நீர்கொழும்பு கட்டுவபிட்டிய பால்தி சந்தியில் உள்ள வாகன உதிரிப்பாகங்கள் கடையொன்றில் தீ பரவியுள்ளது. நேற்று இரவு 7.30 மணியளவில் தீ பரவியுள்ளது.

இத் தீயில் விற்பனைக்காக வைக்கப்பட்டிருந்த மோட்டார் சைக்கிள் உதிரிப்பாகங்கள் தீக்கிரையாகியுள்ளன. சுமார் இரண்டு மணித்தியாலங்கள் நீடித்த தீயை, நீர்கொழும்பு மாநகர சபை தீயணைப்பு பிரிவினர் கட்டுப்பாட்டிற்குள் கொண்டுவந்தனர்.

தீயினால் ஏற்பட்ட நட்டம் தொடர்பில் இதுவரை கணக்கிடப்படவில்லை.

ஹட்டன் நகரிலுள்ள பிரபல வர்த்தக நிலையமொன்று உடைத்து கொள்ளையடிக்கப்பட்டுள்ளதாக ஹட்டன் பொலிஸார் தெரிவித்தனர்.

ஹட்டன் நகர பிரதான வீதியிலுள்ள பல்பொருள் மொத்த விற்பனை நிலையமே நேற்று (14.08) இனம்தெரியாதோரால் உதைத்து கொள்ளையடிக்கப்பட்டுள்ளது.

வர்த்தக நிலைய உரிமையாளர் இன்று வர்த்தக நிலையத்தை திறந்து உள்ளே சென்று பாரத்த போதே வர்த்தக நிலையத்தின் மேல்மாடியின் பின்புறம் வழியாக உடைத்துகொண்டு உள் நுளைந்து கொள்ளைடித்து சென்றுள்ளமை தெரியவந்துள்ளது

உரிமையாளரினால் ஹட்டன் பொலிஸ் நிலையத்தில் முறைப்பாடு செய்யப்பட்டதையடுத்து மோப்ப நாயின் உதவியுடன் தேடுதல் நடவடிக்கையில் பொலிஸார் ஈடுபட்டு வருகின்றனர்

மேலும் பணம், சிகரெட் பக்கட்டுக்கள், மற்றும் கைபேசி மீள்நிரப்பு அட்டைகள் என்பன கொள்ளை அடிக்கப்பட்டுள்ளன.

கொள்ளையடுக்கப்பட்ட பெறுமதி தொடர்பில் இதுவரையில் கண்டறியப்பவில்லை எனவும் சம்பவம் தொடர்பில் விசாரணையை முன்னெடுத்து வருவதாகவும் அட்டன் பொலிஸார் தெரிவித்தனர்.

யாழில் உயிரிழந்த பொலிஸ் அதிகாரியின் மனைவி நேற்றையதினம் பொலிஸ் சேவையில் மீண்டும் இணைந்துள்ளார்.

யாழ். மேல் நீதிமன்ற நீதிபதி எம்.இளஞ்செழியனுக்கு பாதுகாப்பு வழங்கும் போது, இடம்பெற்ற துப்பாக்கி சூட்டில் உயிரிழந்த பொலிஸ் சார்ஜன்டின் மனைவியை மீண்டும் பொலிஸ் சேவையில் இணைத்து கொள்ள தீர்மானிக்கப்பட்டது.

உயிரிழந்த பொலிஸ் அதிகாரியை கௌரவிக்கும் வகையில் தேசிய பொலிஸ் ஆணைக்குழுவினால் இதற்கான அனுமதி வழங்கப்பட்டுள்ளது.

அவரால் பொலிஸ் மா அதிபருக்கு அனுப்பி வைக்கப்பட்ட மனுவை ஆராய்ந்த பின்னரே அவரை மீண்டும் சேவையில் இணைத்து கொள்வதற்கு தீர்மானிக்கப்பட்டது.

அதற்கமைய அவரது வீடு அமைந்துள்ள பிரதேசத்தில் உள்ள பொலிஸ் நிலையமான பள்ளம பொலிஸ் நிலையத்தில் சேவை செய்வதற்கு அவருக்கு நேற்றைய தினம் முதல் சந்தர்ப்பம் ஏற்படுத்தி கொடுக்கப்பட்டுள்ளது.

கடந்த மாதம் 22ஆம் திகதி யாழ். நல்லூர் கோயிலுக்கு அருகில் இடம்பெற்ற துப்பாக்கி சூட்டில் குறித்த பொலிஸ் சார்ஜன்ட் உயிரிழந்தமை குறிப்பிடத்தக்கது.

போக்குவரத்து விதிமுறைகளை மீறும் வாகனங்களை செலுத்தும் சாரதிகளுக்கு எதிராக 25 ஆயிரம் ரூபாய் அபராதம் விதிக்கும் சட்டம் இன்று முதல் நடைமுறைப்படுத்தப்படுகிறது.

சாரதி அனுமதிப் பத்திரம் இன்றி வாகனம் செலுத்துதல், அங்கீகரிக்கப்பட்ட காப்புறுதி இன்மை, சாரதி அனுமதிப்பத்திரம் இல்லாதவரை சாரதியாக பணிக்கு அமர்த்துதல், மதுபோதையில் வாகனம் செலுத்துதல் மற்றும் தொடருந்து கடவைகளில் ஒழுங்கற்ற முறையில் வாகனத்தை செலுத்தல் ஆகிய குற்றங்களுக்கு எதிராக இந்த அபராதம் விதிக்கப்படவுள்ளது.

 
லிந்துலை – மட்டுக்கலை 7ஆம் இலக்க கொலணி பிரிவில் மரக்கறி தோட்டத்தில் புதைக்கப்பட்ட பெண் சிசுவின் சடலமொன்று நுவரெலியா மாவட்ட நீதிமன்ற உத்தரவுக்கமைய இன்று தோண்டி எடுக்கப்பட்டது.

நுவரெலியா மாவட்ட நீதிமன்ற பதில் தயா நாணயக்கார முன்னிலையில் லிந்துலை பொலிஸார், பொது மக்கள் உதவி கொண்டு மதியம் 2 மணியளவில் சிசுவின் சடலத்தை தோண்டி எடுத்துள்ளனர். சம்பவம் தொடர்பாக மேலும் தெரிய வருவதாவது,

மட்டுக்கலை 7ஆம் இலக்க கொலனி பகுதியில் 23 வயது மதிக்கத்தக்க பெண்ணொருவர் சிசு ஒன்றை பிரசவித்துள்ளார்.

இதனையடுத்து அப்பெண்ணுக்கு அதிக குருதிப்போக்கு ஏற்பட்டதன் காரணமாக அவர் லிந்துலை பிரதேச வைத்தியசாலையில் அனுமதிக்கப்பட்டுள்ளார்.

இதன்பின் அவர் மேலதிக சிகிச்சைக்காக நுவரெலியா மாவட்ட வைத்தியசாலைக்கு மாற்றம் செய்யப்பட்டுள்ளார்.

அங்கு இந்த பெண்ணிடம் விசாரணையை மேற்கொண்ட வைத்திய அதிகாரிகள் சிசுவை பிரசவித்ததால் அவருக்கு குருதி போக்கு ஏற்பட்டு இருப்பதாக கண்டறிந்துள்ளனர்.

பிரசவிக்கப்பட்ட சிசு தொடர்பாக விசாரணையை மேற்கொண்ட போது, சிசுவொன்று தோட்டத்தில் புதைக்கப்பட்டதாக கிடைத்த தகவலையடுத்து வைத்தியர்கள் நுவரெலியா பொலிஸாரின் கவனத்திற்கு கொண்டு வந்துள்ளனர்.

இதனையடுத்து பொலிஸார் முன்னெடுத்த நடவடிக்கையில், சிசுவை பெற்றெடுத்த தாய் மற்றும் சிசுவை தோட்டத்தில் புதைக்க உதவி புரிந்த பெண் ஆகியோரையே லிந்துலை பொலிஸாரின் ஊடாக கைது செய்தனர்.

சம்பவத்தில் சிசுவை புதைத்த இடத்திலிருந்து மீட்பதற்கு லிந்துலை மற்றும் நுவரெலியா பொலிஸார் நீதிமன்ற உத்தரவினை நேற்று பெற்றிருந்தனர்.

இதனடிப்படையில் நுவரெலியா மாவட்ட பதில் நீதவான் தயா நாணயக்கார தலைமையில் சிசு புதைக்கப்பட்ட இடத்திலிருந்து இன்று தோண்டி எடுக்கப்பட்டது.

இவ்வாறு தோண்டி எடுக்கப்பட்ட சிசுவின் சடலத்தை நீதிமன்ற அனுமதியுடன் நுவரெலியா மாவட்ட வைத்தியசாலைக்கு பிரேத பரிசோதனைக்காக கொண்டு செல்லப்பட்டுள்ளது.

சம்பவம் தொடர்பில் கைது செய்யப்பட்ட சந்தேகநபர்கள் இருவரிடமும் மேலதிக விசாரணைகளை மேற்கொண்டு நீதிமன்றத்தில் ஆஜர்படுத்த லிந்துலை பொலிஸார் நடவடிக்கை எடுத்து வருகின்றனர்.

உலகின் மிகப்பெரிய பயணிகள் விமானம் கட்டுநாயக்க விமான நிலையத்திற்கு சற்றுமுன்னர் வருகை தந்துள்ளது.

எமிரேட்ஸ் விமான நிறுவனத்திற்கு சொந்தமான A-380 விமானமே இவ்வாறு வந்துள்ளதாக விமான நிலைய அதிகாரிகள் தெரிவித்துள்ளன்.

அதற்கமைய டுபாயில் இருந்து இன்று மாலை 4.30 மணியளவில் வருகை தந்த இந்த விமானம் எவ்வித சிரமமும் இன்றி தரையிறக்கப்பட்டதாக விமான நிலைய அதிகாரிகள் தெரிவித்துள்ளனர்.

இந்த வருடத்தின் ஆரம்பத்தில் கட்டுநாயக்க விமான நிலையத்தின் ஓடுபாதை புனரமைக்கப்பட்டது. இதன் காரணமாக பாரிய விமானங்கள் தரையிறக்குவதற்கான வாய்ப்புகள் ஏற்படுத்தப்பட்டன.

இன்றையதினம் பாரிய விமான வெற்றிகரமாக தரையிறங்கியதன் மூலம், மிகப்பெரிய விமானங்கள் தரையிறக்க முடியும் என சர்வதேசத்திற்கு அறிவிப்பதற்கான சந்தர்ப்பமாக இதனை பயன்படுத்தி கொள்வதாக கட்டுநாயக்க விமான நிலைய அதிகாரிகள் குறிப்பிட்டுள்ளனர்.

 
இலங்கையில் மர்மங்கள் பல நிறைந்த பகுதி ஒன்று அடையாளம் காணப்பட்டுள்ளதாக கொழும்பு ஊடகம் ஒன்று தகவல் வெளியிட்டுள்ளது. 150 வருடங்கள் பழமையான பகுதி தொடர்பில் இவ்வாறு தகவல் வெளியாகியுள்ளது.

அந்தப் பகுதியில் பேய்கள் மற்றும் மர்ம நிகழ்வுகளுக்கு பிரபலமான இடம் ஒன்று இன்னமும் இலங்கையில் உள்ளதாக தெரியவந்துள்ளது.

இந்த இடம் தொடர்பில் ஆர்வம் காட்டு நபர்கள் மற்றும் கண்டுபிடிப்பாளர்கள் அந்த இடத்தை தேடிச் சென்றாலும் அந்த நபர்களின் அவதானத்திற்கு உட்படாத சில விடயங்கள் தெரியவந்துள்ளது.

திக்கந்த வலவ்வ என்ற இந்த இடம் அமானுஷ்ய சம்பவங்களுக்கு மிகவும் பிரபலமான ஒரு இடமாகும்.

கம்பஹா கிரின்தவெல 231 பஸ் வீதி திக்கந்த என்ற கிராமத்தில் இந்த வலவ்வ அமைந்துள்ளது.

1000 ஏக்கருக்கும் அதிமாக பாரிய இடம் மலையின் மேல் அமைந்துள்ளது. அதனை பார்க்கும் போதே அமானுஷ்யம் நிறைந்தவையாக காணப்படுகின்றன.

திக்கந்த வலவ்வவின் தற்போதைய உரிமையாளர் வெளிநாட்டில் உள்ளமையினால் அந்த இடம் கவனிப்பாரற்ற நிலையில் காணப்படுகிறது.

கண்டுபிடிப்பாளர்களுக்கு அந்த இடத்திற்குள் நுழைய அனுமதி கிடைக்காமையினால் திக்கந்த வலவ்வ இலங்கையில் அமானுஷ்ய சம்பவங்கள் தொடர்பில் பேசப்படும் இடங்களில் முன்னணியில் உள்ளதாக தெரிவிக்கப்படுகின்றது.