சவுத் வேல்ஸ் மற்றும் லிவர்பூல் ஆகிய பகுதிகளில், மருத்துவராக கடமையாற்றி வரும் குணசேகரன் குமார் எனும் மருத்துவரை, பிரித்தானிய நாளிதழொன்று சிறந்த ஒரு மனிதராக கெளரவித்துள்ளது.

குறித்த நாளிதழ் பல உயிர்களை காத்த கடவுள் என அவரை குறிப்பிட்டுள்ளதுடன், இதுவரை சுமார் 2,000 பேரது உயிரை காப்பாற்றியுள்ள மருத்துவர்கள் தர வரிசையில் அவரது பெயரும் இடம்பிடித்துள்ளது. இந்த விடயம் அனைத்து தமிழர்களையும் பெருமிதத்தில் ஆழ்த்தியுள்ளது.

வேல்சில் நிறைமாத கர்பிணியாக இருந்த தாய் ஒருவர் காரில் செல்லும் போது பெரும் விபத்தில் சிக்கியுள்ளார். அவரை உடனே மருத்துவமனைக்கு கொண்டு சென்றவேளை அங்கே பணியில் இருந்த குணசேகரன் உடனே அறுவை சிகிச்சை செய்து பிள்ளையை வெளியே எடுத்துள்ளார்.

பிறந்து சில நிமிடங்களே ஆன அந்த சிசுவுக்கு, மார்பில் பிரச்சினை இருப்பதை உடனே கண்டுபிடித்து உடனடியாக அறுவை சிகிச்சை செய்துள்ளதோடு மட்டுமல்லாமல் சுமார் 7 மணி நேர அறுவை சிகிசை செய்து தாயாரையும் காப்பாறியுள்ளார்.

வெறோனிக்கா, ஜோன்ஸன் என்னும் குறித்த பெண் கூறுகையில், என் உயிரை எனக்கு திருப்பி தந்த நபர் குணசேகரன் என்றும், அவர் தலை சிறந்த ஒரு மருத்துவர் என்றும் தெரிவித்துள்ளார்.

அத்துடன், நானும் எனது பிள்ளையும், எமது வாழ்க்கையையே அவருக்கு அர்ப்பணித்தாலும், அவர் செய்த உதவியை என்னால் மறக்க முடியாது என்று அவர் மேலும் தெரிவித்துள்ளார்.

ஆனால் எந்த ஒரு பெருமிதமும் இன்றி, குணசேகரன் மிகவும் சாதாரணமாக காணப்படும் ஒரு மருத்துவர் என்பதுடன், அவர் பல முதுகலைகளை கற்று, பிரித்தானியாவில் அதி உச்ச தேர்ச்சி பெற்ற மருத்துவராக இருக்கின்றமை குறிப்பிடத்தக்கது.

இலங்கையை சூறாவளி தாக்கும் அபாயம் உள்ளதாக வளிமண்டலவியல் திணைக்களம் எதிர்வு கூறியுள்ளது.

இந்த மாதம் முதல் எதிர்வரும் டிசம்பர் மாதம் வரையிலான காலப்பகுதியில் இந்த ஆபத்து காணப்படுவதாக திணைக்களம் தெரிவித்துள்ளது.

இது தொடர்பில் அவதானமாக இருக்குமாறு திணைக்களம் அறிவுறுத்தியுள்ளது.
காற்றழுத்தம், வளிமண்டலத்தில் குழப்ப நிலை போன்றவைகள் எதிர்வரும் நாட்களில் ஏற்பட கூடும் எனவும், அதன் ஊடாக எந்த ஒரு நாட்களிலும் எந்தவொரு சந்தர்ப்பத்திலும் மழை பெய்ய கூடும் என குறிப்பிடப்படுகின்றது.

இந்த மாதம் இலங்கையின் வெப்ப மண்டலத்தில் அழுத்தம் ஏற்பட கூடும் என்பதனால் இடியுடன் கூடிய மழை பெய்யும் என அந்த அறிக்கையில் மேலும் தெரிவிக்கப்பட்டுள்ளது.

கோவை விமான நிலையத்தில் வைத்து இலங்கையர்கள் மூவரிடம் இருந்து 1.5 கிலோ கிராம் எடையுடைய தங்க நகைகள் பறிமுதல் செய்யப்பட்டுள்ளன.

நேற்று முன்தினம் கொழும்பிலிருந்து கோவை சென்ற விமானத்தில், விமான நிலைய சுங்க அதிகாரிகள் மேற்கொண்ட சோதனையின் போது குறித்த மூவரும் அணிந்திருந்த மற்றும் துணிகளுக்கு இடையில் மறைத்து வைத்திருந்த 1.5 கிலோ தங்கம் பறிமுதல் செய்யப்பட்டுள்ளது.

தமிழக ஊடகங்கள் வெளியிட்டுள்ள செய்தியில் இந்த விடயம் தெரிவிக்கப்பட்டுள்ளது. சுங்க வரி செலுத்தாமையின் காரணமாக இந்த நகைகள் பறிமுதல் செய்யப்பட்டுள்ளதாக தெரிவிக்கப்பட்டுள்ளது.

இந்நிலையில், உரிய சுங்க வரி மற்றும் அபராத தொகையை செலுத்தினால் மீளவும் நகைகள் கையளிக்கப்படும் என சுங்க திணைக்கள அதிகாரிகள் தெரிவித்துள்ளதாக அந்த செய்தியில் மேலும் தெரிவிக்கப்பட்டுள்ளது.

இலங்கைக்கு வருகை தரும் சுற்றுலாப்பயணிகளின் எண்ணிக்கை கடந்த செப்டம்பர் மாதத்தில் அதிகரித்துள்ளது.

கடந்த வருடத்துடன் ஒப்பிடுகையில், சுற்றுலாப்பயணிகளின் எண்ணிக்கை 2.3 வீதமாக அதிகரித்திருப்பதாக இலங்கை சுற்றுலாத்துறை அபிவிருத்தி அதிகார சபையின் அறிக்கையில் குறிப்பிடப்பட்டுள்ளது.

பிரித்தானியா, கிழக்கு ஐரோப்பா, ரஷ்யா, உக்ரைன், இந்தியா ஆகிய நாடுகளிலிருந்து வருகை தரும் சுற்றுலாப்பயணிகளின் எண்ணிக்கை வெகுவாக அதிகரித்துள்ளமை குறிப்பிடத்தக்கது.

கடந்த 9 மாதத்தில் 15,51,000-இற்கும் அதிகமானோர் நாட்டிற்கு வருகை தந்துள்ளனர்.

 
முன்னாள் இராஜாங்க அமைச்சர் எம்.ரி.ஹசன் அலியின் சகோதரரும், ஸ்ரீ லங்கா முஸ்லிம் காங்கிரசின் அம்பாறை மாவட்ட உயர்பீட உறுப்பினருமான ஜப்பார் அலி (வயது 57) வாகன விபத்தில் சிக்கி உயிரிழந்துள்ளார்.

நிந்தவூரிலிருந்து, திருமலை நோக்கிச் சென்ற இவரது காரும், எதிர்த்திசையில் வந்த பேருந்து ஒன்றும் கிண்ணியா பாலத்திற்கு அருகிலுள்ள உப்பாறு எனும் இடத்தில் நேற்றைய தினம் மோதி விபத்துக்குள்ளானது.

குறித்த விபத்தில், வாகனத்தில் இவருடன் கூடச்சென்ற மூவரும் காயங்களுக்கு உள்ளானதுடன், படுகாயங்களுக்கு உள்ளான லாபீர் மற்றும் ஜப்பார் அலி ஆகியோர் கிண்ணியா வைத்தியசாலையில் அனுமதிக்கப்பட்டு பின்னர் மேலதிக சிகிச்சைகளுக்காக திருமலை வைத்தியசாலைக்கு மாற்றப்பட்டிருந்தனர்.

இந்நிலையில் சிகிச்சை பலனின்றி இன்று அதிகாலை ஜப்பார் அலி உயிரிழந்துள்ளதாக வைத்தியசாலை வட்டாரங்கள் தெரிவித்துள்ளன.

இதேவேளை, இந்த விபத்துத் தொடர்பான மேலதிக விசாரணைகளை கிண்ணியா பொலிஸார் மேற்கொண்டு வருகின்றனர்.

மத்திய கிழக்கு நாடொன்றில் தொழிலுக்குச் சென்று சந்தேகத்திற்கிடமான முறையில் உயிரிழந்த பணிப்பெண் ஒருவரின் சடலம் இன்று இலங்கைக்கு கொண்டுவரப்பட்டுள்ளது.

பசறையைச் சேர்ந்த இரண்டு பிள்ளைகளின் தாயான 36 வயதான பெண் ஒருவருடைய சடலமே நாட்டிற்கு அனுப்பி வைக்கப்பட்டுள்ளது.

இவர் இரண்டாவது தடவையாக தொழிலுக்கு சென்றிருந்த சந்தர்ப்பத்தில் பல்வேறு துன்புறுத்தல்களை எதிர்நோக்கியிருந்ததாக உறவினர்கள் குறிப்பிட்டனர்.

ஆறு மாதங்களுக்கு முன்னதாக இவர் சந்தேகத்திற்கிடமான முறையில் உயிரிழந்ததாகவும் அவர்கள் தெரிவித்தனர்.

இந்த மரணம் தொடர்பில் கட்டுநாயக்க பொலிஸ் நிலையத்தில் முறைப்பாடு செய்யப்பட்டுள்ளது.