தென் கொரிய நாடாளுமன்றத்தில் பேசிய அமெரிக்க அதிபர் டிரம்ப், வடகொரிய தலைவர் கிம் ஜாங்-உன்னுக்கு நேரடியாக எச்சரிக்கை விடுத்துள்ளார்.

எங்களை குறைத்து மதிப்பிடாதீர்கள். எங்களை சீண்ட வேண்டாம் என்று கூறியதோடு, வடகொரியாவில் வாழ்க்கை என்பது `இருண்ட கற்பனை` என்றும் கண்டனம் தெரிவித்துள்ளார்.

வட கொரியா தலைவர் கிம்மை குறிப்பிட்டு பேசிய அவர், `நீங்கள் பெறும் ஆயுதங்கள் உங்களை வலுவாக்கவில்லை` என்றார். மேலும், வடகொரியாவை தடுக்க மற்ற நாடுகளும் ஒன்றிணைய வேண்டும் என்று வலியுறுத்தினார்.

ஆசியாவின் ஐந்து நாடுகள் பயணத்தின் ஒரு பகுதியாக, டிரம்ப் தென்கொரியா சென்றுள்ளார். அவர் இந்த பயணத்தில், சீனாவின் அதிபர் ஜின்பிங்கை சந்திப்பார் என்றும், பேச்சுவார்த்தையில் வணிகமும், வடகொரியா பிரச்சினையும் முக்கியமாக பேசப்படும் என எதிர்பார்க்கப்படுகிறது.

இந்த சுற்றுப்பயணத்தில், வடகொரியாவின் அணுஆயுத திட்டமே, டிரம்பின் முக்கிய விஷயமாக உள்ளது.

கடந்த ஒரு ஆண்டாக, ஐ.நாவின் தடைகளையும் மீறி, வடகொரியா தொடர்ந்து தனது ஏவுகணைகளை சோதனை செய்து வருகிறது. கடந்த செப்டம்பர் மாதம், தனது மிகப்பெரிய மற்றும் ஆறாவது அணுஆயுத சோதனையை அது நடத்தியது.

தென்கொரிய தலைவர்கள் மத்தியில் டிரம்ப் அளித்த உரை மிகவும் கவனிக்கப்பட்டது. அவரின் உரையில் அப்பட்டமான கோபம் இருந்தாலும், முன்பு போல வட கொரியாவை டிரம்ப் தொடர்ந்து தாக்கவில்லை. கிம் ஜாங்-உன் குறித்து பேசினார்.

எதிர்பாராத விதமாக, டிரம்ப், வடகொரிய தலைவர் கிம் ஜாங்-உன் குறித்து நேரடியாக பேசியதோடு, அந்நாடு தங்களின் அணுஆயுத திட்டங்களையும், ஆயுதங்களையும் கைவிட வேண்டும் என வலியுறுத்தினார்.

அவை உங்கள் நாட்டை மிகவும் மோசமான ஆபத்தில் தள்ளுகிறது. இந்த பாதையில் நீங்கள் எடுத்து வைக்கும் ஒவ்வொறு அடியும், நீங்கள் ஆபத்தை சந்திக்கும் வாய்ப்பை அதிகப்படுத்தும்` என்று எச்சரித்தார்.

இருநாடுகளுக்கு இடையிலான ஒப்பந்தம் குறித்து செவ்வாய்க்கிழமை குறிப்பிட்டதை வலியுறுத்தும் வகையில் பேசிய அவர், `நீங்கள் குற்றங்கள் செய்திருந்தாலும் கூட, நாங்கள் உங்களுக்கு மேம்பட்ட ஒரு வருங்காலத்திற்கான பாதையை வழங்குகிறோம் என்றார்.

எச்சரிக்கை: தவறான கணக்கீடு முன்பு கட்டுப்பாடுகளுடன் இருந்த அமெரிக்கா வலுவிழந்தது போல தெரிந்தது என்பதை வைத்து வடகொரியா தவறான கணக்கீடு செய்யக்கூடாது என்றும், தற்போது புதிய நிர்வாகம் அமெரிக்காவில் உள்ளது என்றும் தெரிவித்தார்.

வடகொரியாவிடம், எங்களை குறைத்து மதிப்பிடாதீர்கள், எங்களை சீண்ட வேண்டாம் என்று கூறுவது, எங்கள் நாட்டிற்காக மட்டுமில்லாமல், அனைத்து நாகரிகமடைந்த நாடுகளுக்காகவும் பேசுகிறேன் என்று நம்புகிறேன் என்றார்.

மோசமான இந்த ஆட்சியை ஒதுக்கி வைக்க, அனைத்து நாடுகளும் ஒன்றிணைய வேண்டும் என்று அவர் கேட்டுக்கொண்டார்.

கொரிய தீபகற்பத்தில் , வான்வழி படை மற்றும் ஜெட் விமானங்கள் ஆகிய அமெரிக்க படைகள் உள்ளதை குறிப்பிட்ட அவர், `நான் வலிமையின் மூலமாக அமைதியை வேண்டுகிறேன்` என்றார்.

மேலும், வடகொரியாவின் பொருளாதார ஆதரவாளர்களான ரஷ்யா மற்றும் சீனாவையும் குறிப்பிட்டு பேசிய டிரம்ப், பொருளாதாரம் உள்ளிட்ட அனைத்து விதமான தொடர்புகளையும் வடகொரியாவுடன் அவர்கள் துண்டித்துக்கொள்ள அழைப்பு விடுத்தார்.

வடக்கின் திகில் வாழ்க்கையும் -தெற்கின் அதிசய வாழ்க்கையும் கொரிய போருக்கு பிறகான, தென் கொரியாவின் சாதனைகள் குறித்து தனது உரையில் அதிகமான அளவு பேசினார் டிரம்ப்.

தென்கொரியாவின் வாழ்க்கைக்கு எதிர்மாறாக, வடகொரியாவில் வாழ்க்கையை திகில் வாழ்க்கை என்று குறிப்பிட்ட அவர் அவர்கள் பிரிந்து சென்ற பாதை என்பது, வரலாற்றின் ஆய்வுக்கூடத்தில் நடந்த சோகமான சோதனையை` போன்றது என்று கூறினார்.

தென் கொரியா எவ்வளவு வெற்றிகரமாக வளர்ந்து வருகிறதோ, அந்த அளவிற்கு, கிம்மின் இதயத்தில் உள்ள இருண்ட கற்பனைகளை நீங்கள் உறுதியுடன் இழிவு செய்கிறீர்கள் என்று அர்த்தம் என்றார் டிரம்ப்.

பூமி தொடர்ந்து வெப்பமயமாகி கொண்டே இருந்தால் இன்னும் 600 ஆண்டுகளில் அதாவது 2600 ஆம் ஆண்டில் பூமி கொளுந்துவிட்டு எரியும் நெருப்பு பந்து போன்று மாறும் என விஞ்ஞானி ஸ்டீபன் ஹாக்கிங் கூறினார்.

பூமியில் மக்கள் தொகை பெருக்கம் தொடர்ந்து அதிகரித்து வருகின்றமையால் அதற்கு தக்கபடி எரிபொருள் தேவையும் அதிகரித்து வருகிறது. இதன் காரணமாக பூமி தொடர்ந்து வெப்பமயமாகி கொண்டே வருகிறது என இங்கிலாந்து இயற்பியல் விஞ்ஞானி ஸ்டீபன் ஹாக்கிங் தெரிவித்துள்ளார்.

இதேநிலை தொடர்ந்து நீடித்தால் இன்னும் 600 ஆண்டுகளில் அதாவது 2600 ஆம் ஆண்டில் பூமி கொளுந்துவிட்டு எரியும் நெருப்பு பந்து போன்று மாறும் என குறிப்பிட்டுள்ளார்.

இதனால் பூமியில் உயிரினங்கள் மற்றும் தாவர வகையில் வாழமுடியாத சூழ்நிலை ஏற்படும். அனைத்தும் அழியும். ஆனால் மனிதர்கள் நினைத்தால் இன்னும் 10 இலட்சம் ஆண்டுகளுக்கு உயிர்வாழ முடியும் எனவும் ஸ்டீபன் ஹாக்கிங் கூறியுள்ளார்.

அதாவது மனிதர்கள் சூரிய மண்டலத்தில் மிக அருகேயுள்ள ஆல்பா சென்டாரி என்ற துணை கிரகத்தில் குடியேறலாம் அல்லது பூமிக்கு அருகேயுள்ள புளூட்டோவுக்கு சென்று தங்கலாம்.

இவற்றில் சூரிய மண்டலத்துக்கு அருகேயுள்ள ஆல்பா சென்டாரி துணை கிரகம்தான் சிறந்தது என தான் கருதுவதாகவும் இக்கிரகம் பூமியில் இருந்து 400 கோடி மைல் தொலைவில் உள்ளது எனவும் இது செவ்வாய் கிரகத்தை விட குறைந்த தொலைவில் உள்ளது என்றும் அவர் தெரிவித்துள்ளார்.

இக்கிரகத்துக்கு சிறிய விமானத்தில் ஒரு வாரத்திற்குள் செல்ல முடியும். எனவே அதற்கான ஏற்பாட்டை இன்னும் 20 ஆண்டுகளில் செய்து முடித்துவிடுங்கள் என்று யற்பியல் விஞ்ஞானி ஸ்டீபன் ஹாக்கிங் பெய்ஜிங்கில் நடந்த அறிவியல் மாநாட்டில் கலந்து கொண்டு பேசிய போது கூறியுள்ளார்.

இங்கிலாந்து போர்ட்ஸ் மௌத் பல்கலைக்கழக மாணவர் 145 மில்லியன் ஆண்டுகளுக்கு முன் வாழ்ந்த எலியின் பல்லை கண்டுபிடித்துள்ளார்.

இங்கிலாந்தில் உள்ள போர்ட்ஸ் மௌத் பல்கலைக்கழகத்தைச் சேர்ந்த மாணவர் கிராண்ட் ஸ்மித், இவர் தென்மேற்கு இங்கிலாந்தில் உள்ள ‘டோர்செட்’’ கடற்கரையில் பாறைகளுக்கு இடையே கூர்மையான 2 பற்களை கண்டெடுத்துள்ளார்.

அவை எலி போன்று வலைக்குள் (பொந்துகளுக்குள்) வாழும் உயிரினத்திற்குரியது.

அந்த பல் மிகவும் கூர்மையானது அதே நேரத்தில் உணவு பொருட்களை துண்டாக்கி அதை மென்று சாப்பிடும் வகையில் உள்ளது, எலியின் பல்லுடன் ஒத்து போகிறது.

அந்த பற்களுக்குரிய உயிரினம் சுமார் 14½ கோடி (145 மில்லியன் ) ஆண்டுகளுக்கு முன்பு வாழ்ந்து இருக்கலாம் என ஆராய்ச்சியாளர் ஸ்டீவ் சுவீட்மேன் தெரிவித்துள்ளார்.

மேலும் இந்த உயிரினம் பாலூட்டி வகையைச் சேர்ந்தது, டய்னோசர் தொடக்க நிலைவகை மிருகமான டியூரிஸ்டோடான் என்சோமி மற்றும் டியூரிஸ்டோதெரியம் நியூமனி ஆகியவற்றில் ஏதாவது ஒருவகையை சேர்ந்ததாக இருக்கலாம் என்றும் அவர் கூறியுள்ளார்.

வயது முதிர்ந்த ஆண்களைத் திட்டமிட்டுக் காதலித்து, அவர்களது காப்புறுதிப் பணத்துக்கு உரித்துப் பெற்றபின் அவர்களை சயனைட் கொடுத்துக் கொலை செய்து வந்த பெண்ணுக்கு ஜப்பானிய நீதிமன்றம் மரண தண்டனை விதித்துத் தீர்ப்பளித்துள்ளது.

சிஸாக்கோ காகேஹி (70) என்ற பெண்ணுக்கே மரண தண்டனை விதிக்கப்பட்டுள்ளது. இவரை ‘விஷப் பெண்’ என்றும் ‘சூனியக்கார விதவை’ என்றும் ஜப்பானியர்கள் அழைக்கிறார்கள்.

முதல் திருமணம் உட்பட இதுவரை நான்கு முறை திருமணம் செய்தவர் காகேஹி. டேட்டிங் இணையதளங்களில், வயதான மற்றும் நோய்வாய்ப்பட்ட, சொந்தமென்று சொல்லிக்கொள்ள யாருமேயில்லாத ஆண்களையே காகேஹி குறிவைத்துத் திருமணம் செய்துகொண்டார்.

சொல்லிவைத்தாற்போல், ஒவ்வொரு ஆணின் காப்புறுதிப் பணத்துக்கும் பொறுப்பாளராக காகேஹி நியமிக்கப்பட்ட ஓரிரு தினங்களில் அவர்கள் கொல்லப்பட்டு வந்தனர்.

கொல்லப்பட்டவர்களது உடற்கூற்று அறிக்கையில் சயனைட் மற்றும் அதற்கு நிகரான விஷப் பொருட்கள் காணப்பட்டதை பொலிஸார் அவதானித்தனர்.

காகேஹியின் நான்காவது கணவரும் மர்மமான முறையில் இறந்ததையடுத்து, 2013ஆம் ஆண்டு சந்தேகத்தின் பேரில் காகேஹியைக் கைது செய்து வழக்குப் பதிவு செய்தனர்.

ஆரம்ப விசாரணையின்போது மௌனம் காத்த காகேஹி, நான்காவது கணவரைக் கொலை செய்ததை ஒத்துக்கொண்டார். எனினும், தனது காதலிகளுக்கு மில்லியன் கணக்கில் பணம் கொடுத்த அவர் தனக்கு ஒரு யென்னையேனும் தராததாலேயே கொலை செய்ததாகக் கூறியிருந்தார்.

எவ்வாறெனினும், காகேஹியின் வீட்டுக் குப்பைகளில் சயனைட் அடங்கிய சாடிகள் கண்டுபிடிக்கப்பட்டதையடுத்து குற்றம் நிரூபிக்கப்பட்டது. இதையடுத்து அவருக்கு மரண தண்டனை விதிக்கப்பட்டது. விரைவில் இத்தண்டனை நிறைவேற்றப்படலாம் என்றும் தெரிவிக்கப்படுகிறது.

இவ்வாறு காகேஹி முறைகேடாகச் சேர்த்த பணம் பல மில்லியன் டொலர்கள். என்றபோதும், அந்தப் பணத்தை நேர்த்தியாக வியாபாரத்தில் பயன்படுத்தத் தெரியாததால், தற்போது காகேஹி பணப் பற்றாக்குறையிலேயே உள்ளமை குறிப்பிடத்தக்கது.