கடந்த சில நாட்களாகப் பெய்துவரும் மழை காரணமாக கிளிநொச்சி மாவட்டத்தில் டெங்கு நுளம்புகளின் பெருக்கம் சடுதியாக அதிகரித்துள்ளதாக கிளிநொச்சி மாவட்ட ஆராய்ச்சியியல் ஆய்வுப் பிரிவினர் எச்சரித்துள்ளனர்.

இவ்வாறு அதிகரித்துள்ள நுளம்புகள் டெங்குநோயாளிகளைக் கடிக்கநேரிட்டால் கிளிநொச்சி மாவட்டத்தில் அதிதீவிரமாக டெங்குநோய்த்தாக்கம் ஏற்படும் அபாயம் ஏற்பட்டுள்ளதாகவும் ஆய்வுப்பிரிவினர் எச்சரித்துள்ளனர்.

தை மாதத்திலிருந்து நேற்று வரையான 227 நாட்களில் கிளிநொச்சி பொதுவைத்தியசாலையில் மொத்தம் 815 பேர் டெங்குகாய்ச்சலால் பீடிக்கப்பட்டு, சிகிச்சை வழங்கப்பட்டுள்ளது.

இவர்களுள் 585 நோயாளர்கள் கிளிநொச்சி மாவட்டத்தைச் சேர்ந்தவர்கள். ஏனையோர் பிறமாவட்டத்தைச் சேர்ந்தவர்கள் என கிளிநொச்சி மாவட்ட வைத்தியசாலையின் புள்ளிவிபரத் தகவல்கள் தெரிவிக்கின்றன.

இதில் உள்ள 585 கிளிநொச்சி மாவட்ட நோயாளர்களில் அனேகமானோர் கொழும்பு உள்ளிட்ட பிற மாவட்டங்களிலிருந்து டெங்குநோய் தொற்றிய நிலையில் கிளிநொச்சிக்கு வந்து சிகிச்சைபெற்றவர்களாவர். இவர்களுள் ஒருவர் டெங்குநோய் காரணமாக உயிரிழந்துள்ளார்.

மேலும் சராசரியாக நாளொன்றிற்கு டெங்குநோய்த்தொற்றுக்கு ஆளாகிய நிலையில் குறைந்தது 3 பேர் கிளிநொச்சி பொது வைத்தியசாலைக்குத்தினமும் வெளிமாவட்டங்களிலிருந்து வந்துகொண்டிருக்கிறார்கள்.

இவ் நெருக்கடியான நிலையில் மாவட்டத்தின் மக்களைப் பாதுகாக்கும் வகையில் கிளிநொச்சி சுகாதாரப் பிரிவினர் சிறு செய்திக் குறிப்பு ஒன்றினையும் வெளியிடுள்ளனர்.

குறித்த செய்திக் குறிப்பில், புகையிரத நிலையங்கள், பேரூந்து நிலையங்கள், வைத்தியசாலைகள், உணவகங்கள் ஆகிய இடங்களை பொதுமக்கள் பாவிக்கும்போது அவ்விடங்களில் டெங்கு நுளம்புகள் காணப்படுமாயின் அவை டெங்கினால் பாதிக்கப்பட்டநோயார்களின் டெங்கு வைரஸ் கலந்த இரத்தத்தினை உறிஞ்சிக்கொள்ளலாம்.

இவ்வாறு டெங்கு வைரஸின் தாக்கம் காரணமாக கிளிநொச்சி வைத்தியசாலைக்கு வரும் நோயாளர்களிடம் இருந்து டெங்கு வைரஸ் கலந்த இரத்தத்தினைக் கிளிநொச்சியில் காணப்படும் டெங்கு நுளம்புகள் உறிஞ்சுமாயின், அந்த நுளம்புகளினால் கடிக்கப்படும் அனைவரும் டெங்குநோயாளிகளாக நேரிடும். இதனால் கிளிநொச்சி மாவட்டத்தினுள்ளே டெங்கு காட்டுத் தீ போல அதிதீவிரமாக பரவத்தொடங்கும்.

இந்த அபாய நிலையைக் கருத்தில் கொண்டு இன்றும் நாளையும் நாளை மறுதினமும் கிளிநொச்சி மாவட்டத்தில் டெங்கு நுளம்புகள் இனங்காணப்பட்ட பொது இடங்களில் விசேட டெங்கு ஒழிப்பு நடவடிக்கைகள் மேற்கொள்ளப்படவுள்ளன. பொதுமக்கள் மற்றும் பொது அமைப்புகள் தத்தமது பகுதி பொதுச்சுகாதார பரிசோதகர்களுடன் தொடர்புகொண்டு இந்த உயிர்க்காப்புப் பணியில் ஈடுபட முன்வருமாறு வேண்டுகிறோம் என அச் செய்திக் குறிப்பில் குறிப்பிடப்பட்டுள்ளது.

அமெரிக்காவில் நடைபெறவுள்ள ஆளுநருக்கான தேர்தலில் இலங்கையை பூர்வீகமாக கொண்ட பெண்ணொருவர் போட்டியிடவுள்ளார்.

அமெரிக்காவின் முன்னாள் முதல் பெண் மிஷேல் ஒபாமாவின் கொள்கை இயக்குனராக செயற்பட்ட, கிரிஷாந்தி விக்னராஜா, மேரிலாந்து ஆளுநருக்கான போட்டியில் நுழைவதாக தெரிவிக்கப்படுகின்றது.

அமெரிக்க பெண்ணான கிரிஷாந்தி பிறந்த 9 மாதங்களாக இருந்த போது, இலங்கையின் உள்நாட்டுப் போரின் காரணமாக தப்பிச் சென்ற அவரது குடும்பத்தினர் மேரிலாந்தில் குடியேறினர்.

இந்நிலையில் பல உயர் பதவிகளை வகித்த கிரிஷாந்தி, மேரிலாந்தின் ஆளுநருக்காக தான் போட்டியிடுவது குறித்து அண்மையில் அறிவித்துள்ளார்.

2018ஆம் ஆண்டு ஜனநாயகக் கட்சி வேட்பாளருக்கு போட்டியிடும் முதல் பெண் கிரிஷாந்தி என்பது குறிப்பிடத்தக்க ஒரு விடயமாகும்.

கிரிஷாந்திக்கு அரசியல் புதிய விடயமல்ல. கடந்த ஒபாமா நிர்வாகத்தின் போது, அவர் முதல் பெண்மணி மிஷேல் ஒபாமாவின் கொள்கை இயக்குனராகவும், வெளியுறவுத்துறை செயலர் ஹிலாரி கிளிண்டன் மற்றும் மாநில செயலாளர் ஜோன் கெரி ஆகியோரின் மூத்த ஆலோசகராகவும் பணியாற்றியுள்ளார்.

யேல் கல்லூரியில் மூலக்கூறு உயிரியல் மற்றும் அரசியல் விஞ்ஞானம் ஆகியவற்றில் அவர் பட்டம் பெற்றுள்ளார்.

அரசியலுக்கு வருவதற்கு முன்னர் McKinsey & Company மற்றும் சட்ட நிறுவனமான Jenner & Block என்பவற்றில் அவர் நேரம் செலவிட்டுள்ளார்.

கிரிஷாந்தி மற்றும் அவரது கணவர் Collin O’Mara புதிதாக பிறந்த தங்கள் மகள் Alanaவை ஜுன் மாதம் வரவேற்றனர். மேலும் அவர் ஆளுநருக்கான போட்டியில் ஈடுபடுவதற்கான காரணங்களில் ஒன்றாக தனது மகளையும் சுட்டிக்காட்டியுள்ளார்.

நான் ஒரு குழந்தையாக இருந்த போது எங்கள் குடும்பம் இங்கு வந்தது. குறித்த சந்தர்ப்பத்தில் எனது அம்மா எனக்கு கொடுத்த சவால்கள், வாய்ப்புகள் எனது மகளுக்கு கிடைக்காதென்பது குறித்து வருத்தமாக உள்ளது. அதற்காகவே தான் ஆளுநர் போட்டியில் போட்டியிட விரும்புகின்றேன்.

மேரிலாந்து மக்கள் சிறந்த ஆணின் சேவையை ஒரு பெண்ணிடம் இருந்து பெற்று கொள்வதை ஏற்றுக் கொள்வார்கள் என நான் நம்புகின்றேன்” என கிரிஷாந்தி தெரிவித்துள்ளார்.

வடக்கு, கிழக்கில் வீடுகள் இல்லாதோருக்காக 50 ஆயிரம் கல் வீடுகள் அமைக்கப்படவுள்ளன. ஒப்பந்த நிறுவனங்கள் ஊடாகவே இந்த வீடுகள் கட்டப்படவுள்ளன. இந்தத் திட்டத்துக்கு அமைச்சரவை அங்கீகாரம் அளித்துள்ளது.

தேசிய ஒருங்கிணைப்பு மற்றும் நல்லிணக்க அமைச்சு தலைமையில் ஏனைய சில அமைச்சுக்கள் இணைந்து இதனை முன்னெடுக்கவுள்ளது.

பிரதமர் ரணில் விக்ரமசிங்கவினால் இது தொடர்பான திட்டம் அமைச்சரவையில் முன்வைக்கப்பட்டு அனுமதி பெறப்பட்டது.

இத்தகைய ஒரு திட்டத்துக்கு அனுமதி பெறப்பட்டிருக்கிறது என்பதையும் அது தொடர்பிலான பணிகள் விரைவில் ஆரம்பிக்கப்படும் என்பதையும் தேசிய நல்லிணக்க அமைச்சின் செயலாளர் வே.சிவஞானசோதி உறுதிப்படுத்தினார்.

வடக்கு, கிழக்கில் 60 ஆயிரம் பொருத்து வீடுகளைக் கட்டுவதற்கு முயற்சி எடுக்கப்பட்டது. அதற்கு மக்களிடம் இருந்தும் அரசியல் கட்சிகளிடம் இருந்தும் பெரும் எதிர்ப்புக் கிளம்பியது.

பொருத்து வீடுகள் வடக்கு, கிழக்குக் காலநிலைக்கு உகந்தவையல்ல என்று நிராகரிக்கப்பட்டன. அத்துடன் அதற்கான செலவில் குறைந்தது இரண்டு கல் வீடுகளை அமைக்கலாம் என்றும் சுட்டிக்காட்டப்பட்டது.

கடும் எதிர்பை அடுத்து இந்தத் திட்டம் கைவிடப்படும் நிலையை எட்டியது. எனினும், அதில் 6 ஆயிரம் வீடுகளையாவது அமைப்பதற்கு அமைச்சர் டி.எம்.சுவாமிநாதன் விடாப்பிடியாக முயன்ற வருகிறார்.

இந்த நிலையில், வடக்கு, கிழக்கில் 50 ஆயிரம் கல் வீடுகளை நிறுவுவதற்கான திட்டம் முன்வைக்கப்பட்டு அதற்கு அமைச்சரவை அனுமதி அளித்துள்ளது.

கல்வீடுகளை அமைக்கத் தகுதியுள்ள ஒப்பந்த நிறுவனங்கள், இந்த வீடுகளை நிர்மாணிப்பதற்குரிய நிதியையும் கொண்டு வர வேண்டும் என்று நிபந்தனை விதிக்கப்பட்டுள்ளது. அந்த நிதியை அரசு நீண்ட காலக் கடன் அடிப்படையில் செலுத்தும்.

இதற்கு அமைவாகக் கேள்விகோரலை விளம்பரப்படுத்துவதற்கு நடவடிக்கை எடுக்கப்பட்டுள்ளது. அடுத்த வாரம் அது வெளியிடப்படும் என்று தெரியவருகின்றது. கேள்விகோரல் குழுவும் நியமிக்கப்பட்டுள்ளது.

கல்வீட்டுத் திட்டம் ஜனாதிபதியின் கீழுள்ள தேசிய ஒன்றிணைப்பு மற்றும் நல்லிணக்க அமைச்சால் முன்னெடுக்கப்படும். இந்த அமைச்சுடன் இணைந்து வேறு சில அமைச்சுக்களும் பணியாற்றும் என்று தெரிவிக்கப்படுகின்றது.

சவுதிக்கு பணிப் பெண்ணாக சென்று உயிரிழந்த மற்றுமொரு பெண்ணின் சடலம் நாட்டிற்கு கொண்டுவரப்பட்டுள்ளது.

குருநாகல் மொரகொல்ல பகுதியைச் சேர்ந்த 48 வயதான ஆர்.டப்ளியூ .சோமலதா என்ற பெண்ணின் சடலமே கொண்டுவரப்பட்டுள்ளது.

வௌிநாட்டு வேலைவாய்பு முகவர் நிலையமொன்றினூடாக கடந்த மார்ச் மாதம் 22 ஆம் திகதி இந்த பெண் வௌிநாட்டிற்கு சென்றுள்ளார்.

தனது தாயின் மரணத்தில் சந்தேகம் உள்ளதாக உயிரிழந்த பெண்ணின் மகன் குறிப்பிட்டுள்ளார்.

இந்த விடயம் தொடர்பில் வௌிநாட்டு வேலைவாய்ப்புப் பணியகத்திடம் வினவியபோது, குறித்த பெண் சுகவீனமடைந்ததன் பின்னர் வீட்டுரிமையாளர் வைத்தியசாலையில் அனுமதித்ததாக இலங்கைக்கான சவுதி தூதரகம் அறிவித்துள்ளதாக வௌிநாட்டு வேலைவாய்ப்புப் பணியகத்தின் ஊடகப் பேச்சாளர் உபுல் தேஷப்பரிய குறிப்பிட்டுள்ளார்.

வைத்தியசாலையில் அனுமதிக்கப்பட்டதன் பின்னரே அவர் உயிரிழந்துள்ளதாகவும், அவருக்கான நட்ட ஈட்டை வழங்க நடவடிக்கை எடுக்கப்பட்டுள்ளதாகவும் அவர் தெரிவித்தள்ளார்.