார் .

அண்மையில் மேற்கொண்ட DNA பரிசோதனையின் அடிப்படையில் 99.99% வீதம் தாய்க்கும், மகளுக்கும் பொருத்தம் உள்ளதாக பரிசோதனையை மேற்கொண்ட பிரித்தானிய நிறுவனம் தெரிவித்துள்ளது.

DNA பரிசோதனை வெற்றியளித்த நிலையில் தனது தாயை கண்டுப்பிடித்து, உறுதிப்படுத்தியுள்ளார்.

இந்த நிலையில், தனது தாயை சந்திப்பதற்காக நேற்றைய தினம் இலங்கையை வந்தடைந்துள்ளதாக தெரியவந்துள்ளது.

கடந்த1991ஆம் ஆண்டு பெப்ரவரி மாதம் 28ஆம் திகதி இலங்கையில் பிறந்த ஷெரி எசேஸனுக்கு, வீர முதியன்சலாகே நிரோஷிகா என பெயரிடப்பட்டது. அவர் குழந்தையாக இருக்கும் போது அயர்லாந்து தம்பதி ஒன்றுக்கு தத்துக் கொடுக்கப்பட்டுள்ளமை குறிப்பிடத்தக்கது.