வவுனியா, பேரூந்து நிலையத்தில் 2 கிலோ 136 கிராம் கேரள கஞ்சாவுடன் யாழ்ப்பாணத்தைச் சேர்ந்த இளைஞன் ஒருவரை வவுனியா மதுஒழிப்பு பிரிவுப் பொலிசார் கைது செய்துள்ளனர்.

நேற்று மாலை 6.30 மணியளவில் குறித்த நபர் கைது செய்யப்பட்டுள்ளார். இது குறித்து மேலும் தெரியவருவதாவது,

யாழில் இருந்து கண்டி நோக்கிச் செல்லும் பேரூந்தில் பயணித்த இளைஞன் ஒருவரின் செயற்பாட்டில் சந்தேகம் அடைந்த வவுனியா மது ஒழிப்பு பிரிவுப் பொலிசார் வவுனியா பேரூந்து நிலையத்தில் வைத்து குறித்த இளைஞனின் பையினை சோதனை செய்த போது அதில் 2 கிலோ 136 கிராம் கேரள கஞ்சா கண்டு பிடிக்கப்பட்டது. இதனையடுத்து குறித்த கேரள கஞ்சா கைப்பற்றப்பட்டதுடன் குறித்த இளைஞரும் கைது செய்யப்பட்டுள்ளார்.

யாழ் பண்டத்தரிப்பைச் சேர்ந்த இளைஞரே இவ்வாறு கைது செய்யப்பட்டுள்ளார். கைது செய்யப்பட்ட நபரை நீதிமன்றில் முற்படுத்துவதற்கான நடவடிக்கைகளை வவுனியா பொலிசார் மேற்கொண்டு வருகின்றனர்.

இதேவேளை குறித்த கஞ்சா இந்தியாவின் தெலுங்குப் பத்திரிகை ஒன்றில் பொதி செய்யப்பட்டிருந்தமை குறிப்பிடத்தக்கது.

ஊடகவியலாளர்கள் ஒரு கட்சி சார்ந்து செயற்படக்கூடாது, அதேபோல ஊடக கற்கை நெறி கல்லூரிகள் அரசியல் சார்ந்து செயற்படாமல் அனைத்து கட்சி மக்கள் பிரதிநிதிகளையும் அரவணைத்து செயற்பட முன்வரவேண்டும் என நேற்று வவுனியா விருந்தினர் விடுதியில் இடம்பெற்ற வடக்கு ஊடகவியலாளர்கள் பயிற்சிக்கல்லூரியில் பயிற்சிகளை முடித்து சான்றிதழ் வழங்கும், சமூகசேவையாளர்களை கௌரவிக்கும் நிகழ்வில் சிறப்பு விருந்தினராக கலந்துகொண்டு உரையாற்றிய வன்னி மாவட்ட நாடாளுமன்ற உறுப்பினர் கே. காதர் மஸ்தான் தெரிவித்துள்ளார். அவர் மேலும் உரையாற்றுகையில்,

சமூக வலையத்தளங்களை தற்போது பார்க்கமுடியவில்லை யாரையோ ஒருவரைத்தாக்கவேண்டும் என்ற நோக்கத்துடனே செயற்படுவது. ஒரு இணையதளத்தில் பிரசுரிக்கப்பட்ட செய்தியை வைத்து இவர் எந்தக்கட்சியைச் சார்ந்தவர் என்பதை தெரிந்துகொள்ளமுடியும் முடியுமானவரை இச் செயற்பாடுகளை நாங்கள் தவிர்த்துக்கொள்ளவேண்டும்.

வவுனியாவைப் பொறுத்தவரையில் ஒரு செய்தி வரமுன் அத்தகவல் சரியா என்பதை அக்கட்சியிடம் உறுதிப்படுத்தி வெளியிடுவது அவசியம். ஆனால் அவ்வாறு செய்படாமல் செய்திகளைப்பிரசுரித்த பின்னர் பார்த்தால் அது தவறான கருத்தாகவே காணப்படுகின்றது.

அவ்வாறான நிகழ்வுகள் இன்று வவுனியா மாவட்டத்தில் நடைபெற்றுக்கொண்டிருக்கின்றது. அனேகமான ஊடகவியலாளர்களுக்குத் தெரியும் அது என்ன என்று.

சிலர் தங்களுடைய கட்சியை உயர்த்துவதற்கும் தங்களது கட்சி சார்ந்த செய்திகளைப்பிரசுரித்து வருவதும் தெரிந்ததே. தற்போது இந்த சமூக வலையத்தளங்கள் பாரதூரமான தாக்கத்தை ஏற்படுத்தியுள்ளது.

அவ்வாறு செயற்படும் ஊடகவியலாளர் அரசியல் கட்சியைச் சார்ந்தவர்களாகவே காணப்படுகின்றார்கள். தற்போது நல்லவிடயங்களுக்காக சமூகத்தில் சமூக வலைத்தளங்கள் பாரிய தாக்கத்தை ஏற்படுத்த வேண்டும். சமூகப்பொறுப்புள்ள விடயங்களில் கல்வி, சமூகம் இவ்வாறான நல்ல விடயங்களை கையிலெடுத்து மக்களிடத்திற்கு கொண்டு சென்று மாற்றத்தை ஏற்படுத்தும் விதமான செய்திகளாக பிரசுரிக்க முன்வரவேண்டும்.

மக்கள் பிரதிநிதிகள் தாங்கள் தவறு செய்கின்றார்கள் என்றால் துணிந்து அவர் இவ்வாறான தவறுகள் செய்கின்றார் என்று நேரடியாக தொடர்புபட்ட மக்கள் பிரதிநிதியிடம் தொடர்புகொண்டு கேட்டு அவரைத் திருத்துவதற்காக ஊடகங்கள் செய்தால் அது தவறல்ல. நாங்கள் ஒருவரை அவமானப்படுத்தினால் அதன் பிரதிபலன் எமக்கு திரும்பவரும் என்று நினைத்துக்கொள்ளவேண்டும்.

அதேபோல இன்றும் எனது மனதில் பட்டதை நான் கூறியாக வேண்டும். இன்று இடம்பெறும் குறித்த வடக்கு ஊடக கல்லூரி நிகழ்விற்கு வருகை தந்த விருந்தினர்கள் என்பவர்கள் வவுனியா மாவட்டத்தைத்தவிர்ந்த ஏனைய மாவட்டங்களிலிருந்து வரவழைக்கப்பட்டுள்ள மக்கள் பிரதிநிதிகள். அவர்கள் ஒரே கட்சியைச்சார்ந்தவர்களாகவே காணப்படுகின்றார்கள்.

எங்கு அந்தத்தவறு இடம்பெற்றுள்ளது என்று எனக்குத் தெரியவில்லை. அனுராதபுரம், புத்தளம், திருகோணமலை மாவட்டங்களிலிருந்து இங்கு வந்துள்ள மக்கள் பிரதிநிதிகள் எந்தக்கட்சியைச்சார்ந்தவர்கள் என்று எல்லோருக்கும் தெரியும்.

ஆனால் குறித்த மாவட்டங்களில் இன்னும் பாராளுமன்ற உறுப்பினர்கள் வேறு கட்சியைச்சார்ந்தவர்கள் இருக்கின்றார்கள். அவர்களிடம் கேட்டு அவர்களுக்கும் சந்தர்ப்பம் வழங்கியிருந்தால் சிறப்பாக இருந்திருக்கும்.

ஏனென்றால் என்னுடைய பார்வைக்கு அந்த அழைப்பிதழில் அழைக்கப்பட்ட விருந்தினரைப்பார்க்கும்போது இது ஒரு கட்சி சார்ந்த ஊடகமாகவும் ஊடக கல்லூரியாகவும் காணப்படுகின்றதா என்ற கேள்வி எனக்குள்ளும் எழுகின்றது. வடக்கு மாகாணத்தைப் பொறுத்தவரையில் இவ்வாறான வேறுபாடுகள் காட்டப்படவில்லை. என்று மேலும் தனது உரையில் தெரிவித்துள்ளார்.

இன்றைய நிகழ்வில் முதன்மை விருந்தினராக வணிகத்துறை அமைச்சர் ரிஸாட் பதியூதின் மற்றும் அவரது கட்சி ஆதரவாளர்கள் கலந்துகொண்டனர்.

சிவசக்தி ஆனந்தன், செல்வம் அடைக்கலநாதன், வடமாகாணசபை உறுப்பினர் ப.சத்தியலிங்கம் ஆகியோரின் பெயரும் அழைப்பில் பிரசுரிக்கப்பட்டிருந்தது. எனினும் அவர்கள் இந்நிகழ்வில் கலந்துகொள்ளவில்லை என்பது குறிப்பிடத்தக்கது.

 
வவுனியாவில் இன்று பிற்பகல் வேளையில் குளத்திற்கு குளிக்கச்சென்றவர் மாலையில் உயிரிழந்த நிலையில் சடலமாக குளத்திலிருந்து மீட்கப்பட்டுள்ளார். இச்சம்பவம் தொடர்பாக மேலும் தெரியவருகையில்,

வவுனியா ஈச்சங்குளம், மறவன்குளம் பகுதியிலுள்ள நடராசா சந்தனகுமார் என்ற 36 வயது இளைஞன் இன்று பிற்பகல் வேளையில் கல்மடு குளத்திற்கு குளிக்கச் செல்வதாக தெரிவித்து விட்டுச் சென்றுள்ளார்.

இதையடுத்து மாலை அக்குளத்திற்கு குளிக்கச் சென்ற வேறொருவர் குறித்த நபர் குளத்தில் சடலமாக இருப்பதை அவதானித்ததுடன் இது குறித்து ஈச்சங்குளம் பொலிசாருக்கு தகவல் வழங்கப்பட்டுள்ளது.

இதையடுத்து சம்பவ இடத்திற்குச் சென்ற பொலிசார் மேலதிக விசாரணைகளை மேற்கொண்டு வருகின்றதுடன் குறித்த நபருக்கு வலிப்பு வருவதாக அவரது உறவினர்கள் பொலிசாரிடம் தெரிவித்துள்ளனர்.

தற்போது சடலம் வவுனியா பொதுவைத்திசாலையில் வைக்கப்பட்டுள்ளது. நாளை மரண விசாரணைகளின் பின்னர் சடலம் உறவினரிடம் ஒப்படைக்கப்படவுள்ளதாக ஈச்சங்குளம் பொலிசார் மேலும் தெரிவித்துள்ளனர்.

 
“பாத்தீனியம் அற்ற வவுனியாவை உருவாக்குவோம்” எனும் செயற்றிட்டத்தின் கீழ் இன்று (22.10.2017) காலை 8.30 மணி முதல் 12 மணி வரை “வவுனியா பசங்க” அமைப்பினரால் வவுனியா வைரவப்புளிங்குளம் சிறுவர் பூங்கா வீதி, நகரசபை ஊழியர் விடுதி வீதி என்பற்றில் வவுனியா நகரசபையின் அனுசரணையுடன் மாபெரும் சிரமதானப்பணி முன்னெடுக்கப்பட்டது.

தற்போது வவுனியா நகரில் பாத்தீனியம் அதிகரித்து காணப்படும் இந் நிலையில் வவுனியா மாவட்ட இளைஞர்களினால் உருவாக்கப்பட்ட ‘வவுனியா பசங்க ‘ அமைப்பினர் இவ்வாறான சமூக சேவைகளில் ஈடுபட்டடுள்ளமை பாராட்டத்தக்க விடயமாகும்.

இவ் அமைப்பினரின் சிரமதான பணிக்கு ஒத்துழைப்பு வழங்கும் முகமாக த எவர் கிறீன் பரடைஸ் உணவகத்தினால் தேனீர் வழங்கப்பட்டதுடன் பொதுமகன் நந்தன் அவர்களினால் குளிர்பானமும் வழங்கப்பட்டமை குறிப்பிடத்தக்கது.

வவுனியாவில் நடிகர் விஜய்க்கு பணத்தினை செலவழித்து பாதாதைகள் வைக்கும் இளைஞர்களுக்கு மத்தியில் இப்படியும் இளைஞர்களா என அனைவரும் பார்வையும் ‘வவுனியா பசங்க’ அமைப்பினர் மீது திரும்பியுள்ளது.