கடும் வறுமையான நிலையிலும் ஐந்தாம் தர புலமைப்பரிசீல் பரீட்சையில் சித்தியடைந்த மாணவி பி.டி.துலாஞ்சலி மதுமாலி பிரேமரத்னவை ஜனாதிபதி நேற்று சந்தித்து பாராட்டு தெரிவித்துள்ளார்.

அத்துடன், குறித்த மாணவிக்கு ஒரு வருடத்திற்குத் தேவையான பாடசாலை அப்பியாசப் புத்தகங்கள் மற்றும் பரிசில்களையும் ஜனாதிபதி வழங்கினார்.

மாணவியை சந்திப்பதற்கு அழைப்பு விடுத்திருந்த ஜனாதிபதி நேற்று முற்பகல் ஜனாதிபதி செயலகத்தில் வைத்து சந்தித்து பேசியிருந்தார்.

இதன் போது மாணவியின் திறமையைப் பாராட்டிய ஜனாதிபதி, அவரது உயர்கல்வி நடவடிக்கைகள் நிறைவடையும்வரை மாதாந்தம் 3000 ரூபாவை வழங்குவதாக உறுதியளித்தார்.

மேலும் இந்நிகழ்வில் கலந்துகொண்ட அமைச்சர் சஜித் பிரேமதாச, மாணவிக்கு புதிய வீடொன்றை அமைத்துக்கொடுப்பதற்கு ஜனாதிபதியிடம் உறுதியளித்தார்.

இந்நிகழ்வில் குறித்த பாடசாலை மாணவி கல்வி பயின்ற பாடசாலையின் அதிபர், கலேவெல வலயக் கல்விப் பணிப்பாளர் நயோமி ஹெட்டியாரச்சி, துலாஞ்சலி மதுமாலி பிரேமரத்னவின் தாயார் ஆகியோர் கலந்துகொண்டனர்.

இதேவேளை, கலேவல கல்வி வலயத்தின் பஹல திக்கல ஆரம்பப் பாடசாலை ஆரம்பிக்கப்பட்டு 45 வருடங்கள் ஆகின்றன. தற்போது பாடாசலையில் 96 மாணவர்கள் உள்ளனர்.

இப்பாடசாலை வரலாற்றில் புலமைப் பரிசில் பரீட்சையில் சித்தியடைந்த ஒரேயொரு மாணவி பி.டி.துலாஞ்சலி மதுமாலி என்பது குறிப்பிடத்தக்கது.

தந்தையை இழந்து உரிய வீட்டு வசதியுமின்றி மிகுந்த பொருளாதார கஷ்டங்களுக்கு மத்தியில் வாழ்ந்துவரும் துலாஞ்சலி மதுமாலி 168 புள்ளிகளைப்பெற்று இம்முறை 05ஆம் ஆண்டு தர புலமைப்பரிசில் பரீட்சையில் சித்தியடைந்துள்ளார்.

வறுமை மற்றும் பிர காரணங்களினால் பாடசாலைக்கு செல்லாத மாணவர்களுக்கு சிறப்பு கொடுப்பனவுகளை வழங்குவதற்கு கல்வி அமைச்சு நடவடிக்கை எடுத்துள்ளது.

அடுத்த ஆண்டு முதல் நடைமுறைப்படுத்த எதிர்பார்த்துள்ள குறித்த திட்டத்தின் ஊடாக, மாணவர்களின் பாடசாலை இடைவிலகலை தடுக்க முடியும் என கல்வி அமைச்சு நம்பிக்கை வெளியிட்டுள்ளது.

இந்த புதிய திட்டத்தின் கீழ் பாடசாலைக்கு வருகைத்தரும் நாள் ஒன்றுக்கு 100 ரூபா வீதம் மாதாந்த கொடுப்பனவை வழங்குவதற்கு உத்தேசித்துள்ளதாகவும், இது குறித்து ஆராய்ந்து வருவதாகவும் கல்வி அமைச்சர் அகிலவிராஜ் காரியவசம் கூறியுள்ளார்.

இந்த திட்டம் தொடர்பிலான யோசனையை அடுத்த ஆண்டுக்கான வரவு செலவு திட்டத்தில் முன்வைக்கவுள்ளதாகவும் கல்வி அமைச்சர் சுட்டிக்காட்டியுள்ளார்.

இலங்கையில் இலவச கல்வி முறைமை அமுல்படுத்தப்பட்டுள்ள போதிலும், 4,52,661 மாணவர்கள் பாடசாலைக்கு செல்வதில்லை எனவும், அவர்களில் 51,249 பேர் ஒரு நாள் கூட பாடசாலைக்கு செல்லாதவர்கள் எனவும் ஆய்வின் மூலம் தெரியவந்துள்ளது.

இந்நிலையில், கல்வி அமைச்சின் இந்த புதிய திட்டத்திற்கு இலங்கை ஆசிரியர் சங்கம் எதிர்ப்பு வெளியிட்டுள்ளது. இது குறித்து கருத்து தெரிவித்துள்ள அந்த சங்கத்தின் செயலாளர் ஜோசப் ஸ்டாலின், “மாணவர் வரவுக்கு ரூபாய் 100 என்ற இந்த யோசனை அவசியமற்றது. அடுத்த ஆண்டு இடம்பெறவுள்ள தேர்தலை இலக்காக கொண்டே இந்த யோசனை முன்வைக்கப்பட்டுள்ளது.

இந்நிலையில், “கல்வியில் சம வாயப்பு மற்றும் பாகுபாடு இன்றி பாடசாலைகள் அபிவிருத்தி செய்யப்படுவது பற்றியே அரசாங்கம் கவனம் செலுத்த வேண்டும்” என அவர் மேலும் தெரிவித்துள்ளார்.

நுவரெலியாவில் புதிய வகை சோளக்காட்டு பொம்மை தயாரிக்கப்பட்டுள்ளது. காட்டு மிருகங்களிடம் இருந்து பயிர்களை பாதுகாக்கும் நோக்கில் மின்சார சோளக்காட்டு பொம்மை ஒன்று தயாரிக்கப்பட்டுள்ளது. இது தொடர்பான தகவைல நுவரெலியா விவசாய சேவை அபிவிருத்தி அதிகாரி தெரிவித்துள்ளார்.

சீ டெக் சோளக்காட்டு பொம்மை என அடையாளப்படுத்தும் இந்த உபகரணத்தினால் ஒரு ஏக்கர் அளவு பயிர்ச்செய்கைகள் மிருகங்களிடம் இருந்து பாதுகாக்கப்படும்.

சூரிய சக்தியின் மூலம் பெறப்படும் மின்சாரத்தில் இந்த சோளக்காட்டு பொம்மை இயங்குகிறது.

பன்றி, முயல், மாடு, மான் போன்ற மிருகங்களிடம் இருந்து பயிர்ச்செய்கைகளுக்கு ஏற்படும் பாதிப்பினை இந்த இயந்திரத்தின் ஊடாக தடுதக்க முடியும்.

இந்த இயந்திரம் தற்போது வலப்பனை பிரதேசத்தில் விவசாயிகள் பயன்படுத்துவதாக குறிப்பிடப்படுகின்றது.

குவைத்தில் இருந்து இந்தியா செல்லும் வழியில் இலங்கை வந்திருந்த ஒருவர் விமானத்திலேயே உயிரிழந்த சம்பவம் கட்டுநாயக்க விமான நிலையத்தில் நேற்று இடம்பெற்றுள்ளது.

மூத்தன் முருகன் (52) என்ற இந்த நபர் குவைட்டில் பணிபுரிந்து வந்தவர். தமிழகத்தைச் சேர்ந்த இவர், விசாக் காலம் முடிவடைவதையடுத்து தமிழகம் செல்லவிருந்தார்.

குவைத்தில் இருந்து ஸ்ரீலங்கன் எயார்லைன்ஸுக்குச் சொந்தமான யு.எல்.230 விமானத்தில் புறப்பட்ட இவரது உயிர், நேற்று (10.10) காலை சுமார் ஆறரை மணியளவில், கட்டுநாயக்கவில் தரையிறங்க முன்னரே பிரிந்தது.

விமான நிலைய பொலிஸாரிடம் கையளிக்கப்பட்ட இவரது சடலம், பிரேத பரிசோதனைக்காக நீர்கொழும்பு வைத்தியசாலைக்கு எடுத்துச் செல்லப்பட்டது.

காதலனை பெற்றுக்கொள்ளும் நோக்கில் கொள்ளையில் ஈடுபட்ட யுவதி ஒருவர் உள்ளிட்ட இருவர் கைது செய்யப்பட்டுள்ளனர்.

பலகொல்ல பிரதேச வீடொன்றில் 670000 ரூபாய் பணம் திருடியமை தொடர்பில் அந்த வீட்டின் பணிப்பெண் கைது செய்யப்பட்டுள்ளார்.

கைது செய்யப்பட்ட பெண்ணிடம் மேற்கொள்ளப்பட்ட விசாரணைக்கமைய பண மோசடி செய்த தமிழ் மந்திரவாதி பெண் ஒருவரும் முஸ்லிம் ஆண் ஒருவரும் கைது செய்யப்பட்டுள்ளதாக பொலிஸார் தெரிவித்துள்ளனர்.

நினைப்பதெல்லாம் கிடைக்கும் மந்திரம் உண்டு என பெண் மந்திரவாதி ஒருவரின் விளம்பரம் தமிழ் பத்திரிகையொன்றில் அண்மையில் வெளியாகியிருந்தது.

இந்த விளம்பரத்தை பார்த்த பலகொல்ல பிரதேசத்தை சேர்ந்த வீட்டு பணிப்பெண் தனது காதலனை பெற்றுத் தருமாறு விளம்பரத்தில் கொடுக்கப்பட்ட தொலைபேசி இலக்கத்திற்கு தொடர்பு கொண்டுள்ளார்.

மந்திரம் செய்யும் தமிழ் பெண் தனது கணக்கிற்கு 5000 ரூபாய் பணம் வைப்பிடுமாறு பணிப்பெண்ணிடம் தெரிவித்துள்ளார். பணம் வைப்பிட்ட பின்னர் காதலனை பெற்றுக் கொள்வதற்காக காளி அம்மனுக்கு பூஜை செய்ய வேண்டும் என கூறி அதற்கு பணம் கோரியுள்ளார்.

இவ்வாறு மந்திரம் செய்வதற்கு பணம் பெற்றுக் கொள்வதற்காக பணிப்பெண் தங்க நகைகளை திருடியுள்ளதாக தெரியவந்துள்ளது.

மந்திரம் செய்யும் நடவடிக்கையில் ஈடுபட்டுள்ள பெண் அக்குரனை பிரதேசத்தில் கைது செய்யப்பட்டுள்ளார். அவரிடம் மேற்கொள்ளப்பட்ட விசாரணைக்கமைய அவருக்கு உதவிய முஸ்லிம் இளைஞர் கட்டுகஸ்தொட்டை பிரதேசத்தில் கைது செய்யப்பட்டுள்ளார்.

தற்போது, யாழ்ப்பாணம், முல்லைத்தீவு, கிளிநொச்சி பிரதேசங்களில் தமிழ் மக்களின் பணத்தை இந்த மோசடி செய்துள்ளதாகவும், அவரது கணக்கில் தற்போது 4 லட்சம் ரூபாய் பணம் உள்ளதாகவும் பொலிஸார் தெரிவித்துள்ளனர்.

கைது செய்யப்பட்ட பெண் மந்திரவாதி நீதிமன்றத்தில் ஆஜர்படுத்தப்பட்ட நிலையில், 5000 ரூபா ரொக்கப் பிணையிலும், 3 இலட்சம் ரூபா சரீரப் பிணையிலும் விடுவிக்கப்பட்டுள்ளார்.