வவுனியாவில் கண்டி வீதியில் அமைந்துள்ள புதிய தனியார் பேரூந்து நிலையத்திற்கு முன்பாக வீதியோரங்களில் பட்டுப்போன நிலையில் உள்ள மரங்கள் தற்போது வீதியோரங்களில் பயணம் செய்யும் மக்களுக்கு அபாயகரமானதாக மாறியுள்ளதாக அப்பகுதி மக்கள் தெரிவிக்கின்றனர்.

பட்டுப்போன மரங்களின் கிளைகள் அவ்வப்போது காற்றுக்கு உடைந்து விழுகின்றன. பலத்த காற்று வீசும் போது இம் மரங்களின் பெரிய கிளைகள் முறிந்து விழுமாயின் இவ் வீதியில் பயணம் செய்யும் மக்களுக்கு பெரும் ஆபத்தை ஏற்படுத்தும்.

வவுனியாவில் தற்போது காற்றுடன் கூடிய மழை பெய்து வருகின்றது. இவ்வாறான சூழலில் இம் மரங்கள் முறிந்து விழுவதற்கான சந்தர்ப்பம் அதிகமாக இருப்பதாக தெரிவிக்கும் மக்கள் இம் மரங்களை அகற்றுவதற்கு சம்பந்தப்பட்ட அதிகாரிகள் நடவடிக்கை எடுக்க வேண்டும் எனத் தெரிவிக்கின்றனர்.

யாழ் பல்கலைக்கழக ஊழியர் சங்கத்தின் போராட்டத்திற்கு முழுமையான ஆதரவை வழங்குவதுடன், அவர்களது நீதியான போராட்டத்தை கொச்சைப்படுத்துவதற்கு எமது கண்டனத்தையும் தெரிவித்துக் கொள்கின்றோம் என வவுனியா வளாக ஊழியர் சங்கம் தெரிவித்துள்ளது.

இன்று வவுனியா வளாக ஊழியர் சங்கத்தின் தலைவர் கே.பூங்கண்ணன், செயலாளர் எம்.முகுந்தகுமார் ஆகியோர் கையொப்பமிட்டு அனுப்பி வைத்துள்ள அறிக்கையிலேயே இவ்வாறு தெரிவிக்கப்பட்டுள்ளது. அதில் மேலும் தெரிவிக்கப்பட்டுள்ளதாவது,

யாழ் பல்கலைக்கழகத்தில் அனேகமான முறையீடுகளை தவறாது சுட்டிக்காட்டி யாழ் பல்கலைக்கழகம் சீரிய முறையில் இயங்க வழிவகுப்பதுடன், ஊழியர் நலனில் அதீத அக்கறையுடனும் செயற்பட்டு வருவது மட்டுமல்லாது சமூக சீர்திருத்தம், சமூக மேம்பாடு மற்றும் இடர்கால உதவிகளைக் கூட புரிந்து வந்த யாழ் பல்கலைக்கழக ஊழியர் சங்கமானது கடந்த சில நாட்களாக ஊழியர் நலன்சார்ந்ததும், சில விரும்பத்தகாத செயற்பாடுகளுடன் தொடர்புடைய உயர் அதிகாரிகளினது செயற்பாடுகளைக் கண்டித்தும் அதற்கு நீதி கோரியும் தொடர்ச்சியாக வேலை நிறுத்தப்போராட்டத்தில் ஈடுபட்டு வருவதானது நல்லாட்சி அரசில் ஊழல், காடைத்தனமற்ற நல்லதொரு நிர்வாகமும் அதன்மூலம் நல்லதொரு சமூக மேம்பாடும், உயரிய பாதுகாப்பும் சாதாரண மக்கள் யாவருக்கும் கிட்டும். இது இலங்கை வாழ் சகல மக்களுக்கும் ஒரு முன்னுதாரணமான நிலையாகும்.

மேற்படி போராட்டத்தை யாழ் பல்கலைக்கழக ஊழியர் சங்கத்தின் தோழமை சங்கமாகிய வவுனியா வளாக ஊழியர் சங்கமானது முழுமனதுடன் ஆதரிப்பதுடன், அவர்களது நீதியும், நியாயமுமான போராட்டம் தொடரும் பட்சத்தில் எமது சங்கமும் அவர்களுடன் கைகோர்க்கும்.

யாழ் பல்கலைக்கழக ஊழியர் சங்கத்தின் போராட்டத்தை கொச்சைப்படுத்தும் விதமாக சில புல்லுருவிகள் செயற்படுவதனையிட்டு நாம் மிக மனவேதனையடைகின்றோம்.

இப்படியான புல்லுருவிகளின் செயற்பாட்டை வன்மையாக கண்டிப்பதுடன், இவர்களது செயற்பாடானது சமூகத்தில் மேலும் பல சமூக கலாசார சீர்கேடுகளை ஏற்படுத்த வழிவகுக்கும் என்பதடன் மேலும் பல போராட்டங்கள் ஏற்பட வழிவகுக்கும் என்று கூறிவைக்க விரும்புகின்றோம்.

எனவே உதவி செய்யாவிட்டாலும் உபத்திரம் செய்யாமல் இருப்பதே நன்மை பயக்கும். இதனை உணர்ந்து நீதியான போராட்டத்திற்கு முட்டுக்கட்டை போடுபவர்கள் தமது சுயநலன் கருதியும் தம்மை சார்ந்தவர்களை திருப்திப்படுத்துவதுமே ஆகும் என அவ் அறிக்கையில் தெரிவிக்கப்பட்டுள்ளது.

வவுனியா நொச்சிமோட்டை கிராமசேவையாளர் பிரிவிலுள்ள துவரங்குளத்திற்கு பேருந்துச் சேவை , முன்பள்ளி என்பன அமைத்துத்தருமாறு அப்பகுதி மக்கள் கோரிக்கை விடுத்துள்ளனர்.

யுத்தம் முடிவுற்ற பின்னர் இப்பகுதியில் கடந்த 2010ஆம் ஆண்டு மீள் குடியேற்றப்பட்ட மக்கள் தமக்கு சீரான போக்குவரத்து இன்மை, தமது பிள்ளைகளுக்கான முன்பள்ளி தேவை என்பவற்றை வலியுறுத்தி வருகின்றனர்.

நொச்சிமோட்டை பகுதியிலிருந்து 3 கிலோ மீற்றர் தூரத்திலுள்ள துவரங்குளம் பகுதியில் 25 தொடக்கம் 30 வரையான குடும்பங்கள் வசித்து வருகின்றனர். இவர்கள் தமது ஜீவனோபயமாக கூலித் தொழிலினையே மேற்கொண்டு வருகின்றனர். வைத்தியசாலை, பிரதேச செயலகம், மாவட்ட செயலகம் போன்ற இதர தேவைகளினிமித்தம் வவுனியா நகருக்கே செல்லவேண்டிய தேவையும் ஏற்படுகின்றது.

பிரதான ஏ9 வீதியிலிருந்து 3கிலோ மீற்றர் நடந்தும் ஏனைய வாகனங்களிலும் தமது பயணத்தினை மேற்கொண்டு வருகின்றனர். தமது இந்நிலை தொடர்பாக மக்கள் பிரதிநிதிகளின் கவனத்திற்குக் கொண்டு செல்லப்பட்டபோதும் தமது கோரிக்கைக்கு தீர்வு பெற்றுக்கொள்ள முடியவில்லை.

தமது பிள்ளைகளின் எதிர்கால கல்வி செயற்பாடுகளுக்கு தமது பகுதியில் ஒரு முன்பள்ளியினை அமைத்துத்தருமாறும் கோரியுள்ள துவரங்குளம் பொதுமக்கள் தமது கிராமத்திலிருந்து சின்னக்குளம் ஊடாக மாமடு பகுதிக்கான பேருந்து செவையினை மேற்கொண்டு தருமாறும் அதிகாரிகளின் கவனத்திற்கு கொண்டு வர நடவடிக்கை மேற்கொள்ளுமாறும் கோரிக்கை விடுத்துள்ளனர்.

 
வவுனியா நெளுக்குளம் பகுதியில் நேற்று (14.09.2017) மாலை 5.15 மணியளவில் இடம்பெற்ற முச்சக்கரவண்டி விபத்தில் இருவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர். இவ் விபத்துச் சம்பவம் தொடர்பாக மேலும் தெரியவருகையில்,

மன்னார் வீதியூடாக வவுனியா நோக்கி பயணித்த முச்சக்கரவண்டி நெளுக்குளம் வயல்வெளிக்கு அருகே முச்சக்கரவண்டியில் ஏற்ப்பட்ட கோளாறு காரணமாக சாரதியின் கட்டுப்பாட்டையிழந்து வீதியின் அருகேயிருந்த மின்கம்பத்தில் மோதியதுடன் பனை மரத்துடன் மோதி விபத்துக்குள்ளானது.

இவ்விபத்தில் முச்சக்கரவண்டியின் சாரதியான யசோதன் (வயது 27) என்பவரும் முச்சக்கரவண்டியில் பயணித்த சன்ஜன் (வயது 27) என்பவரும் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

 
நெடுங்கேணி – புளியங்குளம் வீதியில் அடிக்கடி யானைகள் வீதிக்கு வருவதால் அவ் வீதி வழியாக பயணிக்கும் மக்களை பல்வேறு அசௌகரியங்களை எதிர்நோக்கியுள்ளனர்.

நேற்று முன்தினம் மாலை 4.30 மணிமுதல் மாலை 5.20 வரை அப்பகுதியில் யானைகளின் நடமாட்டம் அதிகமாக காணப்பட்டதாக அவ் வீதி வழியாக பயணித்த மக்கள் தெரிவித்துள்ளனர்.

இதனால் அச்சத்துடனேயே பலரும் பயணங்களை மேற்கொண்டதாக தெரிவித்துள்ளதுடன் தற்போது மாலை வேளைகளில் அப்பகுதியில் அடிக்கடி யானைகள் வந்து செல்வதாகவும் இதனால் தாம் அச்சத்துடனேயே அவ் வீதியில் பயணிப்பதாகவும் அவர்கள் மேலும் தெரிவித்துள்ளனர்.